2 Maŋtsɛmɛi 19:1-37

  • Hezekia tsɔ Yesaia nɔ etao Nyɔŋmɔ dɛŋ yelikɛbuamɔ (1-7)

  • Senakerib wo Yerusalem he gbeyei (8-13)

  • Hezekia sɔlemɔ lɛ (14-19)

  • Yesaia kɛ hetoo ni jɛ Nyɔŋmɔ ŋɔɔ lɛ hã (20-34)

  • Ŋwɛibɔfo ko gbe Asiriabii 185,000 (35-37)

19  Be ni Maŋtsɛ Hezekia nu enɛ nɔŋŋ lɛ, egbála etadei lɛ, ni ebu kpekpe ni etee Yehowa shĩa lɛ.+  Kɛkɛ ni etsu Eliakim, mɔ ni kwɛɔ maŋtsɛ shĩa lɛ nɔ lɛ, kɛ Shebna, woloŋmalɔ lɛ, kɛ osɔfoi lɛ ateŋ onukpai lɛ, ni amɛbumɔ kpekpei kɛtee gbalɔ Yesaia,+ Amoz binuu lɛ ŋɔɔ.  Amɛkɛɛ Yesaia akɛ: “Nɔ ni Hezekia kɛɛ nɛ, ‘Ŋmɛnɛ gbi nɛɛ ji haomɔ gbi, jɛmɔ* gbi, kɛ hiɛshishwiemɔ gbi; ejaakɛ fɔmɔ eshɛ lagbaŋ,* shi hewalɛ ko bɛ ni akɛfɔɔ.+  Aleenɔ Yehowa, o-Nyɔŋmɔ lɛ baanu wiemɔi fɛɛ ni Rabshake* lɛ ewie lɛ, mɔ ni enuŋtsɔ, Asiria maŋtsɛ lɛ tsu lɛ koni ebatswa Nyɔŋmɔ hiɛkãalɔ lɛ mpoa+ lɛ, ni Yehowa, o-Nyɔŋmɔ lɛ baagbala etoi yɛ wiemɔi ni enu lɛ ahewɔ. No hewɔ lɛ, sɔlemɔ+ ohã Nyɔŋmɔ webii ni eshwɛ lɛ.’”  No hewɔ lɛ, Maŋtsɛ Hezekia tsuji lɛ tee Yesaia ŋɔɔ,+  ni Yesaia kɛɛ amɛ akɛ: “Nyɛyakɛa nyɛnuŋtsɔ lɛ akɛ, ‘Nɔ ni Yehowa kɛɛ nɛ: “Nyɛkashea gbeyei+ yɛ wiemɔi ni nyɛnu lɛ ahewɔ, ni ji wiemɔi fɔji ni Asiria maŋtsɛ lɛ sɔɔlɔi lɛ wie amɛshi mi lɛ.+  Naa, mikɛ susumɔ ko miiwo ejwɛŋmɔ mli,* ni ebaanu sane ko he, ni ebaaku esɛɛ kɛya lɛ diɛŋtsɛ eshikpɔŋ lɛ nɔ; ni mahã akɛ klante agbe lɛ yɛ lɛ diɛŋtsɛ eshikpɔŋ lɛ nɔ.”’”+  Be ni Rabshake* lɛ nu akɛ Asiria maŋtsɛ lɛ eshi Lakish+ lɛ, eku esɛɛ kɛtee eŋɔɔ ni eyana lɛ ni eewu eeshi Libna.+  Maŋtsɛ lɛ nu ni aawie yɛ Etiopia maŋtsɛ Tirhaka he akɛ: “Naa, eba koni ebawu eshi bo.” No hewɔ lɛ, etsu mɛi+ kɛtee Hezekia ŋɔɔ ekoŋŋ ekɛɛ: 10  “Nɔ ni nyɛyakɛa Yuda maŋtsɛ Hezekia nɛ, ‘Kaahã o-Nyɔŋmɔ lɛ ni okɛ ohiɛ efɔ̃ enɔ lɛ laka bo akɛ: “Akɛ Yerusalem woŋ Asiria maŋtsɛ lɛ dɛŋ.”+ 11  Naa! Bɛ onu nɔ ni Asiria maŋtsɛmɛi lɛ fee, bɔ ni amɛkpãtã shikpɔji lɛ fɛɛ ahiɛ lɛ he?+ Bo lɛ, ani obaaye ohe? 12  Ani jeŋmaji ni mitsɛmɛi lɛ kpãtã amɛhiɛ lɛ anyɔŋmɔi lɛ nyɛ amɛhere amɛ? Nɛgbɛ Gozan, kɛ Haran,+ kɛ Rezef, kɛ Edenbii ni yɔɔ Tel-asar lɛ yɔɔ? 13  Nɛgbɛ Hamat maŋtsɛ lɛ, kɛ Arpad maŋtsɛ lɛ, kɛ Sefarvaim maji lɛ anɔ maŋtsɛ lɛ, kɛ Hena maŋtsɛ lɛ, kɛ Iva maŋtsɛ lɛ yɔɔ?’”+ 14  Hezekia he woji lɛ yɛ mɛi ni atsu kɛba lɛ adɛŋ ni ekane. Kɛkɛ ni Hezekia kwɔ kɛtee Yehowa shĩa lɛ ni eyagbɛ mli yɛ Yehowa hiɛ.+ 15  Ni Hezekia sɔle+ yɛ Yehowa hiɛ ekɛɛ: “Ao Yehowa, Israel Nyɔŋmɔ, bo mɔ ni ota maŋtsɛ sɛi nɔ yɛ kerubim lɛ anɔ,*+ bo okome too ji anɔkwa Nyɔŋmɔ yɛ shikpɔŋ lɛ nɔ maŋtsɛyelii lɛ fɛɛ anɔ.+ Bo ofee ŋwɛi kɛ shikpɔŋ. 16  Ao Yehowa, ba otoi shi, koni onu!+ Ao Yehowa, gbelemɔ ohiŋmɛii,+ koni ona! Ni onu wiemɔi ni Senakerib kɛtsu kɛba koni ekɛtswa bo, Nyɔŋmɔ hiɛkãalɔ lɛ mpoa lɛ. 17  Yehowa, eji anɔkwale akɛ Asiria maŋtsɛmɛi lɛ ekpãtã jeŋmaji lɛ kɛ amɛshikpɔji lɛ ahiɛ.+ 18  Ni amɛshɛrɛ amɛnyɔŋmɔi lɛ amɛshwie la mli ejaakɛ jeee nyɔŋmɔi diɛŋtsɛ ji amɛ,+ shi moŋ gbɔmɛi aninenaa nitsumɔi ni,+ amɛji tsei kɛ tɛi. No hewɔ ni amɛkpãtã amɛhiɛ lɛ. 19  Shi agbɛnɛ, Ao Yehowa, wɔ-Nyɔŋmɔ, ofainɛ, heremɔ wɔ kɛje edɛŋ, koni shikpɔŋ lɛ nɔ maŋtsɛyelii lɛ fɛɛ aná ale akɛ, bo Yehowa, okome too ji Nyɔŋmɔ.”+ 20  Kɛkɛ ni Yesaia, Amoz binuu lɛ tsu ayakɛɛ Hezekia akɛ: “Nɔ ni Yehowa, Israel Nyɔŋmɔ lɛ kɛɛ nɛ, ‘Minu osɔlemɔ+ ni kɔɔ Asiria maŋtsɛ Senakerib he lɛ.+ 21  Nɔ ni Yehowa ewie eshi lɛ nɛ: “Zion biyoo oblayoo fro lɛ miinyaŋe bo, eeye ohe fɛo. Yerusalem biyoo lɛ miihoso eyitso ni eeŋmɔ bo. 22  Namɔ otswa lɛ mpoa ni owie wiemɔi fɔji oshi lɛ?+ Namɔ owo ogbee nɔ oshi lɛ,+Ni namɔ ogbɛ ohiŋmɛiiaŋ owo lɛ? Ani jeee, Israel Mɔ Krɔŋkrɔŋ lɛ?+ 23  Otsɔ otsuji+ lɛ anɔ otswa Yehowa mpoa+ akɛ,‘Mikɛ mita shwiilii pii lɛBaakwɔ gɔji ni kwɔlɔ,Kɛya Lebanon hei ni yɔɔ shɔŋŋshɔŋŋ lɛ. Mafolɔ etseneduru tsei wuji lɛ, kɛ ejunipa tsei kpakpai lɛ mashwie shi. Mabote ehei ni yɔɔ shɔŋŋ lɛ, ekoo hayii lɛ mli. 24  Matsa nubui, ni manu maŋsɛɛ nui;Mikɛ minanetsitsi baahã Ejipt fai* lɛ fɛɛ agbi.’ 25  Ani onuko? Kɛjɛ blema tɔ̃ɔ mikpɛ mli.*+ Kɛjɛ gbii ni eho lɛ tɔ̃ɔ mito.+ Ni amrɔ nɛɛ, mahã eba mli.+ Obaahã maji ni atswa gbogboi awo amɛhe lɛ atsɔ amaŋfɔ.+ 26  Maji nɛɛ amli bii lɛ ahewalɛ baatã;Amɛtsui baafã ni amɛhiɛ baagboi. Amɛbaatsɔmɔ tamɔ ŋa nɔ jwɛi kɛ jwɛi fɔ,+Kɛ tsuyiteŋ jwɛi ni bokã kɔɔyɔɔ eŋãlã lɛ. 27  Shi mile oshitamɔ, kɛ oyaa kɛ obaa,+Kɛ be ni omli efu mi hu,+ 28  Ejaakɛ omli ni efu+ lɛ kɛ hũumɔ ni ohũɔ lɛ eshɛ mitoiiaŋ.+ No hewɔ lɛ, agbɛnɛ mikɛ mikpoŋ lɛ baawo ogugɔŋ, ni mikɛ mimanyoflɛ+ lɛ baawo odaaŋ,Mahã otsɔ gbɛ ni otsɔ nɔ kɛba lɛ nɔ kɛku osɛɛ kɛya.”+ 29  “‘Enɛ baafee okadi ahã bo:* Afi nɛɛ, nyɛbaaye nibii ni amɛ diɛŋtsɛ amɛkwɛ̃; ni afi ni ji enyɔ lɛ, nyɛbaaye ŋmaa* ni baakwɛ̃ kɛjɛ nomɛi amli lɛ;+ shi afi ni ji etɛ lɛ, nyɛ diɛŋtsɛ nyɛbaadu nii ni nyɛbaakpa, ni nyɛbaafee wain ŋmɔji ni nyɛbaaye amɛmli yibii lɛ.+ 30  Yuda shĩa lɛ mli bii ni baaje mli lɛ, ni ji mɛi ni baashwɛ+ lɛ ashishifã baamɔ shi kɛya shikpɔŋ, ni amɛbaawo yibii yɛ ŋwɛigbɛ. 31  Ejaakɛ mɛi komɛi baashwɛ ni baashi Yerusalem, mɛi ni abaahere amɛyiwala lɛ baashi Zion Gɔŋ lɛ nɔ. Yehowa, taiatsɛ lɛ, baafee enɛ yɛ ehiɛdɔɔ lɛ naa.+ 32  “‘No hewɔ lɛ, nɔ ni Yehowa wie yɛ Asiria maŋtsɛ lɛ he nɛ:+ “Ebaŋ maŋ nɛɛ mli+Ni etsɛŋ gãi kome po kɛbaŋ mliNi ekɛ tsɛŋ hu baŋ jɛmɛNi etswaŋ kpoku kɛwoŋ he hu.+ 33  Gbɛ ni etsɔ nɔ kɛba lɛ, no nɔŋŋ nɔ ebaatsɔ kɛku esɛɛ;Ebaŋ maŋ nɛɛ mli,” Yehowa kɛɛ. 34  “Mafã maŋ nɛɛ he+ ni mahere lɛ yɛ mi diɛŋtsɛ mihewɔ+Kɛ mitsulɔ David hu hewɔ.”’”+ 35  Nakai gbi lɛ nɔ nyɔɔŋ lɛ Yehowa bɔfo je kpo kɛtee ni eyagbe Asiria nsara lɛ mli hii 185,000.+ Be ni mɛi te shi leebi maŋkpa lɛ, amɛna gbohii lɛ fɛɛ.+ 36  No hewɔ lɛ, Asiria maŋtsɛ Senakerib shi jɛmɛ ni eku esɛɛ etee Ninive+ ni eyahi jɛmɛ.+ 37  Ni be ni ekotoɔ enyɔŋmɔ Nisrok yɛ Nisrok jamɔhe* lɛ, lɛ diɛŋtsɛ ebihii Adramelek kɛ Sharezer kɛ klante+ gbe lɛ ni amɛjo foi kɛtee Ararat+ shikpɔŋ lɛ nɔ. Ni ebinuu Esar-hadon+ baye maŋtsɛ yɛ esɛɛ.

Shishigbɛ Niŋmaa

Loo “hiɛkamɔ.”
Loo “ejaakɛ bii lɛ eshɛ lagbaŋ.”
Loo “dãawolɔnukpa.”
Hebri sht. ŋm., “mikɛ mumɔ ko miiwo emli.”
Loo “dãawolɔnukpa.”
Shishitsɔɔmɔi komɛi kɛɔ akɛ, “ateŋ.”
Loo “Nilo lɛ nujɔi ni agbala.”
Hebri sht. ŋm., “mifee.”
Ni ji, Hezekia.
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “sɔlemɔ shĩa.”