1, 2. Inki mpusa bansadi ya Yehowa ke vandaka na yo?

BANSADI ya Yehowa me vingilaka na ntima-nda yonso kulungana ya bambikudulu. Mu mbandu, Yeremia vandaka kuvingila ntangu yina bantu ya Babilone zolaka kufwa Yuda mpi yo lunganaka na mvu 607 N.T.B. (Yeremia 25:8-11) Yezaya bikulaka nde Yehowa ta basisa Bayuda na kimpika na Babilone mpi ta vutula bo na Yuda, yandi tubaka nde: “Kiese na bantu yonso yina ke landa kuvingila yandi.” (Yezaya 30:18, NW) Mika mpi vingilaka kulungana ya bambikudulu ya Yehowa, yandi tubaka nde: “Mono ke tala kaka Mfumu Nzambi.” (Mika 7:7) Na nsungi ya bamvula mingi, bansadi ya Nzambi vandaka kuvingila kukwisa ya Mesia to Kristu.—Luka 3:15; 1 Piere 1:10-12. * (Tala noti na nsi ya lutiti.)

² Bubu yai, beto mpi ke vingila kulungana ya bambikudulu ya me tala Kimfumu ya Yehowa. Ntama mingi ve Yezu, Ntotila ya Kimfumu yina, ta gulusa bansadi ya Nzambi na nsi-ntoto yai ya mbi. Yandi ta fwa bantu ya mbi mpi ta manisa bampasi yonso. (1 Yoane 5:19) Yo yina, beto fwete landa na kuvingila kilumbu ya Yehowa konso ntangu yina yo ta kwisa mpi beto fwete sala bikesa sambu na kuvanda ya kuyilama.

3. Kana beto me vingilaka kilumbu ya Yehowa bamvula mingi, inki ngiufula beto lenda yantika kudiyula?

 ³ Beto ke vingilaka na mpusa yonso nsungi yina luzolo ya Nzambi ta salama na ntoto. (Matayo 6:10) Kansi, kana beto me vingilaka kilumbu ya Yehowa bamvula mingi, beto lenda yantika kudiyula nde, ‘Keti yo me fwana kibeni nde beto landa na kuvingila kilumbu ya Yehowa?’

4. Sambu na nki yo kele mfunu nde beto “landa na kukengila”?

⁴ Yezu zabisaka balongoki na yandi nde: “Beno landa na kukengila” mpi nde: “Beno bikala ya kusikama.” Yo yina, yo kele mfunu na kulanda na kuvingila kilumbu ya Yehowa yina me kuma pene. (Matayo 24:42; Luka 21:34-36) Diaka, organizasio ya Yehowa ke landa na kuyibusa beto na ‘kuvingila mpi kuyibuka ntangu yonso kukala ya kilumbu ya Yehowa’ mpi na kutula mabanza na beto kaka na lusilu ya Yehowa ya nsi-ntoto ya mpa.—Tanga 2 Piere 3:11-13.

5. Inki kele kikuma ya nkaka yina ke pusaka beto na kulanda na kuvingila kilumbu ya Yehowa?

⁵ Kana Yezu lombaka balongoki na yandi ya mvu-nkama ya ntete na kulanda na kuvingila kilumbu ya Yehowa, yo kele pwelele nde ntuma yai kele diaka mfunu mingi sambu na beto bubu yai. Sambu na nki? Sambu kidimbu yina Yezu pesaka me monisaka nde yandi me kumaka Ntotila ya Kimfumu ya Nzambi banda na 1914, mpi yo me monisaka nde beto ke zinga na bilumbu ya nsuka to na “nsukilu ya ngidika ya bima.” Mu mbandu, kaka mutindu Yezu tubaka na ntwala, mambu ya nsi-ntoto ke landa kaka kubeba mpi Bakristu ya kieleka ke na kusamuna nsangu ya mbote ya Kimfumu na ntoto ya mvimba. (Matayo 24:3, 7-14) Yezu monisaka ve kana bilumbu ya nsuka ta sala bamvula ikwa. Yo yina beto fwete vanda ya kuyilama sambu beto me zaba ve ntangu nsuka ta kwisa.

6. Inki ke sadisa beto na kuzaba nde mambu ya nsi-ntoto ta landa kaka kubeba mutindu nsuka me finama?

⁶ Keti “nsukilu ya ngidika ya bima” kele nsungi mosi na bilumbu ke kwisa yina mambu ya nsi-ntoto ta beba diaka mingi kuluta? Biblia ke tuba nde “na bilumbu ya nsuka” bantu ta kuma diaka mbi mingi. (2 Timoteo 3:1, 13; Matayo 24:21; Kusonga 12:12) Yo yina, bubu yai mambu ke beba mpi yo ke landa kaka na kubeba.

7. Matayo 24:37-39 ke longa beto nki na yina me tala mambu ya nsi-ntoto na bilumbu yai ya nsuka?

⁷ Bantu ya nkaka lenda yindula nde na ntwala nde “mpasi ya nene” kuyantika, bitumba ta vanda na konso insi mpi nde bantu mingi ta bela to ta niokwama na nzala. (Kusonga 7:14) Kana yo kele mutindu yina, yo ke tendula nde bantu yonso ta bakisa nde mbikudulu ya Biblia ke na kulungana. Bantu yonso, ata bayina ke tulaka ve dikebi na mambu ya Biblia ta bakisa yo pwelele. Kansi kuvila ve nde, Yezu tubaka nde na bilumbu ya nsuka bantu mingi ta ‘tula ve dikebi.’ Bo ta zinga kaka mutindu bo ke zingaka na ntwala mpi bo ta yituka ntangu kilumbu ya Yehowa ta kwisa. (Tanga Matayo 24:37-39.) Yo kele pwelele nde, beto fwete vingila ve nde mambu ya nsi-ntoto ta kuma mbi mingi na ntwala nde “mpasi ya nene” kuyantika sambu yo pusa bantu na kundima na ngolo nde nsuka me finama.—Luka 17:20; 2 Piere 3:3, 4.

8. Kidimbu yina Yezu pesaka ke ndimisa beto nki?

⁸ Kidimbu yina Yezu pesaka vandaka lukebisu ya pwelele yina ta sadisa bantu yina ta kwikila na yandi na kubakisa mambu yina ke  salama na bansungi yina bo ke zinga. Bantu yina ke kwikilaka na Yezu me zabaka mutindu mambu ta salama. (Matayo 24:27, 42) Banda na 1914, mambu yina Yezu tubaka na kidimbu yina yandi pesaka ke na kulungana. Yo ke ndimisa beto kibeni nde, beto ke zinga na bilumbu ya nsuka, disongidila, “nsukilu ya ngidika ya bima.” Yehowa me tulaka dezia kilumbu yina yandi ta fwa nsi-ntoto yai ya mbi ya Satana.

9. Sambu na nki beto fwete landa na kuvingila kilumbu ya Yehowa?

⁹ Sambu na nki beto fwete landa na kuvingila kilumbu ya Yehowa? Sambu na kulemfuka na ntuma ya Yezu Kristu. Diaka, beto ke mona pwelele kulungana ya kidimbu yina Yezu pesaka na yina me tala bilumbu ya nsuka. Beto ke ndima nde kilumbu ya Yehowa me kuma pene sambu beto ke mona mutindu mbikudulu ya Biblia ke na kulungana kansi ve sambu beto ke ndima mambu yonso yina bantu ke tubaka. Beto fwete landa na kukengila mpi kuvanda ya kuyilama sambu na kilumbu ya Yehowa yina ke kwisa.

10, 11. (a) Sambu na nki Yezu zabisaka balongoki na yandi nde, “Beno landa na kukengila”? (b) Inki Yezu zabisaka balongoki na yandi na kusala kana bo ke yindula nde nsuka ke kwisa ve nswalu? (Tala kifwanisu yina kele na luyantiku ya disolo.)

¹⁰ Bampangi mingi me sadilaka Yehowa na kwikama yonso mpi me vingilaka na mpusa yonso kilumbu na yandi na nsungi ya bamvula mingi. Yo vanda beto me vingilaka kilumbu ya Yehowa bamvula ikwa, beto fwete landa kaka kuvingila sambu yo me finama. Beto fwete vanda ya kuyilama ntangu Yezu ta kwisa kufwa nsi-ntoto yai ya Satana. Yibuka mambu yina Yezu zabisaka balongoki na yandi: “Beno keba, beno bikala ya kusikama, sambu beno me zaba ve ntangu yina ntangu ya bo me tulaka ta bwa. Yo kele bonso muntu mosi ya ke sala nzietelo na insi ya nzenza yina bikaka nzo na yandi mpi pesaka kiyeka na bampika na yandi, yandi pesaka konso muntu kisalu na yandi, mpi yandi pesaka muntu ya ke kengilaka kielo ntuma ya kulanda na kukengila. Yo yina, beno landa na kukengila sambu beno me zaba ve ntangu yina Mfumu ya nzo ta kwisa, kana na nkokila to na midi ya mpimpa to na nsusu ya ntete to na suka-suka, na mpila nde ntangu yandi ta kwisa na kintulumukina, yandi kuta beno ve beno ke lala. Kansi mambu ya mono ke tubila beno, mono ke tubila yo bantu yonso: Beno landa na kukengila.”—Marko 13:33-37.

¹¹ Balongoki me bakisaka nde Yezu yantikaka kuyala na 1914; yo yina, bo me bakisaka nde nsuka lenda kwisa konso ntangu yina. Bo ke salaka mingi na kisalu ya kusamuna sambu na kuvanda ya kuyilama. Yezu tubaka nde yandi lenda kwisa na nsukinina, “na nsusu ya ntete to na suka-suka.” Kana yo ta salama mutindu yina, inki balongoki ya Yezu fwete sala? Yezu tubaka nde: “Beno landa na kukengila.” Yo yina, kana beto ke mona nde beto me vingilaka bamvula mingi, yo ke tendula ve nde kilumbu ya Yehowa kele kaka ntama to nde yo ta kwisa ve ntangu beto kele na luzingu.

12. Inki ngiufula Habakuki yulaka Yehowa, mpi nki mvutu Yehowa pesaka yandi?

¹² Profete Habakuki samunaka lufwa ya  Yeruzalemi, mpi yandi vingilaka kulungana ya diambu yango na ntima-nda yonso. Baprofete ya nkaka yina zingaka na ntwala na yandi samunaka mpi nsangu yina na nsungi ya bamvula mingi. Habakuki monaka nde na bilumbu na yandi mambi mpi kukonda lunungu kumaka diaka mingi. Yo yina, yandi yulaka Yehowa nde: “Mfumu Nzambi, tii nki ntangu mono fweti binga nge sambu nge kwisa kusadisa beto?” Ata Yehowa zabisaka yandi ve kilumbu yina nsuka zolaka kukwisa, yandi silaka Habakuki nde: “Yo ta konda ve,” disongidila, yo ta sukinina ve.—Tanga Habakuki 1:1-4; 2:3.

13. Inki mabanza Habakuki lendaka kuvanda na yo, mpi sambu na nki yo zolaka kuvanda kigonsa?

¹³ Yindula nde Habakuki lembaka na kuvingila lufwa ya Yeruzalemi mpi tubaka nde: ‘Mono me vingilaka lufwa ya Yeruzalemi bamvula mingi. Kilumbu yango kele kaka ntama. Yo kele mfunu ve nde mono landa na kusamuna mambu ya me tala kilumbu yango. Bantu ya nkaka mpi lenda sala kisalu yango.’ Inki zolaka kusalama kana yandi yindulaka mutindu yina? Yandi zolaka kubebisa bangwisana na yandi ti Yehowa. Diaka, kana yandi yilamaka ve sambu na lufwa ya Yeruzalemi, yandi zolaka ve kuguluka.

14. Sambu na nki beto ta vanda na ntonda na mutindu Yehowa zabisaka beto na kulanda kuvingila kilumbu na yandi?

¹⁴ Yindula nde nge kele na nsi-ntoto ya mpa. Mambu yonso yina Biblia tubaka sambu na bilumbu ya nsuka me lungana kaka mutindu Yehowa tubaka. Nge me kuma kutudila Yehowa ntima mingi kibeni mpi nge me kuma ti kivuvu ya ngolo na mambu yonso yina Yehowa me silaka. (Tanga Yozue 23:14.) Nge kele na ntonda mingi na mutindu Yehowa ponaka mbote kilumbu ya kutula nsuka na ngidika yai, mpi na mutindu yandi zabisaka bansadi na yandi na kulanda kuvingila kilumbu yango.—Bisalu 1:7; 1 Piere 4:7.

15, 16. Sambu na nki na bilumbu yai ya nsuka, beto fwete sala bikesa na kisalu ya kusamuna?

¹⁵ Organizasio ya Yehowa ke landa na kuyibusa beto na kutula dikebi na beto na kisalu ya Yehowa. Bangibusa yai ke sadisaka beto na kudipesa na kisalu ya Nzambi kaka ve kansi mpi sambu na kumonisa pwelele nde beto fwete longa nsangu kukonda kusukinina. Beto ke ndima nde kidimbu yina Yezu pesaka ke na kulungana bubu yai, mpi nde kilumbu ya Yehowa me kuma pene. Yo yina, beto  ke tulaka mambote ya Kimfumu na kisika ya ntete na luzingu na beto mpi beto ke landa na kusamuna nsangu ya mbote ya Kimfumu.—Matayo 6:33; Marko 13:10.

¹⁶ Ntangu beto ke samuna nsangu ya mbote na bantu ya nkaka, beto ke sadisa bo na kuguluka na lufwa ya nsi-ntoto yai ya Satana yina me kuma pene. Na 1945, kisumbula mosi ya mbi kibeni salamaka na nzadi-mungwa ntangu maswa mosi (Wilhelm Gustloff) dindaka. Bantu mingi fwaka. Mpangi-nkento mosi ti bakala na yandi gulukaka na kisumbula yina. Mpangi-nkento ke yibuka nde ntangu maswa vandaka kudinda, nkento mosi vandaka kudila nde: “Bavalize na mono! Bavalize na mono! Mayaka na mono ya ntalu! Mayaka na mono me dinda na masa. Mono me vidisa bima na mono yonso!” Kansi, bantu ya nkaka yina vandaka na kati ya maswa bakisaka diambu ya mfunu ya kusala na ntangu yina mpi bo salaka bikesa sambu na kugulusa luzingu ya bantu. Bubu yai mpi luzingu ya bantu kele na kigonsa. Beto fwete vanda bonso bantu yina vandaka na maswa yina monisaka ntima-mbote mpi beto fwete kudipesa na kisalu ya kusamuna yina fwete salama kukonda kusukinina. Beto fwete sadisa bantu na kuguluka na nsuka ya ngidika yai.

17. Sambu na nki beto fwete ndima nde nsuka lenda kwisa na konso ntangu yina?

¹⁷ Beto ke mona pwelele mutindu mbikudulu ya Biblia ke na kulungana mpi beto ke bakisa nde nsuka ya  ngidika yai ya mbi me kuma kibeni pene. Beto ke vingila nde “bibongo kumi” mpi “mbisi ya mfinda” kunwanisa Babilone ya Nene, disongidila kimvuka ya mabundu ya luvunu. (Kusonga 17:16) Beto fwete yindula ve nde ntangu me bikala diaka mingi na ntwala nde mambu yai kusalama. Kuvila ve nde Nzambi ta “tula na bantima na bo” ngindu ya kunwanisa kimvuka ya mabundu ya luvunu mpi yo ta salama nswalu na konso ntangu yina! (Kusonga 17:17) Nsuka ya nsi-ntoto yai ya mbi ya Satana me kuma pene. Yo yina beto fwete lemfuka na lukebisu yai ya Yezu: “Beno kudikeba sambu bantima na beno kukuma ve ata fioti kizitu na kudia mbiki, na kulutisa ndilu na kunwa malafu, mpi na basusi ya luzingu, mpi na kintulumukina kilumbu yina kubwila beno na mbala mosi bonso mutambu.” (Luka 21:34, 35; Kusonga 16:15) Bika nde beto bikala ya kukengila mpi beto kudipesa na kisalu ya Yehowa, yina “ke salaka mambu sambu na mambote ya bantu yina ke vingilaka yandi.”—Yezaya 64:4, NW.

18. Inki ngiufula beto ta tadila na disolo yina ke landa?

¹⁸ Ntangu beto ke vingila nsuka ya nsi-ntoto yai ya mbi, beto fwete sadila ndongisila yai ya Yude: “Bampangi ya mono ke zolaka mingi, beno kuditunga na zulu ya lukwikilu na beno ya kuluta santu mpi beno samba ti mpeve santu sambu beno bikala na zola ya Nzambi, na ntangu beno ke vingila mawa ya Mfumu na beto Yezu Kristu yina ke nata na luzingu ya mvula na mvula.” (Yude 20, 21) Kansi, nki mutindu beto lenda monisa nde beto ke vingila na kiese yonso nsi-ntoto ya mpa ya Nzambi yina me kuma pene? Beto ta tadila ngiufula yai na disolo yina ke landa.