iKarua ni Pita 2:1-22

  • Basika na qasenivuli lasu (1-3)

  • Era na lewai dina na qasenivuli lasu (4-10a)

    • Ra kolotaki na agilosi i Tatarusi (4)

    • Waluvu, Sotoma kei Komora (5-7)

  • Nodra ivalavala na qasenivuli lasu (10b-22)

2  Ia ena basika vei ira na tamata ni Kalou eso na parofita lasu, ena basika tale ga vei kemuni eso na qasenivuli lasu.+ Era na kauta lo mai o ira qo na isoqosoqo e veivakarusai ra qai sega ni via kila na kedra itaukei a voli ira,+ era na vakarusai kina vakatotolo.  Kena ikuri, e levu era na muria na nodra ivalavala vakasisila,*+ ena vosavakacacataki kina na sala ni dina.+  Ena nodra kocokoco tale ga era na vakalolomataki kemuni ena vosa ni veivakacalai. Ia ena sega ni bera na yaco ni lewa sa tau makawa tu mai me baleti ira,+ ni se sega ni moce na nodra vakarusai.+  E sega sara ga ni tuvakasuka na Kalou me totogitaki ira na agilosi era a valavala ca,+ ia e kolotaki ira i Tatarusi,*+ e vesuki ira ena sinucodo ena qara butobuto loaloa mera waraka kina na nodra lewai.+  E sega tale ga ni tuvakasuka me totogitaka na vuravura makawa,+ ia e vakabulai Noa, e dauvunautaka na ka dodonu,+ kei na vitu tale+ ena gauna e luvuca kina na vuravura e sega ni doka na Kalou.+  E vukica tale ga na koro o Sotoma kei Komora me dravusa me kedrau itotogi,+ me ivakaraitaki ni ka ena yacovi ira na sega ni doka na Kalou.+  E qai vakabulai Loti+ na turaga yalododonu, ni vakararawataki koya vakalevu na nodra ivalavala vakasisila* na lewenivanua era dau murilomadra—  E vakararawataki koya na turaga yalododonu qo na ivalavala dukadukali e raica, e rogoca ena nona bula vata tiko kei ira e veisiga.  E macala ena ka kece qo ni kila o Jiova* na sala me vakabulai ira kina era qarava na Kalou nira vakatovolei,+ me maroroi ira tale ga na tawayalododonu me yaco mada na siga ni lewa+ mera na qai vakarusai,* 10  vakabibi o ira era vaqarai ira eso tale mera vakadukadukalitaka na yagodra,+ era beca tale ga na veiliutaki.+ Era doudou qai nanumi ira ga, era sega ni rere ni vosavakacacataki ira e vakadonui ira na Kalou. 11  Ia o ira na agilosi, e dina ni levu sara na nodra kaukaua kei na igu, era sega ga ni vosavakacacataki ira nira dokai Jiova.*+ 12  Ia o ira na tagane qo era vaka na manumanu era sega ni vakayalo, era sucu mai mera tobo ra vakamatei nira vosavakacacataka na ka era lecava.+ Era na vakarusai ena nodra ivalavala torosobu. 13  Era vakamavoataki ira ga me isau ni nodra caka ca. Era taleitaka mera vakaceguya na nodra gagadre vakayago+ ena siga. Era vaka na duka kei na ca e veitakavi, era vakacegui ira ena nodra marau vakalialia kei na nodra ivakavuvuli veivakacalai nira kanavata tiko kei kemuni.+ 14  E sinai na matadra ena veibutakoci,+ era sega ni tinia rawa na nodra ivalavala ca, era bacani ira na lomalomarua. Sa vakavulici na lomadra mera kocokoco. Era gone cudruvi. 15  Era biuta na sala dodonu nira vakacalai. Era muria na sala i Pelami+ na luvei Piori, o koya e vinakata na isau ni cakacala, + 16  ia e vunauci ni beca na lawa dodonu.+ E qai vakaseva na sala lialia e sa muria tiko na parofita qo e dua na manumanu dau cakacaka ni vosa vua ena domo ni tamata.+ 17  Era vaka na mataniwai e sa maca kei na o e veikauyaki ena cagi kaukaua, sa tu me nodra na butobuto e loaloa sara.+ 18  Era cavuta na vosa viavialevu e tawayaga, ena gagadre ni yagodra+ kei na nodra ivalavala vakasisila* era bacani ira kina era se qai drovaki ira tiko na daucaka ca.+ 19  Era yalataka na bula galala, ia era bobula tu mada ga ena ka ca.+ Ni dua e rawa e dua tale, sa na bobula vei koya.+ 20  Ke ra sa drovaka na veika dukadukali ni vuravura+ ena nodra kila na ka dina me baleta na Turaga, na iVakabula, o Jisu Karisito, era qai lesuva na ka vata ga ya mera rawai tale kina, ena ca sara na kedra ituvaki e muri e bau vinaka cake e liu.+ 21  E vinaka cake mera a kua ga ni kila na sala ni yalododonu, e ca mera sa kila vinaka ra qai vakanadakuya na ivunau savasava a soli vei ira.+ 22  E sa yacovi ira na ka e kaya na vosa vakaibalebale dina: “Sa lesu tale na koli ina nona lua, sa lai boroboro tale ena soso na vuaka ni sili oti.”+

iVakamacala e ra

Se “nodra ivalavala vakamadua.” Na a·selʹgei·a, e vosa raraba vaKirisi. Raica na iVakamacala ni Vosa.
Se “nodra ivalavala vakamadua.” Na a·selʹgei·a, e vosa raraba vaKirisi. Raica na iVakamacala ni Vosa.
Raica na iKuri A5.
Kir., “muduki.”
Raica na iKuri A5.
Se “nodra ivalavala vakamadua.” Na a·selʹgei·a, e vosa raraba vaKirisi. Raica na iVakamacala ni Vosa.