ANG isa ka adulto nga balyena nga humpback mas daku kag mabug-at sa isa ka depasahero nga bus. Pero, nagasibad lang ini kon maglangoy. Paano ini mahimo sang humpback? Ang isa sa mga rason amo ang kudolkudol sa mga kapay sini.

Binagbinaga: Ang kalabanan nga balyena kag iban pa nga mamalya sa dagat wala nagakudolkudol ang mga kapay. Pero pinasahi ang humpback nga balyena. May dalagku ini nga kudolkudol (nga ginatawag tubercles) sa atubang sang iya mga kapay. Kon maglangoy ang humpback, nagadalhay lang ang tubig nga nagaagi sa mga kudolkudol sini kag nagahimo nga gagmay nga mga alimpuros. Bangod sini, makabuylo sia pasaka kag mapahilay ang iya mga kapay nga wala nagadulog. Sa sini nga posisyon, ang mga kudolkudol sang iya kapay nagapadasig pa gid sang iya paglangoy kag daku ini nga bulig sa iya malaba nga mga kapay nga mga 1/3 sang iya lawas.

Gusto sang mga researcher nga gamiton ini nga ideya sa paghimo sang mga timon sang sakayan, makina sa tubig, windmill, kag elise sang helikopter.

Ano sa banta mo? Ang kapay bala sang balyena nga humpback resulta sang ebolusyon? Ukon gindesinyo ini?