Yeremia 25:1-38

  • Yehowa me sambisa makanda (1-38)

    • Makanda ta sadila Babilone bamvula 70 (11)

    • Dikopa ya vinu ya makasi ya Nzambi (15)

    • Mpasi me katuka na dikanda mosi mpi ya nkaka (32)

    • Bantu yina Yehowa ta fwa (33)

25  Ndinga kwisilaka Yeremia sambu na bantu yonso ya Yuda na mvula ya iya ya Yehoyakimi+ mwana ya Yoziasi, ntotila ya Yuda; mvula yina vandaka mvula ya ntete ya Nebukadenezare* ntotila ya Babilone.  Yai mambu yina mbikudi Yeremia tubaka sambu na* bantu yonso ya Yuda mpi bantu yonso ya Yeruzalemi:  “Katuka na mvula ya 13 ya Yoziasi+ mwana ya Amone, ntotila ya Yuda, tii bubu yai, bamvula 23 yai, ndinga ya Yehowa ke kwisilaka mono, mpi mono landaka kutubila beno mbala na mbala,* kansi beno vandaka kuwa ve.+  Mpi Yehowa tindilaka beno bansadi na yandi yonso bambikudi, yandi vandaka kutinda bo mbala na mbala,* kansi beno vandaka kuwa ve mpi beno vandaka kutula ve dikutu sambu na kuwa.+  Bo vandaka kutuba nde, ‘Pardo, beno yambula, konso muntu kuyambula banzila na yandi ya mbi+ mpi bisalu na yandi ya mbi; ebuna beno ta landa kuzinga ntangu mingi na ntoto yina Yehowa pesaka beno ti ba-nkaka na beno tuka ntama.  Beno landa ve banzambi ya nkaka, beno sadila bo ve, mpi beno fukimina bo ve, mpi beno pesa mono ve makasi na kisalu ya maboko na beno; kana ve mono ta natila beno mpasi.’  “‘Ata mpidina, beno vandaka kuwa mono ve,’ Yehowa muntu ke tuba. ‘Kansi beno pesaka mono makasi na kisalu ya maboko na beno, sambu na mpasi na beno mosi.’+  “Yo yina, Yehowa ya makesa ke tuba nde, ‘“Sambu beno zitisaka ve mambu ya mono tubaka,  mono ke binga mabuta yonso ya nordi,”+ Yehowa muntu ke tuba, “mono ke binga Nebukadenezare* ntotila ya Babilone, nsadi na mono,+ mpi mono ta nata bo sambu bo nwanisa insi yai+ ti bantu na yo, mpi makanda yai yonso ya kele na nziunga.+ Mono ta fwa bo mpi ta kumisa bo kima ya ke pesa boma, kima ya kubudila mwita, mpi mayumbu ya kimakulu. 10  Mono ta sukisa makelele ya kuyangalala mpi milolo ya kiese na kati na bo,+ ndinga ya bakala yina ke kwela mpi ndinga ya nkento yina ke kwela,+ makelele ya kima ya kunikila bambuma na maboko mpi nsemo ya mwinda. 11  Insi yai ya mvimba ta kuma mayumbu mpi kima ya ke pesa boma, mpi yo ta lomba nde makanda yai kusadila ntotila ya Babilone bamvula 70.”’+ 12  “‘Kansi ntangu bamvula 70 ta lunga,+ mono ta sambisa* ntotila ya Babilone mpi dikanda yina sambu na kifu na bo,’+ Yehowa muntu ke tuba, ‘mpi mono ta kumisa insi ya bantu ya Kaldea ntoto ya mpamba yina bantu ke zingaka ve ntangu yonso.+ 13  Mono ta lungisa na insi yina mambu yonso ya mono tubaka sambu na yo, mambu yonso ya bo me sonika na mukanda yai yina Yeremia me bikula sambu na makanda yonso. 14  Sambu makanda mingi mpi bantotila ya nene+ ta kumisa bo bampika,+ ebuna mono ta futa bo na kutadila bisalu na bo mpi kisalu ya maboko na bo.’”+ 15  Sambu Yehowa Nzambi ya Izraele tubilaka mono nde: “Baka dikopa yai ya vinu ya makasi na diboko na mono, mpi nwisa yo makanda yonso yina mono ke tinda nge. 16  Bo ta nwa yo, bo ta tambula na lunziungu, mpi bo ta sala mambu bonso bantu ya kilawu sambu na mbele ya bitumba yina mono ke tinda na kati na bo.”+ 17  Yo yina mono bakaka dikopa yina na maboko ya Yehowa mpi mono nwisaka makanda yonso yina Yehowa tindaka mono:+ 18  yantika na Yeruzalemi mpi na bambanza ya Yuda,+ na bantotila na yo ti bamfumu na yo, sambu na kukumisa bo mayumbu, kima ya ke pesa boma, kima ya kubudila mwita mpi lusingu,+ mutindu yo kele bubu yai; 19  na nima Farao ntotila ya Ezipte ti bansadi na yandi, bamfumu na yandi, ti bantu na yandi yonso,+ 20  mpi banzenza yonso yina ke zingaka kuna; bantotila yonso ya insi ya Usi; bantotila yonso ya insi ya bantu ya Filistia,+ Ashkeloni,+ Gaza, Ekroni, mpi bantu ya Ashdodi yina me bikala; 21  Edomi,+ Moabi,+ mpi bantu ya Amoni;+ 22  bantotila yonso ya Tire, bantotila yonso ya Sidoni,+ mpi bantotila ya kisanga yina kele na nzadi-mungwa; 23  Dedani,+ Tema, Buze, mpi bantu yonso yina bo me zengaka nsuki na bo yina kele na lweka ya ntu, pene-pene ya dikutu;+ 24  bantotila yonso ya bantu ya Arabia+ mpi bantotila yonso ya banzenza yina ke zingaka na ntoto-makanga; 25  bantotila yonso ya Zimri, bantotila yonso ya Elami,+ mpi bantotila yonso ya bantu ya Media;+ 26  bantotila yonso ya nordi, bayina kele pene-pene mpi bayina kele ntama, mosi-mosi, mpi bimfumu yonso ya nkaka ya nsi-ntoto yina kele na zulu ya ntoto; ebuna ntotila ya Sheshaki*+ ta nwa na nima na bo. 27  “Mpi nge fwete tubila bo nde, ‘Yehowa ya makesa, Nzambi ya Izraele, ke tuba nde: “Beno nwa, beno lawuka, beno luka, mpi beno bwa sambu beno kuka diaka ve kutelama+ sambu na mbele ya bitumba yina mono ke tinda na kati na beno.”’ 28  Kana bo buya kubaka dikopa na maboko na nge sambu na kunwa, tubila bo nde, ‘Yehowa ya makesa ke tuba nde: “Beno fwete nwa yo! 29  Sambu tala! kana mono ke nata ntete mpasi na mbanza yina kele ti zina na mono,+ keti beno ta konda kubaka ndola?”’+ “‘Beno fwete baka kibeni ndola, sambu mono ke nata mbele ya bitumba sambu na kunwanisa bantu yonso ya ntoto,’ Yehowa ya makesa muntu me tuba. 30  “Mpi nge fwete bikudila bo mambu yai yonso mpi kutubila bo nde,‘Yehowa ta ngana katuka na zulu,Mpi yandi ta sala nde ndinga na yandi kuwakana katuka na kisika ya santu ya yandi ke zingaka. Yandi ta ngana ngolo na kisika ya yandi ke zingaka. Yandi ta tula milolo bonso bantu yina ke niata-niataka bambuma ya vinu na kikamuninu ya vinu,Yandi ta yimba sambu na kusonga nde yandi me nunga bantu yonso ya ke zingaka na ntoto.’ 31  ‘Makelele ta wakana tii na nsuka ya ntoto,Sambu Yehowa kele na ntembe ti makanda. Yandi mosi ta sambisa bantu yonso.*+ Mpi yandi ta fwa bantu ya mbi na mbele ya bitumba,’ Yehowa muntu me tuba. 32  Yehowa ya makesa ke tuba nde: ‘Tala! Mpasi ke panzana katuka na dikanda mosi tii na dikanda ya nkaka,+Mpi mupepe ya ngolo ta katuka na bisika ya kuluta ntama ya ntoto mpi ta bula.+ 33  “‘Mpi bantu yina Yehowa ta fwa na kilumbu yina ta vanda katuka na nsuka mosi ya ntoto tii na nsuka ya nkaka ya ntoto. Bo ta dila bo ve, bo ta vukisa bo ve, mpi bo ta zika bo ve. Bo ta kuma bonso nsasa na zulu ya ntoto.’ 34  Beno bangungudi, beno dila, mpi beno boka! Beno baluka na ntoto, beno bantu ya nene ya kibuka ya bitwisi,Sambu ntangu ya kufwa beno mpi ya kupanza beno me kwisa,Mpi beno ta bwa bonso dibungu ya kitoko! 35  Bangungudi kele ve ti kisika ya kutina,Mpi mpila ya kutina kele ve sambu na bantu ya nene ya kibuka ya bitwisi. 36  Beno wa! Bidilu ya bangungudiMpi kudila ya bantu ya nene ya kibuka ya bitwisi,Sambu Yehowa ke bebisa nseke na bo. 37  Mpi bisika ya kuzinga ya ngemba me bikala kukonda luzinguSambu na makasi ya ngolo ya Yehowa. 38  Yandi me yambula kisika na yandi ya kulala kaka bonso mwana-ntambu,*+Sambu insi na bo me kuma kima ya ke pesa bomaSambu na mbele ya bitumba ya nkuMpi sambu na makasi na yandi ya ngolo.”

Banoti na nsi ya lutiti

Na kisina, “Nebukadrezare,” mutindu ya nkaka ya kusonika yo.
To “tubaka na.”
Na kisina, “mono landaka kutelama na suka-suka mpi kutubila beno.”
Na kisina, “yandi vandaka kutelama na suka-suka mpi kutinda bo.”
Na kisina, “Nebukadrezare,” mutindu ya nkaka ya kusonika yo.
To “ta pesa ndola na.”
Yo ke monana nde yo kele zina ya Babele (Babilone) ya bo me sonika na bisono ya kinsweki.
Na kisina, “nsuni yonso.”
To “mwana-ntambu yina kele ti mika mingi na nkingu.”