Wolo Ni Akɛmaje Romabii Lɛ 12:1-21

  • Nyɛkɛ nyɛgbɔmɔtsei lɛ ahãa akɛ afɔle ni hiɛ kã (1, 2)

  • Dromɔ nikeenii srɔtoi, shi gbɔmɔtso kome (3-8)

  • Anɔkwa Kristofoi ashihilɛ he ŋaawoo (9-21)

12  No hewɔ lɛ, nyɛmimɛi, mikɛ Nyɔŋmɔ musuŋtsɔlɛi lɛ miikpa nyɛ fai akɛ, nyɛkɛ nyɛgbɔmɔtsei+ lɛ ahãa akɛ afɔle ni hiɛ kã, ni yɔɔ krɔŋkrɔŋ,+ ni Nyɔŋmɔ náa he miishɛɛ, ni kɛ́ nyɛfee nakai lɛ, no baatsɔɔ akɛ nyɛmiitsɔ nyɛjwɛŋmɔ nɔ nyɛkɛ sɔɔmɔ krɔŋŋ miihã.+  Ni nyɛkahãa je nɛɛ* shɔ̃a nyɛ dɔŋŋ, shi moŋ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ,+ koni nyɛ diɛŋtsɛ nyɛnyɛ nyɛka nyɛkwɛ ni nyɛyɔse+ nɔ ni ji Nyɔŋmɔ suɔmɔnaa nii kpakpa ni enáa he miishɛɛ ni hi kɛwula shi lɛ.  Ejaakɛ miitsɔ dromɔ ni akɛdro mi lɛ nɔ miikɛɛ nyɛteŋ mɔ fɛɛ mɔ akɛ ekabu ehe tsɔ fe bɔ ni sa akɛ ebuɔ ehe,+ shi moŋ esusu nii ahe bɔ ni baahã ejwɛŋ jogbaŋŋ, yɛ hemɔkɛyeli falɛ ni Nyɔŋmɔ ehã mɔ fɛɛ mɔ lɛ naa.*+  Ejaakɛ tamɔ bɔ ni gbɔmɔtso kome yɔɔ henii pii,+ shi henii lɛ fɛɛ tsuuu nitsumɔ kome lɛ,  nakai nɔŋŋ wɔ hu, eyɛ mli akɛ wɔyi fa moŋ, shi wɔji gbɔmɔtso kome ni kɛ Kristo efee ekome, ni wɔji gbɔmɔtso kome henii ni wɔteŋ mɔ fɛɛ mɔ yeɔ ebuaa mɔ kroko lɛ.+  No hewɔ lɛ, akɛni esoro dromɔ nikeenii ni akɛdro wɔteŋ mɔ fɛɛ mɔ lɛ hewɔ lɛ,+ kɛ́ gbalɛ ni lɛ, nyɛhãa wɔgbaa yɛ hemɔkɛyeli ni asusu ahã wɔ lɛ naa;  ni kɛ́ sɔɔmɔ ni lɛ, nyɛhãa wɔyaa nɔ wɔsɔmɔa; ni mɔ ni tsɔɔ nii lɛ, eya nɔ etsɔɔ nii;+  ni mɔ ni woɔ mɛi hewalɛ lɛ,* eya nɔ ewo mɛi hewalɛ;*+ mɔ ni jaa nii* lɛ, efee kɛ tsui krɔŋŋ;+ mɔ ni kwɛɔ nii anɔ lɛ,* efee lɛ jogbaŋŋ;*+ mɔ ni naa mɔbɔ lɛ, ekɛ miishɛɛ afee.+  Nyɛsuɔmɔ lɛ, osato akahi mli.+ Nyɛhia efɔŋ;+ nyɛkpɛtɛa ekpakpa he. 10  Nyɛjɛa nyɛmimɛi asuɔmɔ mli nyɛsumɔsumɔa nyɛhe. Mɔ fɛɛ mɔ kɛ woo ahã enaanyo klɛŋklɛŋ.*+ 11  Nyɛhiɛ adɔa nyɛnitsumɔ he,* nyɛkafea anihao.*+ Nyɛfea ekãa yɛ mumɔ lɛ naa.+ Nyɛsɔmɔa Yehowa* akɛ nyɔji.+ 12  Nyɛnyaa yɛ hiɛnɔkamɔ lɛ hewɔ. Nyɛfia shi yɛ amanehulu mli.+ Nyɛhiɛa sɔlemɔ mli daa.+ 13  Nyɛkɛ mɛi krɔŋkrɔŋi lɛ ajaa nii ni nyɛyɔɔ lɛ yɛ nɔ ni he hiaa amɛ lɛ naa.+ Nyɛkɔa gbɔfeemɔ gbɛ lɛ.+ 14  Nyɛyaa nɔ nyɛjɔa mɛi ni waa nyɛ yi lɛ;+ nyɛjɔa ni nyɛkalomɔa.+ 15  Nyɛkɛ mɛi ni nyaa lɛ anyaa; nyɛkɛ mɛi ni fóɔ lɛ afóa. 16  Nyɛnaa mɛi krokomɛi tamɔ bɔ ni nyɛnaa nyɛ diɛŋtsɛ nyɛhe lɛ nɔŋŋ;* nyɛkɛ nyɛjwɛŋmɔ akamaa nibii wuji anɔ,* shi moŋ, nyɛtiua nibii ni abuuu amɛ tsɔ lɛ asɛɛ.+ Nyɛkabua nyɛhe hiɛshikalɔi yɛ nyɛ diɛŋtsɛ nyɛhiŋmɛiiaŋ.+ 17  Nyɛkɛ efɔŋ akatoa mɔ ko mɔ ko efɔŋ najiaŋ.+ Nyɛjwɛŋa nii ni hi yɛ mɛi fɛɛ ahiɛ* lɛ nɔ. 18  Kɛ́ ebaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ.+ 19  Mɛi ni asumɔɔ, nyɛkatɔa nyɛ diɛŋtsɛ nyɛhe owele, shi moŋ nyɛshia nyɛhãa mlifu lɛ;*+ ejaakɛ aŋma akɛ: “‘Minɔ ji oweletɔɔ lɛ; mi mato najiaŋ,’ Yehowa* kɛɛ.”+ 20  Shi “kɛ́ hɔmɔ miiye mɔ ni nyɛɔ bo lɛ, hã lɛ nɔ ko eye; kɛ́ kumai miiye lɛ lɛ, hã lɛ nɔ ko enu; ejaakɛ kɛ́ ofee nakai lɛ, oobua ŋai kɛ la naa ooshwie eyiteŋ.”* + 21  Kaahã efɔŋ miiye onɔ kunim, shi moŋ yaa nɔ okɛ ekpakpa aye efɔŋ nɔ kunim.+

Shishigbɛ Niŋmaa

Loo “yinɔ nɛɛ; shihilɛ gbɛjianɔtoo nɛɛ.” Kwɛmɔ Wiemɔi Titrii Amligbalamɔ lɛ.
Loo “yɛ hemɔkɛyeli falɛ ni Nyɔŋmɔ esusu ehã mɔ fɛɛ mɔ lɛ naa.”
Loo “mɔ ni wieɔ tsɔɔ mɛi lɛ.”
Loo “eya nɔ ewie etsɔɔ mɛi.”
Loo “mɔ ni kɛ nii hãa kɛyeɔ ebuaa.”
Loo “mɔ ni nyiɛɔ hiɛ lɛ.”
Loo “ekɛkafee shwɛmɔ.”
Loo “Mɔ fɛɛ mɔ atsɔ hiɛ ekɛ woo ahã enaanyo.”
Loo “Nyɛbɔa nyɛhe mɔdɛŋ; Nyɛfea ekãa.”
Loo “Nyɛkɛ nyɛnitsumɔ akashwɛa.”
Loo “Jwɛŋmɔ ni nyɛhiɛ yɛ nyɛ diɛŋtsɛ nyɛhe lɛ, nyɛnáa nakai jwɛŋmɔ nɔŋŋ yɛ mɛi krokomɛi ahe.”
Loo “nyɛkanáa susumɔi wuji.”
Loo “mɛi fɛɛ asusumɔ naa.”
Ni ji, Nyɔŋmɔ mlifu lɛ.
Ni tsɔɔ akɛ, ebaahã mɔ lɛ he ajɔ ni ebaasere etsuiŋwalɛ lɛ.