Magdiretso sa kaundan

Magdiretso sa listahan sang kaundan

“Ang Kamatuoran Magahilway sa Inyo”!

“Ang Kamatuoran Magahilway sa Inyo”!

 “Ang Kamatuoran Magahilway sa Inyo”!

INING pinamulong ni Jesus nga mabasa sa Juan 8:32 matuod gid. Ini nga kamatuoran nagahilway sa aton sa mga disparatis kag mga tradisyon nga nagahalit sa aton kag wala nagapahamuot sa Dios. Ipakita sa aton sang masunod nga halimbawa kon paano ginhilway sang kamatuoran sang Biblia ang mga tawo sa lainlain nga lugar sa mga kustombre sang Krismas.

Ginhilway Sila sang Kamatuoran sang Biblia!

Argentina “Nalikawan sang amon pamilya ang mga problema nga resulta sang sobra nga pagkaon kag pag-inom, kag ang pagbakal sang mga regalo nga indi namon masarangan,” siling ni Oscar.

Daw nahaw-asan si Mario sang natun-an niya ang parte sa ginatawag niya nga “kabutigan sang  Krismas.” “Nalipay ako subong nga ipabutyag ang akon apresasyon sa iban paagi sa paghatag sa ila sing regalo sa bisan ano nga tion kag suno lang sa akon masarangan.”

Canada “Nanamian ako maghatag kag magbaton sing mga regalo,” siling ni Elfie. “Pero wala ako nanamian magbaton sing regalo kon ang naghatag napilitan lang. Sang wala na kami nagaselebrar sang Krismas, daw nakabakasyon lang kami!”

Ang isa sa mga bata nga babayi ni Elfie nga si Ulli, nagsiling: “Sang wala na nagaselebrar sang Krismas ang amon ginikanan, ginasorpresa nila kami sing mga regalo ukon masadya nga mga hilimuon sa bilog nga tuig, kag nanamian kami sini! Kon pamangkuton kami sang amon mga klasmeyt kon ano ang okasyon, ginasilingan namon sila, ‘Wala lang.’ Indi mahapos para sa amon mga ginikanan nga sundon ang kamatuoran sang Biblia kay ginapamatukan sila. Pero ang ila panindugan kag determinasyon nga pahamut-an si Jehova nga Dios may daku nga epekto sa akon.”

Para kay Silvia, “daw nahaw-asan” sia kay wala na sia nagselebrar sing Krismas. “Nalipay gid ako kay nahibaluan ko nga nahamuot si Jehova nga Dios. Mas maayo ini sangsa linibo ka selebrasyon sang Krismas.”

Kenya Si Peter nagsiling: “Sang nagaselebrar pa ako sing Krismas, nagapinangutang ako para magbakal sing mga regalo kag malahalon nga mga pagkaon. Bangod sini, kinahanglan ko nga mag-overtime kag mapahilayo sa akon pamilya. Nalipay gid ako nga wala ko na ini subong ginahimo!”

“Nagahatag kag nagabaton ako sing mga regalo halin sa akon pamilya kag mga abyan sa bisan ano nga tion,” siling ni Carolyne. “Amo ini ang pinakamaayo nga regalo nga nabaton ko kay wala ko ini ginapaabot kag wala napilitan ang naghatag sa akon.”

Japan “Wala naanad ang amon kabataan nga magpaabot sing regalo kag pasapayanan ini,” siling kanday Hiroshi kag Rie. “Nalipay kami . . . kay naintiendihan nila nga dapat kinabubut-on ang paghatag.”

Si Keiko nagsiling: “Sang una, nagaselebrar ang amon pamilya sing Krismas. Kon tulog na ang amon bata nga lalaki, nagabutang kami sang akon bana sing regalo sa kilid sang iya katre. Pagkaaga, ginasilingan sia namon: ‘Kay nagpakabuot ka, ginregaluhan ka ni Santa.’ Sang matun-an ko ang kamatuoran parte sa Krismas kag ginsugid ini sa akon bata, nakibot gid sia kag naghibi. Didto ko narealisar nga indi gali maayo ang Krismas. Kabutigan ini kag daw gintonto ko lang ang akon bata.”

Pilipinas Si Dave nagsiling: ‘Daku gid ang akon pagpasalamat kay Jehova kay gintudluan niya ako sing mga kamatuoran sa Biblia. Kon ang amon pamilya maghatag sing regalo sa iban, wala kami nagapaabot nga regaluhan man. Kag nagahatag kami sing tinagipusuon.’

Ang mga ginsambit sa ibabaw pila lang sa minilyon nga nakaeksperiensia nga ang kamatuoran sang Biblia nagahilway sa mga tawo. Pero ang pinakaimportante sa tanan, amo nga mapahalipay naton ang Dios kon ginasunod naton ang kamatuoran. (Hulubaton 27:11) Si Jesucristo nagsiling: “Ang matuod nga mga sumilimba magasimba sa Amay sa espiritu kag kamatuoran, kay sa pagkamatuod amo sini ang ginapangita sang Amay nga magsimba sa iya.” (Juan 4:23) Kon usisaon sang Dios ang imo tagipusuon, makita bala niya nga ginahandum mo gid ang kamatuoran? Kabay pa nga huo ang imo sabat!

[Retrato sa pahina 9]

Bangod sa ila gugma ang mga Cristiano nagahatag sa bisan ano nga tion