Magdiretso sa kaundan

Magdiretso sa listahan sang kaundan

Mas Mabaskog Pa nga mga Linog

Mas Mabaskog Pa nga mga Linog

 Mas Mabaskog Pa nga mga Linog

SUGOD sang naimbento ang mga instrumento nga makatakus sang kabaskugon sang mga linog, madamo sing mabaskog nga linog ang narekord na sang mga sientipiko. Ang mga linog nga nagakatabo sa mga lugar nga wala sing tawo halos wala ginasapak ukon ginabalita sang media. Pero, apektado gid kita kon ang linog mag-igo sa daku nga siudad. Ang kadamuon sang mapatay nga tawo kag maguba nga mga propiedad nagadepende sa kadakuon sang populasyon kag sa kahanda sini sa linog.

Sang Enero 12, 2010, naeksperiensiahan sang mga taga-Haiti ang pinakamakahalalit nga linog sa kasaysayan kon parte sa kadamuon sang napatay kag naguba nga mga propiedad. Pero indi ini ang una ukon ang pinakamabaskog nga linog sa sini nga tuig. Ang masunod amo ang pila ka linog nga natabo sang una nga mga binulan sang tuig 2010 nga mas mabaskog pa sa nag-igo sa kapital sang Haiti.

Enero 3: 7.1 nga kabaskugon, Solomon Islands

Ining mabaskog nga linog nga sang primero ginrekord nga mas mabaskog pa sa 7.1, nagtuga sing tsunami nga may kataason nga “6 asta 10 ka pie (2-3 metros).” Ang isa ka opisyal nga responsable sa mga kalamidad nga si Loti Yates nagsiling nga makita halin sa eroplano ang “bug-os nga pagtabon sang tubig,” sa sini nga lugar. Suno kay Yates, 16 ka balay ang nagkalarumpag kag dinosena man ang naguba sa isa ka lugar sa Bainara sa Rendova Island.

Duha ka oras antes sini, naglinog na. May kabaskugon lang ini nga 6.6. Pero bangod madamo ang naalarma kag nalagyo sa mga bakulod, naluwas sila sang mag-igo ang tsunami nga tuga sining 7.1 nga linog.

 Pebrero 26: 7.0 nga kabaskugon, Ryukyu Islands, Japan

Alas 5:31 sang aga sang mag-igo ini nga linog sa isa sa Ryukyu Islands sa Japan, nga mga 80 kilometros ang kalayuon sa Naha, Okinawa. May mga paandam parte sa tsunami, pero ginbawi ini sang ulihi. Ang isa ka babayi nga sobra na 90 ka tuig nga nagaistar sa Okinawa nagsiling nga amo ini ang pinakamabaskog nga linog nga iya nabatyagan.

Pebrero 27: 8.8 nga kabaskugon, Chile

Ini amo ang ikalima sa pinakamabaskog nga linog sugod sang tuig 1900. Ang pinakamabaskog natabo man sa Chile sang 1960, nga may kabaskugon nga 9.4. Bangod sini, pati na ang 7.7 nga linog nga naghalit sa kapital nga siudad sang Chile sang 1985, ginpatuman gid nila ang pagpatindog sang mga bilding nga makabato sa linog.

Gani pila lang ka bilding sa Santiago kag iban nga siudad ang narumpag sa linog sa sini nga tuig. Pero, madamo ang nasamaran kag nadulaan sing mga propiedad kag pagkabutang. Mga 500 ang ginapatihan nga napatay. Halos katunga sa ila, napatay sa baybayon sang Chile bangod sa tsunami.

Abril 4: 7.2 nga kabaskugon, Baja California, Mexico

Ang sentro sini nga linog 18 kilometros halin sa Guadalupe Victoria, Mexico kag 47 kilometros halin sa Mexicali. Ini nga lugar malayo kag halos wala sing may nagaistar. Pero ang grabe nga pagtay-ug nabatyagan pa sa madamo nga siudad kag banwa sa Mexico kag bagatnan nga Estados Unidos.

Mayo 9: 7.2 nga kabaskugon, Northern Sumatra, Indonesia

Ining linog sa idalom sang dagat natabo sang udto, mga 217 kilometros halin sa pinakanaaminhan nga siudad sang Indonesia ang Banda Aceh. Madamo nga tawo ang naggulua sa ila balay kag wala anay nagbalik bangod sa kakulba. Pero wala sing may ginreport nga napatay.

Madamo Pa nga Linog

Base sa nagkalatabo nga dalagku nga mga linog sa aton duta, makapaabot kita sang madamo pa nga mga linog sa masunod nga mga tuig. Nagsiling ang U.S. Geological Survey: “Ang mabaskog nga mga linog nga natabo sang una, matabo gihapon subong.”

Ang editoryal sang isa ka pamantalaan nagsiling: “Ang mga linog karon . . . indi gid masolusyunan sang mga tawo kag ginapahanumdom kita sini sang aton mga limitasyon. Pero indi buot silingon nga indi na naton paghimuon ang aton masarangan . . . , kundi batunon naton nga may mabaskog pa gid nga mga kalamidad nga indi naton makontrol.”

Ginapahanumdom sini ang mga nagatuon sa Pulong sang Dios parte sa propisiya sang Biblia nga ang mga linog isa sa mga tanda sang katapusan nga mga adlaw.—Mateo 24:3, 7; Marcos 13:8; Lucas 21:11.

[Mapa sa pahina 20, 21]

(Para sa aktual nga pormat, tan-awa ang publikasyon)

Ang pila sa mga linog nga 7.0 ang kabaskugon ukon mataas pa halin sang Enero asta sang Mayo

Mexico

Haiti

Chile

Japan

Indonesia

Solomon Islands