E Veisautaki Iko Tiko ga na iVolatabu?
“Me veisautaki na nomuni itovo ni vakavoui na nomuni vakasama.”—ROMA 12:2.
SERE: 61, 52
1-3. (a) Na veisau cava ena dredre meda cakava nida sa papitaiso? (b) Na taro cava eda rawa ni taroga ni dredre meda veisau? (Raica na imatai ni iyaloyalo.)
DUA na ka nona vinakata o Kelevi [1] me veiwekani kei Jiova ena gauna e sa vulica kina na ka dina. Ia sa dede toka nona veimauilavo, vakatavako, gunu sivia kei na vakayagataki ni wainimategaga. Me rawa ni vakadonui koya na Kalou, ena vinakati me biuta na itovo e beci kina na ivakavuvuli vakaivolatabu qori. E cakava rawa qori ni nuitaki Jiova kei na kaukaua ni nona Vosa volai.—Iper. 4:12.
2 Ni sa papitaiso oti o Kelevi, e se vinakati tiko ga me cakava eso na veisau me rawa ni dua kina na lotu vaKarisito vinaka. (Efeso 4:31, 32) Kena ivakaraitaki, e kidroataka ni dredre vua me lewa vinaka nona dau yalototolo. E tukuna kina: “E dredre sara meu lewa vinaka noqu yalototolo ni vakatauvatani ina ka ca au dau cakava tu e liu!” E veisau rawa ga ena nona masu vagumatua kei na nona dau vulica vinaka na iVolatabu.
3 E levu vei keda e vakataki Kelevi oya nida cakava na veisau lelevu ni bera noda papitaiso me salavata kei na ivakatagedegede ni iVolatabu. Nida sa papitaiso oti, eda raica ni se vinakati meda cakava tiko ga na veiveisau ena noda bula. Vakabibi na veisau lalai, me rawa nida vakatotomuria voleka kina na Kalou kei Karisito. (Efeso 5:1, 2; 1 Pita 2:21) Kena ivakaraitaki, de dua eda raica nida dau vakalelewa, rerevaki ira na tamata, se matau vei keda na kakase se so tale na malumalumu. Vakacava o vakadinadinataka ni dredre mo veisautaka na ivakarau va qori? Ke vaka kina o na rairai lomatarotarotaka, ‘Au sa cakava mai na veisau lelevu, ia cava sa rui dredre kina meu cakava tiko ga na veisau lalai? Cava meu cakava me vakavinakataka tiko ga noqu itovo na iVolatabu?’
KUA NI NAMAKA VAKASIVIA
4. Na cava eda na sega kina ni vakamarautaki Jiova e veigauna?
4 Nida sa kilai Jiova da qai lomani koya, eda na vinakata ga meda vakamarautaki koya mai vu ni lomada. Ia nida sega ni uasivi, eda na sega ni vakamarautaki koya e veigauna. Eda vakataki koya kina na yapositolo o Paula e kaya: “E levu na ka vinaka au via cakava, ia e sega vei au na kaukaua meu cakava kina.”—Roma 7:18; Jeme. 3:2.
5. Na veisau cava eda cakava ni bera na papitaiso, ia ni toso na gauna cava e rawa ni yaco?
5 Ni bera nida lewe ni ivavakoso, eda sa biuta laivi na itovo makawa. (1 Kor. 6:9, 10) Ia eda se sega tiko ga ni uasivi. (Kolo. 3:9, 10) E sega gona ni vinaka meda nanuma nida na sega ni cala nida papitaiso oti, ke da mani dede mada ga ena dina. Ni toso na gauna eda na rairai butucala, basika eso na malumalumu makawa, se sega ni lewa rawa na lomada kei na ka eda galeleta. E rawa ni vakayabaki sara noda sasaga.
6, 7. (a) Nida sega ni uasivi, eda rawa ni veitokani vakacava kei Jiova? (b) Na cava meda kerea kina na veivosoti i Jiova?
6 Eda sega ni uasivi, ia eda se rawa tiko ga ni veiwekani kei Jiova da qai qaravi koya. Dikeva mada qo: Ni vagolei keda o Jiova meda veiwekani kei koya, e kila tiko nida na dau cala ena so na gauna. (Joni 6:44) Ni kila noda itovo kei na ivakarau ni lomada, e kila vinaka na ka sara ga e rawa ni vakaleqai keda. E kila tale ga nida na talaidredre ena so na gauna. Ia e se vinakata ga o Jiova meda nona itokani.
7 E uqeti Jiova na loloma me solia vei keda e dua na isolisoli talei—na isoro ni veivoli i Luvena duabau. (Joni 3:16) Nida cala, da qai kerea na veivosoti i Jiova nida veivutuni, eda nuidei ni na vinaka tale noda veitokani kei koya ena vuku ni ivoli qori. (Roma 7:24, 25; 1 Joni 2:1, 2) Vakacava eda na cata na yaga ni ivoli nida nanuma nida tawasavasava se valavala ca? Sega! Qori e vaka ga noda sega ni via vuluvulu ena wai ni duka na ligada. E vakarautaki tale ga na ivoli ena vukudra na ivalavala ca era veivutuni. Eda sega ni uasivi, ia eda vakavinavinakataka nida rawa ni veitokani kei Jiova ena vuku ni ivoli.—Wilika 1 Timoci 1:15.
8. Na cava meda kua ni vakalecalecava kina noda malumalumu?
8 Eda na sega ni vakalecalecava na noda malumalumu. E sa tukuna vei keda o Jiova na itovo mera muria na nona itokani. (Same 15:1-5) Ke da via toro volekati koya, meda saga sara meda vakatotomuri koya kei Luvena. E okati tale ga kina noda saga meda lewa vinaka noda malumalumu, se meda cavuraka laivi sara ga. Ke da se qai papitaiso wale tiko ga se da sa dede ena dina, meda “vakavinakataki [keda] tiko ga.”—2 Kor. 13:11.
9. Eda kila vakacava nida na rawa ni vakavinakataka tiko ga noda itovo?
9 E vinakati tiko ga na sasaga me rawa nida “vakavinakataki” keda, meda vakaraitaka tale ga “na itovo vou.” E vakadreti ira kina na tacina vakabauta o Paula: “Oni vakavulici moni biuta tani na tamata makawa me vaka na nomuni itovo makawa e sa vakaleqai tu ena nomuni gagadre ca, moni qai vakavoui [tiko ga] ena igu e lewa na nomuni vakarau ni vakasama, ni dodonu moni tokara na tamata vou e buli me vaka na loma ni Kalou e vauci kina na yalodina kei na yalododonu.” (Efeso 4:22-24) Na matavosa ‘vakavoui tiko ga’ e dusia ni na vinakati meda veisautaka wasoma noda itovo. E veivakauqeti qori, nida vakadeitaka kina se mani vakacava na balavu ni noda qaravi Jiova, eda se rawa ni vakavinakataka tiko ga noda itovo. Io, e rawa ni veisautaka tiko ga noda bula na iVolatabu.
VUNA E DREDRE KINA
10. Me salavata kei na Vosa ni Kalou, na cava meda cakava meda toso tiko ga kina? Na taro cava e basika?
10 E bibi na sasaga ke da vinakata me veisautaki keda tiko ga na Vosa ni Kalou. Ia na cava e vinakati kina na sasaga? Ke sa vakalougatataka tiko o Jiova na noda sasaga, sa dodonu ga me rawarawa na noda toso vakayalo se vakaevei? Vakacava e rawa ni raibaleta o Jiova na noda malumalumu meda sega kina ni gumatua ni muria na itovo vakalou?
11-13. Na cava e vinakata kina o Jiova meda saga vagumatua ni vorata noda malumalumu?
11 Eda kila ni tu vei Jiova e levu na kaukaua ke da vakasamataka noda vuravura. Kena ivakaraitaki, dua na ka na levu ni kaukaua e bulia na matanisiga qai caka qori ena veisekodi. E vica ga na kaukaua qori e curuma mai noda maliwalala, e veirauti vinaka na kena katakata kei na rarama me rawa kina na bula e vuravura. (Same 74:16; Aisea 40:26) E marautaka o Jiova me veiraurautaka na kaukaua e solia vei keda na nona dauveiqaravi ke vinakati. (Aisea 40:29) Io, e rawa ni solia na Kalou na kaukaua meda vorata kina noda malumalumu kece qai sega ni vinakati kina na sasaga se meda vuli mai na noda cala. Ia na cava e sega ni cakava kina qori?
12 Sa vakarautaka vei keda o Jiova na iloloma e sega ni vakatauvatani rawa, oya na galala ni vakatulewa. Nida vakatulewataka meda cakava na loma i Jiova da qai sasaga vagumatua, eda sa vakaraitaka tiko na levu ni noda lomani koya kei na noda via vakamarautaki koya. E vakaraitaka tale ga nida tokona nona veiliutaki cecere. E saqata tiko o Setani na dodonu ni veiliutaki cecere i Jiova. Nida yalorawarawa gona da qai saga vagumatua meda tokona na veiliutaki i Jiova, e macala ga ni na talei vua na Tamada vakalomalagi dauloloma. (Jope 2:3-5; Vkai. 27:11) Ia ke vakarawarawataka kece o Jiova na sala meda vakamarautaki koya kina, meda sega ni sasaga vagumatua meda vorata noda malumalumu, ena sega sara ga ni vakaibalebale na noda yalodina kei na tokoni ni nona veiliutaki cecere.
13 E tukuna gona vei keda o Jiova meda ‘sasaga vagumatua’ ke da via vakatotomuria nona itovo. (Wilika 2 Pita 1:5-7; Kolo. 3:12) E vinakata meda sasaga vagumatua meda lewa vinaka noda vakasama kei na lomada. (Roma 8:5; 12:9) Nida cakava qori eda na marau vakalevu nida kila ni se veisautaki keda tiko ga na iVolatabu.
ME VEISAUTAKI IKO TIKO GA NA VOSA NI KALOU
14, 15. Na cava meda cakava meda muria kina na itovo ena marautaka o Jiova? (Raica na kato “ E Veisautaki Ratou na iVolatabu kei na Masu.”)
14 Na cava eda rawa ni cakava meda muria kina na itovo ena vakamarautaki Jiova? Eda na sega ni cakava ga na veiveisau eda nanuma, eda na muria na ivakaro ni Kalou ena Roma 12:2: “Ni kua ni muria na ivakarau ni veika vakavuravura qo, me veisautaki na nomuni itovo ni vakavoui na nomuni vakasama, moni vakadinata kina ni vinaka, e yaga, qai uasivi na loma ni Kalou.” E vakayagataka nona Vosa o Jiova kei na yalona tabu meda kila kina na nona inaki, meda cakava sara, da qai veisautaka noda bula me salavata kei na nona ivakatagedegede. E okati ena noda sasaga na noda dau wilika e veisiga na iVolatabu, na kena vakasamataki vakatitobu, kei na noda masuta na yalo tabu. (Luke 11:13; Kala. 5:22, 23) Nida muria na veidusimaki ni yalo tabu ni Kalou qai salavata noda rai kei na nona Vosa, eda na vakatotomuria kina na nona ivakarau ni vakasama, ivosavosa, kei na nona ivalavala. Ia se vinakati tiko ga meda qaqarauni meda kua ni rawai ina noda malumalumu.—Vkai. 4:23.
E rawa ni yaga na nomu kumuna qai railesuva eso na tikinivolatabu kei na vica na ulutaga mo vorata kina nomu malumalumu (Raica na parakaravu 15)
15 Nida sa wili iVolatabu e veisiga, e bibi tale ga meda vulica vata kei na noda ivola vakaivolatabu, me noda inaki meda vakatotomuria na itovo totoka i Jiova. Era raica eso ni yaga mera kumuna eso na tikinivolatabu, Vale ni Vakatawa se Yadra!, oti mera qai railesuva, vakabibi na ulutaga ena yaga me muri kina na itovo vakalou se na kena vorati na noda malumalumu.
16. Na cava meda kua kina ni yalolailai ke berabera noda toso vakayalo?
16 De dua e berabera noda toso vakayalo, ia meda nanuma tiko ni dau taura na gauna me laurai noda toso. Ena tomani tiko ga na noda bucina na itovo vakalou. E bibi na vosovoso nida saga tiko me veisautaki keda tiko ga na iVolatabu. De dua ena vinakati meda vakavulici keda mada ena muri ni iVolatabu. Ia ni toso na gauna, ke salavata kei na Kalou o Jiova na noda ivakarau ni vakasama kei na noda ivalavala, sa na rawarawa ga na noda vakatotomuri koya.—Same 37:31; Vkai. 23:12; Kala. 5:16, 17.
VAKASAMATAKA NA INUINUI TOTOKA
17. Na ka marautaki cava eda rawa ni nuitaka ke da yalodina vei Jiova?
17 Ena qai yaco ga na gauna meda na qaravi Jiova kina me tawamudu, meda uasivi tale ga. Sa na sega ni dredre tale ena gauna qori meda vakaraitaka na itovo vakalou, ia eda na marautaka tu ga. Ena gauna mada ga qo eda rawa ni sokaloutaka na noda Kalou dauloloma ena vuku ni ivoli. Eda sega ni uasivi, ia eda rawa ni cakava qori ke da saga tiko ga meda vakalaiva na kaukaua ni nona Vosa me veisautaki keda.
18, 19. Eda vakadeitaka vakacava ni rawa ni veisautaki keda tiko ga na iVolatabu?
18 E sasaga vagumatua o Kelevi, e sa cavuti oti mai me lewa vinaka nona dau yalototolo. E vakasamataka vakatitobu na ivakavuvuli vakaivolatabu qai muria sara. E rogoca tale ga nodra ivakasala kei na nodra veivuke na mataveitacini. E taura toka e dua na gauna me qai veisau o Kelevi. Mani yaco sara me dua na dauveiqaravi, sa sivi tale ga qo e 20 na yabaki nona qase ni ivavakoso. Ia e raica ni se bibi tiko ga me qarauna na ka e rawa ni vakamalumalumutaki koya vakayalo.
19 Eda vulica vei Kelevi ni yaga na iVolatabu meda vakavinakataka tiko ga kina noda bula. Meda kua gona ni soro, laiva na Vosa ni Kalou me veisautaki keda tiko ga, meda veiwekani voleka tiko ga kina kei Jiova. (Same 25:14) Nida raica na veivakalougatataki i Jiova ena noda sasaga, eda vakadinadinataka kina ni rawa ni veisautaki keda tiko ga na iVolatabu.—Same 34:8.
^ [1] (parakaravu 1) Sa veisau na yaca.
