● Ang alingayo ginakabig nga maayo nga enhinyero. Ngaa?

Binagbinaga: Ang alingayo nagahimo kag nagamentinar sang iya balay nga human sa pinasahi nga papel nga sia mismo ang nagahimo. * Ini nga insekto nagatipon sang uganot sang mga tanom kag laya nga kahoy halin sa mga troso, poste sang kudal, poste sang telepono, kag mga materyales nga madamo sing cellulose. Ginausang niya ini, dayon ginasamuan sing mapilit kag madamo sing protina nga laway. Kon magmala na, mahimo ini nga mamag-an kag mabakod nga papel. Isa pa, ang laway sini may mga elemento nga makabulig para ang papel makapreserbar sang init. Gani, mamentinar ang eksakto lang nga temperatura sa ila balay kon tigtulugnaw.

Ang alingayo amat-amat nga nagahimo sang iya balay. Ini nga balay human sa daw manipis nga papel kag indi mabasa. Madamo ini sing kulukuarto nga may anom ka pamusod. Bangod sini nga korte, mabakod ang ila balay kag wala sing nauyang nga space. Ang mga alingayo nga nagaistar sa lugar nga pirme basa, nagabutang sing mas madamo nga laway sa ila balay para indi ini mabasa. Isa pa, nagapangita sila sing lugar nga puede bitayan sang ila balay. Ginabitay nila sing suli ang ila balay nga ginaangot sa sanga sang kahoy. Indi makahalit sa palibot ang paghimo nila sang papel, indi pareho sa proseso subong nga makahigko sa hangin, tubig, kag duta!

Ginatun-an sang mga arkitekto kag mga researcher ang balay sang alingayo para makadesinyo sing de-kalidad nga mga materyales nga mamag-an, mabakod, mahunit, kag madunot.

Ano sa banta mo? Natabuan lang bala nga makahibalo maghimo sing papel nga balay nga may maayo nga desinyo ang isa ka insekto nga ang utok halos duha lang ka balas ang kadakuon? Ukon indi ayhan nga ang iya abilidad subong kemikal kag mekanikal nga enhinyero nagapamatuod nga may nagdesinyo sa iya?

[Nota]