Bakangami mpo na kondima na bango

YOKÁ NA

Mibeko ya guvɛrnema ya Singapour esɛngaka moto nyonso asala mosala ya soda mpe eyebi te lotomo ya baoyo baboyaka mosala yango mpo na kotosa lisosoli. Bilenge Batatoli ya Yehova oyo bazali koboya mosala ya soda mpo na kotosa lisosoli basengeli kosala mbula mibale mobimba na bolɔkɔ, to sanza 39 ya bolɔkɔ.

Soki elenge mobali akokisi mbula 18, mibeko ya mboka esɛngi ye akɔta mosala ya soda. Soki aboyi mpo na kotosa lisosoli na ye, bakokanga ye na kaa ya basoda na boumeli ya sanza 15. Soki babimisi ye asengeli mbala moko kolata iniforme ya basoda mpe kozwa formasyo ya mosala yango. Soki aboyi lisusu formasyo yango, bakosambisa ye lisusu na tribinale ya basoda mpe bakokatela ye etumbu ya bolɔkɔ oyo ekoki koumela sanza tii 24.

Singapour eboyi kotosa malako ya ONU

Banda kala, ONU esɛngaka bikólo na yango “endima ete koboya mosala ya soda mpo na kotosa lisosoli ezali lotomo oyo moto azali na yango ya kosalela bonsomi na ye ya kokanisa, ya lisosoli mpe ya losambo ndenge ESAKOLA ya ONU mpo na ntomo ya moto (Déclaration universelle des droits de l’homme) elobi.” Atako Singapour ekɔtá na bikólo ya ONU banda 1965, elobá ete endimaka te ekateli ya ONU mpo na likambo wana. Na mokanda moko oyo mokonzi moko ya guvɛrnema ya Singapour atindelaki ONU na mokolo ya 24/04/2002, alobaki ete “soki mateya oyo moto andimaka to makambo oyo asalaka eyokani te na matomba ya ekólo, lotomo oyo ekólo ezali na yango ya kobatela kimya na mboka esengeli naino kotosama.” Alobaki polele boye: “Tondimaka te kosalela mobeko yango na likambo etali koboya mosala ya soda mpo na kotosa lisosoli.”

Fɔtɔ ya moto oyo akɔti bolɔkɔ mpo aboyi mosala ya soda

Bernard Oh Yu Hua

Na mokolo ya 03/09/2018, Bernard Oh Yu Hua asilisaki etumbu ya bolɔkɔ ya sanza 12 na kasho ya basoda ya Singapour mpo aboyaki mosala ya soda mpo na kotosa lisosoli. Mokolo oyo babimisaki ye, mokonzi moko ya basoda ayebisaki ye alata iniforme ya basoda, atako ayebaki ete eyokani te na mateya oyo Bernard andimaka. Lokola Bernard akokaki te kolata iniforme yango, asɛngaki mbala na mbala ete asala mosala mosusu na esika ya mosala ya soda. Likambo ya mawa, baboyaki likambo oyo asɛngaki.

Na mokolo ya 19/10/2018, bamemaki Bernard na tribinale ya basoda mpo bafundaki ye ete aboyi na nko nyonso kotosa mobeko ya mboka. Ntango azalaki kosamba, Bernard asɛngaki asala mosala mosusu na esika ya mosala ya soda mpe atángaki ndakisa ya misala mosusu ya basivile oyo eyokani na mateya oyo andimaka, oyo guvɛrnema ya Singapour esí etyá. Kasi baboyaki likambo nyonso oyo asɛngaki. Tribinale ekatelaki ye lisusu etumbu, kasi ya mbala oyo sanza 18 ya bolɔkɔ.

Atako bakatelaki ye etumbu yango, Bernard azali kaka na makanisi malamu. Ndakisa ya ndeko na ye Michael Oh Yu Rong, oyo auti kosala sanza 39 na bolɔkɔ mpo aboyaki mosala ya soda mpo na kotosa lisosoli, ezali kopesa ye makasi.

Badati

07/05/2019

Batatoli ya Yehova 8 bakɔti bolɔkɔ mpo baboyi mosala ya soda mpo na kotosa lisosoli.
24/04/2002

Mokonzi moko ya guvɛrnema aboyi kondima lotomo ya baoyo baboyaka mosala ya soda mpo na kotosa lisosoli.
Sanza ya 02/1995

Bakómi konyokola Batatoli ya Yehova makasi na Singapour mpe kokanga bango.
08/08/1994

Tribinale monene ya Singapour eboyi Batatoli ya Yehova básamba lisusu.
12/01/1972

Guvɛrnema ya Singapour elongoli nkombo ya lingomba ya Batatoli ya Yehova na buku ya Leta.

Talá mpe...

BANSANGO YA SIKA

Batatoli ya Yehova bakangami mpo na kondima na bango—Ekólo na ekólo

Bikólo oyo batye Batatoli ya Yehova na bolɔkɔ, na bantango mosusu banyokola bango makasi, mpo basalaka makambo na bango ya losambo mpe mpo basalela ntomo oyo moto azalaka na yango.

BANSANGO YA SIKA