Magtindog Sing Bug-os Kag Magtuo Sing Malig-on

“Isa ka Obra-Maestra nga Proyekto”

KUTOB sang maaga nga panahon sang ila modernong-adlaw nga maragtas, ang mga Saksi ni Jehova interesado gid sa isa sang mga tagna ni Jesucristo: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Samtang ang 1914​​—⁠ang pamuno sang “katapusan nga mga adlaw”​​—⁠naghilapit, ginsugdan sang sinsero nga mga Estudyante sang Biblia nga may malig-on nga pagtuo ang di-matupungan nga bug-os kalibutan nga kampanya sang edukasyon pasad sa Balaan nga Kasulatan.​​—⁠2 Timoteo 3:⁠1.

Agod matuman ang ila tulumuron nga ipahayag ang maayong balita sa bug-os nga duta, ining mga alagad ni Jehova naggamit sing isa ka metodo nga sadto anay bag-o, maathag, kag masili ang duag. Agod mahibaluan ang dugang pa tuhoy sini, balikan naton ini.

Isa ka Bag-o nga Paagi sa Pagpahayag Sing Maayong Balita

Enero sadto sang tuig 1914. Handurawa nga nagapungko ka kaupod sang 5,000 pa sa isa ka madulom nga awditoryom sa New York City. Sa atubangan ninyo yara ang isa ka daku nga telon para sa sine. Isa ka bukay-sing-buhok nga lalaki nga nakaamerikana ang nagguwa sa telon. Nagatan-aw ka sing inapa nga mga pelikula (silent movies), apang ining tawo nagahambal, kag mabatian mo ang iya ginahambal. Nagatan-aw ka sang una nga pagpasalida sang isa ka butang nga bag-o sa teknolohiya, kag pinasahi gid ang mensahe. Ang nagahambal amo si Charles Taze Russell, ang nahauna nga presidente sang Watch Tower Society, kag ang produksion amo ang “Photo-Drama of Creation.”

Narealisar ni C. T. Russell ang ikasarang sang sine agod malab-ot ang kadam-an sang katawhan. Busa, sang 1912, gin-umpisahan niya ang paghanda sa “Photo-Drama of Creation.” Sang ulihi, nangin isa ini ka walo-ka-oras-kalawig nga produksion sang potograpiko nga slide kag sine, nga may duag kag tunog.

Gindesinyo nga ipasalida sa apat ka bahin, gindala sang “Photo-Drama” ang mga tumalan-aw halin sa pagpanuga pakadto sa tawhanon nga maragtas tubtob sa talipuspusan sang katuyuan ni Jehova nga Dios para sa duta kag katawhan sa katapusan sang Milenyo nga Paggahom ni Cristo. Mga tinuig pa ang nagligad antes ang amo man nga paggamit sang teknolohiya nangin madinalag-on sa komersio. Walay sapayan sina, minilyon ang nakatan-aw sang “Photo-Drama of Creation” nga wala sing bayad!

Ang maayo-sing-kalidad nga mga rekording sa musika subong man ang 96 ka pamulongpulong nga ginrekord sa plaka ginhanda para sa “Photo-Drama.” Ang stereopticon slides (isa ka sahi sang pagpasalida nga nagagamit sing prodyektor diin ang isa ka slide ginasampaw sa isa pa) ginahuman sang matahom nga taliambong nga nagalaragway sang maragtas sang kalibutan. Kinahanglan man nga maghimo sing ginatos ka bag-o nga painting kag sketch. Ang pila sang de-kolor  nga slide kag film mahalungon nga ginpinta paagi sa kamot. Kag ginhimo ini sing sulitsulit, kay, sang ulihi, 20 ka reproduksion nga may apat-ka-bahin ang tagsa ang ginhanda. Nagpaposible ini agod mapasalida ang isa ka bahin sining “Photo-Drama” sa 80 ka siudad sa bisan ano man nga adlaw!

Sa Likod Sang mga Danyag

Ano ang nagakatabo sa likod sang mga danyag sa tion sang pagpasalida sang “Photo-Drama”? “Ang Drama nagasugod paagi sa isa ka pelikula ni Brother Russell,” siling sang isa ka Estudyante sang Biblia nga si Alice Hoffman. “Sa tion nga magguwa sia sa telon kag magtikab sang iya mga bibig, ang ponograpo ginapatokar . . . kag nalipay kami sa pagpamati sa iya.”

Tuhoy sa time-lapse nga potograpiya, si Zola Hoffman naghinumdom: “Nagapungko ako didto nga nagamurahag ang mata sa katingala samtang ginatan-aw namon ang paglaragway sa mga adlaw sang pagpanuga. Makita didto ang mga liryo nga amat-amat nga nagapamukadkad sa atubangan namon.”

Ang maluyagon sa musika nga si Karl F. Klein sang Nagadumala nga Hubon sang mga Saksi ni Jehova nagsiling: “Samtang ginapasalida ining mga sine, ginaakumpanyaran ini sang malulot gid nga musika, sang matahom nga mga musika subong sang Narcissus kag Humoreske.”

May yara iban pa nga halandumon nga mga hitabo. “Kon kaisa may makahalam-ot nga mga aksidente nga nagakatabo,” hinumdom ni Clayton J. Woodworth, Jr. “Isa ka bes ang rekord nagatokar sang ‘Flee as a Bird to Your Mountain,’ kag sa telon naman makita ang laragway sang isa ka daku nga gigantosaurus, isa ka daku kaayo nga sapat antes sang Anaw”!

Luwas sa regular nga “Photo-Drama of Creation,” yara man sang ulihi ang “Eureka Drama.” (Tan-awa ang kahon.) Ang isa ginahuman sang ginplaka nga mga pamulongpulong, subong man sang ginplaka nga musika. Ang isa pa ginahuman sang mga plaka kag mga slide. Bisan pa ang “Eureka Drama” wala sing sine, madinalag-on ini nga ginpasalida sa mga lugar nga diutay sing pumuluyo.

Isa ka Epektibo nga Galamiton sa Pagpanaksi

Sang talipuspusan sang 1914, ang “Photo-Drama” natan-aw sang tumalambong nga may kabug-usan nga kapin sa 9,000,000 sa Aminhan nga Amerika, Europa, kag Australia. Bisan pa diutay lamang sa kadamuon, ang mga Estudyante sang Biblia malig-on sing pagtuo nga nagpahayag sing maayong balita paagi sining bag-o nga pamaagi. Malipayon sila nga nag-amot agod makaarkila sing nagakaigo nga mga duog para sa sining pagpasalida. Gani, paagi sa “Photo-Drama of Creation,” ang mga tumalan-aw nangin pamilyar sa Pulong kag mga katuyuan sang Dios.

Sa isa ka sulat kay C. T. Russell, ang isa ka tawo nagsiling: “Yadtong una nga pagtan-aw sa imo Drama amo ang pinakaimportante nga tion sa akon kabuhi; ukon, masiling ko, ang pinakaimportante nga tion sa akon ihibalo sa Biblia.” Ang isa pa nagsiling: “Halos nalunod na ang akon pagtuo kag pamatyag ko ginluwas ako sang ‘Photo-Drama of Creation’ nga ginpasalida diri sang nagligad nga tig-ilinit. . . . May kalinungan na ako karon nga indi mahatag sang kalibutan kag indi ko pag-ibaylo sa tanan nga kamanggaran sini.”

Si Demetrius Papageorge, ang madugay na nga katapo sang ulong-talatapan sang Sosiedad, nagsiling: “Kon binagbinagon naton ang diutay nga kadamuon sang mga Estudyante sang Biblia kag ang diutay nga pundo nga magamit, ang ‘Photo-Drama’ isa gid ka obra-maestra nga proyekto. May espiritu gid ni Jehova sa likod sini!”

[Kahon/Mga retrato sa pahina 8, 9]

Ang “Eureka Drama”

Walo ka bulan sa tapos sang una nga pagpasalida sang “Photo-Drama,” nakita sang Sosiedad ang kinahanglanon nga mag-aman sing isa pa ka bersion sini nga ginatawag ang “Eureka Drama.” Samtang ang kompleto nga “Photo-Drama” padayon nga ginpasalida sa dalagku nga mga siudad, ginahatag sang “Eureka” ang amo gihapon nga sadsaran nga mensahe sa mga minuro kag kaumhan. Ang isa ka bersion sang “Eureka Drama” ginlaragway subong nagahatag sa “mga utod nga babayi sing pinasahi nga kahigayunan” sa pagpanaksi. Ngaa? Bangod ang suludlan sang mga plaka nagabug-at lamang sing 14 ka kilo. Siempre pa, para sa pagpasalida sini, kinahanglan man nga magdala sing ponograpo.