Magdiretso sa kaundan

Sin-o ang mga Nefilim?

Sin-o ang mga Nefilim?

Ang sabat sang Biblia

Ang mga Nefilim mga higante kag mapintas nga mga anak sang malaut nga mga anghel nga nagpangasawa sang mga babayi diri sa duta sang panahon ni Noe. *

Ang kasaysayan sa Biblia nagsiling nga “nakita sang mga anak sang matuod nga Dios nga matahom ang mga anak nga babayi sang mga tawo.” (Genesis 6:2) Ining ‘mga anak sang Dios’ mga espiritu nga tinuga nga nagrebelde sa Dios sang ‘ginbiyaan nila ang ila nagakaigo nga ilistaran’ sa langit, dayon nagpakatawo sila kag “ginpangasawa nila ang tanan nga ila nagustuhan.”​—Judas 6; Genesis 6:2.

Ang mga anak sang tawo kag anghel indi ordinaryo nga kabataan. (Genesis 6:4) Ang mga Nefilim mga higante nga nagapangdaugdaug sa iban, amo nga napuno sang kapintas ang duta. (Genesis 6:​13) Ginalaragway sila sang Biblia nga “gamhanan kag bantog nga mga lalaki sadto.” (Genesis 6:4) Pero ang madumduman lang sa ila amo nga mapintas sila kag ginakahadlukan.​—Genesis 6:5; Numeros 13:33. *

Sayop nga mga pagpati parte sa mga Nefilim

Sayop nga pagpati: Ang mga Nefilim buhi pa asta subong diri sa duta.

Kamatuoran: Nagpahanabo si Jehova sing baha sa bilog kalibutan para mapatay ang mapintas nga mga tawo sang una. Ang mga Nefilim napatay upod sa tanan nga malain nga tawo. Ang naluwas lamang amo si Noe kag ang iya pamilya kay gintuman nila si Jehova.​—Genesis 6:9; 7:​12, 13, 23; 2 Pedro 2:5.

Sayop nga pagpati: Ang mga Nefilim mga anak sang tawo.

Kamatuoran: Ang ila mga amay gintawag nga “mga anak sang matuod nga Dios.” (Genesis 6:2) Gingamit man sang Biblia ini nga ekspresyon sa paglaragway sa mga anghel. (Job 1:6; 2:1; 38:7) Ang mga anghel may gahom nga magpakatawo. (Genesis 19:​1-5; Josue 5:​13-​15) May ginhambal si apostol Pedro parte sa “mga espiritu sa bilangguan, nga wala magtuman sadto sang mapinasensiahon nga naghulat ang Dios sang mga adlaw ni Noe.” (1 Pedro 3:​19, 20) Parte man sini, ang manunulat sang Biblia nga si Judas nagsiling nga ang pila ka anghel “wala magpabilin sa ila orihinal nga kahimtangan, kundi nagbiya sang ila nagakaigo nga ilistaran.”​—Judas 6.

Sayop nga pagpati: Ang mga Nefilim mga anghel nga ginhulog halin sa langit.

Kamatuoran: Ang palibot nga mga bersikulo sang Genesis 6:4 nagapakita nga ang mga Nefilim indi mga anghel, kundi mga anak sang nagpakatawo nga mga anghel nga nagpangasawa sang mga babayi sa duta. Sang “ginpangasawa [sang mga anghel] ang tanan nga ila nagustuhan,” nagsiling si Jehova nga pagkatapos sang 120 ka tuig silutan niya ang malain nga kalibutan sadto. (Genesis 6:​1-3) Nagsiling pa ini nga “sadto,” ang mga anghel nga nagpakatawo “padayon nga naghulid . . . sa mga anak nga babayi sang mga tawo” kag nag-anak sila sing “gamhanan . . . nga mga lalaki sadto,” ang mga Nefilim.​—Genesis 6:4.

^ par. 3 Ang Hebreo nga tinaga nga gin-translate “Nefilim” mahimo nagakahulugan sing “Mga Manugpukan.” Ang Wilson’s Old Testament Word Studies nagsiling nga ang tinaga nagapatuhoy sa mga “nagapamintas kag nagapangawat sa mga tawo, nga nagresulta sa ila pagkapukan.”

^ par. 5 Ang Israelinhon nga mga espiya nga ginsiling sa Numeros 13:33 nakakita sang mga tawo nga nagpadumdom sa ila sang kasaysayan parte sa mga Nefilim, nga napatay na ginatos ka tuig ang nagligad.​—Genesis 7:​21-​23.