“Eski ou kapav viv san Bondie? Plizir milyon dimounn kapav.” Se mesaz ki enn group ate ti fer met lor enn gran pano piblisite. Pou zot, li kler ki zot pa bizin Bondie dan zot lavi.

Dan enn lot kote, boukou dimounn ki dir zot krwar dan Bondie pran bann desizion ki montre koumadir Bondie pa existe. Salvatore Fisichella, enn larsevek Katolik, ti dir lor bann manb so legliz: “Kan bann dimounn get nou azordi, kitfwa personn pa pou rekonet ki nou bann Kretien, parski nou fason viv parey kouma bann dimounn ki pa krwar dan Bondie.”

Sertin dimounn telman okipe ki zot pa gagn letan pans Bondie. Zot trouv Li tro lwin pou ki Li ena enn rol inportan dan zot lavi. Sa bann dimounn-la rod Bondie zis kan zot dan problem ouswa kan zot bizin kitsoz​—Li koumadir enn serviter ki la pou servi zot kan zot bizin Li.

Lezot pa pratik seki zot relizion ansegne, parski kitfwa zot panse ki sa bann lansegnman-la pa pou fer zot gagn bann bienfe. Par exanp, 76 poursan bann Katolik ki res l’Allemagne krwar ki enn misie ek enn madam kapav viv ansam avan maryaz​—enn fason panse ki kontrer ar seki zot legliz ek Labib ansegne. (1 Corinthiens 6:18; Hébreux 13:4) Biensir, se pa zis bann Katolik ki trouve ki zot fason viv li pa an-akor avek seki zot relizion ansegne. Bann pret diferan relizion plengne ki bann manb zot legliz konport zot kouma “bann ate.”

Li normal ki sa bann lexanp-la fer nou poz sa kestion-la: Eski vremem nou bizin Bondie? Se pa enn kestion ki nouvo. Ofet, premie fwa ki ti koz lor la se dan bann premie paz Labib. Pou gagn repons sa kestion-la, anou examinn plizir lezot kestion ki finn souleve dan liv Genèse, dan Labib.