SANG panahon sang Biblia, ang isa ka tulugyanan nagadumala sang panimalay ukon propiedad sang iban nga tawo. Ang Hebreo kag Griego nga mga tinaga nga gin-translate nga “tulugyanan” nagapatuhoy man sa manugtatap ukon sa manugdumala sang panimalay.

Sang ulipon sa Egipto si Jose nga anak ni Jacob, nangin tulugyanan sia sang panimalay sang iya agalon. Ang matuod, gintugyan kay Jose sang iya Egiptohanon nga agalon “ang tanan nga iya” ginapanag-iyahan. (Gen. 39:2-6) Sang ulihi, sang nangin gamhanan nga gumalahom si Jose sa Egipto, nagtangdo sia sang isa ka tulugyanan para sa iya panimalay.—Gen. 44:4.

Sang panahon ni Jesus, masami nga nagaistar sa mga siudad ang mga tag-iya sang mga uma. Gani nagatangdo sila sang mga tulugyanan para dumalahan ang hilikuton sang mga trabahador sa uma.

Sin-o ang kalipikado nga mangin tulugyanan? Ang isa ka Romano nga manunulat sang unang siglo nga si Columella nagsiling nga ang isa ka ulipon nga gintangdo bilang manugtatap, ukon tulugyanan, dapat “eksperiensiado” sa trabaho sa uma. Dapat “responsable sia kag indi mapintas.” Nagsiling man sia: “Ang pinakaimportante sa tanan, dapat indi niya paghunahunaon nga kabalo sia sang tanan, kag dapat handa sia magtuon sang bag-o nga mga butang.”

Ginagamit sang Pulong sang Dios ang halimbawa sang tulugyanan kag ang responsibilidad sini para ilaragway ang pila ka hilikuton sa Cristianong kongregasyon. Halimbawa, ginpalig-on ni apostol Pedro ang mga Cristiano nga gamiton ang ila mga ikasarang nga ginhatag sang Dios “sa pag-alagad sa isa kag isa subong maayong mga tulugyanan sang wala tupong nga kaayo sang Dios.”—1 Ped. 4:10.

Naggamit man si Jesus sang halimbawa sang isa ka tulugyanan sa iya ilustrasyon nga mabasa sa Lucas 16:1-8. Dugang pa, sa tagna ni Jesus parte sa tanda sang iya presensia bilang Hari, ginpasalig niya ang iya mga sumulunod nga magatangdo sia sang “matutom kag mainandamon nga ulipon,” ukon “matutom nga tulugyanan.” Ang panguna nga asaynment sini nga tulugyanan amo ang paghatag sa mga sumulunod sang Cristo sang tanan nila nga espirituwal nga pagkaon nga kinahanglan nila sa tion sang katapusan. (Mat. 24:45-47; Luc. 12:42) Nagapasalamat gid kita kay padayon kita nga nagabaton sang mga publikasyon nga ginahanda sang matutom nga tulugyanan. Ini nga mga publikasyon nga matigayon sa bug-os nga kalibutan nagapabakod sang aton pagtuo.