Magdiretso sa kaundan

Magdiretso sa listahan sang kaundan

 Pamangkot sang mga Pamatan-on

Paano Ako Manamian sa Pagtuon sa Biblia?

Paano Ako Manamian sa Pagtuon sa Biblia?

Ngaa kinahanglan tun-an ang Biblia? Pamensara ini:

Ang Biblia makabulig sa imo nga makita ang bahandi. Ining pinakamabakal nga libro

● Makabulig sa imo para mangin maayo ang imo kabuhi

● Amo lamang ang makasugid sa imo parte sa palaabuton kag sa mga natabo sang una

● Makabulig man sa imo nga makilala ang imo kaugalingon kag mangin mas maayo nga tawo *

MABUDLAY tun-an ang Biblia, pero daku gid ang mabenepisyo mo sa sini. Gusto mo bala mahibaluan kon paano ini ginahimo sang iban nga pamatan-on? Guntinga kag pilua ang masunod nga apat ka pahina. Puede mo ini madaladala. Kopya mo ini sang mga komento sang iban nga pamatan-on, kon ano ang ila ginhimo para manamian sila sa pagtuon sa Biblia kag kon ano nga mga benepisyo ang ila nakuha.

“May mga impormasyon sa Biblia nga makabulig sa kada isa sa aton. Tama gid kadamo sang topiko sa sini nga indi naton maubos tuon!”—Valerie. *

Ang iban pa nga artikulo sang “Young People Ask” makita sa Web site nga www.watchtower.org/ype

[Mga Nota]

^ par. 7 Para mahibaluan mo pa gid kon paano ini mahimo sang Biblia sa imo, kontaka ang mga Saksi ni Jehova sa inyo lugar ukon magsulat sa nagakaigo nga adres sa pahina 5.

^ par. 9 Gin-islan ang iban nga ngalan sa sini nga artikulo.

 [Kahon/Mga Retrato sa pahina 19, 20]

PAANO TUN-AN ANG BIBLIA?

Ang problema: WALA SING GANA

“Wala gid ako pirme gana magtuon!” —Lena.

Ang pamensaron mo: MGA BENEPISYO

Para manamian ka sa pagtuon sa Biblia, kinahanglan mo sabton ang mga pamangkot nga, Ano ang makuha ko sa sini? Gusto ko bala mangin abyan sang Dios? mahangpan pa gid ang nagakatabo sa kalibutan? kag mangin maayo nga tawo? Mabuligan ka sang Biblia nga mahimo ini—kag ang iban pa!

“Indi pagpamensara nga isa ini ka obra ukon nagatuon ka para sa eskwelahan. Kundi, pamensara nga ang pagtuon sa Biblia makabulig sa imo nga mangin suod sa pinakamaayo nga Abyan, si Jehova nga Dios.”—Bethany.

“Ang pagtuon amo ang tion nga makaupod mo si Jehova nga Dios. Kon nagapakig-abyan ka sa isa ka tawo bangod lang sa imo mga ginikanan, abyan mo gid bala sia ukon abyan sang imo mga ginikanan? Kon ikaw mismo ang nagatuon, mangin abyan mo si Jehova.”—Bianca.

Dumduma: “Ang bug-os nga Kasulatan ginsulat paagi sa gahom sang Dios, kag mapuslanon sa pagtudlo sang kamatuoran, sa pagsabdong sang sala, sa pagtadlong sang sayop, kag sa pagtudlo sang matarong nga pagkabuhi.” (2 Timoteo 3:16, APD) Amo man sini ang mahimo sang Biblia sa imo!

“Nagapokus ako sa mga benepisyo. Kon may kinahanglan ako pauswagon, ang pagtuon makabulig sa akon nga mahimo ini.”—Max.

Binagbinaga ini:

Ano ang imo pamensaron para maganahan ka magtuon?

 Ang problema: NATAK-AN

“Pagkatapos ko tuon sing 10 minutos, daw nakapoy na ’ko; pagka-20 minutos, daw indi na ko mapahamtang; pagka-30 minutos, natak-an na gid ako!”—Allison.

Ang himuon mo: LAINLAINA

Pamensara kon ano ang imo tun-an, kon paano, kag sa diin ka matuon.

“I-research ang mga sabat sa imo mga pamangkot. Kon tun-an mo ini kag makita ang mga sabat, malipay ka gid.”—Richard.

“Kon magbasa ka sang isa ka hitabo, imadyina nga ara ka didto. Kuno abi ikaw ang karakter ukon isa sa mga nagatan-aw. Imadyina nga nakita mo ini mismo.”—Steven.

“Himua nga makalilipay ang imo pagtuon. Puede ka man makatuon sa gua sang inyo balay nga nagainom sing juice. Sin-o bala ang indi gusto mag-snack samtang nagatuon?”—Alexandra.

Dumduma: Sa pensar mo lang ’na nga katalaka, pero pagtamod mo lang ina. Gani imbes magsiling nga “katalaka magtuon,” magsiling nga “natak-an ako.” Mangin responsable sa imo pagtamod sa pagtuon. Paagi sini, ikaw na ang may kontrol kon ano ang imo himuon.—Hulubaton 2:10, 11.

“Ang pagtuon indi dapat makatalaka, kay pagusto ka kon paano mo ini himuon.”—Vanessa.

Binagbinaga ini:

Paano mo malainlain ang imo paagi sa pagtuon?

Ang problema: WALA SING TION

“Gusto ko pa gid tun-an ang Biblia, pero tama gid sa akon kasako kag daw wala gid ako sing tion!”—Maria.

Ang kinahanglan mo: PRIORIDAD

Samtang nagadaku ka, matun-an mo kon paano ‘mapat-od ang mas importante nga mga butang.’—Filipos 1:10.

“Ginparealisar ni Nanay sa akon nga indi ako maghulat kon san-o lang ako may tion, kundi hatagan ko gid ini sing tion. Sang gin-umpisahan ko na ini, may tion na ako sa pagtuon.”—Natanya.

“Samtang nagadaku ako, natun-an ko nga dapat may iskedyul gid sa pagtuon, kag bisan ano ang matabo, dapat sundon ko gid ini.”—Yolanda.

“Kon unahon mo ang pagtuon sangsa paglingawlingaw, sigurado nga mas manamian ka pa gid magtuon, kag indi ka na pagkonsiensiahon kon maglingawlingaw ka.”—Diana.

Dumduma: Kon wala ka sing prioridad, indi mo mahimo ang mga dapat mo himuon. Mas maayo gid kon mangita ka sing paagi kag hatagan sing tion ang pagtuon.—Efeso 5:15, 16.

“Hayskul na ako, gani kasako sa akon! Pero, ginauna ko gid sa akon iskedyul ang personal nga pagtuon sa Biblia.”—Jordan.

Binagbinaga ini:

Ano ang plano mo nga iskedyul sa pagtuon?

[Kahon/Mga Retrato sa pahina 19]

PANUGDA SANG IBAN NGA PAMATAN-ON

Zachary—Indi lang pagtun-i kon ano ang ginatun-an sang imo mga ginikanan ukon sang iban. Personal ini nga pagtuon kay ginatun-an mo kon ano ang imo gusto mahibaluan.

Kaley—Umpisa ka sa malip-ot lang. Puede nga lima lang anay ka minutos, pero himua ini adlaw-adlaw. Dayon magtuon sing 10 minutos, 15 minutos . . . Sa ulihi manamian ka na!

Daniela—Makabulig man ang ginagmay nga mga butang. Maggamit sing lainlain nga kolor sang bolpen kag manami nga notebook, ukon puede ka maghimo sing file sa kompyuter kag ngalanan ini sing Personal nga Pagtuon.

Jordan—Kon nanamian ako sa topiko, mas malawig ang akon pagtuon. Gusto ko man nga malinong. Indi ako makatuon kon magahod ang palibot.

[Diagram sa pahina 18]

(Para sa aktual nga pormat, tan-awa ang publikasyon)

Guntinga

Pilua