„სწორედ ეს არის ღვთის უწმინდესი და უდიადესი სახელი“

ეს სიტყვები 1430 წელს ნიკოლას კუსელმა * ქადაგების დროს წარმოთქვა. იგი მრავალი დარგით იყო დაინტერესებული; სწავლობდა ბერძნულს, ებრაულს, ფილოსოფიას, თეოლოგიას, მათემატიკასა და ასტრონომიას. 22 წლის ასაკში ნიკოლას კუსელი რომის კათოლიკური კანონიკური სამართლის დოქტორი გახდა, 1448 წელს კი — კარდინალი.

დაახლოებით 550 წლის წინათ ნიკოლას კუსელმა ქალაქ კუსში (ამჟამად ბერნკასტელ-კუსი, მდებარეობს ბონის სამხრეთით 130 კილომეტრში) გახსნა მოხუცებულთა სახლი. მოგვიანებით ეს შენობა კუსელის სახელობის ბიბლიოთეკად გადაკეთდა, სადაც დღეისათვის 300-ზე მეტი ხელნაწერი ინახება. ერთ-ერთი მათგანია „კუსანუსის კოდექსი 220“, რომელშიც ჩაწერილია 1430 წელს კუსელის მიერ წარმოთქმული ქადაგება. ამ ქადაგების * ლათინური სახელწოდებაა „ინ პრინციპიო ერატ ვერბუმ“ („დასაწყისში იყო სიტყვა“). როგორც ამ ხელნაწერიდან ჩანს, ნიკოლას კუსელმა ქადაგების დროს გამოიყენა ღვთის სახელი იეჰოვა, რომელიც ლათინურად წარმოითქმებოდა, როგორც „იეჰოუა“. ამ ხელნაწერის 56-ე გვერდზე ღვთის სახელის შესახებ ნათქვამია: „ეს სახელი ღმერთმა თვითონ უწოდა საკუთარ თავს. ეს არის ტეტრაგრამატონი, ანუ ოთხი ასოსგან შემდგარი სახელი . . . სწორედ ეს არის ღვთის უწმინდესი და უდიადესი სახელი“. ნიკოლას კუსელის ეს ციტატა კიდევ ერთხელ ადასტურებს იმ ფაქტს, რომ ებრაული წერილების დედანი შეიცავს ღვთის სახელს (გამ. 6:3).

ეს კოდექსი მე-15 საუკუნის დასაწყისში შეიქმნა. ის ერთ-ერთი უძველესი დოკუმენტია, რომელშიც ტეტრაგრამატონი გადმოტანილია, როგორც „იეჰოუა“. ეს დოკუმენტი კიდევ ერთი მტკიცებაა იმისა, რომ ღვთის სახელის, „იეჰოვას“, მსგავსი ფორმები წერილობითი სახით საუკუნეების განმავლობაში გამოიყენებოდა.

[სქოლიოები]

[სურათი 16 გვერდზე]

კუსელის ბიბლიოთეკა