Eviavia Rọkẹ Jọn 6:1-17
-
Omogodẹ na o si eka ihrẹ nọ a rọ gba uko-obe na di na no (1-17)
-
Ọnọ ọ keria anyenya ọfuafo na o bi fi kparobọ (1, 2)
-
A ta kẹ ọnọ ọ be dhẹ anyenya ọwawae na inọ ọ tọlọ udhedhẹ no (3, 4)
-
A ta kẹ ọnọ ọ be dhẹ anyenya obiebi na inọ ọ wha ohọo ze (5, 6)
-
Uwhu họ odẹ ọnọ ọ be dhẹ anyenya ọviẹviẹ na (7, 8)
-
Ahwo nọ a kpe a rrọ otọ agbada-idhe na (9-11)
-
Otọ nọ u nuhu gaga (12-17)
-
6 Mẹ tẹ ruẹ Omogodẹ na+ nọ o si ovo jọ evaọ usu eka ihrẹ na no,+ me te yo nọ ọvo jọ evaọ usu emama ene nọ e rrọ uzuazọ na+ ọ rehọ urru nọ u do wọhọ agbrara ta nọ: “Nyaze!”
2 Mẹ tẹ ruẹ anyenya ọfuafo,+ yọ ọnọ ọ keria ehru riẹ o kru uze; a kẹ riẹ etu-uvie,+ ọ tẹ dhẹ vrẹ bi fi kparobọ, re o fi kparobọ riẹriẹriẹ.+
3 Nọ o si oka avọ ivẹ na no, me te yo nọ omama avọ ivẹ nọ o rrọ uzuazọ na+ ọ ta nọ: “Nyaze!”
4 Anyenya ọfa ọ tẹ lahwe, anyenya nọ ọ rrọ wawae wọhọ erae, yọ a kẹ ọnọ ọ keria ehru riẹ udu re o si udhedhẹ no otọakpọ na re ahwo a kpe ohwohwo, a kẹ riẹ ọgbọdọ ologbo.+
5 Nọ o si oka avọ esa+ na no, me te yo nọ omama avọ esa nọ o rrọ uzuazọ na+ ọ ta nọ: “Nyaze!” Kẹsena mẹ tẹ ruẹ anyenya obiebi, yọ ọnọ ọ keria ehru riẹ o kru iskeli họ obọ.
6 Me te yo edo jọ nọ o wọhọ urru evaọ udevie emama ene nọ e rrọ uzuazọ na nọ o ta nọ: “Unuigho ugbogbo* iwhiti họ dinariọs,*+ yọ unuigho igbogbo esa ebali họ dinariọs; rekọ whọ raha ewhri olivi na gbe enwaene na ha.”+
7 Nọ o si oka avọ ene na no, me te yo urru omama avọ ene nọ o rrọ uzuazọ na+ nọ ọ ta nọ: “Nyaze!”
8 Mẹ tẹ ruẹ anyenya ọviẹviẹ, yọ odẹ ọnọ ọ keria ehru riẹ họ Uwhu. Yọ Uki* u bi lele iei kpekpekpe. A kẹ rai udu kpahe abọvo abane otọakpọ na, re a rehọ ọgbọdọ othethei gbe ohọo+ gbe ẹyao ọgaga gbe erao ijihẹ otọakpọ na+ ro kpe ahwo.
9 Nọ o si oka avọ isoi na no, mẹ tẹ jọ otọ agbada-idhe na+ ruẹ izuazọ*+ enọ a kpe fiki ẹme Ọghẹnẹ gbe fiki isẹri nọ a se.+
10 A tẹ rọ urru oruarua bo nọ: “Ẹvẹ u ti kri te, Olori nọ Ọ Mai Kpehru, nọ ọ rrọ ọrẹri jẹ rrọ ọrọ uzẹme na,+ re who te bruoziẹ ahwo nọ a be rria otọakpọ na jẹ kioja azẹ mai?”+
11 A tẹ rehọ ewu othethei ọfuafo kẹ ae omomọvo,+ a tẹ ta kẹ ae nọ a gbe serihọ omojọ, bẹsenọ unu ibe erigbo rai gbe inievo rai nọ a bi ti kpe wọhọ ae omarai o rẹ gba no.+
12 Mẹ ruẹ e riẹ nọ o si oka avọ ezeza na no, otọ u te nuhu gaga; ọre na ọ tẹ jọ biebi wọhọ ohọ-ekpa* nọ a rọ eto* ru, ọvẹre na kpobi ọ tẹ wọhọ azẹ,+
13 isi obọ ehru* i te kie fihọ otọakpọ na wọhọ epanọ ibi ure ifigi nọ e re ware he e rẹ kpare kie nọ ofou ọgaga o te fou rie.
14 Odhiwu na ọ tẹ vrẹ no wọhọ uko-obe nọ a bi kpiri,+ ugbehru kpobi gbe ukoliko kpobi u te no oria riẹ.+
15 Kẹsena ivie otọakpọ na, enọ e rrọ ahwo ologbo evaọ esuo, enọ i wuzou egbaẹmo, edafe, egba, erigbo kpobi gbe emuyẹ kpobi a te dhere ighogho-itho gbe udevie igbehru-itho.+
16 A tẹ be ta kẹ igbehru gbe itho na nọ: “Wha kie ruru omai+ re wha ko omai dhere no ovao Ọnọ ọ keria agbara-uvie na+ je no ofu Omogodẹ na,+
17 keme ẹdẹ ologbo ọrọ ofu rai ọ ze no,+ kọ ono ọ rẹ sai dikihẹ?”+
Eme-Obotọ
^ Hayo “kwọto.” Rri Ẹme-Ofiba B14.
^ Dinariọs yọ ubiugho isiliva orọ ahwo Rom nọ o jọ osa iruo okpẹdẹ. Rri Ẹme-Ofiba B14.
^ Hayo “ohọ-ẹkporo.”
^ O sae jọ nọ eto ẹwe.
^ Hayo “odhiwu.”
