Magdiretso sa kaundan

Magdiretso sa listahan sang kaundan

Pagtukod sing Isa Ka Pamilya nga Mabakod sa Espirituwal

Pagtukod sing Isa Ka Pamilya nga Mabakod sa Espirituwal

 Pagtukod sing Isa ka Pamilya nga Mabakod sa Espirituwal

“Padayon sila nga padakua sa disiplina kag sa nagatadlong nga panghunahuna ni Jehova.”​—⁠EFESO 6:4.

1. Ano ang katuyuan sang Dios para sa pamilya, apang sa baylo, ano ang natabo?

“MAGMABUNGAHON kamo kag magbuad kag pun-a ninyo ang duta.” (Genesis 1:28) Paagi sa sini nga mga pulong kanday Adan kag Eva, gintukod ni Jehova nga Dios ang kahimusan sang pamilya. (Efeso 3:​14, 15) Sa pagtan-aw sa unahan, mahanduraw sadtong nahaunang mag-asawa ang duta nga puno sang ila mga kaanakan​—⁠isa ka daku nga pamilya sang himpit nga mga indibiduwal nga nagakabuhi sing malipayon sa paraiso nga duta kag nagasimba sing nahiusa sa ila Dakung Manunuga. Apang sanday Adan kag Eva nagpakasala, kag ang duta wala mapuno sang matarong kag mahinadlukon-sa-Dios nga katawhan. (Roma 5:12) Sa baylo, ang pagkabuhi sang pamilya madasig nga nag-usmod, kag ang pagdumot, kasingki, kag kakulang sing “kinaugali nga gugma” nangibabaw, ilabi na sa sining “katapusan nga mga adlaw.”​—⁠2 Timoteo 3:1-5; Genesis 4:​8, 23; 6:​5, 11, 12.

2. Ano ang mga ikasarang sang mga kaanakan ni Adan, apang ano ang ginkinahanglan agod makatukod sing isa ka pamilya nga mabakod sa espirituwal?

2 Sanday Adan kag Eva gintuga sa larawan sang Dios. Bisan makasasala na, gintugutan ni Jehova nga makatigayon sing mga anak si Adan. (Genesis 1:27; 5:​1-4) Kaangay sang ila amay, ang mga kaanakan ni Adan may yara anay moral nga ikasarang kag makatuon sa pagkilala sa ulot sang husto kag sala. Mahimo sila tudluan kon paano simbahon ang ila Manunuga kag ang importansia nga higugmaon sia upod ang ila bug-os nga tagipusuon, kalag, hunahuna kag kusog. (Marcos 12:30; Juan 4:24; Santiago 1:27) Isa pa, mahimo sila mahanas ‘sa paghimo sing katarungan kag  sa paghigugma sa kaayo kag sa paglakat sing maugdang upod sa Dios.’ (Miqueas 6:⁠8) Apang, subong mga makasasala, dapat sila maghatag sing daku nga igtalupangod agod makatukod sing isa ka pamilya nga mabakod sa espirituwal.

Bakla ang Tion

3. Paano ang mga ginikanan ‘makabakal sing tion’ agod mapadaku ang Cristianong mga kabataan?

3 Sa sining mabudlay kag makahalanguyos nga mga tion, dapat himuon ang daku nga panikasog agod ang mga kabataan mangin ‘mga mahigugmaon kay Jehova’ nga tunay nga ‘nagadumot sang malaut.’ (Salmo 97:10) Ang maalamon nga mga ginikanan ‘magabakal sang tion’ agod atubangon ining mabudlay nga hilikuton. (Efeso 5:15-17) Kon ikaw isa ka ginikanan, paano mo ini himuon? Una, magpahamtang sing mga prioridad, nga nagahatag sing igtalupangod sa “mas importante nga mga butang,” pati na ang pagtudlo kag paghanas sa imo mga kabataan. (Filipos 1:​10, 11) Ikaduha, himua nga simple ang imo estilo sang pagkabuhi. Mahimo kinahanglan nga untatan mo ang mga hilikuton nga indi gid man kinahanglanon. Ukon mahimo nga dulaon mo ang di-kinahanglanon nga mga pagkabutang nga nagakinahanglan sing tion agod mentinahon. Subong isa ka Cristianong ginikanan, indi mo gid paghinulsulan nga ginhimo mo ang kinahanglanon nga panikasog agod mapadaku ang mahinadlukon-sa-Dios nga mga kabataan.​—⁠Hulubaton 29:​15, 17.

4. Paano ang isa ka pamilya mahuptan nga nahiusa?

4 Ang paghinguyang sing tion upod sa imo mga kabataan, ilabi na kon nahugod sa espirituwal nga mga butang, takus gid sa panikasog kag amo ang isa sang labing maayo nga mga paagi agod huptan nga nahiusa ang pamilya. Apang indi ini paghimua kon may higayon lamang. Mag-iskedyul sing mga tion nga mag-updanay kamo. Wala ini nagakahulugan nga yara lang kamo sa isa ka balay, kag ang kada isa nagahimo kon ano ang luyag niya. Ang mga kabataan nagamadinalag-on sing labi pa gid paagi sa adlaw-adlaw nga pagpakita sing igtalupangod sa kada isa. Ang gugma kag kabalaka dapat ipakita sing bugana. Bisan antes pa sila magdesisyon nga magpanganak, dapat binagbinagon sing serioso sang mga mag-asawa ining importante nga responsabilidad. (Lucas 14:28) Sa sina, indi nila kabigon ang pagpadaku sa mga kabataan subong isa ka mabudlay nga hilikuton. Sa baylo, tamdon nila ini subong isa ka ginapakamaayo nga pribilehiyo.​—⁠Genesis 33:⁠5; Salmo 127:3.

Magtudlo Paagi sa Hambal kag Halimbawa

5. (a) Paagi sa ano nagasugod ang pagtudlo sa mga kabataan nga higugmaon si Jehova? (b) Ano nga laygay ang ginahatag sa mga ginikanan sa Deuteronomio 6:​5-7?

5 Ang pagtudlo sa imo anak nga higugmaon si Jehova nagasugod paagi sa imo mismo gugma sa iya. Ang mabakod nga gugma sa Dios magapahulag sa imo nga sundon sing matutom ang iya tanan nga instruksion. Nagalakip ini sang pagpadaku sa mga kabataan “sa disiplina kag sa nagatadlong nga panghunahuna ni Jehova.” (Efeso 6:⁠4) Ginalaygayan sang Dios ang mga ginikanan nga magpahamtang sing halimbawa sa ila mga kabataan, magkomunikar sa ila, kag magtudlo sa ila. Ang Deuteronomio 6:​5-7 nagasiling: “Dapat mo higugmaon si Jehova nga imo Dios sa bug-os mong tagipusuon kag sa bug-os mong kalag kag sa bug-os mong kusog. Kag ining pulong nga ginasugo ko karon sa imo dapat mangin sa imo tagipusuon; kag ipatudok mo ini sa imo mga anak kag ihambal mo ini kon nagapungko ka sa imo balay kag kon nagalakat ka sa dalan kag kon nagahigda ka kag kon nagabangon ka.” Paagi sa masunson nga pagpaandam kag pagsulitsulit, mapatudok mo ang mga sugo sang Dios sa imo mga kabataan. Sa amo, mamutikan sang imo mga anak ang imo gugma kay Jehova kag, sila man maimpluwensiahan sa pagpalambo sing pagkasuod sa iya.​—⁠Hulubaton 20:7.

6. Paano mahimuslan sang mga ginikanan ang kamatuoran nga ang mga kabataan nagatuon paagi sa halimbawa?

6 Ang mga kabataan nalangkag sa pagtuon. Maalam sila nga mga tagpalamati kag mga tagpanilag kag maabtik sa pag-ilog sang imo halimbawa. Kon makita nila nga indi ka materyalistiko, nagabulig ini sa ila sa pagtuon kon paano sundon ang laygay ni Jesus. Ginatudluan mo sila nga indi mangin mabinalak-on sa materyal nga mga butang kundi ‘pangitaon anay ang ginharian sang Dios.’ (Mateo 6:25-33) Paagi sa mapuslanon kag makapalig-on nga paghambalanay tuhoy sa kamatuoran sang Biblia, sa kongregasyon sang Dios, kag sa gintangdo nga mga gulang, ginatudluan mo ang imo mga kabataan nga tahuron si Jehova kag apresyahon ang iya espirituwal nga mga aman. Sanglit mahapos mamutikan sang mga kabataan ang indi paghisantuanay, ang ginahambal nga instruksion dapat man pamatud-an paagi sa paggawi kag panimuot nga nagapakita sang imo tudok nga apresasyon sa espirituwal nga mga butang. Daw ano gid nga pagpakamaayo kon makita sang mga ginikanan  nga ang ila maayo nga halimbawa nagresulta sa bug-os tagipusuon nga paghigugma sang ila mga kabataan kay Jehova!​—⁠Hulubaton 23:​24, 25.

7, 8. Ano nga halimbawa ang nagapakita sang kabilihanan sang paghanas sa mga kabataan sugod sa pagkabata, kag kay sin-o ipatungod ang kadalag-an?

7 Ang kabilihanan sang paghanas sa mga kabataan kutob sa pagkabata sarang makita sa isa ka halimbawa halin sa Venezuela. (2 Timoteo 3:15) May kaangtanan ini sa isa ka lamharon nga mag-asawa, nga sanday Félix kag Mayerlín. Mga payunir sila nga ministro. Sang nabun-ag ang ila anak nga si Felito, nalangkag sila sa paghimo sang ila bug-os nga masarangan nga padakuon sia subong isa ka matuod nga sumilimba ni Jehova. Ginsugdan ni Mayerlín nga basahan sing mabaskog si Felito sang Ang Akon Libro sang mga Sugilanon sa Biblia, nga ginbalhag sang mga Saksi ni Jehova. Sa lamharon gid nga edad, daw kilala ni Felito si Moises kag ang iban pa nga mga tawo nga ginalarawan sa sining libro.

8 Si Felito nagsugod sa pagpanaksi sing isahanon samtang bata pa. Natuman niya ang iya handum nga mangin manugbantala sang Ginharian, kag sang ulihi ginbawtismuhan sia. Sang ulihi, si Felito nangin regular payunir. Ang iya mga ginikanan nagkomento: “Samtang ginabantayan namon ang pag-uswag sang amon anak, nahisayran namon nga utang namon ini kay Jehova kag sa iya instruksion.”

Buligi ang mga Kabataan sa Pagtubo sa Espirituwal

9. Ngaa dapat kita magpasalamat tungod sa espirituwal nga instruksion nga ginabaton naton paagi sa matutom kag mainandamon nga ulipon nga klase?

9 Madamong magasin, ginatos ka libro, kag linibo ka Internet Web site ang nagahatag sing laygay kon paano padakuon ang mga kabataan. Sa masami “ang impormasyon nagasumpakilay,” siling sang espesyal nga edisyon sang Newsweek nahanungod sa mga kabataan. “Ang labi pa ka makapagumon amo kon ang impormasyon nga sa banta mo imo masaligan sala gid gali.” Daw ano gid ang aton pagpasalamat nga si Jehova nag-aman sing bugana para sa instruksion kag espirituwal nga pag-uswag sang mga pamilya! Ginahimuslan mo bala sing bug-os ang tanan nga aman nga ginahimo paagi sa matutom kag mainandamon nga ulipon nga klase?​—⁠Mateo 24:45-47.

10. Paano ang isa ka madinalag-on nga pagtuon sang pamilya sa Biblia makabulig sa mga ginikanan kag sa mga kabataan?

10 Ang isa ka importante gid nga kinahanglanon amo ang regular kag tayuyon nga pagtuon sang pamilya sa Biblia nga ginahimo sa isa ka relaks nga kahimtangan. Agod nagakaigo ini nga makatudlo, makalilipay, kag makapalig-on, ang maayo nga paghanda ginakinahanglan. Paagi sa pagpahambal sa ila mga kabataan, mahibaluan sang mga ginikanan kon ano ang yara sa ila tagipusuon kag hunahuna. Ang isa ka paagi agod mapat-od nga mangin madinalag-on ang pangpamilya nga pagtuon amo ang pagtalupangod kon bala ang tanan nga katapo sang panimalay malangkagon nga nagapaabot sini.

11. (a) Ano nga mga tulumuron ang mabulig sang mga ginikanan sa ila mga kabataan nga tukuron? (b) Ano ang resulta sang ginhimud-usan sang isa ka Haponesa nga bata ang iya tulumuron?

11 Daku man ang mabulig sang Makasulatanhon nga mga tulumuron agod ang isa ka pamilya mangin mabakod sa espirituwal, kag dapat buligan sang mga ginikanan ang ila mga kabataan sa pagtukod sini. Lakip sa nagakaigo nga mga tulumuron amo ang pagbasa sing Biblia adlaw-adlaw, ang mangin isa ka regular nga manugbantala sing maayong balita, kag ang pag-uswag padulong sa dedikasyon kag bawtismo. Lakip sa iban pa nga mga tulumuron amo ang pag-alagad sing bug-os tion subong payunir, Bethelite, ukon misyonero. Samtang yara pa sa elementarya, nangin tulumuron ni Ayumi, isa ka Haponesa nga bata, nga panaksihan ang tanan sa iya klase. Agod mapukaw ang interes sang iya manunudlo kag mga kabutho, nangayo sia sing pahanugot nga magbutang sing pila ka publikasyon tuhoy sa Biblia sa librarya. Subong resulta, si Ayumi nagdumala sing 13 ka pagtuon sa Biblia sa sulod sang iya anom ka tuig sa elementarya. Ang isa sang mga estudyante sa Biblia kag ang iban pa nga katapo sang pamilya sang estudyante nangin bawtismado nga mga Cristiano.

12. Paano gid makapanginpulos sing daku ang mga kabataan gikan sa Cristianong mga miting?

12 Kinahanglanon man para sa mabakod nga kapagros sa espirituwal amo ang tayuyon nga pagtambong sa mga miting. Ginlaygayan ni apostol Pablo ang mga masigkatumuluo nga ‘indi pagpabay-an ang pagtilipon sing tingob, subong sang kinabatasan sang iban.’ Kabay nga indi ini mangin kinabatasan naton, kay ang mga bata kag mga tigulang  nagabenepisyo sing daku gikan sa tayuyon nga pagtambong sa Cristianong mga miting. (Hebreo 10:​24, 25; Deuteronomio 31:12) Ang mga kabataan dapat tudluan nga magpamati sing maayo. Ang paghanda para sa mga miting importante man, bangod matigayon ang pinakadaku nga benepisyo gikan sa pagpakigbahin sing aktibo paagi sa pagkomento. Bisan pa ang isa ka bata mahimo magsugod paagi sa paghambal sing pila ka tinaga ukon sa pagbasa sang isa ka diutay nga bahin sang isa ka parapo, labing mapuslanon kon ang mga kabataan ginahanas sa pagpangita sing mga sabat kag sa pagpabutyag sini sa ila kaugalingon nga mga tinaga. Kamo bala nga mga ginikanan nagapahamtang sing halimbawa paagi sa paghatag mismo sing regular kag mapuslanon nga mga komento? Nagakaigo man para sa tagsa ka katapo sang pamilya nga magtigayon sing isa ka Biblia, songbook, kag kopya sang publikasyon nga ginagamit para sa paghinun-anon sa Kasulatan.

13, 14. (a) Ngaa ang mga ginikanan dapat magpangabudlay kaupod sang ila mga kabataan sa ministeryo? (b) Ano ang magabulig agod ang pag-alagad sa latagon mangin mapuslanon kag makalilipay para sa mga kabataan?

13 Ang maalam nga mga ginikanan magatuytoy sang kusog sang pagkapamatan-on sang ila mga kabataan padulong sa pag-alagad kay Jehova, nga nagabulig sa ila nga tamdon ang pagbantala nga isa ka importante nga bahin sang ila kabuhi. (Hebreo 13:15) Paagi lamang sa pagpangabudlay upod sa ila mga kabataan sa ministeryo nga mapat-od sang mga ginikanan nga ang ila mga kabataan makatigayon sing paghanas nga kinahanglanon agod mangin mga ministro nga “wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Kon amo, kamusta ka naman? Kon ikaw isa ka ginikanan, ginabuligan mo bala ang imo mga kabataan sa paghanda para sa pag-alagad sa latagon? Magabulig ini  sa ila agod ang ministeryo mangin makalilipay, mapuslanon, kag mabungahon para sa ila.

14 Ngaa mapuslanon para sa mga ginikanan kag sa ila mga kabataan nga magpangabudlay sing tingob sa ministeryo? Sa sining paagi, makita kag mailog sang mga kabataan ang maayo nga halimbawa sang ila mga ginikanan. Sa amo man nga tion, mapanilagan sang mga ginikanan ang panimuot, paggawi, kag ikasarang sang ila mga kabataan. Pat-ura nga paupdon ang imo mga kabataan sa nanarisari nga bahin sang ministeryo. Kon mahimo, hatagi ang tagsa ka bata sang iya bag sa pagpanaksi, kag tudlui sia nga huptan ini nga mahipid kag matinlo. Paagi sa tayuyon nga paghanas kag pagpalig-on, ang matuod nga apresasyon para sa ministeryo mapabakod, kag pagatamdon sang mga kabataan ang pagbantala nga hilikuton subong isa ka paagi sa pagpakita sing gugma sa Dios kag sa isigkatawo.​—⁠Mateo 22:37-39; 28:​19, 20.

Hupti ang Espirituwal nga Kapagros

15. Sanglit importante gid nga huptan ang espirituwal nga kapagros sang isa ka pamilya, ano ang pila ka paagi agod mahimo ini?

15 Ang paghupot sa espirituwal nga kapagros sang pamilya kinahanglanon. (Salmo 119:93) Ang isa ka paagi agod mahimo ini amo ang paghinun-anon  sa espirituwal nga mga butang upod sa imo pamilya sa tanan nga higayon. Ginabinagbinag mo bala ang matag-adlaw nga teksto sa Biblia upod sa ila? Kinabatasan mo bala nga magsugid sing mga eksperiensia sa pag-alagad sa latagon ukon sing mga punto gikan sa bag-o nga Lalantawan kag Magmata! nga mga magasin “kon nagalakat ka sa dalan”? Nadumduman mo bala nga pasalamatan si Jehova sa pangamuyo tungod sa tagsa ka adlaw sang kabuhi kag tungod sa iya bugana nga mga aman “kon nagahigda ka kag kon nagabangon ka”? (Deuteronomio 6:​6-9) Kon makita sang imo mga kabataan nga mabanaag sa tanan nga ginahimo mo ang gugma sa Dios, magabulig ini sa ila nga tamdon sing serioso ang kamatuoran.

16. Ano ang kapuslanan sang pagpalig-on sa mga kabataan nga himuon ang ila kaugalingon nga pagpanalawsaw?

16 Kon kaisa, ang mga kabataan magakinahanglan sing panuytoy agod malubad sing madinalag-on ang mga problema ukon mga palaligban nga nagautwas. Sa baylo nga hambalan sila kon ano ang dapat himuon, ngaa indi ipakita sa ila kon paano mahibaluan ang pagtamod sang Dios tuhoy sa mga problema paagi sa pagpalig-on sa ila nga magpanalawsaw sing kinaugalingon? Ang pagtudlo sa mga kabataan sa paggamit sing nagakaigo sang tanan nga gamit kag publikasyon nga ginaaman paagi sa ‘matutom nga ulipon’ magabulig sa ila nga mapalambo ang isa ka suod nga kaangtanan kay Jehova. (1 Samuel 2:21b) Kag kon ipaambit nila ang mga kapuslanan sang ila pagpanalawsaw sa Biblia upod sa iban pa nga mga katapo sang panimalay, ang espirituwalidad sang pamilya labi pa nga magabakod.

Magsandig Sing Bug-os kay Jehova

17. Ngaa indi dapat madulaan sing paglaum ang mga nagasolo nga ginikanan may kaangtanan sa pagpadaku sa ila mga kabataan subong mga Cristiano?

17 Kamusta naman ang mga pamilya nga may nagasolo nga ginikanan? Nagaatubang sila sing dugang nga mga hangkat may kaangtanan sa pagpadaku sa mga kabataan. Apang mga nagasolo nga ginikanan, indi kamo maluyahan sing buot! Mahimo matigayon ang kadalag-an, subong sang ginapakita sang madamong nagasolo nga ginikanan nga nagsalig sa Dios, nagtuman sing matinumanon sang iya laygay, kag nagpadaku sing maayo kag mabakod sa espirituwal nga mga kabataan. (Hulubaton 22:⁠6) Sa pagkamatuod, ang mga Cristiano nga mga nagasolo nga ginikanan dapat magsalig sing bug-os kay Jehova. Dapat sila magtuo nga magahatag sia sing bulig.​—⁠Salmo 121:1-3.

18. Ano nga mga kinahanglanon sa hunahuna kag lawas sang ila mga kabataan ang dapat hatagan sing igtalupangod sang mga ginikanan, apang ano ang dapat hatagan sing prioridad?

18 Nahibaluan sang maalam nga mga ginikanan nga ‘may tion sa pagkadlaw kag tion sa paglukso.’ (Manugwali 3:​1, 4) Agod mapabakod ang hunahuna kag lawas sang isa ka bata, ang tion sa pagpahunayhunay kag ang timbang, makalilipay nga paglingawlingaw kinahanglan. Ang makapalig-on nga musika kag ilabi na ang pag-amba sing mga ambahanon sang pagdayaw sa Dios magabulig sa isa ka bata nga mapalambo ang maayo nga panimuot kag may daku ini nga mahimo agod magbakod ang iya kaangtanan kay Jehova. (Colosas 3:16) Ang pagkapamatan-on amo man ang tion sa paghanda agod mangin isa ka mahinadlukon-sa-Dios nga adulto, agod ang kalipay sa kabuhi magapadayon sing dayon sa paraiso nga duta.​—⁠Galacia 6:8.

19. Ngaa makasalig ang mga ginikanan nga pakamaayuhon ni Jehova ang ila mga panikasog sa pagpadaku sa ila mga kabataan?

19 Luyag ni Jehova nga ang tanan nga Cristianong pamilya magmadinalag-on agod magpabilin nga mabakod kag nahiusa sa espirituwal. Kon ginahigugma gid naton ang Dios kag ginahimo ang aton bug-os nga masarangan agod tumanon ang iya Pulong, pakamaayuhon niya ang aton mga panikasog kag hatagan kita sing kusog nga kinahanglan agod masunod ang iya inspirado nga panuytoy. (Isaias 48:17; Filipos 4:13) Dumduma nga ang imo karon kahigayunan agod tudluan kag hanason ang imo mga kabataan limitado lamang kag indi na maliwat. Himua ang imo bug-os gid nga masarangan agod maaplikar ang laygay sang Pulong sang Dios, kag pakamaayuhon ni Jehova ang imo mga panikasog agod matukod ang isa ka pamilya nga mabakod sa espirituwal.

Ano ang Natun-an Naton?

• Ngaa ang pagbakal sing tion importante gid kon nagahanas sa mga kabataan?

• Ngaa ang maayo nga halimbawa sang mga ginikanan kinahanglanon?

• Ano ang pila ka importante nga paagi agod buligan ang mga kabataan sa pagtubo sa espirituwal?

• Paano mahuptan ang espirituwal nga kapagros sang isa ka pamilya?

[Mga Pamangkot sa Pagtinuon]

[Mga retrato sa pahina 24, 25]

Ang mga pamilya nga mabakod sa espirituwal tayuyon nga nagatuon sa Pulong sang Dios, nagatambong sa Cristianong mga miting, kag nagapakigbahin sa ministeryo sing magkaupod