Indu tjaa zuvarisa kombanda yehi, Jesus aa hungire ohunga nomapu omengi. Otjotjihorera, eye wa honga ovemukongorere omuano wokukumba, omuano mu mave yenene okuyorokisa Mukuru, nokutja mave yenene vi okumuna ondjoroka yatjiri. (Mateus 6:5-13; Markus 12:17; Lukas 11:28) Posi ya epu Jesus nda hungirire ko tjinene, ra ri Ouhona wa Mukuru ndaari epu nda suverere tjinene.—Lukas 6:45.

Otja tji pa raisiwa morupa ndwa kapita, Jesus aa ungurisa ehupo re ‘okuzuvarisa Ombuze Ombwa youhona.’ (Lukas 8:1) Eye we riyandjera omuini okukayenda omikato omire moIsrael atjihe kokutja ma honge ovandu ohunga nOuhona wa Mukuru. Otjiungura tjokuzuvarisa tja Jesus tja tjangwa mOmaevangeli yane. Ovatjange vOmaevangeli ngo va tjanga ohunga nOuhona povikando vyokombanda 100. Oviṋa ovingi mbi va tjanga vi munikwa momambo wa Jesus, posi ya Jesus wa hungira povikando ovingi ohunga nOuhona wa Mukuru pu imbi mbi va tjanga.—Johanes 21:25.

Ongwaye Ouhona wa Mukuru tji wa ri ounanḓengu ku Jesus indu tjaari kombanda yehi? Epu rimwe orondi rokutja, Jesus aa tjiwa kutja Mukuru we mu toorora okurira Ombara yOuhona mbwo. (Jesaja 9:6; Lukas 22:28-30) Posi ya Jesus ka yandjere ombango komasa ngu ma kara na wo, poo okurietera omuini ohiviro. (Mateus 11:29; Markus 10:17, 18) Eye kaa zuvarisa ombuze yOuhona mena rouwa mbu ma munu. Epu enanḓengu Jesus maari nonḓero mOuhona wa Mukuru, a ya ri mena roviṋa Ouhona mbwo mbu mau katjitira Ihe womeyuru novemukongorere ovaṱakame mba suvera.

OVIṊA OUHONA WA MUKURU MBU MAU KATJITIRA IHE YA JESUS

Jesus wa suvera Ihe tjinene. (Omiano 8:30; Johanes 14:31) Eye wa suvera ovikaṋena vya Ihe oviwa mbi: Orusuvero rwe nousemba we. (Deuteronomium 32:4; Jesaja 49:15; 1 Johanes 4:8) Otjiperi kutja, Jesus ka vanga okuzuva ovizeze mbi handjaurwa ohunga na Ihe, ovizeze tjimuna Mukuru ke rikendere komauzeu wovandu nokutja Mukuru u vanga kutja tu mune omauzeu. Indi ondaari epu rimwe Jesus nda zuvarisire “Ombuze Ombwa youhona” nonḓero. Eye aa tjiwa kutja moruveze rwatjimanga Ouhona mbwo mau yapura ena ra Ihe. (Mateus 4:23; 6:9, 10) Omomuano uṋe mu mau tjiti nao?

Okupitira mOuhona we, Jehova ma tjiti omarundurukiro omanene kombanda yehi, ngu maye eta ouwa kovandu. “Eye ma pyoṋa omahoze aehe” momeho wovandu ovaṱakame. Jehova ma isa po oviṋa avihe mbi tjita kutja tu rire, pu mape hee kutja, ‘onḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.’ (Omavandururiro 21:3, 4) Okupitira mOuhona, Mukuru ma isa po omauzeu ayehe wovandu. b

Katjikumise kutja Jesus wa ri nonḓero okuraera ovandu ohunga nOuhona wa Mukuru. Eye aa tjiwa kutja Ouhona mbwo mau ku raisa omasa notjari tja Ihe. (Jakobus 5:11) Jesus wina aa tjiwa kutja Ouhona mbwo mau eta ouwa ku imba eye mba suvera, mbe ri ovakarere va Mukuru ovaṱakame.

OVIṊA OUHONA MBU MAU KATJITIRA IMBA MBE RI OVAṰAKAME

Ngunda Jesus e hi ye ya kombanda yehi, eye aa kara meyuru pu na Ihe. Ihe wa ungurisa Omuna okuuta oviṋa avihe, tjimuna eyuru nozonyose ozengi, nehi retu ewa, novipuka mbi ri mu ro. (Ovakolose 1:15, 16) Moviutwa avihe mbi, Jesus ‘tjinene wa suverere ovandu.’—Omiano 8:31, NWT.

Orusuvero rwe kovandu ondwaaru hingi Jesus okuzuvarisa. Okuza komautiro, eye wa raisa oukahu kutja we ya kombanda yehi ‘okuyekuzuvarisa ombuze ombwa’ ku imba mbaave i hepa. (Lukas 4:18) Posi ya, Jesus wa ungura ovingi pendje nokuhungira ohunga nokuvatera ovandu. Potuingi, eye aa tjiti oviṋa mbyaavi raisa kutja wa suvera ovandu. Otjotjihorera, indu otjimbumba otjinene tjovandu tji tja worongana okupuratena ku ye, Jesus “wa ṱondjenda na wo, na verukisa imba mba verere.” (Mateus 14:14) Omurumendu ngwa ri nomutjise omuzeu wa ri nongamburiro kutja Jesus ma yenene okumuverukisa indu tji ma vanga, nu Jesus wa hingwa i yorusuvero. Eye wa verukisa omurumendu ngo mokumuraera kutja: “Ami me vanga, veruka!” (Lukas 5:12, 13) Indu Jesus tja muna epanga re Maria ee ri moruhoze rwomuṱena kwe Lasarus, eye wa “kurungisiwa tjinene mombepo” nu “wa rira.” (Johanes 11:32-36) Okuzambo, eye wa tjita otjiṋa otjihimise mokukotora Lasarus komuinyo, nandarire kutja eye wa ṱire oure womayuva yane.—Johanes 11:38-44.

Otjiperi kutja, Jesus aa tjiwa kutja ombatero ndjaa yandja moruveze ndwo ya ri oyoruveze orusupi uriri. Eye aa tjiwa kutja avehe mba verukisa mave vere rukwao, nu avehe mba pendura komuinyo mave ṱu rukwao. Posi ya, Jesus wina aa tjiwa kutja Ouhona wa Mukuru ombu mau ku isa po omauzeu otja ingo nga aruhe. Mena ranao, Jesus kaa tjiti ovihimise uriri nungwari wina aa “zuvarisa Ombuze Ombwa youhona” nonḓero. (Mateus 9:35) Ovihimise mbyaa tjiti vya raisa oviṋa Ouhona wa Mukuru mbu mau katjita kombanda yehi. Tara koviṋa Ombeibela mbya kwizika ohunga noruveze ndwo.

Kape nokukakara nomitjise.

“Indino omupoṱu ma munu, nomboro mai zuu; nomuremane ma tuka peyuru otja omenye, nu imba mba seta omaraka mave ravaere nondjoroka.” Nu wina “kape nomundu ngwa tura mehi retu, ngu ma unauna rukwao kutja eye wa vera.”—Jesaja 33:24; 35:5, 6.

Kape nokukakara onḓiro.

“Ovasemba mave rumata ehi, nu mave tura mu ro nga aruhe.”—Epsalme 37:29.

“Muhona Ndjambi ma nyono onḓiro nga ko nga aruhe! Eye ma pyoṋa omahoze momeho waauhe.”—Jesaja 25:8.

Imba mba ṱa mave kotorwa komuinyo.

“Avehe . . . mave zuu eraka re nave piti momayendo wawo.”—Johanes 5:28, 29.

“Ovandu avehe . . . mave penduka movakoke.”—Oviungura 24:15.

Kape nomundu ngu ma kara nokuhinondjuwo poo oviungura.

“Ovandu mave tungu ozondjuwo nave tura mo oveni; mave kunu omivite nave ri ovihape vyavyo. Owo kave nokutungira omundu warwe ondjuwo kutja a ture mo; kave nokukunina omundu warwe omuvite kutja a rye ku wo. . . . Owo oveni mave ri imbi mbi va ungura nomake wawo oveni.”—Jesaja 65:21, 22.

Kape nokukakara ovita.

‘Eye ma yandisa ovita mouye auhe.’—Epsalme 46:9.

“Oviwaṋa kamaavi toorasanene omangaruvyo rukwao, nu kamaavi rirongerere okurwa ovita rukwao.”—Jesaja 2:4.

Kape nokukakara ondjara rukwao.

“Ehi ra eta ovihape vyaro; Ndjambi, ngu ri Ndjambi wetu, me tu sere ondaya.”—Epsalme 67:6.

“Ngamu kare ovikokotwa ovingi mehi nga kozondomba zozondundu.”—Epsalme 72:16.

Kape nokukakara ousyona.

“Ovasyona kave nokuzembwa ko aruhe.”—Epsalme 9:18.

“[Ombara] mai yama omusyona ngu ma ku ombatero ku yo, nomunandjenda, na ingwi ngu hi nomuvatere. Oyo mai tjariparere omusyona nomuhepe, nu mai yama omiinyo vyovahepe.”—Epsalme 72:12, 13.

Indu tji mo ripurire komakwizikiro ngo ohunga nOuhona wa Mukuru, hapo mo munu kutja omena raye Ouhona wa Mukuru tji wa ri ounanḓengu ku Jesus? Indu tjaa ri kombanda yehi, eye wa ri nonḓero okuhungira ohunga nOuhona wa Mukuru ku ngamwa auhe ngu ma puratene, mena rokutja eye aa tjiwa kutja Ouhona wa Mukuru ombu mau ku isa po omauzeu ayehe ngu tu muna ndino.

Hapo omakwizikiro wOmbeibela ohunga nOuhona wa Mukuru maye ku tjatere? Ndoovazu pe ri nao, mo yenene vi okurihonga ovingi ohunga nOuhona mbwo? Nu ovikwaye mbi mo yenene okutjita kutja u mune ouwa mozondaya nḓo? Orupa orusenina maru ziri omapuriro ngo.

[Omambo wokehi]