Evangeli ra Markus 12:1-44
12 Nu eye wa uta okuhungira ku na wo momasasanekero a tja: “Omurumendu wa kunine omandjembere mehi re romakunino, a twa ko orumbo ongondoroka na ro, a se oruveze pu mape ungurirwa omavinu, nu a tungu mo oruhungu. Okuzambo eye wa hirisa oruveze ndwo kovakune na toora ouyenda wokokure.
2 Oruveze rwomakondero tji rwa yenena, eye wa hinda omukarere kovakune okukakambura ku wo ovihape tjiva vyotjikunino tjomandjembere.
3 Posi ya, owo ve mu kambura, ave mu tono, nave mu hindi nokuhinotjiṋa.
4 Rukwao eye wa hinda omukarere warwe ku wo, nu owo ve mu tona kotjiuru nave mu yamburura.
5 Nu eye wa hinda warwe, nu owo ve mu zepa. Nu eye wa hinda varwe ovengi, tjiva vawo va tona, nu varwe vawo va zepa.
6 Okuzambo omuini wotjikunino tjomandjembere wa hinda omuatje we omuzandu omusuverwa ku wo, ama tja, ‘Owo mave raisa ondengero komuatje wandje.’
7 Posi ya ovakune mbo ve rihungirira oveni kutja, ‘Ingwi ongu ma rumata oviṋa avihe. Indjeye tu mu zepe, nu otjirumatwa matji rire otjetu.’
8 Ku nao, owo ve mu kambura nave mu zepa, nave mu yumbu pendje notjikunino tjomandjembere.
9 Hapo omuini wotjikunino tjomandjembere ma tjiti vi? Eye me ya na zepa ovakune na yandja otjikunino tjomandjembere kovandu varwe.
10 Hapo eṋe kamu na pu mwa lesere etjangwa ndi: ‘Ewe ovatunge ndi va imbirahi, onda karira ewe enanḓengu romohuki.*
11 Oro ra za ku Jehova,* nu oro ewa momeho wetu’?”
12 Ku nao, owo aave vanga okumukambura,* posi ya owo aave tira otjimbumba tjovandu, orondu owo aave tjiwa kutja eye wa hungira omasasanekero ngo ame ripura ohunga na wo. Nu owo ve mwesa nave i.
13 Okuzambo Ovafarisei tjiva notjimbumba tjovakongorere va Herodes ve ya ku ye kutja ve tjite kutja me riyate momambo we.
14 Nu owo tji ve ya, va tja nai ku ye: “Muhonge, eṱe matu tjiwa kutja u hungira ouatjiri nu ove ko paha okuritjatisa kovandu, orondu ko tara kombunikiro yovandu yokombanda, nu u honga ouatjiri ohunga na Mukuru. Otjiṋa otjiwa okusuta otjimariva tjouhona kOmbara ya Roma poo katjiṋa otjiwa?
15 Ngatu sute poo atu sutu?” Jesus wa tjiwa ovineya vyawo na tja ku wo: “Omena raye tji mamu ndji roro? Ndji etereye odenari* mbi tare.”
16 Owo va eta imwe, nu eye wa tja ku wo: “Omurungu wauṋe mbwi nu ena rauṋe, ndi ri kotjimariva hi?” Owo va tja: “Ovyombara ya Roma.”
17 Jesus wa tja ku wo: “Suteye imbi vyOmbara ya Roma kOmbara ya Roma, posi ya imbi ovya Mukuru, suteye ku Mukuru.” Nu owo va himisirwe tjinene i ye.
18 Nu Ovasaduke, mbe tja kape nombendukiro yovaṱi, ve ya ku ye nave mu pura kutja:
19 “Muhonge, Moses wa tjanga kutja indu erumbi romurumendu tji ra ṱu na isa omukazendu we nomuinyo nokuhinovanatje, omuangu* we ma sokukupa omukazendu we, nu ovanatje ve mave varwa otjovanatje verumbi re nda ṱa.
20 Pa ri ovangu nomarumbi hambombari. Omutenga wa kupa omukazendu, posi ya tja ṱa kaa ri novanatje.
21 Nu omutjavari wa kupa omukazendu ngo, posi ya a ṱu nokuhinovanatje, nu otjiṋa tjingetjo tja tjitwa ku ingwi omutjatatu.
22 Nu avehe pouhambombari wawo va ṱa nokuhinovanatje. Nu korusenina, omukazendu wina wa ṱa.
23 Mombendukiro, eye ma rire omukazendu wauṋe? Orondu pouhambombari wawo tjinga ave mu kupire.”
24 Jesus wa tja ku wo: “Hapo eṋe kamu nokumuna kutja mu ri posyo, mena rokutja kamu tjiwa Omatjangwa nomasa wa Mukuru?
25 Orondu tji va penduka okuza movakoke ovarumendu kave kupu nu ovakazendu kave kupwa, posi ya owo ve ri otja ovaengeli momayuru.
26 Posi ya ohunga nombendukiro yovaṱi, hapo kamu na pu mwa lesa membo ra Moses, mehungi ohunga notjihwa tjomakwiya, kutja Mukuru wa tja nai ku ye: ‘Owami Mukuru wa Abraham, na Mukuru wa Isak, na Mukuru wa Jakob’?
27 Eye ka Mukuru wovakoke, nungwari oMukuru wovanamuinyo. Eṋe tjiri mu ri posyo.”
28 Umwe wovahonge vomatwako wa ri mokati kawo ama puratene koviṋa owo mbyaave hungire, nu eye aa tjiwa kutja Jesus wa zira momuano omuwa, nu we mu pura a tja: “Etwako riṋe ndi ri etenga* pomatwako ayehe?”
29 Jesus wa zira a tja: “Etwako etanga oro ndi, ‘Zuva Israel, Jehova* Mukuru wetu ongu ri Jehova* erike,
30 nu ove mo sokusuvera Jehova* Mukuru woye nomutima woye auhe, nomuinyo* woye auhe, nozondunge zoye azehe, nomasa woye ayehe.’
31 NEtwako oritjavari oro ndi, ‘Ove mo sokusuvera omukweṋu tjimuna tji we risuvera omuini.’ Kape netwako rarwe enanḓengu okukapita nga.”
32 Omuhonge womatwako wa tja ku ye: “Muhonge, ove wa ziri nawa, nouatjiri, ‘Eye i Umwe nu kape na warwe pendje na ye’,
33 nu okumusuvera nomutima auhe, nozondunge azehe, nomasa ayehe, nokusuvera omukweṋu tjimuna tji we risuvera omuini, oko okunanḓengu okukapita ozombunguhiro azehe ozoningiririsiwa nozombunguhiro zarwe.”
34 Nu Jesus tja muna kutja wa ziri nozondunge, wa tja ku ye: “Ove ko ri kokure nOuhona wa Mukuru.” Posi ya kapa ri omundu ngwa ri nouvanḓe okumupura omapuriro rukwao.
35 Otja Jesus tjaa kayenda komurungu okuhonga mondembeli, eye wa tja nai: “Pe ya vi ovahonge vomatwako ve tje Kristus omuna wa David?
36 Okupitira mombepo ondjapuke, David omuini wa tja, ‘Jehova* wa tja nai kOmuhona wandje: “Haama kokunene kwandje ngandu tji mba twa po ovanavita na ove kehi yozombaze zoye.”’
37 David omuini u mu isana Muhona, ku nao, hapo pe ya vi ma rire omuna we?”
Nu otjimbumba otjinene tjovandu aatji puratene ku ye nondjoroka.
38 Nu momahongero we, eye wa tja: “Ritjevereye kovahonge vomatwako mba suvera okuryanga mozombanda ozonde nu mbe vanga okukorisiwa potuveze twomarandero
39 nokuhaama povihavero vyokomurungu* mozosinagoge na potuveze twovaṋangwa ovananḓengu pomariro.
40 Owo ve kambura omauini wovahepundu,* nu owo ve kumba ozongumbiro ozonde kutja ve munikwe i varwe. Omberero yawo mai rire onene* okukapita inḓa ozavarwe.”
41 Jesus wa haamene poṋa paa yenene okumuna oukesa wovimariva nu eye aa tarere ovimbumba vyovandu tji mavi yumbu ovimariva moukesa wovimariva, nu ovatumbe ovengi aave yumbu ovimariva ovingi.
42 Nu omukazendu omuhepundu omusyona we ya na yumbu oumariva uvari wonḓengu yokehi tjinene.*
43 Jesus wa isana ovahongewa ve ku ye na tja ku wo: “Tjiri ami me mu raere, omukazendu omuhepundu omusyona ngwi wa yumbu ovingi okukapita imba mba yumbu moukesa wovimariva.
44 Orondu avehe va yandja ovihupe okuza komautumbe wawo, posi ya eye mouhepauke we* wa yandja avihe mbya ri na vyo mbyaavi sokumuhupisa.”
Omambo wokehi
^ MOtjigrike, “ewe rotjiuru rokotjikoro.”
^ Tara Oviweziwako A5.
^ Poo “okumupatera monḓorongo.”
^ Tara Oviweziwako B14.
^ Ombeibela kai hungire kutja ya ri erumbi poo omuangu.
^ Poo “enanḓengu tjinene.”
^ Tara Oviweziwako A5.
^ Tara Oviweziwako A5.
^ Tara Oviweziwako A5.
^ Tara Omakahururiro womambo.
^ Tara Oviweziwako A5.
^ Poo “oviwa.”
^ MOtjigrike, “ve rya ozondjuwo zovahepundu.”
^ Poo “onḓeu.”
^ MOtjigrike, “ozolepta mbari.” Ozolepta mbari za ri otjimariva tjaatji sutwa komuungure ngwa ungura ozominute ape 10. Tara Oviweziwako B14.
^ Poo “mousyona we.”
