Maeka 1:1-16
1 Ẹme Jihova nọ o bru Maeka*+ ohwo Morẹshẹt ze evaọ oke Jotam,+ Ehaz,+ gbe Hẹzikaya,+ ivie Juda,+ gbe ẹme nọ ọ jọ eruẹaruẹ yo kpahe Sameria gbe Jerusalẹm:
2 “Wha yo whai ahwo kpobi!
Gaviezọ, O otọakpọ gbe eware nọ e rrọ eva riẹ,Jọ Jihova Olori nọ Ọ Mai Kpehru na o se isẹri kpe owhai+—Jihova ọ rrọ evaọ etẹmpol ọrẹri riẹ.
3 Keme rri! Jihova o bi no oria riẹ vrẹ;Ọ te ziọ otọ, o ve thihi eria ikpehru otọakpọ na.
4 Igbehru na e te ghra evaọ otọ awọ riẹ,+Ikiekpotọ* e te hẹriẹWọhọ iwhri nọ erae e be ghra,Wọhọ ame nọ a ku fihọ oria nọ u kuwhrẹrẹ gaga.
5 Enana kpobi e te via fiki ọkparesuọ Jekọp,Fiki izieraha uwou Izrẹl.+
Ono ọ wha ọkparesuọ Jekọp ze?
Kọ ogbẹrọnọ Sameria?+
Kọ ono o ru nọ eria ikpehru e rọ rrọ Juda?+
Kọ ogbẹrọnọ Jerusalẹm?
6 Me ti ru Sameria zihe ruọ ẹko ẹwhere nọ ọ rrọ udhu,Oria nọ a rẹ kọ egbọ-evaene fihọ;Me ti gbolo* itho riẹ fihọ ukiekpotọ na,Mẹ te tọ etọhotọ riẹ rovie fihọ.
7 A te whọlọ emema riẹ kpobi ehehẹhẹ,+A te rehọ erae mahe ekẹ kpobi nọ ọ rehọ igberẹ-ibro riẹ wo.*+
Mẹ te raha emedhọ riẹ kpobi no.
Keme osa igberẹ-ibro o ro wo ai,A vẹ te rehọ ae hwosa kẹ igberẹ evaọ eria efa.”
8 Fiki onana me ti bo je kuenu oviẹ;+Mẹ te rọ evawọ gheghe nya avọ ẹbẹba.+
Ubo mẹ o te jọ wọhọ orọ ikozi,Uweri mẹ o vẹ te jọ wọhọ orọ igomugoro.
9 Keme a rẹ sai siwi ola riẹ kpo ho;+O kẹre te ugbo obọ Juda no.+
Omonwa na o kẹre te unuẹthẹ ahwo mẹ no, Jerusalẹm.+
10 “Wha whowho iei evaọ Gat he;Wha viẹ vievie he.
Wha jọ otọ ghelie evaọ Bẹt-afra.*
11 Wha rọ ẹbẹba gbe omovuọ nyavrẹ, O ahwo nọ a be rria* Shefẹ.
Ahwo nọ a be rria Zeanan a* re wọ lahwe he.
A te jọ Bẹt-izẹl kuenu oviẹ, ọ gbẹ te sae tha owhai uke he.
12 Ahwo nọ a be rria Merọt a* be hẹrẹ nọ ewoma ọ te ze,Rekọ oware uyoma u no obọ Jihova ziọ unuẹthẹ Jerusalẹm no.
13 Wha gba akẹkẹ na fihọ enyenya na, O ahwo nọ a be rria* Lekish.+
Whai họ enọ e wha uzioraha ọmọtẹ Zayọn ze,Keme eva riẹ a jọ ruẹ ọkparesuọ Izrẹl.+
14 Whọ te kẹ Morẹshẹt-gat ekẹ rọ hẹriẹ iẹe uwou.*
Iwou Akzib+ e jọ oware eviẹhọ kẹ ivie Izrẹl.
15 Mẹ te rehọ ọnọ o re fi kparobọ* na bru owhai ze,+ O ahwo nọ a be rria* Marishah.+
Oruaro Izrẹl o te nya thabọ te obọ Adọlam.+
16 Wha nware eto rai jẹ fọrọ eto uzou rai muotọ fiki emọ eghaghae rai.
Wha fọrọ oma rai fihọ rioriorio wọhọ udele,*Keme a mu rai siọ owhai ba kpohọ igbo no.”+
Eme-Obotọ
^ Ubro odẹ na, Maekẹl hayo Maekaya, onọ otofa riẹ o rrọ “Ono Ọ Wọhọ Jihova?”
^ Hayo “Ikiekpotọ epraprara.”
^ Evaọ Hibru, “ku.”
^ Hayo “osa igberẹ-ibro riẹ kpobi.”
^ Hayo “evaọ uwou Afra.”
^ Evaọ Hibru, “aye nọ ọ be rria.”
^ Evaọ Hibru, “Aye nọ ọ be rria Zeanan ọ.”
^ Evaọ Hibru, “Aye nọ ọ be rria Merọt ọ.”
^ Evaọ Hibru, “aye nọ ọ be rria.”
^ Hayo “ekẹ akodẹ.”
^ Hayo “ọnọ o re mi ahwo eware rai rehọ no.”
^ Evaọ Hibru, “aye nọ ọ be rria.”
^ Ẹme Hibru nọ a fa udele na o sai je dhesẹ ugo.
