Zezi ti dir: “Pei pou lev kont pei, rwayom kont rwayom. Pou ena bann tranblemandeter terib ek lafaminn dan boukou landrwa ek bann lepidemi.” (Lik 21:10, 11) Parey kouma ena bann diferan lalign dan enn lanprint ledwa, tou sa bann levennman-la ansam form parti enn sign ki bien kler. Ek parey kouma kapav idantifie enn dimounn gras-a enn lanprint ledwa, tou sa bann levennman ki arive anmemtan la permet nou kone ki “Rwayom Bondie pe aprose.” Eski nou trouv sa bann levennman-la pe arive anmemtan ek partou dan lemond? Anou get sertin prev.

1. LAGER

An 1914, enn lager ti koumanse ek sa ti afekte pli boukou dimounn ek pli boukou landrwa ki ninport ki lager avan! Bann istorien souvan koz lor lane 1914 kouma enn moman inportan dan listwar, parski premie lager mondial ti koumanse sa lane-la. Se dan sa lager-la ki pou premie fwa ti servi enn kantite masinn lager, bann bom ki bann avion large, mitrayet, gaz toxik, ek lezot zarm ki touy dimounn. Apre sa, ti ena deziem lager mondial, enn lager kot ti koumans servi bann zarm atomik. Depi 1914, limanite pe lager dan diferan landrwa, ek akoz sa bann lager-la bann milyon dimounn finn mor.

2. TRANBLEMAN-DE-TER

Dapre Britannica Academic toule lane ena apepre 100 tranbleman-de-ter ki ase for pou fer “bann gran dega.” Ek United States Geological Survey dir ki “dapre bann ransegnman ki zot ena depi inpe letan (depi lane 1900), nou atann pou gagn anviron 16 gran tranbleman-de-ter par an dan bann lane ki pe vini.” Mem si sertin panse ki ena plis tranbleman-de-ter azordi parski ena bann pli bon teknik pou detekte zot, laverite se, ki bann gran tranbleman-de-ter pe fer bann dimounn soufer ek mor plis ki avan.

 3. LAFAMINN

Souvan ena lafaminn akoz lager, koripsion, problem ekonomik, bann dimounn pa zer lagrikiltir kouma bizin, ouswa zot pa bien prepare pou fer fas ar bann sanzman klimatik. Rapor World Food Programme’s “2018 Year in Review” dir: “Dan lemond ena 821 milyon dimounn ki pena ase manze ek parmi ena 124 milyon dimounn ki pe soufer akoz lafaminn.” Sak lane 3.1 milyon zanfan pe mor-de-fin akoz zot pena manze. An 2011, 45 poursan bann zanfan dan lemond finn mor akoz lafaminn.

4. MALADI EK LEPIDEMI

Dapre Lorganizasion Mondial Lasante: “Li kler ki finn ena bann gran lepidemi pandan 21^em siek. Bann ansien maladi, kouma kolera, lapes ek lafiev zonn, finn retourne, ek bann nouvo maladi finn aparet, kouma SARS, bann lagrip ki afekte plizir pei, MERS, Ebola ek Zika.” Dernie ki nou finn gagne, se pandemi COVID-19. Mem si bann siantis ek bann dokter finn aprann boukou lor bann maladi, zot pa finn kapav trouv enn remed pou tou bann maladi.

5. TRAVAY PREDIKASION DAN LEMOND ANTIE

Zezi ti koz lor enn lot kitsoz ki form parti sa sign-la kan li ti dir: “Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion; lerla lafin pou vini.” (Matie 24:14) Pandan ki lemond pe fer fas ar bann gro problem, plis ki wit milyon dimounn ki sorti dan tou nasion pe anons bon nouvel konsernan Rwayom Bondie dan 240 pei ek dan plis ki 1,000 lang. Zame sa pa’nn arive avan dan listwar limanite.

Azordi, bann levennman ki form parti sign ki Zezi ti done, pe realize. Kifer eski sa bizin interes nou? Parski Zezi ti dir: “Kan zot pou trouv sa bann evennman la arive; zot kone ki Rwayom Bondie pe aprose.”​—Lik 21:31.

Gras-a sign ki Zezi ti done ek ansam avek kalkil bann dat ki ena dan Labib, nou konpran ki Bondie finn etabli so Rwayom dan lesiel an 1914. a Se sa lane-la ki Bondie ti fer so Garson, Zezi Kris, vinn Lerwa. (Psom 2:2, 4, 6-9) Biento, Rwayom Bondie pou dirize lor later, ek li pou tir tou bann gouvernman imin ek fer later vinn enn paradi kot bann dimounn pou viv pou touletan.

Biento, bann parol ki Zezi ti ansegne dan lapriyer model pou realize: “Fer to regn vini realiz to volonte lor later kouma dan lesiel.” (Matie 6:10) Me, ki kitsoz sa Rwayom-la inn fer depi ki li’nn koumans dirize an 1914? Ek ki kitsoz nou kapav atann pou arive kan Rwayom Bondie pou diriz later an-antie?