Kwenda na mambu ke na kati

Kwenda na tansi ya malongi

 APPENDICE

Yezu Kristu Kele Mesia ya Lusilu

Yezu Kristu Kele Mesia ya Lusilu

SAMBU na kusadisa beto na kuzaba Mesia, Yehowa Nzambi kupesaka mpeve na baprofete mingi ya Biblia na mpila nde bo pesa beto bansangu mingi ya metala lubutuku, kisalu, mpi lufwa ya Ngulusi yai ya lusilu. Bambikudulu yai yonso ya Biblia kulunganaka na Yezu Kristu. Busikisiki na yo mpi mambu ya fyoti-fyoti  ya yo ketubilaka keyitukisa mpenza. Sambu na kumonisa dyambu yai, bika beto tadila mwa ndambu ya bambikudulu yina kutubilaka na ntwala mambu ya metala lubutuku mpi bumwana ya Mesia.

Profete Yezaya kutubaka na ntwala nde Mesia tabutuka na dikanda ya Ntotila Davidi. (Yezaya 9:6) Yezu kubutukaka mpenza na dikanda ya Davidi.—Matayo 1:1, 6-17.

 Mishe, profete yankaka ya Nzambi, kutubaka na ntwala nde nsukansuka mwana yai takuma mfumu mpi nde yandi tabutuka na “Betelemi Efrata.” (Mishe 5:2NW) Ntangu Yezu kubutukaka, bambanza zole ya Izraele kuvandaka ti zina ya Betelemi. Mosi kuvandaka penepene ya Nazareti na ndambu ya nordi, mpi yina yankaka, kuvandaka penepene ya Yeruzalemi na Yuda. Bo vandaka kubinga ntete Betelemi yina kuvandaka penepene ya Yeruzalemi nde Efrata. Yezu kubutukaka na mbanza yina, kaka mutindu mbikudulu kutubaka yo na ntwala!—Matayo 2:1.

Mbikudulu yankaka ya Biblia kutubaka na ntwala nde bo tabinga Mwana ya Nzambi katuka “na nsi ya Ezipte.” Ntangu Yezu vandaka mwana, bo nataka yandi na Ezipte. Bo kwisaka kuvutula yandi na nima ya lufwa ya Erode, mpi yo lungisaka mbikudulu.—Ozea 11:1; Matayo 2:15.

Na tablo “ Bambikudulu ya Metala Mesia 200,” baverse yina bo metula na nsi ya ntu-dyambu “Mbikudulu” kele ti mambu ya metala Mesia. Beto kelomba nge na kufwanisa yo ti baverse yina bo metula na nsi ya ntu-dyambu “Kulungana.” Kusala mutindu yina takumisa dyaka lukwikilu na nge ngolo na bukyeleka ya Ndinga ya Nzambi.

Ntangu nge ketadila baverse yai, kuvila ve nde bo sonikaka baverse yina kele bambikudulu bankama ya bamvula na ntwala nde Yezu kubutuka. Yezu kutubaka nde: “Mambu yina yonso ya bo sonikaka na mikanda ya Bansiku ya Moize, na mikanda ya baprofete, ti na mukanda ya Bankunga, mambu yina fweti kulunga.” (Luka 24:44) Mutindu nge lenda mona yo na Biblia na nge, mambu yina yonso kulunganaka mpenza!