Wolo Ni Akɛmaje Efesobii Lɛ 6:1-24

  • Ŋaawoo kɛhã bii kɛ fɔlɔi (1-4)

  • Ŋaawoo kɛhã nyɔji kɛ nuŋtsɔmɛi (5-9)

  • Tawuu hewulamɔ nii ni jɛ Nyɔŋmɔ ŋɔɔ lɛ fɛɛ (10-20)

  • Naagbee ŋamɔ (21-24)

6  Bii, nyɛboa nyɛfɔlɔi atoi+ yɛ Nuŋtsɔ lɛ mli, ejaakɛ enɛ ja.  “Okɛ woo ahã opapa kɛ omami”+ ji klɛŋklɛŋ kitã ni hiɛ shiwoo akɛ:  “Koni ahi ahã bo,* ni otsɛ yɛ shikpɔŋ lɛ nɔ.”  Ni nyɛ tsɛmɛi lɛ, nyɛkawoa nyɛbii amlifu,+ shi moŋ nyɛyaa nɔ nyɛkwɛa amɛ yɛ Yehowa* tsɔsemɔ+ kɛ eŋaawoo* lɛ mli.+  Nyɔji, nyɛjɛa tsui krɔŋŋ mli nyɛkɛ gbeyeishemɔ kɛ hekpokpomɔ aboa nyɛnuŋtsɔmɛi ni ji gbɔmɛi* lɛ atoi,+ tamɔ bɔ ni nyɛfeɔ nyɛhãa Kristo lɛ,  jeee be ni aana nyɛ pɛ koni nyɛkɛsa gbɔmɛi ahiɛ kɛkɛ,*+ shi moŋ akɛ Kristo nyɔji, ni kɛ amɛsusuma* muu fɛɛ feɔ Nyɔŋmɔ suɔmɔnaa nii.+  Nyɛkɛ su kpakpa asɔmɔa akɛ nyɔji, tamɔ nɔ ni nyɛmiisɔmɔ Yehowa,*+ shi jeee gbɔmɛi,  ejaakɛ nyɛle akɛ mɔ fɛɛ mɔ lɛ, nyɔŋ ji lɛ jio, jeee nyɔŋ ji lɛ jio, nɔ kpakpa ni efeɔ lɛ, no he najiaŋ Yehowa* baato lɛ.+  Agbɛnɛ hu, nyɛ nuŋtsɔmɛi, nyɛyaa nɔ nyɛkɛ amɛ ayea yɛ nakai gbɛ nɔŋŋ nɔ, nyɛkawoa amɛhe gbeyei, ejaakɛ nyɛle akɛ nyɛ kɛ amɛ fɛɛ Nuŋtsɔ lɛ yɛ ŋwɛi,+ ni ekwɛɛɛ hiɛiaŋ. 10  Naagbee lɛ, nyɛyaa nɔ nyɛnáa hewalɛ+ yɛ Nuŋtsɔ lɛ mli, kɛ agbɛnɛ hu, yɛ enyɛmɔ kpele lɛ mli. 11  Nyɛwoa tawuu hewulamɔ nii ni jɛ Nyɔŋmɔ ŋɔɔ lɛ fɛɛ+ koni nyɛnyɛ nyɛdamɔ shi shiŋŋ nyɛshi Abonsam ŋaatsɔi lɛ; 12  ejaakɛ jeee heloo kɛ lá wɔkɛnɔɔ lɛ,*+ shi moŋ wɔkɛ nɔyelii, kɛ hegbɛi, kɛ je ni mli ewo duŋ nɛɛ mli nɔyelɔi lɛ, kɛ mumɔi fɔji+ ni yɔɔ ŋwɛiniiaŋ lɛ. 13  Enɛ hewɔ lɛ, nyɛwoa tawuu hewulamɔ nii ni jɛ Nyɔŋmɔ ŋɔɔ lɛ fɛɛ,+ koni be ni nyɛwo fɛɛ nyɛgbe naa lɛ, nyɛnyɛ henyɛlɔ lɛ naa nyɛtsĩ yɛ gbi fɔŋ lɛ nɔ, ni agbɛnɛ hu, nyɛnyɛ nyɛdamɔ shi shiŋŋ. 14  No hewɔ lɛ, nyɛdamɔa shi shiŋŋ, be mli ni nyɛkɛ anɔkwale efi nyɛhɛ akɛ bɛlti,+ ni nyɛwo jalɛ akɛ dama,+ 15  ni nyɛkɛ nyɛhe ni nyɛsaa nyɛto be fɛɛ be akɛ nyɛbaajaje toiŋjɔlɛ he sane kpakpa lɛ ewo nyɛnaji akɛ tokotai.+ 16  Enɛɛmɛi fɛɛ sɛɛ lɛ, nyɛhiɛa hemɔkɛyeli mli akɛ tsɛŋ agbo,+ ni ji nɔ ni nyɛbaanyɛ nyɛkɛgbe mɔ fɔŋ lɛ gãimlibii ni tsoɔ lɛ* fɛɛ lɛ.+ 17  Agbɛnɛ hu, yiwalaheremɔ ni ji dade fai lɛ, nyɛbua,+ ni nyɛkɔa mumɔ lɛ klante lɛ, ni ji Nyɔŋmɔ wiemɔ lɛ,+ 18  ni yɛ nakai beiaŋ nɔŋŋ lɛ, nyɛyaa nɔ nyɛtsɔa mumɔ lɛ nɔ nyɛkɛ sɔlemɔi srɔtoi fɛɛ+ kɛ faikpamɔi ni yɔɔ hiɛdɔɔ srɔtoi fɛɛ asɔlea yɛ shihilɛ fɛɛ shihilɛ mli.+ Enɛ hewɔ lɛ, nyɛyaa nɔ nyɛshia kpe, ni nyɛkãa he daa nyɛsɔlea kɛ hiɛdɔɔ kɛkpaa fai nyɛhãa mɛi krɔŋkrɔŋi lɛ fɛɛ. 19  Nyɛsɔlea nyɛhãa mi hu, koni kɛ́ migbele minaa lɛ, akɛ wiemɔi lɛ awo minaa, koni kɛ́ miijaje sane kpakpa lɛ he teemɔŋ sane krɔŋkrɔŋ lɛ, manyɛ mawie kɛ ekãa,+ 20  sane kpakpa ni mitsuɔ he nii akɛ maŋ bɔfo+ yɛ tsein mli* nɛɛ, ni mawie he kɛ ekãa, bɔ ni sa akɛ miwie lɛ. 21  Agbɛnɛ, bɔ ni afee ni nyɛ hu nyɛle mihe sane kɛ nɔ ni mitsuɔ lɛ, Tihiko,+ nyɛmi nuu ni asumɔɔ lɛ kɛ sɔɔlɔ anɔkwafo yɛ Nuŋtsɔ lɛ mli lɛ, baahã nyɛle nɔ fɛɛ nɔ.+ 22  Yiŋtoo nɛɛ nɔŋŋ hewɔ miitsu lɛ nyɛŋɔɔ lɛ, koni nyɛle bɔ ni wɔyɔɔ, ni eshɛje nyɛtsuii amii. 23  Toiŋjɔlɛ kɛ suɔmɔ ni hemɔkɛyeli fata he, ni jɛ Nyɔŋmɔ, ni ji Tsɛ lɛ, kɛ Nuŋtsɔ Yesu Kristo ŋɔɔ lɛ ahã nyɛmimɛi lɛ. 24  Dromɔ lɛ kɛ mɛi fɛɛ ni sumɔɔ wɔ-Nuŋtsɔ Yesu Kristo kɛ suɔmɔ ni fiteee lɛ ahi shi.

Shishigbɛ Niŋmaa

Loo “Koni oye omanye.”
Loo “enitsɔɔmɔ; egbɛtsɔɔmɔ.” Greek sht. ŋm., “ejwɛŋmɔ ni akɛwoɔ mɔ mli.”
Greek sht. ŋm., “nyɛheloo gbɛfaŋ nuŋtsɔmɛi.”
Greek sht. ŋm., “jeee kɛ hiɛiaŋhiɛiaŋ sɔɔmɔ akɛ gbɔmɛi ahiɛsalɔi.”
Kwɛmɔ Wiemɔi Titrii Amligbalamɔ lɛ, “Susuma.”
Greek sht. ŋm., “wɔkɛfɔ̃ɔ abɔtiri lɛ.”
Loo “tawuu nii ni afɔ̃ɔ lɛ; akpɔlɔi bibii lɛ.”
Loo “kɔsɔŋkɔsɔi amli.”