1. Ki kitsoz ena enn plas inportan dan nou ladorasion?

 ESKI ou’nn deza trouv nom Jéhovah grave lor enn batiman piblik ouswa lor enn lobze dan enn mize? Pena dout ki sa ti kapte ou latansion ek ou ti bien kontan. Apre tou, nom Bondie ena enn plas inportan dan nou ladorasion​—nou bann Temwin Jéhovah! Dan lemond antie, pena enn lot pep azordi ki servi nom Bondie parey kouma nou. Me nou kone ki port nom Bondie se enn privilez ek osi enn gran responsabilite.

2. Ki responsabilite nou ena kan nou port nom Bondie?

² Zis servi nom Bondie pa pou fer nou gagn faver Jéhovah. Nou bizin viv an-akor avek so bann prinsip moral. Akoz sa, Labib rapel nou ki pep Jéhovah bizin “detourn [li] ar seki move.” (Ps. 34:14) Lapot Paul ti montre sa prinsip-la dan enn fason kler kan li ti ekrir: “Fode ki tou dimounn ki invok nom Jéhovah zot rezet linzistis.” (Lir 2 Timothée 2:19.) Bann dimounn konn bann Temwin Jéhovah kouma enn pep ki invok nom Jéhovah. Alor, kouma nou montre ki nou rezet linzistis?

3, 4. Ki verse depi lontan finn interes bann spesialis Labib, ek kifer?

³ Dan 2 Timothée 2:19, Paul koz lor “fondasion solid ki Bondie inn poze,” ek apre li mansionn de mesaz ki’nn grave lor la. Dan premie mesaz-la, kan Paul ti dir: “Jéhovah konn bann dimounn ki pou Li,” li kler ki li ti pe sit Nombres 16:5. (Get lartik avan.) Deziem mesaz-la ki dir: “Fode ki tou dimounn ki invok nom Jéhovah zot rezet linzistis,” depi lontan finn interes bann spesialis Labib ek zot anvi konn plis lor la. Kifer?

⁴ Bann mo ki Paul ti servi fer nou konpran ki li ti pe sit enn lot parti dan bann Lekritir Ebre. Me, li paret ki pena okenn verse dan bann Lekritir Ebre ki koresponn ar seki Paul ti site. Alor, ar ki levennman Paul ti pe fer referans kan li ti dir: “Fode ki tou bann ki invok nom Jéhovah zot rezet linzistis”? Zis avan sa, Paul ti sit seki nou trouve dan Nombres sapit 16, ki koz lor rebelion Qorah. Eski li posib ki sa deziem mesaz-la osi ena enn rapor avek sa rebelion-la?

5-7. Ar ki levennman dan lepok Moïse, Paul ti pe fer referans dan 2 Timothée 2:19? (Get zimaz dan koumansman lartik.)

⁵ Labib dir ki Dathân ek Abiram, bann garson Éliab, ansam avek Qorah ti pran latet pou rebel kont Moïse ek Aaron. (Nomb. 16:1-5) Okler zot ti montre ki zot pa ti ena respe pou Moïse ek ki zot ti rezet lotorite ki Bondie ti donn li. Sa bann rebel-la ti kontign res parmi pep Jéhovah ek ti met an danze spiritialite bann ki ti fidel. Kan zour ti arive pou ki Jéhovah montre diferans ant so bann adorater fidel ek bann rebel, Li ti donn enn lord bien kler.

⁶ Labib dir: “Apre sa, Jéhovah ti dir Moïse: ‘Koz ar lasanble ek dir zot: “Sorti kot latant Qorah, Dathân, ek Abiram!”’ Apre, Moïse ti leve ek ti al get Dathân ek Abiram, ek bann ansien Israël ti al ansam avek li. Li ti dir lasanble: ‘Silvouple al lwin ar latant sa bann move zom-la ek pa tous nanye seki pou bannla, pou ki zot pa detrir ansam avek bannla dan zot pese.’ Deswit zot ti sorti dan kat kote latant Qorah, Dathân ek Abiram ek zot ti al lwin.” (Nomb. 16:23-27) Apre sa, Jéhovah ti touy tou bann ki ti’nn rebel kont Li. Parkont, tou bann adorater fidel​—ki ti rezet linzistis ek ti al lwin ar sa bann rebel-la​—ti gagn lavi sov.

⁷ Jéhovah lir dan leker! Li trouve kisannla ki fidel anver Li. Kanmem sa, so bann fidel adorater ti bizin azir deswit, ek separ zot ar bann ki ti inzis. Alor, li posib ki Paul ti pe fer referans ar Nombres 16:5, 23-27 kan li ti ekrir: “Fode ki tou dimounn ki invok nom Jéhovah zot rezet linzistis.” Sa konklizion-la li an-akor avek sa bann parol Paul la: “Jéhovah konn bann dimounn ki pou Li.”​—2 Tim. 2:19.

8. Kifer li pa ase ki nou zis servi nom Jéhovah ek form parti dan kongregasion Kretien?

⁸ Kan Paul ti pe fer referans ar bann levennman dan lepok Moïse, li ti pe rapel Timothée linportans pou protez so bann bon relasion avek Jéhovah. Li pa ti ase ki bann Kretien zis form parti dan kongregasion, parey kouma dan lepok Moïse li pa ti ase ki bann Izraelit zis servi nom Jéhovah. Bann fidel adorater bizin azir dan enn fason ferm pou rezet linzistis. Kouma Timothée ti pou fer sa? Ek azordi, ki bann leson pep  Jéhovah kapav aprann ar konsey inspire ki Paul ti ekrir?

9. Kouma eski bann “diskision bet ek initil” ti afekte bann kongregasion dan premie siek?

⁹ Parol Bondie donn bann konsey presi konsernan bann linzistis ki bann Kretien bizin rezete. Par exanp, kan nou get kontex 2 Timothée 2:19, nou trouve ki Paul ti dir Timothée ki bann Kretien bizin “pa lager lor bann mo” ek “evit bann diskour ki pena sans.” (Lir 2 Timothée 2:14, 16, 23.) Sertin dan kongregasion ti pe favoriz bann fos lansegnman. Li paret osi ki lezot ti pe introdir bann lide ki ti pe provok bann deba. Mem si sa bann lide-la pa ti al kont bann lansegnman ki sorti dan bann Lekritir, zot ti pe kree divizion. Sa ti pe fer bann Kretien lager ek diskite lor bann mo, ek sa ti kree enn move latmosfer lor plan spiritiel. Akoz sa, Paul ti met laksan lor linportans pou “rezet bann diskision bet ek initil.”

10. Kouma nou bizin azir kan nou gagn kontak avek lapostazi?

¹⁰ Azordi, li rar ki ena bann aposta dan kongregasion. Selman, si nou gagn kontak avek bann lansegnman ki pa Biblik, par ninport ki mwayin, nou bizin determine pou rezet zot. Nou pa pou azir avek sazes si nou rant dan bann deba avek bann aposta, ki li an personn, lor zot bann sit Internet, ouswa par lezot mwayin kominikasion. Mem si nou ena lintansion pou ed zot, nou konversasion pou al kont prinsip Labib ki nou’nn fek examine. Okontrer, antan ki pep Jéhovah nou bizin evit ek rezet net lapostazi.

11. Ki kapav provok “bann diskision bet,” ek kouma bann ansien kapav donn enn bon lexanp?

¹¹ Apart bann fos lansegnman, ena lezot kitsoz ki kapav menas lape dan kongregasion. Par exanp, bann diferan lopinion lor divertisman kapav kree “bann diskision bet ek initil.” Biensir, si sertin ankouraz enn divertisman ki al kont bann prinsip Jéhovah, bann ansien pa pou toler sa zis pou evit bann diskision. (Ps. 11:5; Éph. 5:3-5) Me, bann ansien bizin fer atansion pou pa favoriz zot prop lopinion. Avek fidelite zot swiv konsey ki Labib donn bann sirveyan Kretien: “Pran bien swin troupo Bondie ki’nn konfie zot, . . . pa kouma bann ki dominn lor leritaz Bondie, me vinn bann lexanp pou troupo.”​—1 Pierre 5:2, 3; lir 2 Corinthiens 1:24.

12, 13. (a) Kouma bann Temwin Jéhovah swazir zot bann divertisman, ek ki bann prinsip Labib ki gid zot? (b) Kouma nou kapav aplik bann prinsip ki ena dan paragraf 12 dan diferan domenn nou lavi?

¹² Konsernan bann divertisman, nou lorganizasion pa inpoz lor nou ek dir nou exakteman ki fim, video game, liv, ouswa sante nou bizin evite. Kifer? Labib ankouraz sak dimounn pou devlop so “kapasite pou diserne . . . pou fer diferans ant seki bon ek seki move.” (Héb. 5:14) Dan bann Lekritir ena bann prinsip debaz ki bann Kretien kapav examine kan zot pe swazir zot divertisman. Dan tou domenn nou lavi, nou bizin ena lobzektif pou “kontign verifie seki fer Lesegner plezir.” (Éph. 5:10) Labib ansegne ki bann sef fami ena enn sertenn lotorite, alor zot kapav swazir pou pa aksepte sertin divertisman dan zot lakaz. a​—1 Cor. 11:3; Éph. 6:1-4.

 ¹³ Bann prinsip Labib ki’nn mansione avan, pa aplik zis ar swa nou bann divertisman. Bann diferan lopinion ki nou ena lor labiyman ek kwafir, lasante ek manze, ek lezot kitsoz personel kapav osi deklans bann diskision. Alor, si enn Kretien pa pe al kont okenn prinsip Labib, nou pou azir avek sazes kan nou evit bann diskision lor sa bann size-la, “parski enn esklav nou Segner bizin pa lager, me li bizin ena douser [tak, not] anver tou dimounn.”​—2 Tim. 2:24.

14. Ki lexanp Paul ti servi pou montre linportans pou evit bann move frekantasion?

¹⁴ Dan ki lezot fason bann ki “invok nom Jéhovah zot rezet linzistis”? Se kan zot evit ena bann relasion bien pros avek bann dimounn ki pratik linzistis. Li bon nou remarke ki apre ki Paul ti servi lexanp enn “fondasion solid ki Bondie inn poze,” li ti servi enn lot lexanp. Li ti ekrir konsernan “enn gran lakaz” kot ena “bann resipian an-or ek an-arzan, me ena osi bann resipian an dibwa ek an later. Servi sertin resipian pou bann kitsoz ki ena valer, me lezot pou bann kitsoz ki pena valer.” (2 Tim. 2:20, 21) Apre, li ti konsey bann Kretien pou ‘res lwin,’ ouswa pou separ zot ar bann resipian ki servi pou bann kitsoz “ki pena valer.”

15, 16. Ki nou kapav aprann ar lexanp “enn gran lakaz”?

¹⁵ Ki li ti pe rod fer nou konpran par sa lexanp-la? Paul ti konpar kongregasion Kretien ar “enn gran lakaz” ek sak manb kongregasion ar “bann resipian,” ouswa bann kitsoz ki servi dan enn lakaz. Dan enn lakaz, sertin resipian kapav inn kontamine avek bann prodwi danzere ouswa zot sal. Proprieter sa lakaz-la pou gard sa bann resipian-la separe ar bann resipian ki prop, kouma par exanp bann resipian ki servi pou kwi.

 ¹⁶ Li parey azordi, pep Jéhovah ki pe fer zefor pou res pir, bizin evit fer kamarad pros ar bann dimounn ki kontign pa pran kont bann prinsip Jéhovah. (Lir 1 Corinthiens 15:33.) Si nou bizin evit bann dimounn koumsa dan kongregasion, alor komie plis nou bizin “res lwin” ar bann dimounn ki andeor kongregasion, kot boukou parmi zot ‘kontan kas, dezobeir zot paran, pa fidel, met bann fos akizasion lor lezot, pena okenn pitie, pa kontan seki bon, bann tret, ek kontan plezir plito ki Bondie’!​—2 Tim. 3:1-5.

17. Ziska ki pwin bann Izraelit fidel ti montre ki zot ti kont linzistis?

¹⁷ Labib presize kouma bann Izraelit ti azir deswit kan zot ti gagn lord pou “sorti kot latant Qorah, Dathân, ek Abiram.” Labib dir ki “deswit . . . zot ti al lwin.” (Nomb. 16:24, 27) Zot pa ti ni ezite ni perdi letan. Bann Lekritir fer nou konpran osi ziska ki pwin zot ti obeir. Zot “ti sorti dan kat kote . . . zot ti al lwin.” Bann ki ti fidel pa ti pou pran okenn risk. Zot ti obeir avek tou zot leker. Zot ti pran pozision pou Jéhovah ek zot ti kont linzistis. Ki leson nou kapav aprann ar sa lexanp-la?

18. Ki Paul ti pe rod dir kan li ti konsey Timothée pou “sove, al lwin ar bann dezir lazenes”?

¹⁸ Pou protez nou lamitie avek Jéhovah, nou bizin bien determine pou azir vit. Se seki Paul ti pe rod fer Timothée konpran kan li ti dir li “sove, al lwin ar bann dezir lazenes.” (2 Tim. 2:22) Kan li ti dir sa, Timothée ti deza enn adilt, kitfwa li ti ena anviron 30 an. Alor, se pa zis bann zenn ki ena bann “dezir lazenes.” Pou “rezet linzistis,” Timothée ti bizin “sove, al lwin” ar sa bann dezir-la. Jésus ti donn enn konsey inpe parey kan li ti dir: “Si to lizie pe fer twa al tonbe, tir li ek zet li lwin ar twa.” (Mat. 18:9) Azordi, bann Kretien ki pran kont sa konsey-la, bien determine pou azir vit kont bann danze ki menas zot spiritialite.

19. Azordi, kouma sertin inn fer tou seki zot kapav pou protez zot kont bann danze spiritiel?

¹⁹ Sertin ki finn ena problem avek lalkol avan ki zot vinn Temwin, inn pran desizion pou aret bwar bann labwason alkolik net. Lezot ena bann move dezir kont ki zot pe bizin lite, alor zot evit sertin divertisman ki kitfwa pa move, me ki kapav ogmant sa bann move dezir-la. (Ps. 101:3) Par exanp, avan ki li vinn Temwin, enn frer ti kontan lanbians malsin ki ti ena dan bann sware dansan. Me apre ki li’nn konn laverite, li ti aret danse mem dan bann fet ant Temwin, parski li ti per ki so bann move dezir ek so bann move panse revini. Biensir, bann Kretien pa oblize aret bwar, danse, ouswa aret fer lezot kitsoz ki pa move. Selman, nou tou nou bizin azir deswit ek fer tou seki nou kapav pou protez noumem kont bann danze spiritiel.

20. Mem si kitfwa li pa fasil pou “rezet linzistis,” ki kitsoz rekonfort nou?

²⁰ Port nom Bondie se enn privilez ek osi enn gran responsabilite. Nou bizin “rezet linzistis” ek “detourn [nou] ar seki move.” (Ps. 34:14) Li vre ki li pa touletan fasil pou fer sa. Me sa rekonfort nou pou kone ki Jéhovah pou touletan kontan “bann dimounn ki pou Li” ek ki swiv so bann semin ki drwat.​—2 Tim. 2:19; lir 2 Chroniques 16:9a. b