Omazuvarisiro wombuze ombwa maye yanda ruṋe?

Jesus wa tja: “Indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.” (Mat. 24:14) Embo rOtjigrike ndi teʹlos ra torokwa kutja “omaandero” mu Mateus 24:​14, na momazeva nga 6 no 13 mekondwa tjingero. Embo rOtjigrike ndo ri heya omaandero wouye wa Satan movita vya Armagedon. (Omavan. 16:​14, 16) Iho matji hee kutja eṱe matu kayenda komurungu okuzuvarisa ombuze ombwa nga ovita vya Armagedon tji vi ri pokuuta. Ku nao, otjiṋa ho matji rundurura omazuviro wetu omakuru.

Rutenga, twa ri nomazuviro wokutja otjiungura tjokuzuvarisa ombuze ombwa matji yanda mondatumisire ondirise indu Babilon Otjinene tji tja nyonwa. (Omavan. 17:​3, 5, 15, 16) Eṱe aatu kambura kutja indu ondatumisire ondirise tji ya utu, Jehova ke nokuyandjera ovandu okupuratena kombuze ombwa. (Jes. 61:2) Eṱe wina aatu munu kutja imba mbu mave tuurunga ondatumisire ondirise mave sokukarera Jehova nouṱakame ngunda ondatumisire ondirise ai hi ya uta. Eṱe aatu ve sasaneke nOvajuda mba tuurunga omanyoneno wa Jerusalem mo-607 K.O.Z. Imba mba tuurunga omanyoneno nga va twakerwe otjihako komurungu womanyoneno ngo mena rokutja aave karere Jehova nu va tondere ourunde. (Esek. 5:11; 9:4) Posi yokutja omasasanekero ngo kaye hitasana nomambo wa Jesus nge ri mu Mateus 24:​14, nge raisa kutja ovandu mape ya ave munu oruveze okupuratena kombuze ombwa ngunda ovita vya Armagedon avi hi ya uta.

Mena romazuviro wetu omakahu wa Mateus 24:​14, eṱe wina matu hepa okurundurura omazuviro wetu wOmavandururiro 16:​21, ndi hungira ohunga nozombawe ozonene zombura. Omakonḓononeno ye raisa kutja omatjangwa yevari nga ye hitasana. Omomuano uṋe? Omomuano Ombeibela mu ya hungirira komuano ovandu mu ve yakura ombuze ombwa. Omuapostele Paulus wa tja nai ku imba “mbu mave yamwa,” ombuze ombwa i ri tjimuna “omuṋuko omuwa mbu yandja omuinyo.” Posi ya kovanavita na Mukuru oyo ombuze ombi mena rokutja i ri tjimuna “omuṋuko wonḓiro.” (2 Kor. 2:​15, 16) Owo va tonda ombuze yOuhona mena rokutja oyo i raisa kutja ouye mbu va suvera mbwi ourunde, u honaparerwa po i Satan nu mau nyonwa tjimanga.—Joh. 7:7; 1 Joh. 2:17; 5:19.

Otjiraisiro tjozombawe ozonene zombura tji tja tamunwa mOmavandururiro 16:21 matji rire “otjihimise tjinene.” Ihi mape ya atji hee kutja moruveze rwondatumisire ondirise matu zuvarisa ombuze onḓeu yombanguriro, ku nao ena ra Jehova mari tjiukwa tjinene kombanda yaindu tji ri tjiukwa nai. (Esek. 39:7) Kombunda yaindu Babilon Otjinene tji tja nyonwa, hapo tjiva mape ya ave yakura ombuze ndjo tjimuna omuṋuko womoromuwa? Ii mape ya. Ngahino mave kazemburuka poo mave katjiwa kutja oure wozombura ozengi ovahongonone va Jehova aave tja Babilon Otjinene matji nyonwa, nu mave kamuna kutja aave hungire ouatjiri.

Imbi matu sasaneke noviwonga omurongo mbya tjitwa moEgipte otjikuru. Kombunda yaindu Jehova tja za ‘nokuvera oomukuru wovisenginina avehe vaEngipte,’ ‘otjimbumba tjovandu varwe vozonganda’ tje rikuta ku novakarere ve. (Eks. 12:​12, 37, 38) Ovandu vozonganda mape ya va toorora okuyenda ku novakarere va Jehova indu tji va muna oviṋa avihe Moses mbya hungira kutja mavi tjitwa ohunga noviwonga omurongo.

Auhe ngu me riyameke ku Jehova kombunda yomanyoneno wa Babilon Otjinene ma munu ouwa wokuyandja oruvara kovangu va Jesus mba sewa kombanda yehi. (Mat. 25:​34-36, 40) Otjingaperi kutja okupangurwa otja onḓu maku yanda katjisupi komurungu wovita vya Armagedon, indu otjihupe tjovatwirisiwa tji mave munu ondjambi yawo yomeyuru.

Omazuviro omape nga maye raisa otjari norusuvero rwa Jehova orunene. Eye tjiri “tjinga e ha vanga kutja omundu nangarire umwe a yandekwe, nungwari tjinga e vanga kutja avehe ve ritanaure komauvi wawo.”—2 Petr. 3:9.