Magdiretso sa kaundan

Magdiretso sa listahan sang kaundan

Isa ka Pinasahi nga Pahibalo

Isa ka Pinasahi nga Pahibalo

 Isa ka Pinasahi nga Pahibalo

SA KATAPUSAN nga bahin sang tuigan nga miting sang Watch Tower Bible and Tract Society of Pennsylvania sang Oktubre 7, 2000, isa ka pinasahi nga pahibalo ang ginhatag sang tsirman, si John E. Barr sang Nagadumala nga Hubon. Ining pahibalo nagpalig-on sa una nga mga diskurso nga ginhatag sadto nga adlaw nanday Theodore Jaracz kag Daniel Sydlik.​​—⁠Tan-awa ang pahina 12-​16 kag 28-​31 sining magasin.

Nagasambit sang importante kaayo nga punto, si Utod Barr nagsiling: “ ‘Ang matutom kag mainandamon nga ulipon’ kag ang Nagadumala nga Hubon sini gintugyanan sing mga salabton nga mas mataas kag mas masangkad sangsa ginhatag sa legal nga mga korporasyon. Ginasambit sa karta sang tagsa sining legal nga mga korporasyon ang mga butang nga limitado sing kasangkaron. Apang, gintangdo sang aton Agalon, si Jesucristo, sa matutom nga ulipon nga klase ang iya tanan nga ‘pagkabutang,’ ukon intereses sang Ginharian diri sa duta.”​​—⁠Mateo 24:​45-​47.

Tuhoy sa korporasyon sang Pennsylvania, si Utod Barr nagsiling: “Kutob sang nangin korporasyon ini sang 1884, ang Watch Tower Bible and Tract Society of Pennsylvania nagtungod sing importante nga papel sa aton modernong-adlaw nga maragtas. Apang, isa lamang ini ka legal nga korporasyon nga ginagamit sang ‘matutom kag mainandamon nga ulipon’ kon kinahanglanon.”

Sa ila mga diskurso, ginpaathag nanday Utod Sydlik kag Jaracz nga ang pagtugyan sa “matutom kag mainandamon nga ulipon” sang tanan nga dutan-on nga pagkabutang sang Ginuo wala magpugong sa ulipon nga klase sa pagtugot sa kalipikado nga mga lalaki gikan sa tunga sang “iban nga mga karnero” sa pagtatap sang pila ka kinaandan nga mga responsabilidad sa pagdumala. (Juan 10:16) Wala sing bisan ano man nga Makasulatanhon nga rason agod ipilit nga ang tanan ukon ang bisan sin-o man sa mga direktor sang legal nga mga ahensia nga ginagamit sang mga Saksi ni Jehova dapat nga hinaplas nga mga Cristiano.

Ginsugid ni Utod Barr sa tumalambong nga sining karon lang ang pila ka katapo sang Nagadumala nga Hubon sang mga Saksi ni Jehova nga nagapangalagad subong mga direktor kag mga opisyal kinabubut-on nga nagbiya sa hubon sang mga direktor sang tanan nga korporasyon nga ginagamit sang “matutom kag mainandamon nga ulipon” sa Estados Unidos. Ginpili subong mga tal-us ang masaligan nga mga kauturan sang iban nga mga karnero nga klase.

Ining desisyon sang Nagadumala nga Hubon nga ang sangkol nga mga lalaki sang iban nga mga karnero magaalagad subong mga direktor sang mga korporasyon nga ginagamit sang mga Saksi ni Jehova maayo gid. Nagatugot ini sa mga katapo sang Nagadumala nga Hubon sa paghinguyang sing madamo pa nga tion sa paghanda sing espirituwal nga pagkaon kag sa pagtatap man sa espirituwal nga mga kinahanglanon sang bug-os kalibutan nga paghiliutod.

Sa paghinakop, ang tsirman nagsiling sa iya nalangkag nga tumalambong: “Samtang ang nagkalainlain nga legal kag administratibo nga mga katungdanan gintangdo sa eksperiensiado nga mga manugtatap, . . . sila tanan nagapangalagad sa idalom sang espirituwal nga panuytoy sang Nagadumala nga Hubon. . . . Mapinangamuyuon kita tanan nga nagapaabot nga pakamaayuhon ni Jehova ang aton nahiusa nga mga panikasog sa paghimo sang iya kabubut-on, sa kadungganan kag kahimayaan sang iya daku nga ngalan.”