1, 2. Ki lopinion boukou dimounn ena lor zot travay?

BOUKOU dimounn panse ki se zot travay ki determine si zot enn dimounn inportan ouswa non. Dan sertin kiltir, kan de dimounn fer konesans, bien souvan zot demann zot kamarad: “Ki travay to fer?”

² Parfwa, pou dekrir bann dimounn, Labib dir ki travay zot ti fer. Par exanp, Labib koz lor “Matie ramaser tax,” “Simon, enn zouvrie ki travay lapo,” ek “Lik nou kamarad dokter.” (Matie 10:3; Zistwar Bann Apot 10:6; Kolosien 4:14) Me ena fwa, Labib mansionn bann responsabilite ki sertin ti ena dan servis Zeova. Par exanp, ena Lerwa David, profet Eliya, ek lapot Pol. Sa bann zom-la ti akord enn gran valer bann responsabilite ki Zeova ti donn zot. Nou osi parey, nou bizin akord enn gran valer ninport ki responsabilite ki nou ena dan servis Zeova.

3. Kifer bann ki aze bizin form bann zenn? (Get zimaz dan koumansman lartik.)

³ Nou bien kontan servi Zeova, ek nou akord enn gran valer  bann responsabilite ki nou ena. Ena ki telman kontan zot bann responsabilite ki zot anvi kontign fer sa otan ki zot kapav. Me malerezman, kan enn dimounn vinn vie, li nepli kapav fer parey kouma li ti pe fer avan. (Ekleziast 1:4) Sa sitiasion-la, se enn difikilte ki pep Zeova bizin sirmonte. Azordi, travay predikasion pe kontign ogmante, ek lorganizasion Zeova pe servi bann nouvo teknolozi pou ki maximum dimounn tann bonn nouvel. Me parfwa, li kapav difisil pou bann ki aze aprann bann nouvo fason fer. (Lik 5:39) Ek li normal osi ki lafors ek kouraz enn dimounn diminie pli li vinn vie. (Proverb 20:29) Alor, se enn disposition ranpli ar lamour ek bien pratik kan bann ki aze form bann zenn pou pran plis responsabilite dan lorganizasion Zeova.—Lir Psom 71:18.

4. Kifer eski li difisil pou sertin deleg bann responsabilite? (Get lankadre “ Kifer Nou Kapav Trouv sa Difisil pou Delege?”)

⁴ Li pa touzour fasil pou bann frer ki ena enn lotorite pou deleg bann responsabilite ar bann zenn frer. Kitfwa sertin bien sagrin kan zot panse ki zot nepli pou ena sa privilez ki zot ti bien kontan la. Sa fer zot lapenn kan zot mazine ki zot nepli pou fer sa travay spesial ki zot ti bien kontan la. Ouswa, zot kapav trakase parski zot panse ki si zot pa diriz travay-la, travay-la pou mal fer. Kitfwa zot panse osi ki zot pena ase letan pou form lezot. Me dan enn lot kote, bann zenn frer bizin ena pasians kan zot pa pe gagn plis responsabilite.

5. Ki bann kestion nou pou reponn dan sa lartik-la?

⁵ Alor, kifer eski li inportan ki bann frer aze ed bann zenn frer pou pran plis responsabilite? Kouma zot kapav fer sa? (2 Timote 2:2) Ek kifer eski bann zenn bizin ena enn bon latitid kan zot pe aprann ek pe travay ar sa bann frer aze, ki ena boukou lexperyans la? Pou koumanse, anou gete kouma Lerwa David ti prepar so garson pou enn travay bien inportan.

6. Ki Lerwa David ti anvi fer? Ki Zeova ti dir li?

⁶ David ti gagn persekision pandan boukou lane ek akoz sa, li ti bizin al res dan diferan landrwa. Apre, kan li ti vinn lerwa, li ti res dan enn lakaz konfortab. Alor, li ti dir profet Natann: “Mwa mo pe viv dan enn lakaz ki’nn fer ar dibwa sed alor ki lars lalians Zeova anba bann latwal latant.” David ti ena enn gran dezir pou konstrir enn zoli tanp pou Zeova. Natann ti dir li: “Fer tou seki ena dan to leker, parski vre Bondie avek twa.” Me se pa sa ki Zeova ti anvi. Li ti avoy Natann dir David: “Se pa twa ki pou ranz lakaz kot mo pou reste.” Mem si Zeova ti promet David ki Li ti pou touletan avek li, David ti aprann ki se enn parmi so bann garson ki ti pou konstrir tanp-la. Me, kouma eski David ti reazir?—1 Kronik 17:1-4, 8, 11, 12; 29:1.

7. Kouma David ti reazir kan li ti aprann ki li pa ti pou konstrir tanp?

⁷ David ti vremem anvi konstrir enn tanp pou Zeova. Alor, kitfwa li ti bien afekte kan li ti aprann ki se pa li ki ti pou konstrir sa tanp-la. Me kanmem sa, li ti soutenir san poursan proze ki so garson Salomon ti pou dirize. David ti donn koudme pou organiz bann travayer ek  pou rasanble bann materyo kouma feray, kwiv, larzan, lor, ek dibwa. Li pa ti kas latet pou kone kisannla ti pou gagn laglwar pou konstriksion tanp, ki plitar ti apel tanp Salomon. Okontrer, David ti ankouraz Salomon kan li ti dir: “Asterla mo garson, ki Zeova avek twa, ek ki to gagn sikse ek konstrir lakaz Zeova to Bondie, parey kouma Li’nn dir lor twa.”—1 Kronik 22:11, 14-16.

8. Kifer David kitfwa ti panse ki Salomon pa ti kalifie pou konstrir tanp? Me ki David ti fer?

⁸ Lir 1 Kronik 22:5. * Kitfwa David ti panse ki Salomon pa ti ankor pre pou diriz enn proze inportan koumsa. Tanp-la ti bizin “pli zoli ki zoli,” ek Salomon ti ‘zenn ek li pa ti ena lexperyans.’ Me David ti kone ki Zeova ti pou ed Salomon pou fer sa travay spesial la. Alor, David ti fer tou seki li ti kapav pou ed so garson prepar sa gro proze-la.

9. Kouma bann frer aze kapav ena enn bon latitid kan zot donn lezot bann responsabilite? Donn enn lexanp.

⁹ Fode pa ki bann frer aze dekouraze kan zot bizin donn bann zenn frer sertin responsabilite. Nou tou nou bizin konpran ki travay Zeova se kitsoz pli inportan azordi. Kan nou form bann zenn frer pou pran bann responsabilite, nou ede pou ki travay Zeova kontigne fer kouma bizin. Reflesi lor sa lexanp-la: Kan to ti ankor tipti, sirman to ti pe get to papa kondir so loto. Apre, kan to’nn vinn gran, to papa inn montre twa kondir. Plitar, to finn gagn to lisans ek to finn koumans kondire. Kanmem sa, to papa ti ankor pe donn twa enn-de ti konsey.  Parfwa, sakenn so tour ti pe roul loto-la. Me depi ki to papa inn vinn vie, se twa ki kondire pli souvan. Me, eski to papa agase kan to kondire? Non, sirman li kontan parski to la pou amenn li kot li bizin ale. Dan mem fason, bann frer aze kontan pou trouv bann zenn frer ki zot inn forme, pare pou pran bann responsabilite dan lorganizasion Zeova.

10. Ki latitid Moiz ti ena konsernan lotorite ek loner?

¹⁰ Nou bizin fer bien atansion pou pa zalou bann responsabilite ki lezot ena. Nou kapav tir leson lor fason ki Moiz ti reazir kan sertin Izraelit ti koumans azir kouma bann profet. (Lir Nonb 11:24-29. *) Zozie ti anvi anpes zot, me Moiz ti dir: “Eski to zalou pou mwa? Non, mo ti pou kontan ki tou pep Zeova ti bann profet ek ki Zeova met so lespri lor zot tou!” Moiz ti kone ki se Zeova ki ti pe diriz sa travay-la. Olie ki li ti rod so prop loner, Moiz ti anvi ki tou bann serviter Zeova gagn bann responsabilite. Ki nou kapav dir lor nou? Eski nou kontan kan lezot gagn bann responsabilite dan servis Zeova?

11. Ki enn frer ti dir konsernan responsabilite ki donn lezot?

¹¹ Pandan plizir dizenn lane, boukou frer finn travay bien dir dan servis Zeova ek finn form bann zenn frer pou pran plis responsabilite. Anou get lexanp enn frer ki apel Peter. Pandan sa 74 lane ki li finn pase dan servis aplintan la, 35 lane ladan li finn servi dan enn biro nasional dan l’Europe. Pandan enn bon bout letan, li ti responsab Departman Servis. Ek plitar, Paul, enn zenn frer ki Peter ti forme, ti gagn sa responsabilite-la. Eski Peter ti afekte par sa sanzman-la? Non. Peter ti dir: “Mo bien kontan ki ena bann frer ki finn forme pou pran plis responsabilite ek ki pe bien fer travay-la.”

12. Ki nou kapav aprann ar lexanp Reabam?

¹² Kan Reabam, garson Salomon, ti vinn lerwa, li ti al rod konsey ar bann zom aze lor fason ki li ti bizin asim so nouvo responsabilite. Me apre, li ti rezet zot konsey! Olie sa, li ti ekout konsey bann zenn zom ki ti grandi ansam ar li. Finalman, sa ti amenn bann move konsekans. (2 Kronik 10:6-11, 19) Ki leson nou kapav aprann? Li pli saz ki nou rod konsey ar bann ki pli aze ek ki ena plis lexperyans ki nou. Asterla, fode pa ki bann zenn panse ki zot bizin kontign fer bann kitsoz exakteman kouma ti pe fer avan. Me kanmem sa, zot bizin ena enn gran respe pou lopinion bann frer aze ek fode pa zot panse ki fason sa bann frer-la ti pe travay pa pou marse.

13. Kouma eski bann zenn frer bizin travay ansam ar bann ki pli aze?

¹³ Parfwa, bann zenn frer gagn responsabilite pou okip travay bann frer ki pli aze ek ki ena plis lexperyans ki zot. Sa bann zenn frer-la pou montre ki zot ena sazes kan zot dispoze pou aprann ar sa bann frer aze-la. Dan lexanp ki nou ti mansione avan, kan Paul ti ranplas Peter antan ki responsab enn servis dan Béthel, li ti dir: “Mo finn pas boukou letan pou rod bann konsey ar Peter, ek mo finn ankouraz bann ki dan mo servis osi pou fer parey.”

14. Ki nou kapav aprann ar fason ki lapot Pol ek Timote ti travay ansam?

¹⁴ Timote ti bien pli zenn ki lapot Pol, kanmem sa zot finn travay ansam enn bon bout letan. (Lir Filipien 2:20-22.) Pol ti dir bann Korintien: “Pou sa rezon la ki mo pe avoy Timote kot zot. Mo kontan li kouma mo garson, e li fidel dan Lesegner. Li pou rapel zot bann prinsip ki diriz mo lavi dan Lekris. Li parey kouma seki mo ansegne partou, dan tou [“kongregasion,” NW].” (1 Korintien 4:17) Sa verse-la montre nou ki Pol ek Timote ti travay bien ansam ek zot ti soutenir sakenn zot kamarad. Pol ti pran letan pou ansegn Timote “bann prinsip ki diriz [so] lavi dan Lekris,” ek Timote ti enn bon zelev. Pol ti bien kontan Timote ek li ti sir ki Timote ti pou pran swin bann frer ek ser dan Korint. Bann ansien kapav imit lexanp lapot Pol kan zot form bann frer pou pran latet dan kongregasion.

15. Kouma eski Romin 12:3-5 kapav ed nou pou adapte ar bann sanzman?

¹⁵ Nou pe viv enn lepok extraordiner. Parti lorganizasion Zeova ki lor later pe fer bann progre dan diferan domenn. Ek sa vedir ki pou kontign ena bann sanzman. Sertin parmi sa bann sanzman-la kapav afekte nou personelman ek kitfwa li difisil pou nou adapte ar sa bann sanzman-la. Sa pou ed nou si nou ena limilite, ek nou fixe nou latansion lor tou seki pou favoriz travay predikasion olie ki nou konsantre nou lor seki nou, nou  anvi. Kan nou fer sa, nou favoriz linite. Kan Pol ti ekrir bann Kretien ki dan Rom, li ti dir: “Mo dir ar sakenn parmi zot fode pa ki zot ena enn lopinion tro ot lot zotmem.” Apre li ti explike ki, parey kouma sak manb nou lekor ena diferan fonksion, sak manb kongregasion ena diferan rol.—Romin 12:3-5.

16. Ki sak Kretien kapav fer pou favoriz lape ek linite dan lorganizasion Zeova?

¹⁶ Tou bann serviter Zeova anvi soutenir Rwayom Bondie ek fer tou seki Zeova demande. Bann frer aze kapav form bann zenn frer. Bann zenn frer kapav aksepte pli boukou responsabilite, ek asim zot bann responsabilite avek modesti ek respe. Ek bann frer marye bien kontan kan zot madam soutenir zot, mem kan ena bann sanzman. Sa bann fam-la kapav imit lexanp Prisil, ki ti travay ansam avek so mari Akila avek fidelite.—Zistwar Bann Apot 18:2.

17. Ki formasion Zezi ti donn so bann disip?

¹⁷ Zezi ti dispoze pou form lezot ek se meyer lexanp ki nou kapav swiv. Li ti kone ki lezot ti pou bizin kontign so travay. Biensir, li ti kone ki so bann disip ti inparfe. Me li ti ena konfians ki zot ti pou fer bann travay pli gran ki li, li ti fer. (Zan 14:12) Zezi ti bien form zot, ek zot ti kapav prese dan tou pei ki zot ti ale.—Kolosien 1:23.

18. Ki travay nou pou ena dan lavenir? Ki travay nou ena azordi?

¹⁸ Kan Zezi ti mor, Zeova ti resisit li ek ti donn li pli boukou travay, ek enn lotorite ki “pli lao ki tou gouvernman, tou lotorite, tou pouvwar ek tou dominasion.” (Efezien 1:19-21, NW.) Mem si arive nou mor avan Armagedonn ek ki nou ti bann fidel serviter Zeova, nou pou resisite ek nou pou ena boukou travay inportan pou fer dan lemond nouvo. Me azordi, nou tou nou ena privilez extraordiner pou prese ek fer bann disip. Alor, ki nou zenn ouswa vie, nou tou nou ena “touzour boukou pou fer dan travay nou Segner.”—1 Korintien 15:58, NW.