Evangeli ra Markus 1:1-45
-
Johanes Omupapitise ma zuvarisa (1-8)
-
Ombapitisimo ya Jesus (9-11)
-
Jesus ma rorwa i Satan (12, 13)
-
Jesus wa utu okuzuvarisa mu Galilea (14, 15)
-
Omaisaneno wovahongewa ovatenga (16-20)
-
Ombepo ohakohoke ya pitisiwa (21-28)
-
Jesus ma verukisa ovengi moKapernaum (29-34)
-
Ma kumbu poruveze ndu ri kokure novandu (35-39)
-
Omurumendu ngwa vera ongana wa verukisiwa (40-45)
1 Indji ombutiro yombuze ombwa ohunga na Jesus Kristus, Omuna wa Mukuru:
2 Otja tji pa tjangwa membo ra Jesaja omuprofete: “(Ami me hindi omuhindwa wandje komurungu woye, ngu ma rongerisa ondjira yoye.)
3 Eraka romundu mokuti mari ravaere kutja: ‘Rongerisa ondjira ya Jehova!* Sembamisa ozondjira ze.’”
4 Johanes Omupapitise wa ri mokuti onguza, nu aa raere ovandu kutja ve papitisiwe okuraisa kutja ve ritanaura nu mave vanga okumuna ondjesiro komauvi wawo.
5 Nu ovandu avehe vorukondwa rwa Judea novature avehe va Jerusalem aave ya ku ye nu eye ee ve papitisa* mOnḓonḓu Jordan, nu owo aave rihepura omauvi wawo.
6 Nu Johanes aa zara ombanda ndja ungurwa pomainya wongamero nu we rikutire ekwamo nda ungurwa pomukova, nu eye aa ri ozombahu nouitji wozonyutji.
7 Nu eye aa zuvarisa kutja: “Omundu ngu nomasa pwami me ya kombunda yandje, nu ozondjatate zozongaku ze ami hi nonḓengu okuzekutura.
8 Ami me mu papitisa nomeva, posi ya eye me mu papitisa nombepo ondjapuke.”
9 Momayuva ngo, Jesus wa zire koNasaret tja Galilea, nu wa papitisiwa i Johanes mOnḓonḓu Jordan.
10 Nu tjimanga tja yeruruka okuza momeva, wa muna eyuru ara paturuka, nombepo ya Mukuru amai rauka kombanda ye tjimuna onguti.
11 Nu eraka okuza keyuru ra tja: “Oove Omuna wandje omusuverwa. Ami mbe ku yakura.”
12 Nu tjimanga ombepo ondjapuke ye mu twara mokuti onguza.
13 Eye wa kakara mokuti onguza oure womayuva 40 ama rorwa i Satan. Eye wa ri pu novipuka vyokuti, nu ovaengeli aave mu yanḓiparisa.
14 Indu Johanes tja kamburwa, Jesus wa ya koGalilea okukazuvarisa ombuze ombwa ya Mukuru
15 na tja: “Oruveze nambano rwa yenenisiwa, nu Ouhona wa Mukuru wa tumbuka popezu. Ritanaureye, nu kareye nongamburiro mombuze ombwa.”
16 Ngunda ama kawondja meṋe yOmuronga wa Galilea, eye wa muna Simon nomuangu we Andreas, amave yumbu ozonete zawo momuronga mena rokutja owo va ri ovapate vomahundju.
17 Nu Jesus wa tja ku wo: “Ndji kongorereye, nami me tjiti kutja mu rire ovapate vovandu.”
18 Nu owo va isa ozonete zawo, nave mu kongorere.
19 Tja za nokukayenda komurungu kaṱiṱi, eye wa muna Jakobus omuatje wa Sebedeus nomuangu we Johanes, ngunda ave ri mokayaha amave ṱunu ozonete zawo,
20 nokuhinokuwomba, eye we ve isana. Nu owo va isa ihe Sebedeus mokayaha pu novaungure nave mu kongorere.
21 Owo va ya koKapernaum.
Nu Esabata tji ra za nokuuta, eye wa hita mosinagoge na utu okuhonga.
22 Nu owo va himisirwe i yomuano mbwaa hongo, orondu eye aa hongo momuano mbwau raisa kutja u nomasa nga za ku Mukuru, nu kaa hongo tjimuna ovahonge vomatwako.
23 Moruveze ndwo, pa ri omurumendu mosinagoge ngwa ri nombepo ohakohoke, neye wa ravaera kutja:
24 “Eṱe katu notjiṋa na ove, Jesus wa Nasaret. Hapo ove we ya okuyekutunyona? Ami me ku tjiwa nawa kutja oove uṋe. Oove Ingwi Omuyapuke wa Mukuru!”
25 Posi ya Jesus we i rakiza, na tja: “Mwina, nu pita mu ye!”
26 Nu ombepo ohakohoke ndjo tji ya za nokutjita kutja omurumendu ngo ma range mehi tjimuna omundu woviyoze, oyo ya ravaera nomasa, nai piti momundu.
27 Nu ovandu va himisirwe nave utu okupurasana oveni kutja: “Ovikwaye mbi? Omahongero omape! Eye nandarire u nomasa wokupitisa ozombepo ozombi, nu ozo ze puratena ku ye.”
28 Ku nao ombuze ohunga na ye, ya handjauka akuhe morukondwa rwa Galilea.
29 Nowo va pita mosinagoge, ave i kondjuwo ya Simon na Andreas pu na Jakobus na Johanes.
30 Nu ina yomukazendu wa Simon wa ri momara e noupyu, nowo va raera Jesus ohunga na ye.
31 Jesus wa ya ku ye, e mu kambura keke ne mu yerurura. Oupyu wa pita mu ye, nu ina yomukazendu wa Simon we ve sekirisa.
32 Indu eyuva tji ra hita, ovandu va uta okueta ovandu avehe mba verere na imba mba ri nozondemone ku ye,
33 nu otjihuro atjihe tja woronganena pomuvero.
34 Eye wa verukisa ovengi mba ri nomitjise pekepeke, na pitisa ozondemone ozengi, posi ya kaa yandjere kutja ozondemone ze hungire, mena rokutja aaze tjiwa kutja eye oKristus.*
35 Rukuru omuhukomunene, ngunda akwa zorere, eye wa penduka na piti pendje, nu wa ya koruveze ka kakara erike, nu ingo wa kauta okukumba.
36 Posi ya Simon na imba mba ri pu na ye ve mu tezera
37 nave mu munu, nu owo va tja ku ye: “Ovandu avehe mave ku paha.”
38 Nungwari eye wa tja ku wo: “Ngatu yende kwarwe, kovirongo vyopopezu, kokutja wina ami mbi kazuvarise ngo, orondu ihi otji mbe era.”
39 Nu eye wa ryanga moGalilea atjihe ama zuvarisa mozosinagoge nokupitisa ozondemone.
40 Wina pe ya omundu ngwa verere ongana, eye we riheka ku ye, nu nandarire wa haama kozongoro komurungu we, na tja: “Muhona, tji mo vanga, mo yenene okundjiverukisa.”
41 Ku nao, eye we mu ṱira ondjenda, nu Jesus wa roporora okuwoko kwe, e mu ṱunu na tja ku ye: “Ami me vanga. Veruka.”
42 Nu tjimanga, omutjise wongana wa pita mu ye, neye wa veruka.
43 Okuzambo we mu rakiza oukukutu ne mu raere kutja ma yende.
44 Nu wa tja ku ye: “O raere omundu, posi ya twende u keriraise kovapristeri, nu u kayandje otjiyandjewa otja kOmatwako wa Moses, kokutja i rire omahongononeno ku wo kutja wa veruka.”
45 Nu tja za nokuyenda, eye wa uta okukaserekarera otjiṋa hi akuhe, ku nao Jesus kaa yenene okuhita motjihuro nokuhinokunana ombango yovandu. Mena ranao eye wa kakara pendje kotuveze ku ku hi na kwa ri novandu. Posi ya, ovandu va kayenda komurungu okuya ku ye okuza kominda avihe.
