Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

San-o ginhaplasan “ang Balaan sang mga Balaan” subong gintagna sa Daniel 9:​24?

Ang Daniel 9:​24-​27 isa ka tagna tuhoy sa pag-abot sang “Mesias nga Lider”​​—⁠ang Cristo. Ang gintagna nga paghaplas sa “Balaan sang mga Balaan,” nian, wala nagapatuhoy sa paghaplas sa Labing Balaan nga hulot sang templo sa Jerusalem. Kundi, ang ekspresyon nga “Balaan sang mga Balaan” nagapatuhoy sa langitnon nga santuaryo sang Dios​​—⁠ang langitnon nga Labing Balaan⁠​—⁠​sa dakung espirituwal nga templo ni Jehova.⁠ *​​—⁠Hebreo 8:​1-5; 9:​2-​10, 23.

San-o nagsugod sa pagpanghikot ang espirituwal nga templo? Ti, binagbinaga kon ano ang natabo sang ginpresentar ni Jesus ang iya kaugalingon agod bawtismuhan sang 29 C.⁠E. Sugod sadto nga tion sang iya kabuhi, gintuman ni Jesus ang mga pulong sang Salmo 40:​6-8. Ginpakita ni apostol Pablo sang ulihi nga si Jesus nagpangamuyo sa Dios: “Indi mo luyag ang mga halad kag mga dulot, kundi gin-amanan mo ako sing isa ka lawas.” (Hebreo 10:⁠5) Nahibaluan ni Jesus nga “indi luyag” sang Dios nga magpadayon ang paghalad sing halad nga mga sapat sa templo sang Jerusalem. Sa baylo, si Jehova nag-aman sing isa ka himpit tawhanon nga lawas agod madulot ni Jesus subong isa ka halad. Sa pagpabutyag sang iya tinagipusuon nga handum, si Jesus nagpadayon: “Yari karon! nag-abot ako (sa linukot sang tulun-an nasulat ini nahanungod sa akon) sa paghimo sang imo kabubut-on, O Dios.” (Hebreo 10:⁠7) Kag ano ang sabat ni Jehova? Ang Ebanghelyo ni Mateo nagasiling: “Pagkatapos nga mabawtismuhan gilayon nga nagtakas si Jesus gikan sa tubig; kag, yari karon! ang mga langit nabuksan, kag nakita niya nga nagapanaug ang subong sa salampati nga espiritu sang Dios nga nagkunsad sa iya. Yari karon! May tingog man gikan sa mga langit nga nagsiling: ‘Ini ang akon Anak, ang hinigugma, nga ginakahamut-an ko.’ ”​​—⁠Mateo 3:​16, 17.

Ang pagbaton ni Jehova nga Dios sang pagpresentar sa lawas ni Jesus subong halad nagakahulugan nga nagluntad na ang isa ka halaran nga daku pa sa literal nga halaran sa templo sa Jerusalem. Ini amo ang halaran sang “kabubut-on” sang Dios, ukon ang kahimusan sa pagbaton sang tawhanon nga kabuhi ni Jesus subong isa ka halad. (Hebreo 10:10) Ang paghaplas kay Jesus paagi sa balaan nga espiritu nagakahulugan nga gintukod na karon sang Dios ang iya bug-os nga kahimusan sang espirituwal nga templo.⁠ * Nian, sang ginbawtismuhan si Jesus, ang langitnon nga puluy-an sang Dios ginhaplas, ukon ginpain, subong ang “Balaan sang mga Balaan” sa kahimusan sang dakung espirituwal nga templo.

[Mga nota]

^ par. 3 Para sa pagbinagbinag sang nanuhaytuhay nga bahin sang espirituwal nga templo sang Dios, tan-awa ang pahina 14-19 sang Hulyo 1, 1996, nga Ang Lalantawan.

^ par. 5 Ini ginpatuhuyan sa pahina 195 sang libro nga Binagbinaga ang Tagna ni Daniel!

[Retrato sa pahina 27]

“Ang Balaan sang mga Balaan” ginhaplas sang ginbawtismuhan si Jesus