Ikelakele 12:1-16
12 Miriam avọ Erọn a tẹ jẹ ta ẹme wọso Mosis fiki aye Kush nọ ọ rehọ, keme aye nọ ọ rehọ na ohwo Kush.+
2 A jẹ ta nọ: “Kọ ẹkwoma Mosis ọvo Jihova ọ rọ ta ẹme no? Kọ ọ gbẹ rọ ẹkwoma mai ta ẹme no re?”+ Yọ Jihova ọ jẹ gaviezọ.+
3 Whaọ Mosis họ ọzae nọ ọ mai wolẹ kpaobọ evaọ usu ahwo kpobi*+ nọ a jọ otọakpọ na.
4 Ẹsiẹvo na Jihova ọ tẹ ta kẹ Mosis avọ Erọn gbe Miriam nọ: “Whai imasa na wha nya kpobọ uwou-udhu omakugbe na.” Fikiere aimasa na a tẹ nya.
5 Jihova o te nwrotọ ze evaọ ukulu ẹgho*+ na o te dikihẹ unuẹthẹ uwou-udhu na o te se Erọn avọ Miriam. Aimava a tẹ nya lahwe.
6 Ọ tẹ ta nọ: “Ivie, wha gaviezọ kẹ omẹ. Otẹrọnọ ọruẹaro Jihova jọ ọ rrọ udevie rai, evaọ eruẹaruẹ me re jo dhesẹ oma kẹe,+ yọ evaọ ewezẹ mẹ rẹ jọ ta ẹme kẹe.+
7 Rekọ ere o rrọ kẹ Mosis odibo mẹ hẹ! Me mu uwou mẹ soso họ iẹe obọ.*+
8 Me re lele iei ta ẹme ovao dhe ovao,*+ vevẹ, orọnikọ ẹkwoma ehare* he; yọ ọ be ruẹ oghẹrẹ nọ Jihova ọ rrọ. Kọ fikieme ozọ u gbe mu owhai hi re wha ta ẹme wọso odibo mẹ, wọso Mosis?”
9 Fikiere eva e tẹ dha Jihova kẹ ae gaga, ọ tẹ nyase ae ba.
10 Ẹgho na o te no ehru uwou-udhu na, whaọ rri! oti ọ ruọ Miriam oma no nọ o be fo wọhọ ekpalekpa-ame.+ Erọn o te rri Miriam, ọ tẹ ruẹ nọ a rọ oti tehe iẹe no.+
11 Ababọ oke oraha, Erọn ọ tẹ ta kẹ Mosis nọ: “Mẹ lẹ owhẹ, olori mẹ! Ivie, who kele uzioraha nana kẹ omai hi! Oware ugheghẹ ma ru na.
12 Ivie, whọ kuvẹ re ọ jọ enẹ ọvo wọhọ ohwo owhuowhu hu, ọnọ abọjọ uwo-oma riẹ u gbo no evaọ okenọ a ro yẹi!”
13 Mosis o te mu Jihova họ ebo se nọ: “O Ọghẹnẹ, ivie siwi ei! Ivie!”+
14 Jihova ọ tẹ kpahe kẹ Mosis nọ: “Otẹrọnọ ọsẹ riẹ o nwo eya ku ei ovao, kọ onana u gbe ti kpomovuọ họ iẹe oma edẹ ihrẹ? Jọ a fi ei họ oria riẹ sa edẹ ihrẹ evaọ obọ otafe evuẹ na,+ uwhremu na a vẹ rehọ iẹe zihe ze.”
15 Fikiere a te fi Miriam họ oria riẹ sa evaọ obọ otafe evuẹ na edẹ ihrẹ,+ yọ ahwo na a wọ no etẹe ruọ edhere he bẹsenọ a rọ rehọ Miriam zihe ze.
16 Uwhremu na ahwo na a tẹ wọ no Hazirọt+ a te mu udhude Peran họ ewohọ.+
Eme-Obotọ
^ Hayo “ọ jẹ romakpotọ gaga, tube vi amọfa kpobi.”
^ Evaọ Hibru, “ipila ẹgho.”
^ Evaọ Hibru, “Evaọ uwou mẹ soso, o bi dhesẹ nọ ọyomariẹ yọ ohwo nọ a re fievahọ.”
^ Evaọ Hibru, “unu dhe unu.”
^ Hayo “oze.”
