Magdiretso sa kaundan

Magdiretso sa listahan sang kaundan

Pagdisiplina sa Mata

Pagdisiplina sa Mata

 Pagdisiplina sa Mata

● Katahom gid sang mata sang tawo. Pero indi lang ini matahom. Gamhanan man ini. Ang libro nga Visual Impact, Visual Teaching nagsiling nga “kuarenta porsiento sang tanan nga ugat nga konektado sa utok naangot sa retina,” ang gamay kag masibod nga tisyu sa sulod sang mata.

Husto gid si Jesucristo sang nagsiling sia nga ang mata “suga sang lawas.” Ginpaathag niya ini paagi sa pagsiling: “Kon ang imo mata simple [sinsero, nasentro sa maayo], ang imo bug-os nga lawas mangin masanag; apang kon ang imo mata malaut, ang imo bug-os nga lawas mangin madulom.” (Mateo 6:22, 23) Ginpatalupangod ni Jesus sa aton kon paano maimpluwensiahan sang aton mata ang aton mga ginahunahuna, ginabatyag, kag mga ginahimo. Ang maayo nga mga panghunahuna nagapasanag sang kabuhi, pero ang malain nagapadulom sini.

Halimbawa, binagbinaga ang ginsiling ni Jesus sa Mateo 5:28, 29: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya. Karon, kon ang imo tuo nga mata nagapasandad sa imo, lukata ini [sa malaragwayon nga paagi].” Ano ang iya buot silingon? Ang tawo nga malapad sing mata nagatugot sang malain nga mga kailigbon, kag kon mahatagan sia sing tsansa, magahimo sia sing imoral nga mga buhat nga makapasubo sa Dios.—Santiago 1:14, 15.

Maayo gid nga punggan naton ang aton kaugalingon bisan pa mabudlay ini, pareho sa paglukat sa mata! Ti, isakripisyo mo bala ang kabuhi nga walay katapusan sa umalagi lang nga kalipay?

Mahimo man kita mangin makagod bangod sa makita sang aton mata. Gani ang Biblia nagpaandam sa aton nga “ang kailigbon sang mga mata . . . indi gikan sa Amay, kundi gikan sa kalibutan. Dugang pa, ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 Juan 2:16, 17.

Tama bala kaestrikto ang Biblia? Indi. Kay kon tumanon naton ang mga prinsipio sini, malikawan gid naton ang mga problema kag kasubo. (Galacia 6:7, 8) Kon sundon naton ang Pulong sang Dios, lakip ang pagdisiplina sa aton mata, magamalipayon gid kita. “Malipayon ang mga nagapamati sa pulong sang Dios kag nagatuman sini,” siling ni Jesus. (Lucas 11:28) Labaw sa tanan, may paglaum man sila nga mabuhi sing dayon sa duta, pero ang mga may imoral ukon makagod nga mata indi makabaton sing kalipay kag kabuhi.