Ang mga Manugtuman sang Pulong sang Dios Nakasapo sing Kalipay

“Ginakilala naton ining kombension subong isa pa ka aman ni Jehova agod ihanda kita para sa dugang pa nga hilikuton sa Ginharian,” siling sang isa sang mga humalambal sa nauna nga mga bahin sang “Mga Manugtuman Sang Pulong Sang Dios” Distrito nga Kombension sang mga Saksi ni Jehova. Nagpadayon sia: “Ginhanda naton ang aton kaugalingon agod matudluan kita nahanungod sa malipayon nga pagkabuhi subong pamilya, agod mapalig-on kita nga magpabilin nga suod sa organisasyon ni Jehova, agod mapahulag kita nga huptan ang aton kakugi sa pag-alagad sa Ginharian, kag agod pahanumdumon kita nga dapat padayon kita nga magbantay.”

HALIN sang talipuspusan nga bahin sang Mayo 2000, nagpanong ang minilyon sang mga manugtuman sang pulong sang Dios kag ang ila mga abyan sa linibo ka lugar sa bug-os nga kalibutan agod makabaton sang importante nga edukasyon sa Biblia. Ano ang ila natun-an sa sulod sang tatlo-ka-adlaw nga kombension?

Una nga Adlaw​—⁠Wala Ginakalimtan ang mga Binuhatan ni Jehova

Sa nagabukas nga pamulongpulong, ang tsirman nag-agda sa tagpalamati nga tigayunon ang mga pagpakamaayo nga nagagikan sa nahiusa nga pagsimba kay Jehova sa mga kombension. Ginpasalig ang tanan nga tumalambong nga magauswag ang ila pagtuo kag magabakod ang ila personal nga kaangtanan kay Jehova.

Nahibaluan sang “malipayon nga Dios” kon ano ang kinahanglanon naton agod malipay. (1 Timoteo 1:11) Gani, ginpadaku sang pamulongpulong nga “Ang Paghimo Sang Kabubut-on Sang Dios Nagadala Sing Kalipay” nga ang Pulong ni Jehova, ang Biblia, nagabalay sang labing maayo nga dalanon sang pagkabuhi. (Juan 13:17) Ginpakita sang pila ka interbyu sa madugay na nga mga Saksi ni Jehova kon paano ang paghimo sang kabubut-on sang Dios sa nanuhaytuhay nga kahimtangan nagahatag sing kapin nga kahulugan sa aton kabuhi. Ang nagsunod nga pamulongpulong, “Mangin Malipayon sa Pagkaayo ni Jehova,” nagpadaku nga, subong “mga manug-ilog sang Dios,” luyag sang mga Cristiano nga maghimo sang “tanan nga sahi sang pagkaayo” sa ila pagkabuhi. (Efeso 5:​1, 9) Ang isa ka talalupangdon nga paagi agod mahimo ini amo ang pagbantala sing maayong balita kag paghimo sing mga disipulo.​—⁠Salmo 145:⁠7.

Ang pagbinagbinag sa “Magpabilin nga Mabakod Subong nga Nagatan-aw sa Isa nga Di-makita” nagpakita kon paano ang mabakod nga pagtuo nagabulig sa aton nga “makita” ang di-makita nga Dios. Ginlaragway sang humalambal kon paano nahibaluan sang espirituwal nga mga tawo ang mga kinaiya sang Dios, lakip ang iya ikasarang sa paghibalo bisan sang aton ginahunahuna. (Hulubaton 5:21) Ginsaysay sang mga gin-interbyu ang mga tikang nga ila ginhimo agod mapalambo ang mas mabakod nga pagtuo kag mauna ang espirituwal nga mga interes sa ila kabuhi.

Natapos ang sesyon sa aga paagi sa keynote address, “Dayawa si Jehova​—⁠Ang Manugbuhat Sing Makatilingala nga mga Butang.” Ginbuligan sini ang tagpalamati nga mahangpan nga samtang nagadugang  ang aton ihibalo tuhoy kay Jehova, nagadugang man ang mga rason nga makita naton agod dayawon sia subong ang Manugbuhat sing makatilingala nga mga butang. Ang humalambal nagsiling: “Samtang ginabinagbinag naton ang dalayawon nga mga buhat sang pagpanuga sang Dios upod ang tanan makatilingala nga butang nga ginahimo niya para sa aton karon mismo, ginapahulag kita sang tinagipusuon nga apresasyon nga dayawon sia. Samtang nagapamalandong kita tuhoy sa milagruso nga mga butang nga nahimo niya para sa iya katawhan sang una, ginahandum naton nga dayawon sia. Kag samtang ginabinagbinag naton ang makatilingala nga mga butang nga ginapanaad ni Jehova, nagapangita man kita sing mga paagi agod ipabutyag ang aton apresasyon.”

Nagsugod ang sesyon sa hapon paagi sa pamulongpulong nga “Indi Mag-untat sa Paghimo Sing Maayo,” nga nagpahanumdom sa tanan nga tagpalamati nga ang mga pag-ipit sini nga kalibutan nagapamatuod nga malapit na ang katapusan. (2 Timoteo 3:⁠1) Apang, paagi sa indi pag-untat, mapamatud-an naton nga kita ang “sahi nga may pagtuo padulong sa pagtipig nga buhi sa kalag.”​—⁠Hebreo 10:⁠39.

Ano nga laygay sang Biblia ang ginhatag tuhoy sa pamilya? Ang una nga simposium sang kombension​—⁠“Mangin Matinumanon sa Pulong Sang Dios”⁠​—⁠​nagsugod sa bahin nga “Sa Pagpili Sing Tiayon.” Ang pagpili sing tiayon isa sang labing serioso nga mga desisyon nga ginahimo sang mga tawo. Sa amo, ang mga Cristiano nagahulat sa pagminyo tubtob nga hamtong na sila, kag dapat sila magminyo “lamang sa Ginuo.” (1 Corinto 7:39) Ginbinagbinag sang masunod nga bahin sang simposium ang handum ni Jehova nga magmadinalag-on ang tanan nga Cristianong pamilya subong malig-on sing espirituwalidad nga mga grupo, kag naghatag ini sang praktikal nga mga paagi kon paano ini himuon. Ang katapusan nga bahin nagpahanumdom sa mga ginikanan nga ang pagtudlo sa ila kabataan nga higugmaon ang Dios nagasugod paagi sa paghigugma sang mga ginikanan sa iya.

Ang mga punto nga ginpresentar sa pamulongpulong nga “Mag-andam sa mga Huringhuring kag Kutsokutso” nagbulig sa tanan nga mahangpan nga bisan pa nagakatabo ang makatilingala nga mga butang, dapat kita magmaalamon sa aton reaksion, nga wala nagapati sa gilayon, kon makabati kita sing makagalanyat nga mga report. Mas maayo pa nga isugid sang mga Cristiano ang butang nga nahibaluan nila nga matuod​—⁠ang maayong balita sang Ginharian. Nasapwan sang madamo ang masunod nga pamulongpulong, “Pagbatas sa ‘Isa ka Ungon sa Unod,’ ” nga makalipay kag makapalig-on gid. Nagbulig ini sa ila nga mahangpan nga walay sapayan sang mga pagtilaw nga mahimo ginaatubang naton karon, mapabakod kita ni Jehova paagi sa iya balaan nga espiritu, sa iya Pulong, kag paagi sa aton Cristianong paghiliutod. Daku nga pagpalig-on ang natigayon gikan sa personal nga inagihan ni apostol Pablo may kaangtanan sini.​—⁠2 Corinto 12:​7-​10; Filipos 4:​11, 13.

 Natapos ang una nga adlaw paagi sa pamulongpulong nga “Padayon nga Paglakat Sing Dungan sa Organisasyon ni Jehova.” Ginbinagbinag ang tatlo ka bahin diin ilabi na nga nag-uswag ang organisasyon sang Dios: (1) ang nagauswag nga paghangop sa espirituwal nga kapawa halin kay Jehova, (2) ang ministeryo nga gintugyan sang Dios sa aton, kag (3) ang suno-sa-tion nga mga pagpasibu sa mga pamaagi sang organisasyon. Nian masinaligon nga nagsiling ang humalambal: “Nalangkag kita kon ano ang yara sa palaabuton.” Namangkot sia: “Maduhaduhaan bala nga may rason gid kita nga huptan ang aton pagsalig sa panugod nga malig-on tubtob sa katapusan?” (Hebreo 3:14) Maathag ang sabat. Nagdul-ong ina sa pagpaguwa sing isa ka bag-o nga brosyur nga natig-uluhan sing Mahimo Ikaw Mangin Abyan Sang Dios! Mangin isa ini ka epektibo nga bulig sa pagpanudlo agod buligan ang mga indibiduwal nga limitado lamang ang edukasyon ukon ikasarang sa pagbasa nga makatuon tuhoy kay Jehova.

Ikaduha nga Adlaw​—⁠Padayon nga Maghambal Tuhoy sa Makatilingala nga mga Binuhatan Sang Dios

Sa tapos mabinagbinag ang teksto sa adlaw, ang ikaduha nga adlaw sang kombension nagpadayon paagi sa simposium nga “Mga Ministro Sang Pulong Sang Dios.” Ginpatalupangod sang una nga bahin ang kadalag-an karon sang aton bug-os kalibutan nga pagbantala. Apang, ang pagbatas naton sa sini nga hilikuton ginahangkat sang kalabanan, nga nagasikway sa mensahe sang Ginharian. Pila ka madugay na nga mga manugbantala ang nagpaathag kon paano nila nahuptan ang ila kalipay sa ministeryo paagi sa pagpabakod sa ila hunahuna kag tagipusuon agod maatubang ang hangkat sang di-pagsapak kag pagpamatok. Ang ikaduha nga bahin nagpahanumdom sa mga kombensionista nga ginatinguhaan sang mga Saksi ni Jehova nga malab-ot ang mga tawo bisan diin, sing pormal kag di-pormal. Kag ang katapusan nga bahin naglaragway sang nanuhaytuhay nga mga paagi nga sarang mapasangkad sang tanan nga Cristiano ang ila ministeryo. Ginpadaku sang humalambal nga agod mahimo ini, dapat gid naton unahon ang Ginharian sang Dios, bisan pa nga ang paghimo sini nagadalahig sing kabudlayan kag pagdingot sa kaugalingon.​—⁠Mateo 6:​19-21.

Bangod nagakabuhi kita sa isa ka di-diosnon nga kalibutan nga puno sing di-mapaayawan nga paghingamo sa materyal nga mga butang, sibu gid sa tion ang pamulongpulong nga “Palambua ang Diosnon nga Debosyon nga May Pagkasupisyente sa Kaugalingon.” Nagapasad sang pila niya ka komento sa 1 Timoteo 6:​6-​10, 18, 19, ginpakita sang humalambal kon paano nagabulig ang diosnon nga  debosyon sa mga Cristiano nga malikawan ang gugma sa kuwarta, nga makapatalang sa ila kag tunaan sang madamo nga kasakit. Ginpadaku niya nga ano man ang aton kahimtangan sa pangabuhi, ang kalipay nagadepende sa aton kaangtanan kay Jehova kag sa aton maayo nga kahimtangan sa espirituwal. Madamo ang natandog gid sang mga punto nga ginpresentar sa pamulongpulong nga “Wala Nagahimo Sing Butang nga Ikahuya Sang Dios.” Ginpadaku ang kamatuoran nga wala gid ginakalimtan ni Jehova ang iya matutom nga mga Saksi. Ang di-matupungan nga halimbawa ni Jesucristo​—⁠nga “amo man kahapon kag karon, kag tubtob san-o”⁠​—⁠​magabulig sa madamo nga magpadayon sa pagdalagan sa dalaganon sang kabuhi nga may pagbatas.​—⁠Hebreo 13:⁠8.

Ang nagtakop sa sesyon sa aga amo ang pamulongpulong sa bawtismo​—⁠nga pirme isa ka pinasahi nga bahin sa dalagku nga mga pagtinipon sang mga Saksi ni Jehova. Daw ano gid ka makalilipay nga makita ang mga bag-ong nagdedikar nga nagsunod sang mga tikang ni Jesus paagi sa pagpabawtismo sa tubig! (Mateo 3:​13-17) Ang tanan nga naghimo sini nga tikang may daku na nga nahimo subong mga manugtuman sang pulong sang Dios. Dugang pa, sang ginbawtismuhan nangin ordenado sila nga mga ministro sang maayong balita, nagakalipay gid sa paghibalo nga nagapakigbahin sila sa pagpakabalaan sang ngalan ni Jehova.​—⁠Hulubaton 27:⁠11.

Ginahatag ang maathag nga laygay sa pamulongpulong nga “Kinahanglan ang Pagkahamtong Agod ‘Makilala ang Husto kag Sayop.’ ” Indi gid nagakaigo ang kalibutanon nga mga talaksan kon ano ang husto kag kon ano ang sayop. Gani kinahanglan kita magsandig sa mga talaksan ni Jehova. (Roma 12:2) Ginpalig-on ang tanan nga magpangabudlay sing lakas agod  matigayon ang sibu nga paghangop sa mga dalanon sang Dios kag mag-uswag sa pagkahamtong. Nian, mahanas naton ang aton mga ikasarang sa paghantop agod “makilala ang husto kag sayop.”​—⁠Hebreo 5:​11-14.

Nagsunod ang simposium nga “Mangabudlay Sing Lakas sa Pagpalambo Sang Espirituwalidad.” Nahangpan sang matuod nga mga Cristiano ang importansia sang pagpalambo kag paghupot sang espirituwalidad. Nagakinahanglan ini sang lakas nga pagpangabudlay​—⁠pagbasa, pagtuon, kag pagpamalandong. (Mateo 7:​13, 14; Lucas 13:24) Ang espirituwal nga mga tawo nagapadayon man sa “tanan nga porma sang pangamuyo kag pag-ampo.” (Efeso 6:18) Nahibaluan naton nga ginapakita sang aton mga pangamuyo ang kadalumon sang aton pagtuo kag debosyon, kag kadakuon sang aton espirituwalidad, subong man kon ano ang ginatamod naton nga “mas importante nga mga butang.” (Filipos 1:10) Ginpadaku man ang importansia sang pagpalambo sing mainit kag mahigugmaon nga kaangtanan kay Jehova kaangay sang kaangtanan sang isa ka matinumanon nga bata sa isa ka mahigugmaon nga amay. Indi lamang nga may relihion kita​—⁠bisan pa matuod ini⁠​—⁠​kundi luyag man naton nga mangin mabakod ang aton pagtuo, ‘subong nga nagatan-aw sa Dios.’​—⁠Hebreo 11:​6, 27.

Ang tema tuhoy sa espirituwal nga pag-uswag dugang pa nga ginbinagbinag sa pamulongpulong nga “Ipadayag ang Inyo Pag-uswag.” Ginbinagbinag ang tatlo ka bahin sina nga pag-uswag: (1) pag-uswag sa ihibalo, paghangop, kag kaalam, (2) pagpatubas sing mga bunga sang espiritu sang Dios, kag (3) pagtuman sang aton mga responsabilidad subong mga katapo sang pamilya.

Sa pagtakop sa katapusan nga pamulongpulong sa amo nga adlaw, “Paglakat sa Progresibo nga Kapawa Sang Pulong Sang Dios,” nalipay ang mga kombensionista nga makabaton sing bag-o nga libro, Ang Tagna ni Isaias​—⁠Kapawa Para sa Tanan nga Tawo I. Amo ini ang una sa duha ka tomo nga nagabinagbinag sang tulun-an nga Isaias sa Biblia sing kapitulo por kapitulo. “Ang tulun-an sang Isaias may mensahe para sa aton karon,” siling sang humalambal. Nagpadayon sia: “Huo, madamo nga tagna sini ang natuman anay sang mga adlaw ni Isaias. . . . Apang, madamo sang mga tagna ni Isaias ang nagakatuman karon, kag ang iban matuman pa sa ginsaad sang Dios nga bag-ong kalibutan.”

Ikatlo nga Adlaw​—⁠Mangin mga ManugtumanSang Pulong ni Jehova

Ang katapusan nga adlaw sang kombension nagsugod paagi sa pagbinagbinag sang teksto sa amo nga adlaw. Masunod amo ang simposium nga “Ang Makahulugan nga Tagna ni Sofonias Para sa mga Nagahimo Sing Kabubut-on Sang Dios.” Ginpakita sang tatlo ka pamulongpulong sa sini nga simposium nga, subong anay sang panahon sang batinggilan nga Juda, pahanabuon ni Jehova ang kasisit-an sa mga wala nagapamati sa iya paandam. Bangod nakasala sila batok sa Dios, magadalangdalang sila subong makaluluoy nga mga bulag, nga indi makakita sang kaluwasan. Apang, ang matuod nga mga Cristiano matutom nga nagapadayon sa pagpangita kay Jehova, kag pagalipdan sila sa adlaw sang kaakig sang Dios. Dugang pa, nagaagom sila sing madamong  pagpakamaayo bisan karon. May ginpakamaayo nga kahigayunan sila nga ipamulong ang “putli nga hambal” sang kamatuoran sang Biblia. (Sofonias 3:9) Ang humalambal nagsiling: “Ang paghambal sing putli nga hambal wala lamang nagadalahig sang pagtuo sa kamatuoran kag pagtudlo sini sa iban kundi sang pagpahisuno man sang aton paggawi sa mga kasuguan kag mga prinsipio sang Dios.”

Malangkagon nga ginhulat sang mga kombensionista ang drama nga “Nagapaandam nga mga Halimbawa Para sa Aton Adlaw.” Ginpakita sining drama, diin ang mga may bahin nagapanapot suno sa pamayo sadto nga panahon, kon paano napatay ang linibo ka Israelinhon sa dulunan sang Ginsaad nga Duta bangod ginkalimtan nila si Jehova kag nasulay sang pagano nga mga babayi sa pagpakighilawas kag sa butig nga pagsimba. Ang isa sang panguna nga mga karakter​—⁠si Jamin⁠​—⁠​indi primero makapamat-od kon diin ang pilion niya sa tunga sang pagsulay sang Moabnon nga mga babayi kag sang iya debosyon kay Jehova. Ang sala nga pangatarungan kag malimbungon nga panghunahuna sang di-diosnon nga si Zimri ginpatalupangod, subong man ang pagtuo kag debosyon ni Finehas. Maathag nga ginpakita ang katalagman sang pagpakig-upod sa mga wala nagahigugma kay Jehova.

Ginhanda sang drama ang hunahuna sang tagpalamati para sa nagsunod nga pamulongpulong, “Indi Mangin Malipaton nga mga Manugpalamati.” Ang pagbinagbinag sa 1 Corinto 10:​1-10 nagpakita nga ginatilawan ni Jehova ang aton pagkamatinumanon agod mapat-od kon bala takus kita nga makabaton sang palanublion sa bag-ong kalibutan. Para sa iban, natabunan sang undanon nga mga kailigbon ang espirituwal nga mga tulumuron bisan karon, nga malapit na sa pagsulod naton sa bag-ong sistema. Ginpalig-on ang tanan nga indi pagwasihon ang kahigayunan nga ‘makasulod sa kapahuwayan ni Jehova.’​—⁠Hebreo 4:⁠1.

Ang diskurso publiko may tema nga “Kon Ngaa Dapat Naton Talupangdon ang Makatilingala nga mga Binuhatan Sang Dios.” Ginapakita sang “makatilingala nga mga binuhatan” ni Jehova ang iya kaalam kag ang iya awtoridad sa pisikal nga mga tinuga sa palibot naton. (Job 37:14) Bastante na ang pila ka nagapangusisa nga mga pamangkot ni Jehova agod magdayaw si Job sa gahom sang labing gamhanan nga Manunuga. Magahimo man sing “makatilingala nga mga binuhatan” si Jehova sa ulihi para sa iya matutom nga mga alagad. Naghinakop ang humalambal: “May madamo kita nga rason agod talupangdon ang makatilingala nga mga binuhatan ni Jehova​—⁠kon ano ang ginhimo niya sang una, kon ano ang ginahimo niya sa mga tinuga karon, kag kon ano ang ginasaad niya nga himuon sa malapit nga palaabuton.”

Pagkatapos sang sumaryo sa artikulo sang Lalantawan nga tulun-an sa semana, ginhatag ang katapusan nga pamulongpulong sa kombension. Natig-uluhan sing “Pabalori Sing Daku ang Imo Pribilehiyo Subong Manugtuman Sang Pulong Sang Dios,” ginpadaku sining makatalandog nga diskurso nga isa ka kadungganan nga mangin mga manugtuman sang pulong sang Dios. (Santiago 1:22) Ginpahanumdom sa tumalambong nga ang aton pribilehiyo subong mga manugtuman sang pulong sang Dios pinasahi, kag samtang nagadugay kita sa paghimo sini, nagadugang pa ang aton pagpabalor sa sini. Ginpalig-on ang tanan nga tumalambong nga ipakita ang mapuslanon nga pangpapagsik sining distrito nga kombension sa ila handum nga mangin mga manugtuman sang pulong sang Dios sa bug-os nga kasangkaron. Amo lamang ini ang paagi nga maeksperiensiahan ang labing daku nga kalipay nga sarang matigayon.

[Kahon/Retrato sa pahina 25]

Mahimo Ikaw Mangin Abyan Sang Dios!

Sang hapon sang Biernes ginpaguwa ang bag-o nga brosyur nga natig-uluhan nga Mahimo Ikaw Mangin Abyan Sang Dios! Kinahanglan gid ang ginpasimple nga pagtudlo kag pagtuon sa Biblia sa madamo nga bahin sang kalibutan, kag gamiton ini nga brosyur para sa sina nga kinahanglanon. Mangin daku ini nga pagpakamaayo para sa mga tawo nga limitado lamang ang edukasyon ukon ikasarang sa pagbasa.

[Kahon/Mga retrato sa pahina 26]

Ang Tagna ni Isaias​—⁠Kapawa Para sa Tanan nga Tawo

Nakunyag ang mga kombensionista nga mabaton ang Tomo I sang duha-ka-tomo nga Ang Tagna ni Isaias​—⁠Kapawa Para sa Tanan nga Tawo. Sa sini nga publikasyon, ginpadaku ang praktikal nga kapuslanan sang tagna ni Isaias sa aton panahon.