Eviavia Rọkẹ Jọn 14:1-20

  • Omogodẹ na avọ ahwo idu udhuhrẹ-gbene na (1-5)

  • Evuẹ nọ ikọ-odhiwu esa a whowho (6-12)

    • Ukọ-odhiwu nọ o bi whowho usi uwoma evaọ idadeghe (6, 7)

  • Eva e were enọ e rrọ usu kugbe Kristi nọ i whu (13)

  • Ivuẹvu ivẹ erọ otọakpọ na (14-20)

14  Kẹsena mẹ tẹ ruẹ Omogodẹ na+ nọ o dikihẹ Ugbehru Zayọn,+ avọ ahwo idu udhuhrẹ-gbene (144,000)+ nọ e rrọ kugbei, enọ a kere odẹ riẹ avọ odẹ Ọsẹ riẹ+ họ aruezo rai.  Me te yo edo jọ nọ o bi no obọ odhiwu ze wọhọ edo ame obuobu jẹ wọhọ edo agbrara ọgaga; edo nọ me yo na o wọhọ uvou ahwo nọ a be so ile je bi kporo ekpata rai.  A be so ole nọ o wọhọ ole ọkpokpọ+ evaọ aro agbara-uvie na gbe aro emama ene nọ e rrọ uzuazọ+ na avọ ekpako na,+ yọ ohwo ọvo ọ sae riẹ ole na ha ajokpaọ ahwo idu udhuhrẹ-gbene (144,000)+ na, nọ a dẹ no otọakpọ na vrẹ.  Enana họ enọ i zue omarai hi, nọ i lele eyae wezẹ hẹ; evaọ uzẹme, a rrọ kọkọ.+ Enana họ enọ i bi lele Omogodẹ na ẹsikpobi kpohọ oria kpobi nọ ọ be nya.+ A dẹ enana+ no udevie ahwo-akpọ ze wọhọ ibi ọsosuọ+ rọkẹ Ọghẹnẹ gbe Omogodẹ na,  yọ a ruẹ eviẹhọ evuevo evaọ unu rai hi; a kare epe.+  Mẹ tẹ ruẹ ukọ-odhiwu ọfa nọ ọ be rra evaọ idadeghe,* yọ o bi whowho usi uwoma ebẹdẹ bẹdẹ kẹ enọ e be rria otọakpọ na, kẹ orẹwho, orua, ẹrọunu* gbe utu ahwo kpobi.+  Ọ jẹ rọ urru oruarua ta nọ: “Wha dhozọ Ọghẹnẹ jẹ kẹe oruaro, keme auwa ẹdhoguo riẹ o te no,+ fikiere wha gọ Ọnọ ọ ma odhiwu na gbe otọakpọ na gbe abade+ na gbe iyeri-ame* na.”  Ukọ-odhiwu ọfa, ọrọ avọ ivẹ o te lele iei, be ta nọ: “O kie no! Babilọn Ologbo+ na o kie no,+ ọnọ o ru erẹwho na kpobi da enwaene isiuru egaga* ọfariẹ-ogbe*+ riẹ!”  Ukọ-odhiwu ọfa, ọrọ avọ esa o te lele ai, be rọ urru oruarua ta nọ: “Otẹrọnọ ohwo jọ ọ gọ arao ojihẹ+ na avọ ẹmema riẹ, jẹ rọwo nọ a kpe oka họ aruezo hayo obọ riẹ,+ 10  ọ te da enwaene ofu Ọghẹnẹ re, onọ a gua ha nọ a ku fihọ egho ofu ọgaga Riẹ,+ a vẹ te rehọ erae gbe isọ-ọre+ lahiẹ iẹe evaọ aro ikọ-odhiwu erẹri na gbe aro Omogodẹ na. 11  Iwiri olahiẹ rai i ti kuye bẹdẹ bẹdẹ,+ yọ te aso te uvo a wo eriosehọ họ, enọ e be gọ arao ojihẹ na avọ ẹmema riẹ, gbe ohwo kpobi nọ o wo oka odẹ+ riẹ. 12  Etenẹ o jọ gwọlọ ithihakọ mi erẹri na,+ enọ i bi koko ijaje Ọghẹnẹ je kru ẹrọwọ+ nọ a fihọ* Jesu gaga.” 13  Me te yo urru jọ nọ u no obọ odhiwu ze, nọ o ta nọ, “Kere nọ: Eva e were ahwo nọ a whu evaọ usu rai kugbe Olori na+ no umuo oke nana vrẹ. Ẹhẹ, ẹzi na ọ be ta nọ, jọ a serihọ no iruo egaga rai, keme eware nọ a ru i bi lele ai ovavo.”* 14  Kẹsena mẹ tẹ ruẹ ẹgho ọfuafo, yọ ohwo jọ ọ keria ehru ẹgho na nọ ọ wọhọ ọmọ ohwo,+ avọ etu-uvie igoru nọ o rrọ uzou riẹ yọ o kru ojale odada họ obọ. 15  Ukọ-odhiwu ọfa o te no oria aruẹri etẹmpol na ze, be rọ urru oruarua ta kẹ ọnọ ọ keria ehru ẹgho na nọ: “Rehọ ojale ra muhọ ẹkọrọ, keme auwa ẹkọrọ o te no, yọ ekakọ otọakpọ na e ware ziezi no.”+ 16  Ọnọ ọ keria ehru ẹgho na o te dhe ojale riẹ họ otọakpọ na, ọ tẹ kọrọ ekakọ otọakpọ na. 17  Ukọ-odhiwu ọfa o te je no oria aruẹri etẹmpol nọ o rrọ obọ odhiwu na ze, yọ o kru ojale odada re. 18  Ukọ-odhiwu ọfa o te je no oria agbada-idhe na ze, yọ o wo udu nọ o re ro ru erae na epanọ u je rie. Ọ tẹ rọ urru oruarua bo se ukọ-odhiwu nọ o kru ojale odada na nọ: “Rehọ ojale odada ra muhọ ẹkọrọ re who koko ewhala evaene otọakpọ na họ, keme ibi riẹ e ware no.”+ 19  Ukọ-odhiwu na o te dhe ojale riẹ họ otọakpọ na o te koko evaene otọakpọ na họ, o te gbolo iei fihọ ọgọdọ udi-uruo ulogbo orọ evedha Ọghẹnẹ.+ 20  A te thihi ibi evaene nọ e rrọ ọgọdọ udi-uruo na evaọ otafe okpẹwho na, azẹ o te no ọgọdọ udi-uruo na ze nọ o kpehru te ifi nọ a rọ gba enu enyenya na je thabọ te istediọmo odu ọvo gbe egba ezeza (1,600).*

Eme-Obotọ

Hayo “rra evaọ ofou; rra ehru uzou vrẹ.”
Hayo “ẹvẹrẹ.”
Hayo “eria nọ ame o bi no ze.”
Hayo “evedha.”
Evaọ Griki, por·neiʹa. Rri oria Otofa Eme.
Evaọ Griki, “ẹrọwọ ọrọ.”
Hayo “e rọ kpahe ae.”
Oware wọhọ ikilomita 296 (emaele 184). Istediọmo ọvo o te imita 185 (606.95 ft). Rri Ẹme-Ofiba B14.