“Couvert zot avek l’amour, parski li couma enn la-corde ki tini zot bien ensam.”—COLOSSIENS 3:14.

1, 2. (a) Ki kitsoz encourageant nou trouvé dan congregation Chrétien? (b) Ki été enn mariage reussi?

 KAN nou guette bann vrai Chrétien zordi, eski nou pa content pou trouve bann couple ki finn reste fidel envers zot conjoint pendant 10, 20, 30 an ou-soit mem pli longtemps? Zot finn reste attaché ar zot conjoint malgré toute sorte qualité difficulté.—Genèse 2:24.

² La plupart sa bann couple-la pou admette ki zot finn konn bann moment difficile dan zot mariage. Enn specialiste ti ecrire: “Bann mariage heureux, c’est pa bann mariage sans problem ek sans difficulté. Ena bann bon moment ek bann moment difficile . . . Mais n’importe comment . . . sa bann couple-la finn reste ensam malgré bann difficulté ki ena dan la-vie modern.” Bann couple ki reussi zot mariage finn aprann pou faire face ar bann problem ki arrivé, ek ar bann pression ki la vie faire zot gagné, surtout si zot finn elevé bann zenfant. Mais sa bann couple-la finn aprann par l’experience ki vrai l’amour ‘jamais pa disparette.’—1 Corinthiens 13:8.

3. Ki bann rapport montré concernant mariage ek divorce, ek ki question sa faire nou posé?

³ Mais ena beaucoup mariage ki finn faire naufrage. Enn rapport dire: “Ena enn grand possibilité ki la moitié tou bann mariage en Amérique zordi, fini par enn divorce. Ek la moitié sa bann divorce-la pou arrivé dan premier 7 ou 8 an mariage . . . Parmi sa 75 pourcent dimoune ki ré-marié-la, 60 pourcent pou ré-divorcé encore.” Finn ena enn changement, mem dan bann pays kot avant pa ti ena trop beaucoup divorce. Par exemple, dan Japon quantité dimoune ki divorcé inn preské doublé dan bann l’année ki’nn fek passé. Ki qualité pression finn mette bann couple dan sa situation-la? Parfois, mem bann vrai Chrétien affecté par sa bann pression-la. Ki necessaire pou ki enn mariage reussi malgré bann zeffort ki Satan pé faire pou detruire sa l’arrangement-la?

 Bann Piege Ki Nou Bizin Evité

4. Cite certain kitsoz ki kapav ruine enn mariage.

⁴ Parole Bondié aide nou pou comprend ki kitsoz ki kapav ruine enn mariage. Nou prend par exemple seki l’apotre Paul ti dire lor bann condition ki pou existé dan dernier jour: “Dan dernier jour pou ena bann period critik ki difficile pou supporté. Parski bann dimoune pou content zot-mem, zot pou content l’argent, zot pou vantard, zot pou ena l’orgueil, zot pou koz en mal lor Bondié, zot pa pou ecoute zot parent, zot pou ingrat, zot pa pou fidel, zot pa pou ena l’affection, zot pa pou d’accord entre zot, zot pou faire bann fausse accusation, zot pa pou maitrise zot, zot pa pou ena pitié, zot pa pou content seki droite, zot pou traitre, zot pou ena la tete dur, zot pou rempli ar l’orgueil, zot pou content plaisir au lieu ki Bondié, zot pou ena enn forme l’attachement ar Bondié, mais zot pou trahir so pouvoir; reste loin ar sa bann dimoune-la.”—2 Timothée 3:1-5.

5. Kifer enn dimoune ki ‘content li-mem,’ li mette en danger so mariage, ek ki conseil la Bible donné lor sa sujet-la?

⁵ Kan nou examine seki Paul inn dire, nou trouve beaucoup sa bann kitsoz ki li’nn mentionné-la, kapav ruine enn mariage. Par exemple, bann ki “content zot-mem,” zot bann dimoune egoïste ki pena consideration pou lezot. Bann mari ek bann femme ki content zis zot-mem, zot bien decidé pou faire seki zot envie. Zot pa disposé pou cedé. Eski enn mariage kapav heureux si enn l’attitude coumsa existé? Non. L’apotre Paul ti donne bann Chrétien sa bon conseil-la, conseil ki applik aussi ar bann couple. Li ti dire zot: “Fodé pa ki zot faire nanyin avek l’idée pou leve la-guerre ek pou mette zot-mem en avant, mais avek enn l’esprit l’humilité, considere lezot couma pli grand ki zot. Pa guette zis zot prop l’interet, mais prend compte aussi l’interet lezot.”—Philippiens 2:3, 4.

6. Couma l’amour pou l’argent kapav mette enn mariage en danger?

⁶ L’amour pou l’argent kapav faire division entre enn mari ek enn femme. Paul ti donne sa l’avertissement-la: “Bann ki bien decidé pou vinn riche, tombe dan tentation, dan enn piege ek dan beaucoup desir ki pena sens, ek ki faire di-tort, ki plonge bann dimoune dan destruction ek dan la ruine. Parski l’amour pou l’argent, li enn racine toute sorte qualité mauvais kitsoz, ek parski zot finn galope derriere sa l’amour-la, certain finn perdi la foi ek zot finn faire zot-mem beaucoup di-tort.” (1 Timothée 6:9, 10) Malheureusement, seki Paul ti dire finn vinn vrai dan beaucoup mariage zordi. Beaucoup dimoune ki finn rod la richesse, finn neglige pou donne zot conjoint seki li bizin. Zot finn mem neglige pou soutenir zot camarade lor plan affectif ek pou passe regulierement bann moment agreable ensam.

7. Dan certain cas, ki conduite finn amenn certain pou trahir zot conjoint?

⁷ Paul ti dire aussi ki dan dernier jour, certain dimoune “pa pou fidel, zot pa pou ena l’affection, zot pa pou d’accord entre zot.” Jour so mariage, enn dimoune faire enn voeu, setadir enn promesse ki li pou reste touletan avek so conjoint ek ki li pa pou trahir li. (Malaki 2:14-16) Mais certain finn commence ena bann sentiment pou bann dimoune ki pa zot conjoint. Enn femme ki ti ena inpé plus ki trente an, ek ki so mari finn quitte li, expliké ki avant mem so mari ti quitte li, mari-la ti montré li trop familié ek trop proche envers lezot femme. Mari-la pa ti trouvé ki so conduite pa ti convenable pou enn zom marié. Kan femme-la ti trouve so mari agir coumsa, sa ti bien blesse li, ek avek tact, li ti essaye mette so mari en garde ek faire li comprend ki li pé prend enn chemin dangereux. Mais kan mem sa, mari-la finn fini par commette l’adultere. Mem si sa mari-la ti gagne bann bon l’avertissement, li pa ti oulé prend compte. Li ti tombe couma enn aveugle dan piege l’adultere.—Proverbes 6:27-29.

8. Ki kapav amenn enn dimoune pou commette l’adultere?

⁸ Oui, la Bible mette nou en garde kont l’adultere dan enn fason bien clair! Li dire: “Kikenn ki commette l’adultere avek enn femme, li mank leker, enn kikenn ki faire sa pé detruire so la-vie.” (Proverbes 6:32) En general, enn dimoune ki commette l’adultere pa faire sa coumsa, sans reflechi. Couma Jacques ti dire dan la Bible, enn dimoune commette enn peché couma l’adultere,  seulement kan li finn contigne pense pou faire sa dan so leker. (Jacques 1:14, 15) Tigit par tigit, sa dimoune-la arrete montré li fidel envers so conjoint, alors ki li ti promette pou reste fidel pendant tou so la-vie. Jésus ti dire: “Zot inn tendé ki finn dire: ‘Fodé pa to commette l’adultere.’ Mais moi mo dire zot ki enn dimoune ki contigne guette enn femme enn fason pou li gagne enn desir pou li, finn fini commette l’adultere avek li dan so leker.”—Matthieu 5:27, 28.

9. Ki bon conseil nou trouvé dan Proverbes 5:18-20?

⁹ Livre Proverbes montré nou dan ki fason sage ek fidel nou bizin agir, li dire: “Faire enn maniere ki to la-source de l’eau reste beni, ek passe bann bon moment avek to madame ar ki to’nn vive depuis to jeunesse, li couma enn biche ki digne pou gagne to l’amour ek couma enn joli chevre ki vive dan montagne. Laisse so sein soul toi touletan. Laisse so l’amour faire toi gagne enn grand la-joie touletan. Alors mo garson, kifer to bizin trouve enn grand la-joie avek enn femme etranger, ou-soit kifer to bizin serre enn femme etranger dan to lé-bras?”—Proverbes 5:18-20.

Pa Pressé pou Marié

10. Kifer li bon ki enn kikenn prend lé-temps pou konn sa dimoune avek ki li envie marié-la?

¹⁰ Enn couple kapav gagne problem dan zot mariage si zot trop pressé pou marié. Li possible ki zot trop jeune, ou-soit ki zot pena assez l’experience. Ou-soit, li kapav aussi ki zot pa prend assez lé-temps pou zot konn zot camarade—seki zot content ek pa content, zot but dan la vie, dan ki qualité famille zot sorti. Li bon ki zot ena patience, ek zot prend lé-temps pou konn sa dimoune avek ki zot envie marié-la. Mazinn Jacob, garson Isaac. Pou li kapav marié ar Rachel, li ti bizin travail sept an pou so pretan beau-pere. Li ti disposé pou faire sa parski so sentiment ti basé lor enn vrai l’amour, pa zis lor la beauté.—Genèse 29:20-30.

11. (a) Ki enn mariage faire joinde ensam? (b) Kifer dan enn mariage, li important ki nou veille bien lor nou fason kozé?

¹¹ Mariage vedir plus ki zis ena enn l’amour romantik. Dan enn mariage, ena deux dimoune ki sorti dan deux famille different, ki joinde ensam. Sakenn ena so personnalité, so sentiment, ek souvent zot pena mem l’education. Parfois, c’est deux culture ek mem deux langage different ki joinde ensam. Mais mem kan pena tou sa difference-la, kan deux dimoune marié, zot ena possibilité pou exprime bann l’opinion different lor tou sorte qualité kitsoz. Sa deux l’opinion-la zot bien important dan enn mariage. Kan bann conjoint exprime zot l’opinion, soit zot kapav critiké ek plaigné touletan, ou-soit zot kapav encourage avek amour zot camarade. Oui, avek nou parole, nou kapav soit blesse nou conjoint, ou-soit faire li di-bien. Kan nou pa control seki nou dire, nou kapav faire beaucoup di-mal dan nou mariage.—Proverbes 12:18; 15:1, 2; 16:24; 21:9; 31:26.

12, 13. Ki fason pensée realiste nou encouragé pou ena?

¹² Nou comprend alors ki li sage ki enn kikenn prend lé-temps pou konn so futur conjoint. Enn soeur ki ena l’experience, ti dire enn jour: “Kan ou guette sa dimoune avek ki ou envie marié-la, pense apepré dix qualité ki ou ti pou content trouvé li ena. Si ou trouve zis sept, demann ou-mem: ‘Eski mo pré pou passe lor sa trois ki manké-la? Eski mo pou kapav tolere sa bann manquement-la toulé-jour?’ Si ou ena bann doute, attann ek reflechi.” Bien-sur ou bizin realiste aussi. Si ou envie marié, rapel ki jamais ou pou trouve enn conjoint parfait. Mais en mem temps, sa dimoune ar ki ou pou marié-la, li aussi li pa pou kapav dire ki li finn trouve enn conjoint parfait!—Luc 6:41.

¹³ Dan mariage bizin faire sacrifice. Paul ti attire l’attention lor là, kan li ti dire: “Mo pa’lé ki zot ena okenn tracas. Enn zom ki pa marié tracasse-li ar bann kitsoz ki en rapport avek le Seigneur, couma li kapav gagne faveur le Seigneur. Mais, enn zom marié tracassé ar bann kitsoz ki concerne le monde, couma li kapav gagne faveur so femme, ek li partagé. En plus, enn femme ki pa marié, ek enn vierge, tracassé ar bann kitsoz ki en rapport avek le Seigneur, pou li kapav vinn saint dan so lekor ek dan so l’esprit. Mais, enn femme marié tracasse-li ar bann kitsoz ki  concerne le monde, couma li kapav gagne faveur so mari.”—1 Corinthiens 7:32-34.

Kifer Certain Mariage Pa Reussi

14, 15. Ki kapav affaibli enn mariage?

¹⁴ Pa trop longtemps, enn Chrétienne inn passe par enn period difficile kan li’nn divorcé. So mari inn quitte li apré 12 an mariage, ek finn al vive avek enn lot femme. Eski li ti remark certain kitsoz ki pa ti pé marche bien avant ki sa arrivé? Guette ki li dire lor so mari: “Ti’nn arrive enn point kot li ti’nn arrete prié. Li ti trouve bann excuse banal pou pa assisté reunion, ek pou pa sorti en predication. Li ti pretann ki li trop occupé ou-soit trop fatigué pou passe lé-temps avek moi. Li pa ti koz ar moi. Li ti’nn arrete koz bann kitsoz spirituel. Ti bien triste ki li finn vinn coumsa. Li ti nepli sa dimoune avek ki mo ti marié-la.”

¹⁵ Lezot aussi dire ki zot inn remark mem kitsoz, ek aussi ki dimoune-la li arrete etudié la Bible, prié, ou-soit assisté reunion. Seki nou kapav dire, c’est ki beaucoup dimoune ki finalement finn quitte zot conjoint, avant sa zot finn laisse zot relation avek Jéhovah affaibli. A cause sa, zot ti nepli fixé zot l’attention lor bann kitsoz spirituel. Jéhovah ti nepli réel pou zot, ek le monde nouveau ek juste ki Li’nn promette, sa aussi ti nepli réel. Dan certain cas, ena ki vinn faible lor plan spirituel avant mem ki zot commence content enn lot dimoune.—Hébreux 10:38, 39; 11:6; 2 Pierre 3:13, 14.

16. Ki kapav faire enn mariage vinn solide?

¹⁶ Contrairement ar bann couple ki gagne problem, enn couple dire ki si zot mariage heureux c’est grace a enn bon spiritualité. Zot prié ek etudié ensam. Mari-la dire: “Nou lire la Bible ensam. Nou al preché ensam. Nou content faire kitsoz ensam.” Leson-la li clair: Si nou garde enn bon relation avek Jéhovah, sa pou contribué pou faire nou mariage vinn solide.

Garde enn l’Attitude Realiste ek enn Bon Communication

17. (a) Ki deux kitsoz kapav faire enn mariage heureux? (b) Couma Paul ti decrire l’amour Chrétien?

¹⁷ Ena deux lezot kitsoz ki kapav faire enn mariage heureux: C’est kan nou ena l’amour ki basé lor bann principe Biblik ek enn bon communication. Kan deux dimoune amoureux, zot ena tendance pou ferme lizié lor defaut zot camarade. Kan zot marié, li possible ki parski zot finn laisse zot influencé par bann roman  d’amour ou-soit par bann film, zot attann ki zot mariage pou parfait. Mais avek lé-temps, zot pou bizin faire face ar la realité. Lerla, bann ti defaut ou-soit bann ti manie, kapav vinn bann grand problem. Si sa arrivé, bann Chrétien bizin manifesté fruit de l’esprit, ek bien-sur, l’amour forme partie dan sa fruit-la. (Galates 5:22, 23) Oui, l’amour, li bien puissant—pa l’amour sentimental, mais l’amour Chrétien. Paul ti decrire sa l’amour Chrétien-la, li ti dire: “L’amour ena patience ek li bon . . . [Li] pa rod zis so prop l’interet, li pa offense vite. Li pa garde rancune pou tou di-mal ki’nn faire li. . . . Li supporte tou, croire tou, espere tou, endure tou.” (1 Corinthiens 13:4-7) Oui, vrai l’amour passe lor bann faiblesse enn dimoune. Li realiste, li pa attann perfection.—Proverbes 10:12.

18. Couma enn bon communication kapav renforci enn mariage?

¹⁸ Li bien important aussi ki ena enn bon communication dan enn mariage. N’importe comié lé-temps enn couple inn marié, zot bizin koz ar zot camarade ek ecoute vrai-mem seki sakenn ena pou dire. Enn mari dire: “Nou dire nou bann sentiment bien franc, mais dan enn fason amical.” Enn mari ou enn femme aprann par l’experience pou ecoute pa zis seki lot-la pé dire, mais aussi seki li pa pé dire. Sa vedir ki a mesure ki lé-temps passé, enn couple ki heureux dan zot mariage aprann pou koné ki so conjoint pé pensé ek seki li ressenti sans mem ki li kozé. Certain femme finn dire ki zot mari pa vrai-mem ecoute zot. Certain mari finn plaigné ki zot femme parette envie kozé zis dan bann mauvais moment. Pou ena enn bon communication, sakenn bizin ena compassion ek comprend sentiment so camarade. Enn bon communication amenn bann bienfait pou enn mari ek so femme toulé-deux.—Jacques 1:19.

19. (a) Kifer li kapav difficile pou demann excuse? (b) Ki pou pousse-nou pou demann excuse?

¹⁹ Parfois enn bon communication implik aussi demann excuse. Mais li pa toujours facile. Nou bizin ena l’humilité pou reconette nou erreur. Mais seulement, sa faire enn grand difference dan enn mariage! Enn excuse sincere kapav empeche enn la-guerre eclaté plitar ek permette bann conjoint pou pardonne vrai-mem zot camarade ek pou trouve enn solution pou zot problem. Paul ti dire: “Contigne supporte sakenn so camarade, ek si kikenn ena enn kitsoz kont enn lot, li bizin pardonné volontairement. Pareil couma Jéhovah inn pardonne zot volontairement, faire pareil zot aussi. Mais en plus, couvert zot avek l’amour, parski li couma enn la-corde ki pou tini zot bien ensam.”—Colossiens 3:13, 14.

20. Couma enn Chrétien bizin traite so conjoint en privé ek en public?

²⁰ Enn lot kitsoz ki bien important dan enn mariage, c’est kan chaque conjoint soutenir so camarade. Enn mari ek enn femme Chrétien bizin kapav ena confiance entre zot, ek compte sakenn lor so camarade. Fodé ki personne pa denigré so camarade, ou-soit faire li mank confiance en li-mem dan n’importe ki fason. Nou bizin felicite nou conjoint avek amour; ek fodé pa nou critik li avek severité. (Proverbes 31:28b) Surtout, nou pa pou abaisse li par bann joke ki faire li passe pou enn imbecile. (Colossiens 4:6) Soutien ki sakenn donne so camarade vinn pli fort encore kan zot montré zot l’affection souvent. Souvent, enn caresse ou-soit enn ti mot gentil vedir: “Mo encore content toi. Mo content to avek moi.” Sa bann kitsoz-la kapav ena enn bon l’effet lor enn mariage ek faire li reussi dan sa lé-monde zordi-la. Ena encore lezot kitsoz, ek prochain l’article pou donne encore plus conseil Biblik ki montré couma kapav reussi enn mariage. a

[Note]

Eski Ou Kapav Expliké?

• Cite certain kitsoz ki kapav ruine enn mariage.

• Kifer li pa sage ki enn dimoune pressé pou marié?

• Ki l’effet la spiritualité ena dan enn mariage?

• Ki kitsoz kapav rann enn mariage stable?

[Questions d’étude]

[Zimage, page 26]

Kan enn couple ena enn relation solide avek Jéhovah, sa aide zot pou reussi zot mariage