Labib finn touletan fer lotorite konsernan nou bann krwayans. Amezir ki nou finn konpran pli bien bann Lekritir, nou finn aziste nou bann krwayans. a

 Sa bann sanzman-la an-akor avek enn prinsip Labib ki trouv dan Proverb 4:18: “Me semin bann dimounn drwat li parey kouma lalimier ki eklere ek ki briye pli for, ziska ki’nn fer gran lizour.” Amezir ki soley leve, peizaz vinn pli kler ek nou trouv bann detay. Dan mem fason, tigit par tigit, Bondie fer nou konpran laverite dan ler ki bizin. (1 Pier 1:10-12) Kouma Labib finn predir, Bondie finn akseler sa pandan “lepok lafin.”​—Daniel 12:4.

 Bann sanzman dan nou krwayans amezir nou konpran pli bien laverite, bizin pa etonn nou ni afekte nou. Bann ansien adorater Bondie ti osi ena bann fos lide ek zot ti dan lerer konsernan seki zot ti pe atann. Zot ti bizin sanz zot fason panse.

•   Moiz ti ofer limem antan ki enn sover nasion Izrael 40 an avan dat ki Bondie ti prevwar dan so kalandriye.​—Zistwar Bann Apot 7:23-25, 30, 35.

•   Bann zapot pa ti reisi konpran profesi ki ti predir lamor Lemesi ek so rezireksion.​—Izai 53:8-12; Matie 16:21-23.

•   Sertin premie Kretien ti ena bann fos lide lor kan “zour Zeova” pou arive.​—2 Tesalonisien 2:1, 2.

 Plitar Bondie ti koriz zot bann erer ek nou priye ki Li pou kontign fer parey pou nou.​—Zak 1:5.