2 Maŋtsɛmɛi 18:1-37

  • Hezekia batsɔ Yuda maŋtsɛ (1-8)

  • Awie Israel shigbeemɔ he ekoŋŋ (9-12)

  • Senakerib ba koni ekɛ Yuda abawu (13-18)

  • Rabshake lɛ wie eshi Yehowa (19-37)

18  Yɛ Israel maŋtsɛ Hoshea,+ Ela binuu lɛ nɔyeli afi ni ji etɛ lɛ nɔ lɛ, Yuda maŋtsɛ Ahaz+ binuu Hezekia+ batsɔ maŋtsɛ.  Be ni ebatsɔ maŋtsɛ lɛ, no mli lɛ, eye afii 25, ni eye nɔ afii 29 yɛ Yerusalem. Atsɛɔ emami Abi,* Zakaria biyoo lɛ.+  Etee nɔ efee nɔ ni ja yɛ Yehowa hiɛ+ tamɔ bɔ ni etsɛ David fee lɛ pɛpɛɛpɛ.+  Lɛ ejie hei grɔŋŋi+ lɛ, ni ekumɔ wɔŋ tɛi lɛ, ni efolɔ wɔŋ tsei+ lɛ.* Ejwara akɔɔble onufu ni Mose fee lɛ hu;+ ejaakɛ kɛbashi nakai beiaŋ fɛɛ lɛ, Israelbii lɛ shãa lasu afɔle amɛhãa akɔɔble onufu, ni no mli lɛ, atsɛɔ lɛ akɔɔble onufu amaga lɛ.*  Ekɛ ehiɛ fɔ̃ Yehowa,+ Israel Nyɔŋmɔ lɛ nɔ; Yuda maŋtsɛmɛi lɛ ateŋ mɔ ko kwraa tamɔɔɔ lɛ, mɛi ni ba yɛ esɛɛ jio, mɛi ni tsɔ ehiɛ kɛba lɛ jio.  Emɔ Yehowa mli kpɛŋŋ.+ Ejeee esɛɛ; etee nɔ eye Yehowa kitãi ni ekɛhã Mose lɛ anɔ.  Ni Yehowa kɛ lɛ yɛ. Ekɛ hiɛshikamɔ fee nɔ fɛɛ nɔ ni efeɔ. Etse Asiria maŋtsɛ lɛ hiɛ atua ni esɔmɔɔɔ lɛ.+  Agbɛnɛ hu, eye Filistibii+ lɛ amaji lɛ anɔ kunim kɛtee Gaza kɛ ekpokpai lɛ anɔ tɔ̃ɔ, kɛjɛ bulɔi amɔɔ lɛ nɔ kɛyashi maŋ ni atswa gbogbo awo he lɛ mli.*  Yɛ Maŋtsɛ Hezekia nɔyeli afi ni ji ejwɛ lɛ nɔ, ni ji Israel maŋtsɛ Hoshea,+ Ela binuu lɛ nɔyeli afi ni ji kpawo lɛ nɔ lɛ, Asiria maŋtsɛ Shalmaneser kwɔ kɛba koni ekɛ Samaria abawu, ni ewo Samaria he ka.+ 10  Be ni shɛɔ afii etɛ lɛ, amɛŋɔ maŋ lɛ;+ yɛ Hezekia nɔyeli afi ni ji ekpaa lɛ nɔ, ni ji Israel maŋtsɛ Hoshea nɔyeli afi ni ji nɛɛhu lɛ nɔ lɛ, aŋɔ Samaria. 11  Kɛkɛ ni Asiria maŋtsɛ lɛ ŋɔ Israelbii lɛ nom+ kɛtee Asiria, ni ehã amɛhi Hala kɛ Habor yɛ Gozan faa lɛ he, kɛ agbɛnɛ hu, Mediabii lɛ amaji lɛ amli.+ 12  Enɛ ba lɛ nakai ejaakɛ amɛbooo Yehowa, amɛ-Nyɔŋmɔ lɛ gbee toi, moŋ lɛ, amɛtee nɔ amɛku ekpaŋmɔ lɛ, ni ji kitãi fɛɛ ni Mose, Yehowa tsulɔ lɛ wo amɛ lɛ mli.+ Amɛbooo toi, ni amɛyeee nɔ hu. 13  Yɛ Maŋtsɛ Hezekia nɔyeli afi ni ji 14 lɛ nɔ lɛ, Asiria maŋtsɛ Senakerib+ kwɔ kɛba ni ekɛ Yuda maji fɛɛ ni atswa gbogboi awo amɛhe lɛ bawu, ni eŋɔ amɛ.+ 14  No hewɔ lɛ, Yuda maŋtsɛ Hezekia tsu ayakɛɛ Asiria maŋtsɛ lɛ yɛ Lakish akɛ: “Mitɔ̃. Okɛ mi akabawu, ni mahã bo nɔ fɛɛ nɔ ni obaabi mi.” Asiria maŋtsɛ lɛ bi ni Yuda maŋtsɛ Hezekia ahã lɛ jwiɛtɛi talɛntai* 300 kɛ shika tsuru talɛntai 30. 15  No hewɔ lɛ, Hezekia kɛ jwiɛtɛi fɛɛ ni ena yɛ Yehowa shĩa lɛ, kɛ maŋtsɛ shĩa nitoohei lɛ hã.+ 16  Nakai be lɛ mli lɛ, Hezekia jie Yehowa sɔlemɔ shĩa lɛ shinai+ lɛ kɛ shinaatsei ni Yuda maŋtsɛ Hezekia diɛŋtsɛ kɛ shika tsuru eha he lɛ,+ ni ekɛhã Asiria maŋtsɛ lɛ. 17  Kɛkɛ ni Asiria maŋtsɛ lɛ tsu Tartan* lɛ, kɛ Rabsaris* lɛ, kɛ Rabshake* lɛ kɛ asraafoi babaoo kɛjɛ Lakish+ kɛtee Maŋtsɛ Hezekia ŋɔɔ yɛ Yerusalem.+ Amɛkwɔ kɛtee Yerusalem, ni amɛyadamɔ ŋwɛigbɛ kpaakpo lɛ gɔɔta lɛ, ni yɔɔ gbɛ ni yaa niiahefɔlɔi ashikpɔŋ lɛ nɔ lɛ masɛi lɛ he.+ 18  Be ni amɛtsɛ maŋtsɛ lɛ koni eje kpo kɛba lɛ, Eliakim,+ Hilkia binuu lɛ, ni ji mɔ ni kwɛɔ maŋtsɛ shĩa lɛ nɔ lɛ, kɛ Shebna,+ ni ji woloŋmalɔ lɛ, kɛ Yoa, Asaf binuu lɛ, ni ji saji aŋmalalɔ lɛ, je kpo kɛba ni amɛkɛ amɛ bakpe. 19  No hewɔ lɛ, Rabshake* lɛ kɛɛ amɛ akɛ: “Nyɛfainɛ, nyɛkɛa Hezekia akɛ, ‘Nɔ ni maŋtsɛ kpeteŋkpele lɛ, ni ji Asiria maŋtsɛ lɛ kɛɛ nɛ: “Mɛni nɔ kwraa okɛ ohiɛ efɔ̃?+ 20  Okɛɔ akɛ, ‘Mile bɔ ni awuɔ ta, ni miyɛ hewalɛ hu,’ shi owiemɔi lɛ naafuu wiemɔi kɛkɛ ni. Namɔ nɔ okɛ ohiɛ efɔ̃ hewɔ ni otse mihiɛ atua lɛ?+ 21  Naa! Okɛ ohiɛ efɔ̃ Ejipt, ni tamɔ gãlã ni eku etã nɛɛ nɔ,+ nɔ ni kɛ́ mɔ ko yakpasa lɛ, ebaagbu edɛŋ kɛje kpo lɛ. Nɛkɛ ji bɔ ni Farao, Ejipt maŋtsɛ lɛ ji kɛhã mɛi fɛɛ ni kɛ amɛhiɛ fɔ̃ɔ enɔ lɛ. 22  Ni kɛ́ okɛɛ mi akɛ, ‘Wɔkɛ wɔhiɛ efɔ̃ Yehowa, wɔ-Nyɔŋmɔ lɛ nɔ’+ lɛ, ani jeee ehei grɔŋŋi kɛ efɔleshaa latɛi lɛ Hezekia jie+ ni ekɛɛ Yuda kɛ Yerusalem akɛ, ‘Nyɛjáa yɛ afɔleshaa latɛ nɛɛ hiɛ yɛ Yerusalem’ lɛ?”’+ 23  No hewɔ lɛ, ofainɛ, jee minuŋtsɔ Asiria maŋtsɛ lɛ ŋwane: Mahã bo okpɔŋɔi 2,000 akɛ obaaná mɛi ni baatara nɔ lo.+ 24  No hewɔ lɛ, ni okɛ ohiɛ efɔ̃ Ejipt nɔ kɛhã shwiilii kɛ okpɔŋɔnɔtaralɔi nɛɛ, te ooofee tɛŋŋ oshwie amralo kome, ni ji minuŋtsɔ tsuji lɛ ateŋ mɔ bibioo kwraa lɛ po lɛ? 25  Ani jeee Yehowa ji mɔ ni tsu mi koni mikwɔ kɛba biɛ ni mibakpãtã maŋ nɛɛ hiɛ? Yehowa diɛŋtsɛ kɛɛ mi akɛ, ‘Kwɔɔ kɛya ni okɛ shikpɔŋ nɛɛ ayawu ni okpãtã ehiɛ.’” 26  Kɛkɛ ni Eliakim, Hilkia binuu lɛ, kɛ Shebna,+ kɛ Yoa kɛɛ Rabshake*+ lɛ akɛ: “Ofainɛ, okɛ otsuji awie yɛ Aramaik* wiemɔ+ mli, ejaakɛ wɔnuɔ shishi; okɛ wɔ akawie yɛ Yudafoi lɛ awiemɔ mli, koni mɛi ni yɔɔ gbogbo lɛ nɔ lɛ akanu.”+ 27  Shi Rabshake* lɛ kɛɛ amɛ akɛ: “Ani nyɛ kɛ nyɛnuŋtsɔ lɛ pɛ ŋɔɔ minuŋtsɔ tsu mi ni mikɛ nyɛ abawie wiemɔi nɛɛ? Ani mɛi ni tara gbogbo lɛ nɔ lɛ hu fataaa he? Nyɛ kɛ amɛ fɛɛ lɛ, mɔ fɛɛ mɔ baaye lɛ diɛŋtsɛ efei, ni ebaanu lɛ diɛŋtsɛ eshamɔ.” 28  Kɛkɛ ni Rabshake* lɛ te shi edamɔ shi ni ebolɔ waa yɛ Yudafoi lɛ awiemɔ lɛ mli ekɛɛ: “Nyɛboa maŋtsɛ kpeteŋkpele lɛ, ni ji Asiria maŋtsɛ lɛ toi.+ 29  Nɔ ni maŋtsɛ lɛ kɛɛ nɛ, ‘Nyɛkahãa Hezekia lakaa nyɛ, ejaakɛ enyɛŋ ejie nyɛ kɛje midɛŋ.+ 30  Ni nyɛkahãa Hezekia lakaa nyɛ ni nyɛkɛ nyɛhiɛ fɔ̃ Yehowa nɔ kɛ wiemɔi nɛɛ akɛ: “Yehowa baajie wɔ kɛ̃, ni akɛ maŋ nɛɛ woŋ Asiria maŋtsɛ lɛ dɛŋ.”+ 31  Nyɛkaboa Hezekia toi, ejaakɛ nɔ ni Asiria maŋtsɛ lɛ kɛɛ nɛ: “Nyɛkɛ mi abakpãtãa, ni nyɛŋmɛa nyɛhe nyɛhãa mi,* ni nyɛteŋ mɔ fɛɛ mɔ baaye lɛ diɛŋtsɛ ewain tso yibii kɛ egbami tso yibii ni ebaanu lɛ diɛŋtsɛ ebu ni akɛtoɔ nu lɛ mli nu, 32  kɛyashi maba ni mabaloo nyɛ kɛya shikpɔŋ ni tamɔ nyɛ diɛŋtsɛ nyɛshikpɔŋ lɛ nɔ,+ shikpɔŋ ni ŋmaa* kɛ wain hee yɔɔ nɔ, shikpɔŋ ni blodo* kɛ wain ŋmɔji yɔɔ nɔ, shikpɔŋ ni oliv tsei kɛ wo yɔɔ nɔ. Ni nyɛbaahi shi ni nyɛgbooo. Nyɛkaboa Hezekia toi, ejaakɛ eelaka nyɛ akɛ, ‘Yehowa baajie wɔ.’ 33  Ani jeŋmaji lɛ anyɔŋmɔi lɛ eko enyɛ ejie eshikpɔŋ lɛ kɛje Asiria maŋtsɛ lɛ dɛŋ? 34  Nɛgbɛ Hamat+ kɛ Arpad nyɔŋmɔi lɛ yɔɔ? Nɛgbɛ Sefarvaim,+ kɛ Hena, kɛ Iva nyɔŋmɔi lɛ yɔɔ? Ani amɛnyɛ amɛjie Samaria kɛje midɛŋ?+ 35  Shikpɔji lɛ anyɔŋmɔi lɛ ateŋ namɔ enyɛ ejie eshikpɔŋ kɛje midɛŋ hewɔ ni Yehowa baajie Yerusalem kɛje midɛŋ lɛ?”’”+ 36  Shi maŋbii lɛ fee diŋŋ ni amɛhãaa lɛ hetoo ko, ejaakɛ maŋtsɛ lɛ efã amɛ akɛ, “Nyɛkafoa edaaŋ.”+ 37  Shi Eliakim, Hilkia binuu lɛ, ni ji mɔ ni kwɛɔ maŋtsɛ shĩa lɛ nɔ lɛ, kɛ Shebna, ni ji woloŋmalɔ lɛ, kɛ Yoa, Asaf binuu lɛ, ni ji saji aŋmalalɔ lɛ ba Hezekia ŋɔɔ, kɛ amɛtadei ni amɛgbála, ni amɛbabɔ lɛ nibii ni Rabshake* lɛ wie lɛ.

Shishigbɛ Niŋmaa

Eji gbɛ́i Abiya ni afo lɛ kuku.
Loo “atsɛɔ lɛ Nehushtan lɛ.”
Ni tsɔɔ akɛ, yɛ he fɛɛ he, he ni mɛi faaa tsɔ yɛ loo he ni mɛi fa waa yɛ.
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Loo “tatsɛ.”
Loo “maŋtsɛ shĩa onukpai lɛ anɔkwɛlɔ.”
Loo “dãawolɔnukpa.”
Loo “dãawolɔnukpa.”
Loo “dãawolɔnukpa.”
Loo “Siria.”
Loo “dãawolɔnukpa.”
Loo “dãawolɔnukpa.”
Hebri sht. ŋm., “Nyɛkɛ mi afea jɔɔmɔ, ni nyɛjea kpo nyɛbaa miŋɔɔ.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “dãawolɔnukpa.”