Èske m ka jwenn pawòl pou konsole m nan Bib la?
Repons Bib la bay
Wi (Women 15:4). Ann egzamine kèk vèsè nan Bib la ki te ede plizyè moun ki t ap fè fas ak moman difisil nan lavi yo e ki te gen gwo tètchaje.
Nan atik sa a
Lè m gen pwoblèm
Sòm 23:4: “Menmsi m ap mache nan vale fènwa pwès la, mwen pa pè anyen paske w avè m.”
Sa l vle di: Lè w priye Bondye e ou montre w gen konfyans nan Pawòl li a, Labib, pou gide w, ou ka fè fas ak pwoblèm ou yo avèk kouraj.
Filipyen 4:13: “Mwen gen fòs pou tout bagay grasa Sila a ki ban m pisans lan.”
Sa l vle di: Bondye ka ba w fòs pou w fè fas ak nenpòt pwoblèm.
Lè yon moun pa m mouri
Eklezyas 9:10: “Pa gen ni travay, ni plan, ni konesans, ni sajès nan Tonm [lan].”
Sa l vle di: Moun ki mouri yo pap soufri e yo pa ka fè nou okenn mechanste, se dòmi y ap dòmi.
Travay 24:15: “Pral gen yon rezirèksyon.”
Sa l vle di: Bondye ka fè moun nou renmen yo retounen viv ankò.
Lè m santi m koupab anpil
Sòm 86:5: “Paske, ou bon e w dispoze padone, o Jewova a. Ou demontre lanmou fidèl ou genyen an pou tout moun ki envoke non w.”
Sa l vle di: Bondye padone moun ki vrèman regrèt erè yo te fè yo e ki pran detèminasyon pou yo pa fè menm erè sa yo ankò.
Sòm 103:12: “Menm jan kote solèy la leve a lwen kote li kouche a, se konsa tou li mete peche nou yo lwen nou.”
Sa l vle di: Lè Bondye padone nou, li voye peche nou yo pi lwen pase sa nou ka menm imajine. Li pa plede ap fè nou sonje yo, pou l repwoche nou oswa pou l pini nou.
Lè m tris
Sòm 31:7: “Ou wè soufrans mwen yo. Ou konnen jan m nan gwo pwoblèm.”
Sa l vle di: Bondye vrèman konprann tout soufrans ou yo, li konprann jan w santi w nan fon kè w, menm lè lòt moun pa konprann.
Sòm 34:18: “Jewova toupre moun kè yo ap fann, li sove moun ki gen lespri yo kraze.”
Sa l vle di: Bondye pwomèt ou l ap ede w lè w santi w tris. Li ka ba w fòs pou w fè fas ak sa k ap trakase w yo.
Lè m malad
Sòm 41:3: “Jewova ap ede l pandan l kouche sou kabann li tou malad.”
Sa l vle di: Bondye ka ede w fè fas ak yon maladi ki grav, paske li ka fè lespri w anpè e li ka ba w fòs, andirans ak sajès pou w ka pran bonjan desizyon.
Ezayi 33:24: “Pa gen yon moun nan peyi a k ap di: ‘Mwen malad.’”
Sa l vle di: Bondye pwomèt rive yon lè tout moun sou tè a ap an sante.
Lè m santi m strese
Sòm 94:19: “Lè enkyetid te anvayi m, ou te konsole m, ou te soulaje m.”
Sa l vle di: Si n chèche èd nan men Bondye lè n santi n strese, li kapab ede n pou n rete kalm.
1 Pyè 5:7: “Lage tout tètchaje nou genyen sou li, paske li gen sousi pou nou.”
Sa l vle di: Bondye gen sousi pou nou lè n ap soufri, li vle pou n priye l lè n gen pwoblèm.
Lè gen lagè
Sòm 46:9: “Li fè pa gen lagè ankò sou tout kò tè a.”
Sa l vle di: Talè konsa, Wayòm Bondye a pral elimine tout lagè.
Sòm 37:11, 29: “Men, moun ki gen imilite yo ap posede tè a, e y ap kontan anpil akoz yo pral viv nan yon lapè total. [...] Moun ki jis yo gen pou yo posede tè a e yo gen pou yo viv sou li pou toutan.”
Sa l vle di: Moun ki jis yo pral viv sou tè a pou toutan.
Lè m gen enkyetid pou demen
Jeremi 29:11: “‘Mwen konnen sa m gen nan lide m pou m fè pou nou.’ Se sa Jewova di. ‘M ap ban nou lapè, mwen pap lage malè sou nou, yon fason pou m ban nou yon avni ak yon espwa.’”
Sa l vle di: Bondye bay moun k ap sèvi l yo asirans yo gen bonjan rezon pou yo espere yon pi bèl avni.
Revelasyon 21:4: “L ap siye tout dlo nan je yo, pap gen lanmò ankò, e moun pap nan lapenn ankò akoz moun pa yo ki mouri. Pap gen ni rèl, ni doulè ankò. Ansyen bagay yo disparèt.”
Sa l vle di: Bondye pwomèt l ap elimine tout sa ki mal k ap fèt jodi a.
a Jewova se non Bondye (Sòm 83:18). Gade atik “Kiyès Jewova ye?” a.
Lòt sijè ki enteresan
TOUDEGAD
Byenfè w ka jwenn dèske Bondye enterese nan ou
Bib la ede nou gen yon lafwa nan pwomès Bondye fè pou gen yon monn nouvo.
KÈK LÒT SIJÈ
Konsolasyon pou moun ki gen moun pa yo ki mouri
Lè yon moun pa nou mouri, nou ka santi pa gen pèsonn ki konprann jan nou santi nou. Men, Bondye konprann nou e l kapab ede nou.
ANSÈYMAN FONDAMANTAL KI NAN BIB LA
Poukisa Bondye pèmèt soufrans?
Anpil moun ap mande poukisa monn nan chaje ak lahèn ak soufrans konsa. Bib la bay yon repons ki bay satisfaksyon e ki konsole moun.
