LESON 65
Estè sove pèp li a
Estè te yon fi Juif ki t ap viv Souz, yon vil peyi Pès. Li te sot nan yon fanmi wa Nebikadneza te pran nan Jerizalèm sa gen anpil ane. Se Madoche, yon kouzen l, ki te leve l. Madoche te yon sèvitè wa Asyeris, moun peyi Pès la.
Wa Asyeris te bezwen yon nouvo rèn. Sèvitè l yo te mennen pi bèl medam nan peyi a ba li, e Estè te pami yo. Se Estè wa a te chwazi kòm rèn pami tout medam yo. Madoche te di Estè pou l pa di se Juif li ye.
Mesye ki te chèf tout prens nan peyi a te rele Aman. Li te vle pou tout moun bese byen ba devan l. Madoche te refize fè sa, e Aman te vin tèlman an kòlè, li te vle touye l. Lè Aman vin aprann Madoche se yon Juif, li fè yon plan pou l touye tout Juif nan peyi a. Men sa l te di wa a: ‘Juif yo se moun ki mechan anpil, se pou w elimine yo.’ Asyeris di l: ‘Fè tout sa k nesesè pou sa.’ Epi, wa a ba l pouvwa pou l fè yon lwa. Aman fè yon lwa ki te fè pèp li a konnen yo dwe touye tout Juif yo 13yèm jou nan mwa Ada. Jewova t ap gade tout bagay.
Estè pa t konnen si yo te fè yon lwa konsa. Se sa k fè, Madoche te voye yon kopi lwa a pou li, epi l di l: ‘Al pale ak wa a.’ Estè di: ‘Moun ki antre kot wa a san yo pa envite l ap mouri. Sa fè 30 jou depi wa a pa envite m vin kote l! Men, mwen prale. Si l lonje baton l lan, m ap viv. Si l pa fè sa, m ap mouri.’
Estè t al nan lakou palè wa a. Lè wa a wè l, li lonje baton l lan. Estè pwoche kot wa a, epi wa a mande l: ‘Estè, ki sa w vle m fè pou ou?’ Li di: ‘Mwen vle envite ou menm ak Aman nan yon resepsyon.’ Pandan yo nan resepsyon an, Estè envite yo nan yon dezyèm resepsyon pou demen. Pandan yo nan dezyèm resepsyon an, yon lòt fwa ankò, wa a mande Estè: ‘Ki sa w ta renmen m fè pou ou?’ Estè di l: ‘Gen yon moun ki pral touye m ansanm ak pèp mwen an, tanpri, delivre nou.’ Wa a mande l: ‘Kiyès ki vle touye w la?’ Estè di l: ‘Se vye nonm yo bay pou Aman an.’ Asyeris te tèlman an kòlè, li fè touye Aman lapoula.
Men, pèsonn pa t ka efase lwa Aman te fè a, menm wa a. Se sa k fè wa a te bay Madoche pouvwa pou l fè yon nouvo lwa. Madoche te fè yon lwa ki te pèmèt Juif yo defann tèt yo lè yo atake yo. Nan 13yèm jou mwa Ada, Juif yo te pot laviktwa sou ènmi yo. Depi lè sa a, yo te fete viktwa sa a chak ane.
“Y ap mennen nou devan gouvènè, devan wa poutèt mwen. Sa ap ban nou okazyon pou nou bay ni yo menm ni nasyon yo temwayaj.” — Matye 10:18.
Lòt sijè ki enteresan
YON SERI VIDEYO SOU LIV KI NAN BIB LA
Kèk bagay nou ka aprann nan liv Estè a
Evènman frapan ki te pase nan epòk Estè a ap fè nou vin gen plis lafwa nan kapasite Jewova genyen pou l delivre pèp li jodi a lè gen malè.
MOUN BIB LA PALE DE YO
Fich biblik: Estè
Ki fason kouraj Estè te demontre a te sove lavi anpil moun? Enprime fich biblik sa a, e aprann plis de egzanp li.
ANNOU IMITE LAFWA YO
Estè — Li te pran pozisyon pou pèp Bondye a
Pou yon moun montre l gen lespri sakrifis ak lanmou menm jan ak Estè, li bezwen gen lafwa ak kouraj.
ANNOU IMITE LAFWA YO
Estè — Li te gen sajès ak kouraj e li pa t wè tèt li sèlman
Ki jan Estè te montre li pa t wè tèt li sèlman, men li te panse ak Jewova ansanm ak pèp Jewova a?
