Misambu 34:1-22
Wa Davidi, pavuaye mudivuije bu mupale+ kumpala kua Abimeleke uvua mumuipate, yeye kumbuka.
א [Alefe]
34 Nentumbishe Yehowa dîba dionso;Butumbi buende nebuikale ku mishiku yanyi misangu yonso.
ב [Bete]
2 Meme* nenditumbishile mu Yehowa;+Bena bupuekele nebumvue, nebasanke.
ג [Gimele]
3 Samunayi Yehowa pamue nanyi;+Tutumbishayi dîna diende tshiapamue.
ד [Dalete]
4 Ngakebeja Yehowa, yeye wakangandamuna.+
Wakansungila ku malu onso avua angenza buôwa.+
ה [He]
5 Bavua batangile kudiye bakabalakana ne disanka;Mpala yabu kayivua mua kufuishibua bundu to.
ז [Zayine]
6 Mupuekele eu wakabikila, Yehowa wakamuteleja.
Yeye wakamupandisha ku makenga ende onso.+
ח [Hete]
7 Muanjelu wa Yehowa udi wasa tshitudilu tshinyunguluke bantu badi bamutshina,+Ne udi ubasungila.+
ט [Tete]
8 Labulayi, numone ne: Yehowa mmuimpe;+Wa diakalenga mmuntu udi unyemena kudiye.
י [Yode]
9 Tshinayi Yehowa, nuenu bansantu bende bonso,Bualu badi bamutshina kabena bapangila tshintu nansha tshimue.+
כ [Kafe]
10 Nansha bana ba ntambue badi ne makanda* mbafike ku disomba ne nzala,Kadi bantu badi bakeba Yehowa kabakupangila tshintu tshimpe nansha tshimue.+
ל [Lamede]
11 Luayi, bana banyi, ntelejayi;Nennulongeshe ditshina dia Yehowa.+
מ [Meme]
12 Nnganyi wa munkatshi muenu udi usanka bua muoyoNe udi munange kumona matuku a bungi mimpe?+
נ [Nune]
13 Nunku, lama ludimi luebe ku malu adi mabi,+Mishiku yebe ku diakula malu a dishima.+
ס [Sameke]
14 Umbuka ku malu mabi, enza malu mimpe;+Keba ditalala ne udilonde.+
ע [Ayine]
15 Mêsu a Yehowa adi kudi bantu bakane,+Ne matshi ende adi ateleja muadi wabu wa dilomba diambuluisha.+
פ [Pe]
16 Kadi mpala wa Yehowa mmutangija kudi badi benza malu mabiBua kukupula tshivulukilu tshiabu tshionso pa buloba.+
צ [Tesade]
17 Bakela lubila, Yehowa wakabateleja;+Wakabasungila ku makenga abu onso.+
ק [Kofe]
18 Yehowa udi pabuipi ne badi ne muoyo musunsuke;+Udi upandisha badi bazajibue mu lungenyi luabu.*+
ר [Leshe]
19 Ntatu ya* muntu muakane nya bungi,+Kadi Yehowa udi umusungila kudiyi yonso.+
ש [Shine]
20 Udi ulama mifuba yende yonso;Kakuena umue wa kudiyi udibu batshibule.+
ת [Taw]
21 Tshipupu netshishipe bantu babi;Badi bakina bantu bakane nebapishibue.
22 Yehowa udi upikula muoyo* wa bena mudimu bende;Kakuena umue wa ku badi banyemena kudiye wapishibua to.+
