“Kan zot priye, pa repet touletan mem kitsoz.”​—Matie 6:7, NW.

Zeova pa anvi ki nou repet bann lapriyer ki nou’nn aprann par-ker ouswa ki nou lir dan enn liv. Okontrer, Li anvi ki nou dir Li seki ena dan nou leker. Reflesi lor seki ou ti pou resanti si enn kamarad toulezour dir ou mem kitsoz. Bann vre kamarad zot fran ek sinser. Alor, kan nou servi nou bann prop mo pou priye nou Papa ki dan lesiel, sa montre ki nou anvi vinn so kamarad.

“Zot demande me zot pa resevwar, parski zot mal demande, zot demande zis pou zot prop plezir.”​—Zak 4:3.

Nou pa kapav atann ki Bondie pou reponn nou lapriyer si nou demann Li bann kitsoz ki nou kone Li pa anvi nou fer ouswa ena. Par exanp, si enn zougader priye Bondie pou gagn lasans ek kas, eski Bondie pou reponn so lapriyer? Dan enn fason bien kler, Zeova inn dir ki fode pa ki nou ena bann lanvi exazere ek krwar dan bann kitsoz ki pa existe, kouma par exanp lasans. (Izai 65:11; Lik 12:15) Alor, li pa lozik ki Zeova reponn sa kalite lapriyer-la! Pou ki Bondie reponn nou lapriyer, nou bizin fer sir ki nou lapriyer li an-akor avek seki Li dir dan Labib.

 “Enn dimounn ki refiz obeir lalwa, mem so lapriyer Bondie deteste.”​—Proverb 28:9.

Dan lepase, Bondie pa ti reponn lapriyer bann dimounn ki ti dezobeir so lalwa ki zis. (Izai 1:15, 16) Li pa’nn sanze. (Malaki 3:6) Si nou anvi ki Bondie reponn nou bann lapriyer, nou bizin fer nou best pou obeir so bann lalwa. Ki pou arive si nou’nn fer bann kitsoz ki pa bon dan lepase? Eski savedir ki zame Zeova pa pou ekout nou lapriyer? Non! Avek boukou lamour, Li pou pardonn nou si regret seki nou finn fer ek ki nou fer zefor pou fer Li plezir.​—Zistwar Bann Apot 3:19.