Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

Mɛni Hewɔ Esa Akɛ Wɔjie Yehowa Yi?

Mɛni Hewɔ Esa Akɛ Wɔjie Yehowa Yi?

“Haleluya! [Nyɛjiea Yah yi] . . . ejaakɛ eŋɔɔ, ni yijiemɔ sa lɛ!”​—LALA 147:1.

LALAI: 104, 152

1-3. (a) Mɛɛ be mli eeenyɛ efee akɛ aŋma Lala 147 lɛ? (b) Kɛ́ wɔkase Lala 147 lɛ, mɛɛ gbɛ nɔ wɔbaaná he sɛɛ?

BEI pii lɛ, kɛ́ mɔ ko tsu nitsumɔ ko ni akɛwo edɛŋ lɛ jogbaŋŋ, loo eba ejeŋ jogbaŋŋ yɛ shihilɛ ko mli lɛ, wɔjieɔ eyi. Enyiɛ nɔŋŋ ni esaaa akɛ wɔjieɔ Yehowa Nyɔŋmɔ yi! Nibii ni Yehowa ebɔ lɛ hãa wɔnaa akɛ eyɛ hewalɛ waa, ni wɔbaanyɛ wɔjie eyi yɛ enɛ hewɔ. Agbɛnɛ hu, esa yijiemɔ, ejaakɛ esumɔɔ wɔ waa ni ehã e-Bi lɛ bagbo akɛ kpɔmɔnɔ kɛhã wɔ.

2 Mɔ ni ŋma Lala 147 lɛ jie Yehowa yi kɛjɛ etsuiŋ tɔ̃ɔ. Kɛfata he lɛ, ewo mɛi krokomɛi hu hewalɛ ni amɛfata ehe kɛjie Nyɔŋmɔ yi.​—Kanemɔ Lala 147:1, 7, 12.

3 Wɔleee mɔ ni ŋma lala nɛɛ, shi eeenyɛ efee akɛ mɔ lɛ hi shi be ni Yehowa jie Israelbii lɛ kɛjɛ nomŋɔɔ mli yɛ Babilon ni amɛku amɛsɛɛ kɛtee Yerusalem lɛ. (Lala 147:2) Ŋwanejee ko bɛ he akɛ, hegbɛ ni Nyɔŋmɔ webii lɛ ná akɛ, shi kome ekoŋŋ lɛ, amɛbaasɔmɔ anɔkwa Nyɔŋmɔ lɛ yɛ amɛ diɛŋtsɛ amɛshikpɔŋ lɛ nɔ lɛ tsirɛ lɛ ni ejie Yehowa yi. Kɛ̃lɛ, etsɔɔ nibii krokomɛi hu ahewɔ ni esa akɛ ajie Yehowa yi. Mɛni ji nibii nɛɛ? Mɛɛ yiŋtoi ahewɔ bo diɛŋtsɛ hu obaanyɛ obo “Haleluya!” loo ojie Yehowa yi?​—Lala 147:1.

 YEHOWA TSAA MƐI NI TSUII EKUMƆ LƐ

4. Be ni Maŋtsɛ Koresh hã Israelbii lɛ ye amɛhe kɛjɛ nomŋɔɔ mli lɛ, te eeenyɛ efee akɛ amɛnu he amɛhã tɛŋŋ? Ni mɛni hewɔ?

4 Feemɔ bɔ ni Israelbii lɛ nu he amɛhã be ni aŋɔ amɛ nom kɛtee Babilon lɛ he mfoniri okwɛ. Mɛi ni ŋɔ amɛ nom lɛ ye amɛhe fɛo amɛkɛɛ: “Nyɛláa Zion lalai lɛ eko nyɛtsɔa wɔ!” Shi ehiii Yudafoi lɛ lamɔ, ejaakɛ akpãtã Yerusalem, ni ji nɔ titri ni hãa amɛmii shɛɔ amɛhe lɛ hiɛ. (Lala 137:1-3, 6) Ehe bahia ni ashɛje amɛmii ejaakɛ amɛtsuii ekumɔ. Ni nakai Yehowa fee ehã amɛ. Tamɔ bɔ ni ewo shi lɛ, etsɔ Persia maŋtsɛ Koresh nɔ ekpɔ̃ amɛ. Be ni Koresh ye Babilon nɔ kunim lɛ, ewie akɛ: “Yehowa . . . efã mi akɛ miyama shĩa mihã lɛ yɛ Yerusalem . . . Emaŋbii lɛ ateŋ mɔ fɛɛ mɔ ni yɔɔ nyɛteŋ lɛ, Yehowa, e-Nyɔŋmɔ lɛ, afata ehe ni efã kɛya.” (2 Kron. 36:23) Kwɛ bɔ ni enɛ shɛje Israelbii ni yɔɔ Babilon lɛ amii ehã!

5. Mɛni lalatsɛ lɛ wie akɛ Yehowa feɔ ehãa wɔ?

5 Yehowa shɛje Israel maŋ muu lɛ fɛɛ mii, shi ekɛwaaa jɛmɛ. Eshɛje aŋkroaŋkroi ni yɔɔ maŋ lɛ mli lɛ hu amii. Nakai nɔŋŋ efeɔ ehãa wɔ ŋmɛnɛ. Lalatsɛ lɛ wie yɛ Nyɔŋmɔ he akɛ: “Etsaa mɛi ni amɛtsuii ekumɔ lɛ, ni efimɔɔ amɛpilamɔi lɛ anɔ.” (Lala 147:3) Yɛ wɔhelai kɛ haomɔi fɛɛ amli lɛ, Yehowa hiɛ kpaaa wɔnɔ. Yehowa yɛ he miishɛɛ waa akɛ ebaashɛje wɔmii ni ewo wɔ hewalɛ kɛ́ wɔtsui kumɔ. (Lala 34:19; Yes. 57:15) Eduroɔ wɔ hiɛshikamɔ kɛ hewalɛ koni wɔnyɛ wɔkpee naagbai fɛɛ ni wɔkɛkpeɔ yɛ shihilɛ mli lɛ anaa.​—Yak. 1:5.

6. Mɛɛ gbɛ nɔ wɔnáa nɔ ni lalatsɛ lɛ wie yɛ Lala 147:4 lɛ he sɛɛ? (Kwɛmɔ mfoniri ni yɔɔ nikasemɔ lɛ shishijee lɛ.)

6 Enɛ sɛɛ lɛ, lalatsɛ lɛ kwɛ ŋwɛi ni ewie yɛ Yehowa he akɛ, “etsɔɔ ŋulamii ayibɔ,” ni “ekɛ amɛteŋ mɔ fɛɛ mɔ gbɛ́i tsɛɔ lɛ.” (Lala 147:4) Shi mɛni hewɔ lalatsɛ lɛ wie ŋulamii lɛ ahe lɛ? Ekã shi faŋŋ akɛ, lalatsɛ lɛ nyɛ ena ŋulamii lɛ, shi akɛni ebɛ shwɛde hewɔ lɛ, eleee akɛ ŋulamii lɛ ayi fa kwraa fe nɔ ni ehiŋmɛii naa lɛ. Ŋmɛnɛ lɛ, jeŋ shikpalɔi ehã wɔle akɛ ŋulamii ayi fa waa diɛŋtsɛ. Amɛbuɔ akɔntaa akɛ, yɛ ŋulami kusha, ni atsɛɔ lɛ Milky Way lɛ pɛ mli lɛ, ayɛ ŋulamii akpekpe toi akpei abɔ. Ni mɛi komɛi kɛɔ akɛ ayɛ ŋulami kushai akpekpe toi akpekpei abɔ yɛ ŋwɛiniiaŋ! No hewɔ lɛ, mɛɛ adesa baanyɛ atsɔɔ ŋulamii abɔ ni yɔɔ ŋwɛi? Mɔ ko kwraa bɛ! Shi mɔ ni bɔ ŋulamii lɛ le amɛyibɔ. Anɔkwa, ele ŋulamii lɛ eko fɛɛ eko jogbaŋŋ aahu akɛ, ehã amɛ fɛɛ gbɛ́i. (1 Kor. 15:41) Kɛ́ Nyɔŋmɔ le ŋulamii lɛ eko fɛɛ eko jogbaŋŋ nɛkɛ lɛ, ani enyɛŋ ele adesai ni yɔɔ shikpɔŋ lɛ nɔ lɛ ateŋ mɔ fɛɛ mɔ jogbaŋŋ? Be fɛɛ be lɛ, ele he ni wɔteŋ mɔ fɛɛ mɔ yɔɔ, bɔ ni wɔnuɔ he wɔhãa diɛŋtsɛ, kɛ nɔ tuuntu ni he hiaa wɔ!

7, 8. (a) Mɛni Yehowa le yɛ wɔhe? (b) Gbaa niiashikpamɔ ko ni hãa wɔnaa akɛ Yehowa musuŋ tsɔɔ lɛ yɛ wɔhewɔ.

7 Yehowa nuɔ wɔ shishi. Ele naagbai fɛɛ ni wɔteŋ mɔ fɛɛ mɔ kɛkpeɔ, ni eyɛ hewalɛ ni ebaanyɛ ekɛye ebua wɔ ni wɔnyɛ wɔkpee naa. (Kanemɔ Lala 147:5.) Bei komɛi lɛ, wɔnuɔ he akɛ wɔnyɛɛɛ dɔŋŋ, ejaakɛ wɔnaagbai lɛ fa fe wɔ. Shi Nyɔŋmɔ le he ni wɔhewalɛ yawaa, ni “ekaiɔ akɛ sũ kɛkɛ ji wɔ.” (Lala 103:14) Akɛni wɔyeee emuu hewɔ lɛ, wɔtɔ̃ɔ tɔmɔi kome too lɛ nɔŋŋ shii abɔ. Akɛ nɔkwɛmɔnɔ lɛ, wɔwieɔ nibii komɛi, kɛkɛ lɛ, sɛɛ mli lɛ wɔshwa wɔhe. Wɔshweɔ nibii komɛi ni wɔ diɛŋtsɛ wɔle akɛ ehiii, ni wɔhiɛ kɔ̃ɔ mɛi krokomɛi ahegbɛi kɛ amɛnibii anɔ. Enɛɛmɛi fɛɛ haoɔ wɔ waa diɛŋtsɛ. Yehowa tɔ̃ɔɔ, ni kɛ̃lɛ, ele bɔ ni wɔhaoɔ waa yɛ wɔtɔmɔi lɛ ahewɔ lɛ jogbaŋŋ, ejaakɛ ejwɛŋmɔ mli kwɔ!​—Yes. 40:28.

 8 Ani okaiɔ be ko ni Yehowa kɛ enine ni wa lɛ ye ebua bo yɛ kaa ko mli? (Yes. 41:10, 13) Nyɛmi yoo gbɛgbalɔ ko ni atsɛɔ lɛ Kyoko lɛ niiashikpamɔ nɛ. Be ko be ni efã kɛtee asafo kroko mli lɛ, emiishɛɛ fɛɛ tã. Mɛni Yehowa fee kɛtsɔɔ akɛ ele naagbai ni Kyoko kɛkpeɔ lɛ ni enuɔ lɛ shishi? Nyɛmimɛi ni yɔɔ esafo hee lɛ mli lɛ ateŋ mɛi babaoo tsɔ amɛwiemɔ kɛ amɛnifeemɔ nɔ amɛhã ena akɛ amɛnuɔ lɛ shishi. Ewie akɛ enu he tamɔ nɔ ni Yehowa miikɛɛ lɛ akɛ: “Misumɔɔ bo, jeee yɛ gbɛgbalɔ ni oji lɛ pɛ kɛkɛ hewɔ, shi moŋ akɛni oji mibiyoo ni ojɔɔ ohe nɔ ohã mi lɛ hu hewɔ. Miisumɔ ni oná miishɛɛ, ejaakɛ ofata mi-Dasefoi lɛ ahe!” Mɛni Ofe lɛ efee yɛ oshihilɛ mli ni ehã ona faŋŋ akɛ, enuɔ bo shishi ni ‘enilee lɛ aleee naa’?

YEHOWA DUROƆ WƆ WƆHIAMƆ NII

9, 10. Mɛni ji nɔ klɛŋklɛŋ ni Yehowa tsuɔ he nii ehãa wɔ kɛ́ yelikɛbuamɔ he miihia wɔ? Okɛ enɛ he nɔkwɛmɔnɔ ahã.

9 Nibii tamɔ niyenii, atade, kɛ wɔɔhe he miihia wɔ fɛɛ. Eeenyɛ efee akɛ, bei komɛi lɛ, oyeɔ otsui yɛ nɔ ni obaaye hewɔ. Shi Yehowa bɔ shikpɔŋ lɛ bɔ ni ebaaba nii koni mɔ fɛɛ mɔ aná eko eye. Ehãa “kwaakwaalabitebii ní bolɔɔ” lɛ po amɛdaaŋ ŋmaa! (Kanemɔ Lala 147:8, 9.) Yehowa baaya nɔ elɛ kwaakwaalabitei lɛ, no hewɔ lɛ ná nɔmimaa akɛ, ebaaya nɔ eduro bo hu oheloonaa hiamɔ nii.​—Lala 37:25.

10 Shi nɔ ko yɛ ni Yehowa feɔ ni he miihia kwraa fe ni ebaahã wɔ wɔheloonaa hiamɔ nii. No ji akɛ, eyeɔ ebuaa wɔ koni wɔhemɔkɛyeli lɛ mli awa ni wɔná “Nyɔŋmɔ toiŋjɔlɛ ni fe niiashishinumɔi fɛɛ lɛ.” (Fil. 4:6, 7) Nyɛmi nuu ko ni atsɛɔ lɛ Mutsuo lɛ kɛ eŋa ná enɛ mli niiashikpamɔ. Be ni shikpɔŋ lɛ hoso waa ni efã ŋshɔ lɛ kɛba Japan maŋ lɛ mli yɛ afi 2011 lɛ, amɛwala yaje oshara mli. Anɔkwa, eji jeee ni amɛkwɔ kɛtee amɛtsũ lɛ yiteŋ kulɛ, amɛgboi. Amɛnibii fɛɛ ahiɛ kpãtã. Nakai gbɛkɛ lɛ, amɛwɔ fɛ̃i lɛ mli yɛ tsũ ko ni yɔɔ amɛŋwɛi tsũ lɛ nɔ lɛ mli. Be ni je tsɛre lɛ, amɛtao nɔ ko ni amɛbaanyɛ amɛkane kɛwo amɛhe hewalɛ. Wolo pɛ ni amɛná ji 2006 Yearbook of Jehovah’s Witnesses lɛ. Be ni Mutsuo hiɛ wolo lɛ mli kwɛmɔ lɛ, ena saneyitso ko ni kɛɛ, “The Deadliest Tsunamis Ever Recorded.” Ekɔɔ shikpɔŋhosomɔ ko ni ba yɛ maŋ ko ni atsɛɔ lɛ Sumatra lɛ nɔ yɛ afi 2004 lɛ he. Shikpɔŋhosomɔ nɛɛ fã ŋshɔ lɛ kɛba maŋ lɛ mli ni ekpãtã nibii ahiɛ waa bɔ ni anako enɔ pɛŋ yɛ yinɔsane mli. Mutsuo kɛ eŋa lɛ fo be ni amɛkaneɔ nyɛmimɛi ni yɔɔ jɛmɛ lɛ aniiashikpamɔi lɛ. Amɛnu he akɛ Yehowa susuɔ amɛhe waa, ejaakɛ ehã amɛ nɔ ko ni baawo amɛ hewalɛ yɛ shihilɛ ni amɛyaje mli lɛ mli. Yehowa jɛ suɔmɔ mli etsɔ amɛnyɛmimɛi Kristofoi lɛ anɔ ehã amɛ amɛheloonaa hiamɔ nii hu. Shi nɔ ni wo amɛ hewalɛ fe fɛɛ ji akɛ, Nyɔŋmɔ gbɛjianɔtoo lɛ tsu mɛi koni amɛbasara amɛsafo lɛ. Mutsuo wie akɛ: “Minu he tamɔ nɔ ni Yehowa ta wɔteŋ mɔ fɛɛ mɔ masɛi tuuntu ni eekwɛ wɔ. Enɛ shɛje mimii waa!” Nyɔŋmɔ duroɔ wɔ nibii ni baahã wɔhemɔkɛyeli lɛ mli awa lɛ klɛŋklɛŋ, ni no sɛɛ lɛ, etsuɔ wɔheloonaa hiamɔ nii hu ahe nii ehãa wɔ.

HÃ NYƆŊMƆ AYE ABUA BO

11. Kɛ́ wɔmiisumɔ ni Nyɔŋmɔ aye abua wɔ lɛ, mɛni esa ni wɔfee?

11 Yehowa efee klalo be fɛɛ be akɛ ebaaye ebua “nɔnalɔi.” (Lala 147:6a) Kɛ́ wɔmiitao ni eye ebua wɔ lɛ, mɛni ebiɔ ni wɔfee? Esa akɛ wɔhã wekukpaa kpakpa ahi wɔ kɛ lɛ teŋ, ni ja wɔba wɔhe shi dani wɔbaanyɛ wɔfee nakai. (Zef. 2:3) Mɛi ni baa amɛhe shi lɛ toɔ amɛtsui shi amɛmɛɔ Nyɔŋmɔ koni eye amɛsane ehã amɛ ni ehã amɛnɔnai fɛɛ asɛɛ afo. Yehowa náa heshibalɔi ahe miishɛɛ waa.

12, 13. (a) Kɛ́ wɔmiitao ni Nyɔŋmɔ aye abua wɔ lɛ, mɛɛ nibii ahe esa akɛ wɔtsi wɔhe kɛje? (b) Namɛi ahe Yehowa mii shɛɔ?

 12 Ni “mɛi fɔji” lɛ hu? Lalatsɛ lɛ kɛɛ Nyɔŋmɔ ‘tsirɛɔ amɛ etswiaa shi.’ (Lala 147:6b) Wɔteŋ mɔ ko mɔ ko sumɔŋ ni enɛ aba enɔ! Kɛ́ wɔsumɔɔɔ ni Yehowa mli fuɔ wɔ, shi moŋ, wɔmiisumɔ ni ejie suɔmɔ ni tsakeee kpo etsɔɔ wɔ lɛ, belɛ, esa akɛ wɔnyɛ nibii fɛɛ ni enyɛɔ. (Lala 97:10) Nibii nɛɛ ateŋ ekome ji, bɔlɛnamɔ jeŋba sha. Dani wɔbaanyɛ wɔnyɛ jeŋba sha lɛ, esa akɛ wɔtsi wɔhe kɛje ponografi kɛ nibii krokomɛi fɛɛ ni baanyɛ atsirɛ wɔ ni wɔkɛ wɔhe awo mli lɛ ahe. (Lala 119:37; Mat. 5:28) Ekolɛ wɔnáŋ enɛ feemɔ mlɛo. Shi kɛ́ wɔmia wɔhiɛ lɛ, Yehowa baajɔɔ wɔ.

13 Dani wɔbaanyɛ wɔye omanye yɛ enɛ feemɔ mli lɛ, esa akɛ wɔkɛ wɔhiɛ afɔ̃ Yehowa nɔ, shi jeee wɔ diɛŋtsɛ wɔhe nɔ. Yehowa lɛ, “okpɔŋɔ hewalɛ,” ni ji, nibii ni adesai kɛ amɛhiɛ fɔ̃ɔ nɔ kɛhã yelikɛbuamɔ lɛ, “esaaa ehiɛ.” Nakai nɔŋŋ enáaa “gbɔmɔ shuɔji,” ni ji, nibii ni mɛi susuɔ akɛ nomɛi baanyɛ ahere amɛyiwala lɛ ahe miishɛɛ. (Lala 147:10) Yɛ nɔ najiaŋ ni wɔkɛ wɔhiɛ baafɔ̃ adesai krokomɛi loo wɔ diɛŋtsɛ wɔhe nɔ lɛ, esa akɛ wɔsɔle wɔbi Yehowa dɛŋ yelikɛbuamɔ. Ekɔɔɔ he eko shii abɔ ni wɔbaaya Yehowa hiɛ kɛhã yelikɛbuamɔ lɛ, wɔsane ejeŋ etsine. Emii shɛɔ “mɛi ni sheɔ lɛ gbeyei” kɛ “mɛi ni hiɛ kã emɔbɔnalɛ [loo esuɔmɔ ni tsakeee lɛ] nɔ lɛ” ahe. (Lala 147:11) Yehowa kwaŋ wɔ, ejaakɛ esumɔɔ wɔ; ebaaye ebua wɔ ni wɔye akɔnɔi fɔji anɔ.

14. Mɛɛ nɔmimaa lalatsɛ lɛ ná?

14 Yehowa hãa wɔnáa nɔmimaa akɛ, kɛ́ wɔkɛ naagbai kpe lɛ ebaaye ebua wɔ. Be ni Israelbii lɛ ku amɛsɛɛ kɛba Yerusalem lɛ, lalatsɛ lɛ susu bɔ ni Yehowa yeɔ ebuaa amɛ lɛ he, ni elá akɛ: “Ewaje ogbói lɛ asɛɛ adabaŋi lɛ kpɛŋŋ, ejɔɔ obii ni yɔɔ omli lɛ. Ehãa okpokpai lɛ anɔ jɔɔ.” (Lala 147:13, 14) Ŋwanejee ko bɛ he akɛ, le ni lalatsɛ lɛ le akɛ Nyɔŋmɔ baawaje maŋ lɛ agbói lɛ asɛɛ adabaŋi lɛ hã ená nɔmimaa akɛ Nyɔŋmɔ baabu ewebii lɛ ahe.

Kɛ́ kai ni okɛkpeɔ lɛ hã ohao waa lɛ, mɛɛ gbɛ nɔ Nyɔŋmɔ Wiemɔ lɛ baanyɛ aye abua bo? (Kwɛmɔ kuku 15-17)

15-17. (a) Bei komɛi lɛ, te kai ni wɔkɛkpeɔ lɛ baanyɛ ahã wɔnu he wɔhã tɛŋŋ? Shi mɛɛ gbɛ nɔ Yehowa yeɔ ebuaa wɔ kɛtsɔ e-Wiemɔ lɛ nɔ? (b) Gbaa niiashikpamɔ ko ni hãa wɔnaa akɛ ‘Nyɔŋmɔ wiemɔ lɛ shaa foi oyayaaya.’

15 Naagbai ni okɛkpeɔ yɛ shihilɛ mli lɛ baanyɛ awo bo jwɛŋmɔ. Shi Yehowa baanyɛ aduro bo hiɛshikamɔ koni onyɛ okpee fɛɛ naa. Lalatsɛ lɛ wie yɛ Nyɔŋmɔ he akɛ: “Etsuɔ ekitã kɛbaa shikpɔŋ lɛ nɔ; ewiemɔ lɛ shaa foi oyayaaya.” No sɛɛ lɛ, ewie yɛ Yehowa he akɛ, “ehãa snoo nyɔɔ tamɔ kafɔte; egbɛɔ bɔ́ ni efĩ eshwãa tamɔ lamlu.” Kɛkɛ ni ebi akɛ: “Namɔ aaanyɛ efɛ̃i lɛ naa adamɔ?” Sanebimɔ nɛɛ sɛɛ lɛ, ewie akɛ Yehowa ‘tsuɔ ewiemɔ lɛ, ni ebasereɔ amɛ.’ (Lala 147:15-18) Nyɔŋmɔ yɛ nibii fɛɛ anɔ hewalɛ, ni ehiɛshikamɔ lɛ, anyɛɛɛ shishi ana. Eyɛ bɔ́ ni efĩ kɛ snoo fɛɛ nɔ hewalɛ. No hewɔ lɛ, ani enyɛŋ eye ebua bo ni odamɔ naagbai fɛɛ ni okɛkpeɔ lɛ anaa?

16 Ŋmɛnɛ lɛ, Yehowa tsɔɔ wɔ gbɛ kɛtsɔ e-Wiemɔ, ni ji Biblia lɛ nɔ. “Ewiemɔ lɛ shaa foi oyayaaya” kɛ shishinumɔ lɛ akɛ, Nyɔŋmɔ hãa wɔ gbɛtsɔɔmɔ ni sa yɛ be ni sa mli. Akɛ nɔkwɛmɔnɔ lɛ, kɛ́ wɔkane Biblia lɛ, wɔkase woji ni “nyɔŋ anɔkwafo kɛ hiɛshikalɔ lɛ” kalaa lɛ, wɔkwɛ JW Broadcasting, wɔtee jw.org lɛ nɔ, wɔkɛ asafoŋ onukpai lɛ gba sane, ni wɔkɛ wɔnyɛmimɛi Kristofoi lɛ bɔ lɛ, wɔnáa he sɛɛ waa. (Mat. 24:45) Ani oná niiashikpamɔ ko ni ehã ona akɛ Yehowa hãa wɔ gbɛtsɔɔmɔ ni sa yɛ be ni sa mli?

17 Nyɛmi yoo ko ni atsɛɔ lɛ Simone lɛ ena hewalɛ ni Nyɔŋmɔ Wiemɔ lɛ yɔɔ lɛ yɛ lɛ diɛŋtsɛ eshihilɛ mli. No mli lɛ, enuɔ he  akɛ ehe bɛ sɛɛnamɔ, aahu po akɛ, enu he akɛ Yehowa taooo ehiɛ ena tete. Shi be fɛɛ be ni ebaanu he nakai lɛ, esɔleɔ ekpaa Yehowa fai ni eye ebua lɛ. Kɛfata he lɛ, etee nɔ ekase Biblia lɛ. Ewie akɛ, “Yehowa wajeɔ mi ni etsɔɔ mi gbɛ be fɛɛ be yɛ shihilɛ fɛɛ shihilɛ mli.” Enɛ eye ebua lɛ koni ekanu he akɛ ehe bɛ sɛɛnamɔ ko kwraa.

18. Mɛni hãa onuɔ he akɛ Nyɔŋmɔ sumɔɔ osane? Mɛni ona yɛ oshihilɛ mli ni tsirɛɔ bo ni ojie Yehowa yi?

18 Lalatsɛ lɛ le akɛ, esoro blema Israelbii lɛ kwraa yɛ shikpɔŋ lɛ nɔ maji krokomɛi lɛ fɛɛ ahe. Nyɔŋmɔ ŋɔ amɛ akɛ emaŋ, ni ehã amɛ “ewiemɔ lɛ” kɛ “egbɛnai kɛ ekojomɔi lɛ.” (Kanemɔ Lala 147:19, 20.) Ŋmɛnɛ lɛ, Yehowa ewo wɔ hu wɔhiɛ nyam waa; ekɛ egbɛ́i lɛ efɔ̃ wɔnɔ. Wɔbale Yehowa, ni wɔkɛ e-Wiemɔ lɛ tsuɔ nii yɛ wɔshihilɛ mli. Kɛfata he lɛ, wekukpaa kpakpa yɛ wɔ kɛ lɛ teŋ. Tamɔ mɔ ni ŋma Lala 147 lɛ, wɔ hu wɔyɛ yiŋtoi kpakpai pii ni wɔbaanyɛ wɔdamɔ nɔ wɔjie Yehowa yi ni wɔwo mɛi krokomɛi hu hewalɛ ni amɛkɛ gbee ni wa abo akɛ, “Haleluya!”