Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Kaahã Afite Ojwɛŋmɔ

Kaahã Afite Ojwɛŋmɔ

SATAN, adesai ahenyɛlɔ ni fe fɛɛ lɛ miitao ekpãtã ohiɛ! Eyɛ nibii srɔtoi ni ebaanyɛ ekɛye bo awui. Ekome ko yɛ ni no lɛ, ojwɛŋmɔ ekɛfiteɔ, shi jeee ogbɔmɔtso lɛ. No ji, mɔlakamɔ!

Bɔfo Paulo hã ehiɛ hi ehe nɔ koni Satan akalaka lɛ. Shi Kristofoi ni hi shi yɛ ebeiaŋ lɛ ateŋ mɛi komɛi ku amɛhiɛ amɛfɔ̃ oshara nɛɛ nɔ. Akɛ nɔkwɛmɔnɔ lɛ, etamɔ nɔ ni nyɛmimɛi ni yɔɔ Korinto lɛ ateŋ mɛi komɛi nu he akɛ amɛhe wa yɛ anɔkwale lɛ mli, ni no hewɔ lɛ Satan nyɛŋ alaka amɛ kɔkɔɔkɔ. (1 Kor. 10:12) Paulo kɛɛ amɛ akɛ: “Miishe gbeyei akɛ, yɛ gbɛ ko nɔ lɛ, bɔ ni onufu lɛ kɛ eŋaatsɔɔ lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔ kɛje tsui krɔŋŋ kɛ hetsemɔ ni sa Kristo lɛ he.”​—2 Kor. 11:3.

Paulo wiemɔi lɛ hãa wɔnaa akɛ, esa akɛ wɔhã wɔhiɛ ahi wɔhe nɔ be fɛɛ be. Kɛ́ wɔsumɔɔɔ ni Satan fiteɔ wɔjwɛŋmɔ lɛ, esa akɛ wɔkpɛlɛ nɔ akɛ ebaanyɛ elaka wɔ, ni wɔkwɛ nɔ ni wɔbaanyɛ wɔfee kɛbu wɔhe.

NƆ HEWƆ NI EYƆƆ OSHARA WAA

Kɛ́ mɔ ko male, loo esaa sane ko ni ewieɔ lɛ he bɔ ni afee ni mɛi ni boɔ lɛ toi lɛ amu sane naa yɛ gbɛ ni ejaaa nɔ loo amɛfee amɛnii yɛ gbɛ pɔtɛɛ ko nɔ lɛ, elaka amɛ. Wolo ko ni atsɛɔ lɛ Propaganda and Persuasion lɛ wie akɛ, mɔlakamɔ “ehiii kwraa, eyeɔ awui, ni shishiulɔi pɛ kɛtsuɔ nii.” Kɛ́ alaka mɔ ko lɛ, wiemɔi komɛi ni mɛi kɛtsuɔ nii kɛ́ amɛmiiwie he ji, “ashwɛ lɛ akpa, ato lɛ abla, ahe ejwɛŋmɔ, ahɔ̃ɔ lɛ.”

Kɛ́ wɔhã alaka wɔ ni afite wɔjwɛŋmɔ lɛ, ebaaná bɔ ni wɔsusuɔ nii ahe wɔhãa lɛ nɔ hewalɛ fiofio ni wɔyɔseee po. Enɛ hewɔ esa akɛ wɔkwɛ wɔhe nɔ jogbaŋŋ yɛ oshara nɛɛ he lɛ. Etamɔ kɔɔyɔɔ gbonyo ko ni anaaa, ni asaŋ, ejeee fu hu. Nuu ko ni ekase bɔ ni adesai feɔ  amɛnii amɛhãa lɛ he nii jogbaŋŋ lɛ wie akɛ: “Wɔteŋ mɛi pii yɛ ni alaka wɔ ni ahe wɔjwɛŋmɔ, shi wɔkɔko sɛɛ.” Nilelɔ kpanaa ko hu wie akɛ, mɛi pii kɛ amɛhe ewo nifeemɔi gbohii komɛi ni ehiii kwraa, tamɔ ‘weku shishi bulemɔ, kɛ tawuu mli, amɛwa mɛi ni esoro amɛhewolonɔ su loo amɛjamɔ yɛ amɛnɔ lɛ he lɛ ayi, ni amɛfee nibii krokomɛi babaoo ni jwɛŋmɔ bɛ mli’ yɛ lakamɔ ni alaka amɛ kɛ amɛjwɛŋmɔ ni afite lɛ hewɔ.​—Easily Led​—A History of Propaganda.

Kɛ́ gbɔmɛi adesai po baanyɛ alaka wɔ ni amɛfite wɔjwɛŋmɔ lɛ, ani Satan nyɛŋ afee nɔ ni fe nakai? Satan kɛ adesai ehi shi kɛjɛ be ni abɔ ade, no hewɔ lɛ, ele wɔ jogbaŋŋ. Amrɔ nɛɛ, “jeŋ muu lɛ fɛɛ” yɛ edɛŋ, ni ebaanyɛ etsɔ nibii ni yɔɔ mli lɛ eko fɛɛ eko ni esumɔɔ lɛ nɔ egbɛ amalei ni esɔ̃ɔ lɛ eshwã. (1 Yoh. 5:19; Yoh. 8:44) Ŋmɛnɛ lɛ, Satan ‘miilaka mɛi yɛ shikpɔŋ muu lɛ fɛɛ nɔ,’ ni mɛi ni eshwila lɛ ayi fa naakpa. (2 Kor. 4:4; Kpoj. 12:9) Mɛni obaanyɛ ofee koni enine akashɛ onɔ?

HÃ OHEMƆKƐYELI LƐ MLI AWA

Yesu tsɔɔ wɔ nɔ ko ni waaa kwraa ni wɔbaanyɛ wɔfee koni akalaka wɔ. Ewie akɛ: “Nyɛbaale anɔkwale lɛ, ni anɔkwale lɛ baahã nyɛye nyɛhe.” (Yoh. 8:31, 32) Kɛ́ asraafoi tee ta lɛ, esa akɛ amɛle mɔ ni amɛbaabo enaa sane toi, ejaakɛ amɛhenyɛlɔi lɛ baagbɛ amalei amɛshwã koni amɛkɛlaka amɛ. No hewɔ lɛ, namɔ toi esa akɛ Kristofoi abo? Yehowa. Yehowa ehã wɔ Biblia lɛ, ni Biblia lɛ tsɔɔ wɔ nɔ ni esa akɛ wɔfee koni Satan akalaka wɔ.​—2 Tim. 3:16, 17.

Satan le enɛ. No hewɔ lɛ, etsɔɔ nibii ni yɔɔ je nɛɛ mli lɛ anɔ ejeɔ wɔnijiaŋ wui koni wɔkakane Biblia lɛ ni wɔkase. Kaahã akpa ni etsɔ̃ nɛɛ du bo! (Efe. 6:11, sh. niŋ.) Kasemɔ nii waa koni onyɛ ‘onu anɔkwale lɛ shishi jogbaŋŋ kɛmɔ shi.’ (Efe. 3:18) Enɛ feemɔ bɛ mlɛo. Shi tamɔ bɔ ni woloŋmalɔ ko ni atsɛɔ lɛ Noam Chomsky lɛ wie lɛ, kaimɔ akɛ “mɔ ko mɔ ko gbeleŋ ojwɛŋmɔ mli ni etsɔ anɔkwale lɛ ewo mli. Bo diɛŋtsɛ esa akɛ okase.” No hewɔ lɛ, daa gbi lɛ, hemɔ be ni ‘okɛpɛi Ŋmalɛi lɛ amli jogbaŋŋ.’​—Bɔf. 17:11.

Kɛ́ osumɔɔɔ ni Satan fiteɔ ojwɛŋmɔ lɛ, esa akɛ okpɛlɛ nɔ akɛ ebaanyɛ elaka bo, ni okwɛ nɔ ni obaanyɛ ofee kɛbu ohe

Hã ehi ojwɛŋmɔ mli akɛ, Satan sumɔɔɔ ni osusuɔ nibii ahe kɛyaa shɔŋŋ loo onuɔ nibii ni okaseɔ lɛ ashishi jogbaŋŋ. Mɛni hewɔ? Ejaakɛ tamɔ bɔ ni wolo ko wie lɛ, kɛ́ aje mɛi anijiaŋ wui ni amɛkasusu nii ahe kɛtee shɔŋŋ  lɛ, “ewaaa akɛ abaalaka amɛ.” (Media and Society in the Twentieth Century) No hewɔ lɛ, kaahe nibii fɛɛ ni onuɔ lɛ oye. (Abɛi 14:15) Okɛ jwɛŋmɔ ni Nyɔŋmɔ ehã bo lɛ atsu nii jogbaŋŋ, koni ohemɔkɛyeli lɛ mli awa.​—Abɛi 2:10-15; Rom. 12:1, 2.

KAATSE OHE KƐJE ONYƐMIMƐI KRISTOFOI LƐ AHE

Bei komɛi lɛ, anyɛɔ alakaa asraafoi ni etee ta lɛ, ni afiteɔ amɛjwɛŋmɔ. Kɛ́ eba lɛ nakai lɛ, amɛnijiaŋ jeɔ wui, ni ta lɛ jeɔ amɛtsine. Bei komɛi po lɛ, ekɛ béi baa amɛ sɔŋŋ amɛteŋ, ni ebaanyɛ ehã amɛtse amɛhe kɛje amɛsraafoi akuu lɛ he. German asraafonyo onukpa ko wie akɛ, nɔ kome ni hã aye amɛnɔ kunim yɛ Jeŋ Ta I lɛ mli ji akɛ, amɛhenyɛlɔi lɛ laka amɛ ni amɛlu “tamɔ bɔ ni adanko luɔ kɛ́ ena onufu lɛ.” Ŋmɛnɛ lɛ, Satan hu miibɔ mɔdɛŋ ni efite wɔ kɛ wɔnyɛmimɛi Kristofoi lɛ ateŋ loo ehã wɔtse wɔhe kɛje Yehowa gbɛjianɔtoo lɛ he yɛ sane ko ni wɔsusuɔ akɛ ayeee lɛ jogbaŋŋ loo nɔ ko ni miiya nɔ yɛ asafo lɛ mli ni eŋɔɔɔ wɔnaa lɛ hewɔ.

Shi kaahã elaka bo! Hã Nyɔŋmɔ Wiemɔ lɛ akudɔ bo. Akɛ nɔkwɛmɔnɔ lɛ, Biblia lɛ woɔ wɔ hewalɛ akɛ, wɔya nɔ wɔkɛ eshai ‘afafaa wɔhe tswaa,’ ni wɔsaa béi oya. Kɛ́ wɔbo ŋaawoo nɛɛ toi lɛ, wɔbaabaa ekomefeemɔ ni yɔɔ asafo lɛ mli lɛ yi. (Kol. 3:13, 14; Mat. 5:23, 24) Biblia lɛ bɔɔ wɔ kɔkɔ akɛ, wɔkatse wɔhe kɛje asafo lɛ he. (Abɛi 18:1) Bɔ ni afee ni Satan akadu bo lɛ, bi ohe akɛ: ‘Nyɛsɛɛ nɛɛ nɔŋŋ be ni nyɛmi ko fee mi nɔ ko lɛ, te mifee minii mihã tɛŋŋ? Ani mifee nɔ ni Nyɔŋmɔ sumɔɔ, aloo nɔ ni Satan sumɔɔ?’​—Gal. 5:16-26; Efe. 2:2, 3.

YAA NƆ OMU OFƆ̃ MƐI NI NYIƐƆ WƆHIƐ LƐ ANƆ

Bei pii lɛ, kɛ́ asraafoi tee ta lɛ, amɛhenyɛlɔi lɛ wieɔ nibii ni baahã amɛnu he akɛ amɛnyɛŋ amɛmu amɛfɔ̃ asraafonyo onukpa lɛ nɔ. Mɛni hewɔ? Ejaakɛ kɛ́ asraafonyo ko heee ehiɛnyiɛlɔ lɛ eyeee lɛ, enyɛŋ ewu ta lɛ jogbaŋŋ. Ekolɛ henyɛlɔi lɛ baawie akɛ: “Nyɛkɛ nyɛhiɛ akafɔ̃a nyɛhiɛnyiɛlɔi lɛ anɔ!” loo “Nyɛkanyiɛa amɛsɛɛ ni nyɛhiɛ yakpãtã!” Amɛbaanyɛ amɛtsɔ ŋaa gbɛ nɔ amɛkɛ tɔmɔ ko ni ekolɛ hiɛnyiɛlɔi lɛ baatɔ̃ lɛ afee sane. Nakai pɛpɛɛpɛ Satan hu feɔ. Daa nɛɛ eetao gbɛi ni ebaanyɛ etsɔ nɔ efite nyɛmimɛi ni Yehowa ehala akɛ amɛnyiɛ wɔhiɛ lɛ ehã wɔ, koni wɔkahe amɛ wɔye dɔŋŋ.

 Mɛni obaanyɛ ofee koni ekafite ojwɛŋmɔ? Mɛi ni Yehowa ehala akɛ amɛnyiɛ wɔhiɛ lɛ yeee emuu tamɔ wɔ nɔŋŋ. Shi tswaa ofai shi akɛ, obaaya nɔ ofi amɛsɛɛ ni ohi Yehowa asafo lɛ mli ekɔɔɔ he eko nɔ ni baaba. (1 Tes. 5:12, 13) Mɛi ni ekwa anɔkwa jamɔ lɛ loo shishiulɔi krokomɛi baanyɛ awie nibii gbohii yɛ asafo lɛ he. Shi ‘kaahã amɛhoso bo oya kɛje osusumɔ lɛ he,’ no ji, kaahe amɛ oye ekɔɔɔ he eko bɔ ni sane ni amɛwieɔ lɛ ŋɔɔ hã. (2 Tes. 2:2; Tito 1:10) Paulo wo Timoteo ŋaa ni ‘eya nɔ ehi shi yɛ anɔkwalei ni ekase lɛ anaa,’ ni ekai ‘mɛi aŋɔɔ ni ekase yɛ lɛ.’ Esa akɛ wɔ hu wɔbo ŋaawoo nɛɛ toi. (2 Tim. 3:14, 15) Yehowa etsɔ nyɔŋ anɔkwafo kɛ hiɛshikalɔ lɛ nɔ etsɔɔ wɔ nii nɔ ni fe afii oha, ni nibii pii yɛ ni yeɔ odase akɛ wɔbaanyɛ wɔmu wɔfɔ̃ nyɔŋ lɛ nɔ.​—Mat. 24:45-47; Heb. 13:7, 17.

KAASHE GBEYEI

Nɔ kome ni esa akɛ wɔhã ehi wɔjwɛŋmɔŋ ji akɛ, jeee be fɛɛ be Satan tsɔɔ gbɛi nigii anɔ eduɔ wɔ. Bei komɛi lɛ, ebaa tɛ̃ɛ; ewoɔ wɔhe gbeyei. Hegbeyeiwoo ji “gbɛi srɔtoi ni atsɔɔ nɔ afiteɔ mɛi ajwɛŋmɔ lɛ ateŋ ekome ni akɛbɔi nitsumɔ etsɛ waa.” (Easily Led​—A History of Propaganda) Woloŋlelɔ ko ni jɛ Britain, ni atsɛɔ lɛ Philip M. Taylor lɛ wie akɛ, Asiriabii lɛ kɛ “hegbeyeiwoo kɛ amalei srɔtoi tsu nii kɛfite mɛi ajwɛŋmɔ” koni amɛye amɛnɔ. Satan hu miitao ewo wɔhe gbeyei koni wɔkpa Yehowa sɔɔmɔ. Ebaanyɛ efee nakai kɛtsɔ gbɔmɛi anɔ, loo ehã wɔshe nibii tamɔ gbele kɛ yiwaa gbeyei.​—Yes. 8:12; Yer. 42:11; Heb. 2:15.

Kaahã Satan wo ohe gbeyei ni onijiaŋ je wui loo okpa yɛ Yehowa sɛɛ. Yesu wie akɛ: “Nyɛkashea mɛi ni gbeɔ gbɔmɔtso lɛ ni no sɛɛ lɛ amɛnyɛɛɛ nɔ ko amɛfee dɔŋŋ lɛ gbeyei.” (Luka 12:4) Hemɔ Yehowa nɔ oye kɛ otsui fɛɛ akɛ, tamɔ bɔ ni ewo shi lɛ, ebaabu ohe ni ehã bo “hewalɛ ni fa kɛteke nɔ lɛ,” koni onyɛ odamɔ nibii fɛɛ ni Satan baasumɔ ni ekɛwo ohe gbeyei lɛ anaa.​—2 Kor. 4:7-9; 1 Pet. 3:14.

Shihilɛi komɛi ni okɛbaakpe lɛ baanyɛ aje onijiaŋ wui ni ehã oshe gbeyei. Shi kaimɔ hewalɛwoo wiemɔi ni Yehowa kɛɛ Yoshua lɛ. Ekɛɛ lɛ akɛ: “Wajemɔ ohe ni ofee ekãa. Kaahã ŋmiŋmi miimɔo, ni asaŋ otsui akafã; ejaakɛ Yehowa, o-Nyɔŋmɔ lɛ, fĩ osɛɛ yɛ he fɛɛ he ni oyaa.” (Yosh. 1:9) Kɛ́ ohao lɛ, sɔlemɔ ohã Yehowa amrɔ nɔŋŋ, ni ogba lɛ nɔ fɛɛ nɔ ni gbaa onaa. Ná nɔmimaa akɛ, “Nyɔŋmɔ toiŋjɔlɛ ni fe niiashishinumɔi fɛɛ lɛ” baabu otsui kɛ ojwɛŋmɔ he. Enɛ baawaje bo koni onyɛ odamɔ Satan ŋaatsɔi lɛ fɛɛ anaa.​—Fil. 4:6, 7, 13.

Ani okaiɔ nibii ni Rabshake lɛ, ni ji mɔ ni Asiriabii lɛ tsu kɛtee Nyɔŋmɔ webii lɛ aŋɔɔ lɛ, wie koni ekɛwo amɛhe gbeyei lɛ? Yɛ kukufoo mli lɛ, nɔ ni ekɛɛ amɛ ji akɛ, ‘Nɔ ko nɔ ko nyɛŋ abu nyɛhe kɛjɛ Asiriabii lɛ ahe. Yehowa, nyɛ-Nyɔŋmɔ lɛ po nyɛŋ aye abua nyɛ.’ Ekɛshi sɛɛ akɛ, ‘Yehowa diɛŋtsɛ kɛɛ wɔbakpãtã Yerusalem hiɛ.’ Mɛni Yehowa kɛɛ yɛ wiemɔi nɛɛ ahewɔ? Ekɛɛ akɛ: “Kaashe gbeyei yɛ wiemɔi ní onu ní Ashur maŋtsɛ lɛ tsuji lɛ kɛbabɔ musu amɛshi mi lɛ hewɔ.” (2 Maŋ. 18:22-25; 19:6) Kɛkɛ ni etsu ŋwɛibɔfo kome ni eyagbe Asiria asraafoi 185,000 yɛ gbɛkɛ kome pɛ mli!​—2 Maŋ. 19:35.

FEEMƆ OHE NILELƆ—BO YEHOWA TOI BE FƐƐ BE

Ani okwɛ sini ko ni alaka mɔ ko yɛ mli pɛŋ? Ekolɛ ona faŋŋ akɛ aalaka mɔ lɛ, ni no hewɔ lɛ, obolɔ akɛ: ‘Kaabo lɛ toi! Eelaka bo!’ Agbɛnɛ lɛ, feemɔ ŋwɛibɔfoi lɛ ahe mfoniri ni amɛ hu amɛmiibolɔ amɛmiikɛɛ bo akɛ: “Kaahã Satan laka bo!”

Kaabo amalei ni Satan gbɛɔ eshwãa lɛ toi. (Abɛi 26:24, 25) Bo Yehowa toi, ni okɛ ohiɛ afɔ̃ enɔ yɛ nɔ fɛɛ nɔ ni ofeɔ lɛ mli. (Abɛi 3:5-7) Yehowa sumɔɔ osane ni eekɛɛ bo akɛ: “Mibi, feemɔ ohe nilelɔ, ní ohã mitsui anyɔ mimli.” (Abɛi 27:11) Ofainɛ, bo lɛ toi. Kɛ́ ofee nakai lɛ, Satan nyɛŋ afite ojwɛŋmɔ kɔkɔɔkɔ!