NALIPAY ka bala kon may maghimo sing maayo sa imo?— Ti, amo man ang iban nga mga tawo. Kita tanan nalipay kon may maghimo sing maayo sa aton. Nahibaluan ini sang Daku nga Manunudlo, kag pirme sia naghimo sing maayo sa mga tawo. Sia nagsiling: ‘Nagkari ako, indi agod alagdon, kundi agod mag-alagad.’—Mateo 20:28.

Gani kon luyag naton mangin kaangay sang Daku nga Manunudlo, ano ang dapat naton himuon?— Dapat kita magserbisyo sa iban. Dapat kita maghimo sing maayo sa ila. Matuod nga madamo ang wala nagahimo sini. Sa katunayan, luyag pirme sang kalabanan nga tawo nga serbisyuhan sila. Bisan gani ang mga sumulunod ni Jesus nagbatyag sini sang isa ka bes. Luyag sang kada isa sa ila nga mangin labing daku ukon labing importante.

Sang isa ka adlaw, nagpanglakaton si Jesus upod sa iya mga disipulo, nga mga sumulunod niya. Pag-abot nila sa siudad sang Capernaum, malapit sa Dagat sang Galilea, nagsulod sila sa isa ka balay. Didto ginpamangkot sila ni Jesus: “Ano ang ginbaisan ninyo sa dalanon?” Wala sila magtingog bangod ginbaisan nila sa dalanon kon sin-o ang mas daku sa tunga nila.—Marcos 9:33, 34.

 Nahibaluan ni Jesus nga indi husto nga hunahunaon sang bisan sin-o sa iya mga disipulo nga sia ang labing daku. Gani, subong sang natun-an naton sa una nga kapitulo sini nga libro, ginpatindog niya ang isa ka gamay nga bata sa tunga nila kag ginsilingan sila nga dapat sila mangin mapainubuson kaangay sining gamay nga bata. Apang wala gihapon sila manuto. Gani, sang malapit na ang kamatayon ni Jesus, gintudluan niya sila sing isa ka leksion nga indi gid nila malipatan. Ano ang iya ginhimo?—

Ti, samtang nagakinaon sila tanan, nagtindog si Jesus kag gin-uba niya ang iya mga kunop. Nagkuha sia sing tualya kag ginwagkus ini sa iya hawak. Nian nagkuha sia sing labador kag ginbutangan ini sing tubig. Mahimo gid nga nagpalibog ang iya mga sumulunod kon ano ang iya himuon. Samtang nagatan-aw sila, naglibot si Jesus sa ila tanan, nagduko, kag ginhinawan ang ila mga tiil. Nian ginpahiran niya ang ila mga tiil sang tualya. Hunahunaa ini! Ano kon didto ka? Ano ayhan ang batyagon mo?—

Ginbatyag sang iya mga sumulunod nga indi husto nga ang Daku nga Manunudlo magserbisyo sa ila sa sining paagi. Nahuya gid sila. Sa katunayan, wala magsugot si Pedro nga himuon ni Jesus ining kubos nga butang para sa iya. Apang si Jesus nagsiling nga importante nga himuon niya ini.

Sa karon, indi na kinaandan nga hinawan naton ang mga tiil sang isa kag isa sa aton. Apang ginahimo ini sang si Jesus yari sa duta. Nahibaluan mo bala kon ngaa?— Bueno, sa lugar nga ginapuy-an anay ni Jesus kag sang iya mga sumulunod, sandalyas ang ginasuksok sang mga tawo. Gani kon maglakat sila sa dalan, ginayab-ukan ang ila mga tiil. Isa ka mainayuhon nga buhat sadto nga hinawan ang mga tiil sang isa ka bisita kon magsulod sia sa balay.

Apang sini nga tion wala sing isa sa mga disipulo ni Jesus ang nagboluntaryo nga hinawan ang mga tiil sang iban. Gani si Jesus ang naghimo sini. Sa paghimo sini, gintudluan ni Jesus ang iya mga sumulunod sing isa  ka importante nga leksion. Dapat nila matun-an ini nga leksion. Kag isa ini ka leksion nga dapat naton matun-an karon.

Nahibaluan mo bala kon ano ang leksion?— Sa tapos masuksok liwat ni Jesus ang iya mga kunop kag nagbalik sa lamesa, nagpaathag sia: “Nahibaluan bala ninyo kon ano ang ginhimo ko sa inyo? Kamo nagatawag sa akon, ‘Manunudlo,’ kag, ‘Ginuo,’ kag husto ang ginasiling ninyo, kay amo ako. Busa, kon ako, bisan pa Ginuo kag Manunudlo, naghinaw sang inyo mga tiil, kamo man dapat maghinaway sang inyo mga tiil.”—Juan 13:2-14.

Ginpakita diri sang Daku nga Manunudlo nga luyag niya nga ang iya mga sumulunod magserbisyo sa isa kag isa. Indi niya luyag nga mangin maiyaiyahon sila. Indi niya luyag nga maghunahuna sila nga importante gid sila amo nga dapat sila serbisyuhan pirme sang iban. Luyag niya nga mangin handa sila sa pagserbisyo sa iban.

Indi bala ini isa ka maayo nga leksion?— Ilugon mo bala ang Daku nga Manunudlo kag magserbisyo sa iban nga tawo?— Kita tanan makahimo sing maayo sa iban. Magapahalipay ini sa ila. Apang labaw sa tanan, magapahalipay ini kay Jesus kag sa iya Amay.

 Indi mabudlay ang magserbisyo sa iban nga tawo. Kon manilag ka, makita mo nga madamo ikaw sing mahimo para sa iban. Hunahunaa ini: May mabulig ka bala sa imo iloy? Nahibaluan mo nga madamo sia sing ginahimo para sa imo kag sa bug-os nga pamilya. Mabuligan mo bala sia?— Ngaa indi mo sia pamangkuton?

Ayhan sarang mo mahanda ang lamesa antes magkaon ang inyo pamilya. Ukon ayhan sarang mo mahimos ang lamesa sa tapos makakaon ang inyo pamilya. Ang iban nga kabataan amo ang nagahaboy sang basura kada adlaw. Kon ano man ang mahimo mo, nagaserbisyo ka sa iban, subong sang ginhimo ni Jesus.

May mga manghod ka bala nga imo maserbisyuhan? Dumduma, si Jesus nga Daku nga Manunudlo, nagserbisyo bisan sa iya mga sumulunod. Paagi sa pagserbisyo sa imo mga manghod, ginailog mo si Jesus. Ano ang mahimo mo para sa ila?— Ayhan matudluan mo sila sa paghimos sang ila mga hampanganan sa tapos sila makahampang.  Ukon ayhan mabuligan mo sila sa pag-ilis bayo. Ukon ayhan mabuligan mo sila sa paghimos sang ila hiligdaan. May mahunahuna ka pa bala nga mahimo para sa ila?— Higugmaon ka nila sa paghimo mo sining mga butang, subong nga si Jesus ginhigugma sang iya mga sumulunod.

Makaserbisyo ka man sa iban nga tawo sa eskwelahan. Ayhan sa imo mga kabutho ukon manunudlo. Kon nahulog ang mga libro sang isa, isa ka mainayuhon nga buhat nga buligan mo sia sa pagpulot sini. Ayhan magboluntaryo ka nga panason ang pisara ukon maghimo sing iban nga butang para sa imo manunudlo. Bisan gani ang pagbukas sang ganhaan para sa isa, isa ka mainayuhon nga buhat.

Kon kaisa, mahimo nga indi kita mapasalamatan sang mga tawo sa aton pagserbisyo sa ila. Sa banta mo ayhan mag-untat kita sa paghimo sing maayo bangod sini?— Indi! Madamo ang wala magpasalamat kay Jesus sa iya maayong mga buhat. Apang wala sia mag-untat sa paghimo sing maayo bangod sini.

Gani indi kita maglikaw sa pagserbisyo sa iban nga tawo. Dumdumon naton ang Daku nga Manunudlo, si Jesus, kag tinguhaan naton pirme nga sundon ang iya halimbawa.