Magdiretso sa kaundan

Magdiretso sa listahan sang kaundan

Wala Ginapaabot nga Bulig Gikan sa Magmata!

Wala Ginapaabot nga Bulig Gikan sa Magmata!

 Wala Ginapaabot nga Bulig Gikan sa Magmata!

SUNO SA MANUNULAT SANG MAGMATA! SA BENIN

▪ Sang ang 23 anyos nga si Noël nagdesisyon nga mag-untat sa pag-eskwela kag mangin bug-os tion nga ministro sang mga Saksi ni Jehova, nagpangduhaduha ang iya mga paryente kon bala masakdag niya ang iya kaugalingon sa pinansial. Ang matuod, nabudlayan sia sa pagpangita sing part-time nga trabaho. Gani sang ang magasin nga Magmata! nagbalhag sing sibu sa tion nga artikulo nga “Lima ka Paagi Agod Makakita Sing Trabaho,” makapila nga ginbasa ini ni Noel sing maid-id. * Nakabulig bala ini sa iya? Huo, apang indi suno sa ginapaabot niya.

Nakita sang direktor sang isa ka pribado nga eskwelahan si Noël nga nagabantala sa mga pamalay kag ginpamangkot kon isa sia sang mga Saksi ni Jehova. Nagakinahanglan sing dugang pa nga manunudlo ang direktor, kag bangod natalupangdan niya nga maayo magtudlo ang mga Saksi ni Jehova, ginpamangkot niya si Noël kon may kilala sia nga puede magtudlo. Sang nagsiling si Noël nga wala, ginpamangkot sia sang direktor, “Ikaw, gusto mo magtudlo?”

Wala pa gid si Noël makatudlo sa eskwelahan, kag kon kaisa nagaang-ang pa gani sia. Problema gid ini sa Benin bangod ang board of education nagapatuman nga ang mga manunudlo dapat magkuha sing eksaminasyon nga nagapamatuod nga wala sila nagaang-ang. “Magkuha ka sang sertipikasyon, kag hatagan ko ikaw sang trabaho,” pangako sang direktor.

Maayo ang pag-uswag ni Noël sa Teokratikong Eskwelahan Para sa Ministeryo, isa ini ka eskwelahan nga gindesinyo agod buligan ang mga tawo nga mapauswag ang ila ikasarang sa paghambal sa publiko kag ginahiwat ini kada semana sa mga kongregasyon sang mga Saksi ni Jehova. Nakahatag na gani sia sing pamulongpulong publiko sa ila kongregasyon. Apang, nakulbaan sia sang magkuha sia sang eksaminasyon.

Gindahuan sia sang magasin sang tawo nga nagahatag sing eksaminasyon kag ginpangabay nga basahon sing matunog ang parapo nga nakuritan sing pula. Nagmurahag gid ang mata ni Noël sang makita niya ang artikulo nga “Lima ka Paagi Agod Makakita Sing Trabaho.” Ginbasa niya ang parapo sing talunsay kag nakabaton sing sertipikasyon.

Sang ulihi ginsugid sang tawo nga pirme sia nagabasa sang mga magasin sang mga Saksi ni Jehova. “Madamo ka gid sing matun-an sa sining mga magasin kag maayo gid ang pagkasulat sa sini amo nga pirme ko ini ginagamit para sa mga eksaminasyon,” paathag niya.

Nag-umpisa na si Noël sa pagtudlo, kag luyag sang direktor nga mangin regular na sia nga manunudlo sa masunod nga tuig, apang may iban pa nga plano si Noël. Gin-agda sia nga magtrabaho sa sanga talatapan sang mga Saksi ni Jehova, kag diri na sia karon nagapangalagad.

[Nota]