Dan lettre ki l’apotre Paul ti ecrire bann Hébreu, li ti koz lor “l’imposition la main.” Eski li ti pé koz lor nomination bann ancien ou-soit lor enn lot kitsoz?—Héb. 6:2.

Pena okenn raison pou nou donne enn reponse categorik. Ici, Paul ti pé surement koz lor l’imposition la main pou transmette bann don l’esprit saint.

Li vrai ki la Bible koz lor l’imposition la main en rapport avek bann ki ti nommé dan bann fonction theocratik. Moïse ti “pose so la main lor” Josué kan li ti nomme li pou remplace li. (Deut. 34:9) Dan congregation chretien, ti pose la main lor certain zom qualifié pou nomme zot. (Actes 6:6; 1 Tim. 4:14) Paul ti decourage pou pose la main trop vite lor enn dimoune.—1 Tim. 5:22.

Mais, Paul ti encourage bann chretien hébreu pou “avance vers la maturité” aster ki zot ti’nn laisse “doctrine de base.” Apré, li ti mentionne “repentance pou bann action inutile ek la foi dan Bondié, l’enseignement lor bann bapteme ek l’imposition la main.” (Héb. 6:1, 2) Eski nomination bann ancien li zis enn kitsoz de base ek c’est a partir la ki bann chretien avance vers la maturité? Non. C’est bann frere ki’nn deja gagne maturité ki bizin ena l’objectif pou vinn ancien dan congregation. Ek kan zot vinn ancien, zot bizin apprecié sa privilege-la.—1 Tim. 3:1.

Mais l’imposition la main ti ena enn lot role. Dan premier siecle, Jéhovah ti rejette nation Israël en tant ki so peuple ek Li ti choisir Israël spirituel, setadir congregation bann chretien oint. (Mat. 21:43; Actes 15:14; Gal. 6:16) Pou montré sa changement-la, Jéhovah ti donne bann chretien bann don l’esprit saint, couma par exemple don pou koz en langue. (1 Cor. 12:4-11) Kan Corneille ek bann dimoune dan so lakaz ti vinn chretien, sa bann nouveau disciple-la ti gagne l’esprit saint. Nou konn sa parski zot ti “koz en langue.”—Actes 10:44-46.

Parfois bann chretien ti gagne sa bann don-la par l’imposition la main. Kan Philippe ti preche bon nouvelle dan Samarie, beaucoup dimoune ti prend bapteme. College central ti envoye l’apotre Pierre ek l’apotre Jean la-bas. Kifer? Nou lire: “Lerla [sa deux zapotre-la] ti pose la main lor bannla, ek [bann chretien ki ti’nn fek baptisé] ti commence gagne l’esprit saint.” Sa vedir ki zot ti surement gagne bann don l’esprit, bann don ki lezot ti kapav trouvé. Nou konn sa par seki ti arrive Simon ki avant ti habitué pratik magik. Kan li ti trouve l’esprit saint agir, li ti rod acheté capacité pou pose la main lor lezot ek faire zot gagne l’esprit saint ki ti pou faire zot faire mirak. (Actes 8:5-20) Plitar, 12 dimoune ti prend bapteme dan Éphèse. Nou lire: “Kan Paul ti pose la main lor zot, l’esprit saint ti vinn lor zot, ek zot ti commence koz en langue ek prophetisé.”—Actes 19:1-7; compare avek 2 Timothée 1:6.

Alors, dan Hébreux 6:2, apparemment Paul ti pé koz lor l’imposition la main pou transmette bann don l’esprit saint ar bann ki ti fek vinn chretien.