“Eski Bondié pa pou faire enn maniere ki rann la justice bann ki Li finn choisir ek ki pé criyé la-nuit li-jour pou gagne so l’aide?”—Luc 18:7.

1. Kisannla ki enn grand l’encouragement pou ou, ek kifer?

 Dan le monde entier, bann Témoins de Jéhovah apprecié compagnie lezot chrétien fidel ki finn servi Jéhovah pendant longtemps. Eski ou konn certain parmi zot personnellement? Kitfois ou pé mazinn enn soeur agé ki finn baptisé bien longtemps ek ki bien rare rate enn reunion dan la Salle du Royaume. Ou-soit, ou pé pense enn frere agé ki toulé-semaine bien soutenir predication ki la congregation organisé ek ki finn faire sa pendant plusieurs dizaine l’année. Oui, beaucoup parmi sa bann chrétien fidel-la ti pensé ki dan nou lepok, Har–Maguédôn ti pou’nn fini vini depuis longtemps. Pourtant, mem si sa lé-monde mauvais-la encore existé, sa pa finn affaibli ni zot confiance dan bann promesse ki Jéhovah finn faire, ni zot determination pou “enduré ziska la fin.” (Matthieu 24:13) Sa bann fidel serviteur Jéhovah-la manifesté enn la-foi bien fort ek sa li enn grand l’encouragement pou tou bann membre congregation.—Psaume 147:11.

2. Ki situation faire nou chagrin?

² Mais pourtant, parfois nou remark enn l’attitude bien different. Certain Témoin inn participe dan predication pendant plusieurs l’année, mais avek le temps, zot la-foi en Jéhovah inn vinn faible ek zot inn arrete frequente congregation. Sa faire nou chagrin ki certain frere ek soeur inn arrete servi Jéhovah, ek nou ena enn desir sincere pou contigne aide bann “mouton ki finn perdi” pou ki zot retourne dan troupeau Bondié. (Psaume 119:176; Romains 15:1) Mais kan nou reflechi lor sa deux situation-la, setadir ki certain reste fidel alors ki lezot perdi zot la-foi, sa faire nou pose bann question. Kifer beaucoup Témoins de Jéhovah garde zot la-foi dan bann promesse Jéhovah alors ki lezot perdi li? Ki nou kapav faire personnellement pou nou garde l’assurance ki “grand jour Jéhovah” pé kosté? (Tsephania 1:14) Anou examine enn l’exemple ki trouve dan l’Evangile Luc.

Enn l’avertissement pou bann ki vive dan lepok “kan Fils de l’homme vini”

3. Kisannla surtout kapav tire profit ar l’exemple enn veuve ek enn juge, ek kifer?

³ Dan Luc chapitre 18, nou trouve enn l’exemple ki Jésus ti donné lor enn veuve ek enn juge. Li pareil couma l’exemple ki nou ti examiné dan lartik avant, lor enn missié ki ti bizin recevoir enn visiteur ek ki ti persisté demann so camarade di-pain. (Luc 11:5-13) Mais kan nou lire contexte sa l’exemple lor enn veuve ek enn juge-la, nou trouvé ki sa applik surtout ar bann ki pé vive dan lepok “kan Fils de l’homme vini” en tant ki le roi dan so royaume. Sa lepok-la inn commencé en 1914.—Luc 18:8. a

4. Ki Jésus ti dire avant li donne l’exemple ki trouve dan Luc chapitre 18?

⁴ Avant ki Jésus ti donne sa l’exemple-la, li ti dire ki tou dimoune pou trouve signe ki li pou present dan so Royaume, pareil couma zot trouve “zeclair” ki “brillé depuis enn boute  ziska lot boute dan le ciel.” (Luc 17:24; 21:10, 29-33) Pourtant, la plupart dimoune ki vive dan “lepok la fin” pa pou prend compte sa signe bien clair-la. (Daniel 12:4) Kifer? Pou mem raison ki bann dimoune dan lepok Noé ek dan lepok Lot pa ti prend compte bann l’avertissement Jéhovah. Dan sa bann lepok-la, bann dimoune ‘ti pé mangé, boire, acheté, vendé, planté ek construire ziska jour ki destruction ti vinn lor zot.’ (Luc 17:26-29) Zot ti perdi zot la-vie parski zot ti tellement occupé ar zot bann l’activité toulé-jour ki zot pa ti prend compte volonté Bondié. (Matthieu 24:39) Zordi, bann dimoune en general zot aussi zot tellement occupé par bann l’activité toulé-jour ki zot pa trouvé ki la fin sa mauvais lé-monde-la bien pré.—Luc 17:30.

5. (a) Ar kisannla Jésus ti donne enn l’avertissement, ek kifer? (b) Kifer certain finn perdi zot la-foi?

⁵ Oui, Jésus ti tracassé pangar so bann disciple aussi laisse-zot tellement distraire par le monde Satan, ki zot “retourne vers bann kitsoz ki derriere [zot].” (Luc 17:22, 31) Ek c’est sa-mem ki finn arrive certain chrétien. Pendant plusieurs l’année, certain finn attann avek impatience kan Jéhovah pou detruire sa mauvais lé-monde-la. Mais, kan Har–Maguédôn pa finn vinn dan l’heure ki zot ti pé pensé, zot finn decouragé. Zot confiance ki jour Jéhovah bien pré, finn affaibli. Zot inn commence ralenti dan service Jéhovah ek tigit par tigit, zot inn laisse-zot tellement occupé par bann l’activité toulé-jour ki zot nepli ena le temps pou bann kitsoz spirituel. (Luc 8:11, 13, 14) C’est coumsa ki avek le temps, zot inn “retourne vers bann kitsoz ki derriere [zot]”—enn situation bien triste, pa vrai?

Li important pou “prié touletan”

6-8. (a) Raconte l’exemple lor enn veuve ek enn juge. (b) Couma Jésus ti applik sa l’exemple-la?

⁶ Ki nou kapav faire pou ki nou confiance dan realisation bann promesse Jéhovah pa vinn faible? (Hébreux 3:14) Jésus ti reponn sa question-la zis apré ki li ti averti so bann disciple pou pa retourne dan le monde mauvais ki Satan pé dirigé.

⁷ Luc raconté ki Jésus ti “donne zot enn l’exemple lor l’importance pou zot prié touletan ek pou pa abandonné.” Jésus ti dire zot: “Dan enn certain la-ville, ti ena enn juge ki pa ti ena la crainte pou Bondié ek ki pa ti respecté personne. Mais ti ena enn veuve dan sa la-ville-la ek li ti pé contigne al kot [sa juge-la], ek li ti dire li: ‘Faire maniere ki mo gagne la justice kont mo l’adversaire.’ Eh bien, pendant enn certain temps, li ti refusé, mais apré sa, li ti dire ar li-mem: ‘Mem si mo pena la crainte pou Bondié ek mo pa respecté personne, parski sa veuve-la pé contigne vinn fatigue moi, mo pou faire enn maniere ki li gagne la justice, pou ki li pa contigne vinn donne moi bann coup ziska li fini moi.’ ”

⁸ Apré ki Jésus ti donne sa l’exemple-la, li ti faire sa l’application-la: “Ecouté ki sa juge-la  inn dire, mem si li injuste! Alors, eski Bondié pa pou faire enn maniere ki rann la justice bann ki Li finn choisir ek ki pé criyé la-nuit li-jour pou gagne so l’aide, mem si Li ena patience envers zot? Mo dire zot, Li pou faire ki zot gagne la justice bien vite. Mais seulement, kan Fils de l’homme vini, eski vrai-mem li pou trouve la foi lor la terre?”—Luc 18:1-8.

“Faire maniere ki mo gagne la justice”

9. Ki theme ressorti dan enn fason bien clair dan l’exemple lor enn veuve ek enn juge?

⁹ Theme sa l’exemple-la li bien clair. Toulé-deux dimoune dan sa l’exemple-la, ek Jésus aussi mentionne sa. Sa veuve-la ti suppliyé: “Faire maniere ki mo gagne la justice.” Juge-la ti dire: “Mo pou faire enn maniere ki li gagne la justice.” Jésus ti demandé: “Eski Bondié pa pou faire enn maniere ki rann la justice?” Ek lor Jéhovah, Jésus ti dire: “Li pou faire ki zot gagne la justice bien vite.” (Luc 18:3, 5, 7, 8) Kan surtout Bondié pou “faire enn maniere ki rann la justice”?

10. (a) Dan premier siecle, kan eski ti faire la justice? (b) Kan ek couma pou ena la justice pou bann serviteur Bondié dan nou lepok?

¹⁰ Dan premier siecle, “jour kot [ti] bizin faire la justice” (ou-soit “jour vengeance,” Louis Segond) ti arrivé en l’an 70 n.l., kan Jérusalem ek so temple ti detruire. (Luc 21:22) Dan nou lepok, peuple Bondié pou gagne la justice pendant “grand jour Jéhovah.” (Tsephania 1: 14; Matthieu 24:21) Lerla, Jéhovah pou “rann tribulation bann ki pé faire [so peuple] passe par tribulation” kan “[Jésus Christ] pou tire vengeance lor bann ki pa konn Bondié ek lor bann ki pa obeir la bonne nouvelle concernant nou Seigneur Jésus.”—2 Thessaloniciens 1:6-8; Romains 12:19.

11. Dan ki fason eski Jéhovah pou rann la justice “bien vite”?

¹¹ Mais couma nou bizin comprend l’assurance ki Jésus ti donné ki Jéhovah pou faire enn maniere ki rann la justice “bien vite”? Parole Bondié montré ki “mem si [Jéhovah] ena patience,” Li pou rann la justice bien vite kan le temps pou arrivé. (Luc 18:7, 8; 2 Pierre 3:9, 10) Dan lepok Noé, kan deluge ti vini, bann mauvais dimoune ti detruire dé-suite. Li ti pareil aussi dan lepok Lot; kan enn la-pluie difé ki ti sorti dan le ciel ti tombé, bann mauvais dimoune ti mort. Jésus ti dire: “Li pou pareil aussi jour kot bizin montré ki Fils de l’homme été.” (Luc 17:27-30) Encore enn fois, ‘enn sel coup enn destruction pou vinn lor bann mauvais dimoune sans ki zot attann.’ (1 Thessaloniciens 5:2, 3) Nou kapav sur ki Jéhovah pa pou laisse le monde Satan existé enn sel jour en plus ki seki la justice demandé.

“Li pou faire enn maniere ki rann la justice”

12, 13. (a) Couma l’exemple lor enn veuve ek enn juge enseigne nou enn leson? (b) Kifer nou kapav sur ki Jéhovah pou ecoute nou la-priere ek pou faire nou gagne la justice?

¹² L’exemple Jésus lor sa veuve-la ek sa juge-la montré lezot l’enseignement ki bien important. Kan Jésus ti faire l’application sa l’exemple-la, li ti dire: “Ecouté ki sa juge-la inn dire, mem si li injuste! Alors, eski Bondié pa pou faire enn maniere ki rann la justice bann ki Li finn choisir?” Bien-sur, Jésus pa ti pé compare Jéhovah avek sa juge-la, coumadir Bondié pou traite so bann serviteur dan mem fason. Au contraire, li ti enseigne so bann disciple enn leson lor Jéhovah ek li ti montré ki ena bann difference entre sa juge-la ek Bondié. Ki sa bann difference-la sa?

¹³ Premierement, sa juge dan l’exemple Jésus-la ti “injuste,” alors ki “Bondié Li enn Juge ki juste.” (Psaume 7:11; 33:5) Apré, sa juge injuste-la pa ti interessé personnellement ar sa veuve-la, mais Jéhovah Li, Li interessé ar sakenn parmi nou. (2 Chroniques 6:29, 30) Finalement, sa juge-la pa ti disposé pou aide sa veuve-la, mais Jéhovah Li, Li disposé—oui, Li envie—aide so bann serviteur. (Isaïe 30:18, 19) Ki leson nou kapav tiré ici? Si sa juge injuste-la ti ecoute sa veuve-la ek ti faire li  gagne la justice, eski Jéhovah Li, Li pa pou ecoute encore plus la priere so bann serviteur ek pou faire zot gagne la justice?—Proverbes 15:29.

14. Kifer nou bizin pa perdi la foi ki jour jugement Jéhovah pou vini?

¹⁴ Alors, bann ki perdi la foi ki jour jugement Bondié pou vini, faire enn grave erreur. Kifer? Kan zot arrete ena enn la-foi solid ki “grand jour Jéhovah” pré, en realité zot pé montré ki zot ena doute ki Jéhovah kapav tini so bann promesse ek montré ki Li fidel. Mais personne pa kapav doute fidelité Jéhovah ek ena raison. (Job 9:12) Enn question important ki nou bizin pose nou-mem c’est: ‘Eski moi, personnellement, mo pou reste fidel?’ C’est exactement sa sujet-la ki Jésus ti kozé vers la fin so l’exemple lor enn veuve ek enn juge.

“Eski vrai-mem li pou trouve sa la-foi-la lor la terre?”

15. (a) Ki question Jésus ti posé, ek kifer? (b) Ki nou bizin demann nou-mem?

¹⁵ Jésus ti pose sa question-la: “Kan Fils de l’homme vini, eski vrai-mem li pou trouve sa la-foi-la lor la terre?” (Luc 18:8, note) L’expression “sa la-foi-la” montré ki Jésus pa ti pé koz lor la foi en general, mais lor enn certaine qualité la-foi—enn la-foi pareil couma sa veuve-la ti ena. Jésus pa ti reponn question ki li ti posé. Li ti pose sa question-la pou ki so bann disciple reflechi lor qualité zot prop la-foi. Eski zot la-foi ti pé vinn faible tigit par tigit ek a cause sa, zot ti riské retourne vers bann kitsoz ki zot ti’nn laissé derriere zot? Ou-soit eski zot ti ena mem qualité la-foi ki sa veuve-la? Zordi, nou aussi nou bizin demann nou-mem: ‘Ki qualité la-foi eski “Fils de l’homme” li trouvé dan mo leker?’

16. Ki qualité la foi eski sa veuve-la ti ena?

¹⁶ Pou ki nou parmi bann dimoune ki Jéhovah pou faire gagne la justice, fodé ki nou suive l’exemple sa veuve-la. Ki qualité la foi eski li ti ena? Li ti montré so la-foi kan li ti contigne “al kot [sa juge-la], ek li ti dire li: ‘Faire maniere ki mo gagne la justice.’ ” Sa veuve-la ti persisté pou ki li gagne la justice ar enn dimoune injuste. Bann serviteur Bondié aussi zordi kapav ena confiance ki zot pou gagne la justice ar Jéhovah—mem si sa pou prend plus lé-temps ki zot ti pensé. En plus, zot montré ki zot ena confiance dan bann promesse Bondié kan zot persisté pou prié, kan zot ‘criyé la-nuit li-jour pou gagne l’aide Jéhovah.’ (Luc 18:7) Oui, si enn chrétien arrete prié pou ki Jéhovah rann la justice, li pou montré ki li finn perdi confiance ki Jéhovah pou agir dan faveur so bann serviteur.

17. Ki raison nou ena pou perseveré dan la priere ek pou garde la foi ki jour jugement Jéhovah vrai-mem pou vini?

¹⁷ Nou ena plus raison pou nou contigne prié kan nou reflechi lor situation difficile sa veuve-la. Anou examine certain difference entre so situation ek nou situation. Veuve-la ti contigne al guette sa juge-la mem si personne pa finn encourage li pou faire sa. Mais nou, Parole Bondié encourage nou pou “perseveré dan la priere.” (Romains 12:12) Sa veuve-la pa ti ena okenn garanti ki juge-la pou ecoute seki li ti demandé, mais Jéhovah donne nou l’assurance ki Li pou faire la justice. Jéhovah ti dire par so prophete: “Mem si li tardé, contigne attann li; parski pena doute ki li pou realisé. Li pa pou en retard.” (Habaqouq 2:3; Psaume 97:10) Veuve-la pa ti ena personne pou plaide pou li ek pou appuye so demann. Mais nou, nou ena enn kikenn ki ena beaucoup pouvoir, Jésus, “ki dan coté droite Bondié ek ki aussi plaide pou nou.” (Romains 8:34; Hébreux 7: 25) Alors, si sa veuve-la, malgré bann condition difficile, pa ti arrete al suppliye sa juge-la pou faire li gagne la justice, eski nou pa bizin encore plus garde la foi ki jour jugement Jéhovah vrai-mem pou vini?

18. Couma la priere pou fortifié nou la-foi ek pou aide nou pou gagne la justice?

¹⁸ L’exemple sa veuve-la ek sa juge-la enseigne nou ki ena enn lien direct entre la priere ek la foi. Nou aprann aussi ki kan nou perseveré dan la priere, sa kapav protege nou la-foi kont bann mauvais l’influence ki kapav affaibli li. Bien-sur, sa pa vedir ki si nou faire beaucoup la-priere, li automatik ki nou pa pou perdi nou la-foi. (Matthieu 6:7, 8) Kan nou prié Bondié parski nou rann-nou compte ki nou depann net lor Li, lerla nou la-priere rapproche nou ar Li ek sa fortifié nou la-foi. Nou bizin ena la foi pou ki Bondié sauve nou. A cause sa-mem, Jésus ti trouve sa necessaire pou encourage so bann disciple pou “prié touletan ek pou pa abandonné”! (Luc 18:1; 2 Thessaloniciens 3:13) Bien-sur, “grand jour Jéhovah” pou vini, ek sa pa pou depann lor nou la-priere—li pou vini, ki nou prié pou sa ou non. Mais nou personnellement, pou nou gagne la justice ek pou nou sauvé pendant la guerre Bondié, sa pou depann lor nou la-foi ek si nou pé amenn enn la-vie ki en accord avek bann la-priere ki nou faire regulierement.

19. Couma nou montré ki nou sur ki Bondié pou “faire enn maniere ki rann la justice bann ki Li finn choisir”?

¹⁹ Nou rappel surement ki Jésus ti pose sa question-la: “Kan Fils de l’homme vini, eski vrai-mem li pou trouve sa la-foi-la lor la terre?” C’est enn bon question, mais ki so reponse? Nou content ki zordi, dan le monde entier ena plusieurs million serviteur fidel Jéhovah ki pé prouvé par zot la-priere, zot patience ek zot perseverance ki zot ena sa la-foi-la! Alors, nou kapav reponn oui ar question ki Jésus ti posé. Malgré bann l’injustice ki le monde Satan pé faire nou koné, nou sur ki Bondié pou “faire enn maniere ki rann la justice bann ki Li finn choisir.”

[Note]

 Eski ou rappel?

• Kifer certain chrétien finn perdi zot la-foi?

• Kifer nou kapav ena enn la-foi solid ki jour jugement Jéhovah pou vini?

• Ki raison nou ena pou perseveré dan la priere?

• Couma kan nou perseveré dan la priere sa pou empeche nou perdi nou la-foi?

[Question pou l’etude]

[Zimage, page 19]

Ki leson nou tiré dan l’exemple lor enn veuve ek enn juge?

[Zimage, page 21]

Plusieurs million dimoune zordi sur ki Bondié pou “faire enn maniere ki rann la justice”