Bann vre Kretien pa pou les nanye ouswa ninport kisannla anpes zot ador Zeova. Nou sir ki ou ena sa santiman-la ou osi. Ou fidelite ena boukou valer pou Zeova. (Lir 1 Kronik 28:9.) Ki bann sitiasion kapav teste ou fidelite anver Zeova? Ek ki kitsoz kapav ed ou pou res fidel?

1. Kouma sertin kapav teste nou fidelite anver Zeova?

Sertin dimounn pou esey anpes ou servi Zeova. Kisannla ki pou fer sa? Sertin dimounn finn aret servi Zeova ek asterla zot koz manti lor so lorganizasion, parski zot anvi detrir nou lafwa. Sa bann dimounn-la se bann aposta. Ena osi sertin sef relizie ki fann bann fos linformasion lor nou. Zot fer sa pou ki bann Kretien ki pa fer atansion kit laverite. Li bien danzere ki nou rant dan bann deba avek bann dimounn ki kont nou, ouswa ki nou lir bann kitsoz ki zot ekrir, ki nou al lor zot sit Internet, ouswa mem ki nou get zot bann video. Gete ki Zezi ti dir konsernan bann dimounn ki anpes lezot servi Zeova: “Les zot trankil; zot kouma enn lider aveg ki pe diriz bann aveg. E si enn aveg diriz enn lot aveg, toulede pou tom dan trou.”​—Matie 15:14.

Me ki pou arive si nou kamarad ouswa enn manb nou fami nepli anvi form parti parmi bann Temwin Zeova? Se enn sitiasion bien difisil ki kapav fer nou bien soufer. Sa dimounn-la kapav fors nou pou swazir ant li ek Zeova. Me nou bizin fer tou pou ki nou fidelite anver Bondie pas avan tou kitsoz. (Matie 10:37) Alor nou pou obeir lord ki Zeova inn donn nou pou pa frekant sa kalite dimounn-la.​—Lir 1 Korintien 5:11.

2. Kouma nou bann swa kapav teste nou fidelite anver Zeova?

Nou lamour pou Zeova pou pous nou pou pa fer nanye ki ena enn lien avek fos relizion. Sa kapav konsern nou travay, ouswa lorganizasion dan ki nou ete, ouswa ninport ki laktivite ki nou fer. Zeova donn nou sa lavertisman-la: “Kit [Gran Babilonn], mo pep.”​—Revelasion 18:2, 4.

 ANOU GET INPE PLIS

3. Fer atansion ar bann ki fann bann fos lansegnman

Kouma nou bizin reazir si nou tann bann kitsoz negatif lor lorganizasion Zeova? Lir Proverb 14:15, ek apre sa, get sa kestion-la ansam:

• Kifer nou bizin fer atansion ki nou pa krwar ninport ki kitsoz ki nou tande?

Lir 2 Zan 10, ek apre sa, get sa bann kestion-la ansam:

• Kouma nou bizin azir anver bann aposta?

• Mem si nou pa pou koz direkteman avek bann aposta, kouma nou kapav gagn kontak avek zot bann lansegnman?

• Ki ou panse Zeova pou resanti si nou ekout bann kitsoz negatif ki bann dimounn dir lor Li ouswa lor so lorganizasion?

4. Res fidel ar Bondie mem kan enn frer ouswa enn ser fer pese

Ki nou bizin fer si nou aprann ki enn kikenn dan lasanble inn fer enn pese grav? Anou get enn prinsip ki ena dan lalwa ki Bondie ti donn nasion Izrael. Lir Levitik 5:1.

Parey kouma nou trouve dan sa verse-la, si nou aprann ki enn dimounn inn fer enn pese grav, nou bizin dir bann ansien seki nou kone. Me selman, avan ki nou fer sa, nou pou montre bonte anver sa dimounn-la, kan nou ankouraz li pou al get bann ansien ek pou konfes so pese. Me si li pa fer sa, nou fidelite anver Zeova pou pous nou pou dir bann ansien seki nou kone. Kan nou azir koumsa, kouma nou montre lamour fidel anver . . .

• Zeova?

• sa dimounn ki’nn fer pese la?

• lezot dan lasanble?

 5. Res lwin ar Gran Babilonn

 SEKI NOU’NN APRANN

Pou res fidel ar Zeova, fode pa ki nou frekant bann dimounn ki nepli fidel ar Li. Nou bizin osi nepli ena okenn lien avek fos relizion.

Eski Ou Rapel?

• Kifer fode pa ki nou get, lir, ouswa ekout seki bann aposta dir?

• Kouma nou bizin azir anver bann dimounn ki nepli Temwin Zeova?

• Kouma nou kapav montre ki nou pe obeir lavertisman pou kit fos relizion?