Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Anong serioso nga mga hangkat ang naatubang sang pila ka mga Cristiano sa tapos sila makasal, kag ano ang dapat nila tinguhaan?

Mahimo nga mahisayran sang iban nga mga Cristiano nga indi gali sila bagay. Bangod nahibaluan sang matuod nga mga Cristiano nga ang pagbulagay nga wala sing basihan sa Kasulatan indi amo ang solusyon, dapat nga manikasog gid sila nga mag-unungay suno sa ila ginsumpaan sa kasal.​—4/15, pahina 17.

• Ano nga mga kabudlayan ang mahimo maatubang sang isa ka Cristiano sa balay-alaypan?

Mahimo nga ang ginaistaran niya nga balay-alaypan nahamtang sa teritoryo sang iban nga kongregasyon kag indi sia kilala sang mga Saksi sa sini nga duog. Kalabanan sa balay-alaypan indi mga Saksi kag mahimo nga magtinguha sila nga paentrahon ang isa ka Cristiano sa mga relihioso nga mga aktibidades ukon mga selebrasyon. Ang Cristianong mga himata kag mga katapo sang lokal nga mga kongregasyon dapat makatalupangod sini nga mga problema kag magtanyag sang ila bulig kag pag-atipan.​—4/15, pahina 25-7.

• Ano ang apat ka paagi nga makabulig sa mag-asawa sa pagsolbar sang mga problema?

Magtalana sing tion agod hambalan ang problema. (Man. 3:1, 7) Ipabutyag sing tampad kag matinahuron ang imo opinyon. (Efe. 4:25) Pamatii kag tahura ang balatyagon sang imo tiayon. (Mat. 7:12) Magsugtanay sa solusyon, kag magtinguha kamo nga himuon ini. (Man. 4:9, 10)​—5/1, pahina 10-12.

• Ano nga mga komite ang gina-pangalagaran sang mga katapo sang Nagadumala nga Hubon?

Nagapangalagad sila sa anom ka mga komite: Coordinators’ Committee; Personnel Committee; Publishing Committee; Service Committee; Teaching Committee; Writing Committee.​—5/15, pahina 29.

• Paano naton masigurado nga ang Anaw sang adlaw ni Noe bug-os kalibutan?

Si Jesus nagapati nga natabo ang Anaw sa bug-os nga kalibutan. Ang mga paandam sang Biblia nabase sa kamatuoran sang bug-os kalibutan nga Anaw.​—6/1, pahina 8.

• Ang imoral nga buhat bala nga ginalaragway sa Roma 1:24-32 nagapatuhoy sa mga Judiyo ukon sa mga Gentil?

Mahimo ini mapatuhoy sa mga Judiyo ukon sa mga Gentil, apang ang ginapatuhuyan gid ni Pablo amo ang mga Israelinhon sang una, nga sing siniglo na napaslawan sa pagtuman sang kasuguan. Nahibaluan nila ang matarong nga kasuguan sang Dios, apang wala sila nagkabuhi nahisuno sa sini.​—6/15, pahina 29.

• Sa diin ang Tel Arad kag ngaa importante ini?

Ining pukatod sa Israel nga amo sang una ang dumaan nga siudad sang Arad yara sa katundan sang Patay nga Dagat. Sa sini nga pukatod, nakutkutan ang madamo nga koleksion sang mga kulon nga ginagamit subong sululatan. Ang iban may nasulat nga mga ngalan nga mabasa man sa Biblia, kag ginapakita sini nga ang personal nga ngalan sang Dios ginagamit sa sekular nga mga dokumento.​—7/1, pahina 23-24.

• Ngaa ang pagpalambo sang nagakaigo nga pagtamod sa aton kaugalingon makadugang sa aton kalipay?

Magaresulta lamang sa kahuol kon ginatinguhaan gid naton nga lab-uton ang indi makatarunganon nga mga tulumuron. Pero dapat mag-andam man kita sa paghunahuna nga wala na gid kita sing may masarangan, amo nga mangin uyaya na lang kita sa aton nga ministeryo.​—7/15, pahina 29.

• Ano ang mahimo makaupang sa komunikasyon sang mga ginikanan kag sang mga pamatan-on?

Makaupang ang pagka-hipuson sang pamatan-on ukon pagkamahuluy-on, ang handum sang mga pamatan-on nga mangin hilway, kag mas gusto sang madamo nga pamatan-on nga maghipushipos lang tuhoy sa ila ginapamensar antes nila ini isugid sa iban. Mahimo panikasugan sang mga ginikanan ang komunikasyon sa di-pormal nga paagi kag magtinguha nga mahangpan kon ano ang ginapabutyag sang mga pamatan-on.​—8/1, pahina 10-11.